Strategia da posiziunar las resursas regiunalas
Surselva
Formar communablamein il futur
La concurrenza denter las regiuns crescha. In svilup dallas resursas
economicas cun claras finamiras vegn pli e pli impurtonts. Las vischnauncas grischunas, las regiuns ed il cantun ein perquei s’occupai
pli da rudien cul svilup regiunal tochen igl onn 2030. Representantas
e representants dalla politica e dall’economia vulan mantener e
slargar la Surselva sco regiun attractiva e habla da dumignar il futur.
La strategia da posiziunar las resursas economicas regiunalas representa en tuttas vischnauncas ina gronda part dalla populaziun. Ella
motivescha da daventar activs communablamein e porscha in’ orientaziun tier damondas e decisiuns davart la politica da posiziunament.
lein collaborar
Il spazi economic
funcziunal ei
definius
La Regiun Surselva ha elaborau per sesezza
ina strategia da posiziunar las resursas
regiunalas. El concept territorial dil
Grischun corrispunda la Surselva ad
in spazi d’acziun funcziunal.
Anflar la via anavos
al carschen
Dapi onns stagnescha il turissem en Surselva ed
il diember da pernottaziuns sereducescha. Mo paucas pendicularas ein hablas da far reinvestiziuns.
Menaschis d’albiert cun grondas capacitads sco
ferms cavals che san elaborar e vender sezs ella fiera
turistica mauncan. Plinavon dat ei denter ils purtaders da prestaziuns paucas cooperaziuns ch’ein era
cumpetitivas. La populaziun sereducescha – cun
consequenzas negativas pil svilup dalla regiun: La
sperdita da substanza engreviescha novs impuls per
rinforzar l’economia. Mo cun cuntermesiras efficientas san ins frenar quei trend.
Promover la creaziun
da valur
Mantener e sviluppar la Surselva sco territori attractiv da viver,
habitar e luvrar ch’ei era habels da dumignar il futur: Quei ei
la finamira principala dalla strategia da posiziunar las resursas
regiunalas.
Mesiras concretas migliuran las cundiziuns generalas per iniziativas d’interpresas, ellas mantegnan plazzas da lavur ni promovan
innovaziuns e la creaziun da valur. Pervia dallas cundiziuns generalas natiralas, socialas, economicas e politicas ei la libertad d’agir
limitada. Aschia sto la regiun anflar era egl avegnir siu carschen
economic principalmein el turissem.
Strategia: Seconcentrar sin quater spartas
1. Revitalisar il turissem
Trer neutier dapli carstgauns e cheutras rinforzar ils purtaders da prestaziun dil turissem: Quei ei la strategia che fa il pli grond
effect per mantener plazzas da lavur ed augmentar la creaziun da valur regiunala. La colligiaziun planisada dils territoris da
skis Tujetsch ed Ursera sa dar leutier impuls, medemamein il niev resort da vacanzas Pradas a Breil. Il svilup turistic sedrezza
sin ina collaboraziun rinforzada denter las destinaziuns, cun includer Ursera.
2. Rinforzar la regiun da habitar
Ina fiera da lavur attractiva ed ina aulta qualitad da habitar motiveschan novas habitontas e novs habitonts da secasar
ella regiun. Nova glieud ch’immigrescha reducescha la munconza d’emploiai specialisai – era ordeifer il turissem. Quei
migliurescha il contuorn per survetschs e mistergners. Grazia alla vischinonza tier Cuera dispona la Surselva da bunas
premissas geograficas per sesviluppar sco regiun da habitar.
3. Sviluppar il provediment
Per ch’ei resti ad interpresas ed als tenercasa ina cumpart maximala da gudogn ston ils cuosts pils survetschs publics ed
ils survetschs privats cun caracter da provediturs vegnir minimai. Perquei vegn seconcentrau sin structuras administrativas
optimalas, survetschs publics efficients e sin Glion sco center da distribuziun.
4. Optimar il traffic
Meglieras colligiaziuns da traffic surregiunalas
e regiunalas fuorman premissas per turissem,
mistregn e habitar. Camps d’acziun ein ina megliera
colligiaziun cun Cuera e Turitg sco era ina reit che
colligia ils singuls loghens culs mieds da transport
publics e vias da velo.
volver il fegl
Regiun attractiva
e habla da dumignar il futur
Rinforzar
la regiun
da habitar
revitalisar
il turissem
sviluppar
il provediment
Regiun Surselva
optimar
il traffic
Prender la dretga via
Per saver direger claramein il svilup da posiziunar las resursas regiunalas
han vischnauncas ed acturs a disposiziun mo paucas pusseivladads.
