Incumbensa Jakob Cabernard pertuccont
la creaziun d’ina regurdientscha durabla en honur da Carlo Janka
Incumbensa:
Cun Carlo Janka ha surtut Sursaissa, denton era l’entira regiun Surselva, survegniu ina
persunalitad dil mund da sport cun in format unic. Aunc mai ha la Surselva giu in sportist
ch’ei staus il medem mument victur olimpic e victur dil classament general dil cup
mundial. Quei ei bein in motiv da selegrar e da demussar a Carlo Janka, sper il plascher e
l’attaschadadad, era noss’engrazieivladad e nossa renconuschientscha per questas
grondiusas prestaziuns.
Actualmein vegn Carlo Janka per franc festivaus en bia loghens sco superstar, quei ch’ei
nuot auter che endretg. Pertgei negin avon e probablamein era buc aschi spert in suenter
el vegn ad haver in tal mussament da prestaziun. Sia patria pli stretga, Sursaissa, mo era
l’entira Surselva ei loscha e ventireivla dad haver ellas atgnas retschas in sportist aschi
prezius e renomau. «Freude herrscht», schess igl anteriur cusseglier federal Adolf Ogi! Mo
tgei fa la regiun per che quei success fantastic resti era persistents?
Sco regiun turistica cun il sport da skis e da neiv sco purschida principala, fa la Surselva
bein, gie ella ei quasi obligada da dedicar al victur olimpic e victur dil classament general
dil cup mundial Carlo Janka ina regurdientscha durabla. Ella honurescha aschia il sportist a
liunga vesta e profitescha sezza a moda persistenta, qvd. sur biars onns ni schizun decennis
da siu Carlo Janka enconuschents egl entir mund.
Sebasond sin igl artechel 3 dils statuts dalla corporaziun incumbenseschan ils sutsignai la
suprastonza dalla Regiun Surselva da procurar cun mieds adattai ch’il num „Carlo Janka"
resti aunc ditg colligiaus cun la Surselva sco regiun turistica, ch’el mantegni sia muntada
dad oz e che la Surselva sappi profitar en differentas fuormas da quei grondius skiunz. En
cass da basegns eis ei necessari d’installar ina gruppa da lavur sut la direcziun dil schef dil
departament responsabel. Ei vegn spitgau ch’il parlament vegni informaus a temps util
davart las mesiras planisadas e sappi era decider davart ils credits necessaris.
Cabernard Jakob, Sgier Sievi, Fontana Hans Peter, Buchli Simon, Buchli Max, Epp René,
Pally Emil, Caduff Richard, Pfister Adelin, Camathias Toni, Brunold Kevin, Cantieni Roman,
Derungs Gian, Tuor Roger, Caduff Rudolf
Glion, ils 4 da zercladur 2010
0266-2010pr/DB/sb
Glion, ils 20 d’october 2010
0470-2010pr/DB/nc
Incumbensa Jakob Cabernard pertuccont