Perquei eis ei impurtont da seconcentrar sin tematicas che las vischnauncas ed ils purtaders da prestaziuns san influenzar sezs. Per la Surselva
predomineschan aschia concepziunalmein las suandontas mesiras:
intensivar la collaboraziun en Surselva
identificar e metter a disposiziun areals per novs menaschis
d’albiert, da survetschs e d’industria
elaborar ina strategia regiunala per rinforzar albierts ed alloschis
sviluppar vinavon il turissem d’unviern
sviluppar vinavon products pil turissem da stad
optimar las cundiziuns structuralas per saver sviluppar las destinaziuns
migliurar las cundiziuns pil liug da habitar
optimar l’avertura regiunala
profitar dils effects dil resort Ursera Swiss Alps
Far pass concrets
Intensivar la collaboraziun
Per saver trer a néz efficientamein ils differents potenzials dalla regiun rinforzein nus la collaboraziun denter las vischnauncas
ed ils territoris parzials.
Identificar ils areals e metter a disposiziun quels
Pil svilup da hotels, projects d’alloschament ni per menaschis industrials mettein nus a disposiziun surfatschas en
loghens adattai.
Rinforzar ils menaschis d’albiert
Tenor nossas forzas sustenin nus interpresas turisticas che san elaborar sezs la fiera – per exempel cun infrastructuras
adattadas ni sch’ellas ein ellas stretgas finanzialas.
Sviluppar vinavon il turissem d’unviern
Nus migliurein la cumpetitivitad dils territoris dil sport da neiv enten renovar ed engrondir ils implonts e cun rinforzar
products supplementars sco p. ex. loipas da cuorsa liunga.
Promover il turissem da stad
Cun novs products entuorn «hike & bike» ni «natira & cultura» augmentein nus las frequenzas dalla stad e contribuin alla
creaziun da valur ella regiun. Nus inscenein il Rein cun sia fontauna e prendein la Ruinaulta sco culissa per novas purschidas,
plinavon sviluppein nus vinavon purschidas entuorn l’Arena tectonica Sardona.
Concentrar la vendita
El svilup ed ella vendita dalla destinaziun concentrein nus las forzas. Ils products d’aulta qualitad dil turissem dalla natira
e cultura colligiein nus pli stretg culla creaziun dallas purschidas dallas grondas destinaziuns.
Render pli attractiv il habitar
Cun in concept elaborein nus las pusseivladads d’agir
per purschidas attractivas da habitar ni pil habitar accumpignau.
Sviluppar il concept da traffic
Ils basegns dil traffic regiunal sco era surregiunal analisein
nus da maniera cumplessiva tschentond prioritads ella
realisaziun.
Profitar dils effects dad Ursera Swiss Alps
La colligiaziun planisada dils territoris da skis denter
Ursera e Mustér Tujetsch dat novs impuls. En in
concept mussein nus il potenzial da sinergias per la
Cadi – ord l’optica digl alloschament ni da wellness
sco era tiel sport da cuorsa liunga el territori da Mustér
tochen sil Pass digl Alpsu.
lein far ei
Realisar la strategia regiunala
Elaborar la strategia
Las presidentas ed ils presidents dallas vischnauncas sco era
las representantas ed ils representants da politica ed economia elaboreschan ensemen cul cantun ina strategia regiunala.
Quella sefocusescha sils secturs centrals, ella muossa finamiras
e puncts centrals e cuntegn mesiras concretas. Tier damondas
davart la politica da posiziunament el territori d’acziun communabel san las autoritads s’orientar vid quella strategia.
Realisar ed adattar la strategia
La Surselva entscheiva a realisar las direcziuns d’acziun e las
mesiras priorisadas. La strategia ei in instrument pil dialog
regiunal davart il svilup da posiziunar las resursas regiunalas.
Mintga dus tochen treis onns examinescha la Regiun la strategia ed adattescha quella tenor basegns.
Ussa essas Vus en roda
Tgei ideas purteis Vus per che la Surselva hagi success?
Vegni cun Vossas ideas concretas – per aschia saver dar niev slontsch al svilup da nossa regiun.
Nus targein tuts vid il medem sughet.
regiun @ surselva.ch
Ulteriuras informaziuns sco era la cumpletta «strategia da posiziunar las resursas ragiunalas» anfleis Vus sut
www.surselva.ch ni www.awt.gr.ch.
La procedura d’elaborar e realisar la strategia da posiziunar las resursas regiunalas ha igl uffeci cantunal d’economia e
turissem (AWT) elaborau ensemen cullas vischnauncas e culla Regiun Surselva, sco era en concordanza cugl uffeci cantunal
per il svilup dil territori (ARE). Il secretariat statal per economia (SECO) sustegn l’iniziativa.
Nus targein vid il medem sughet: 20 vischnauncas en Surselva.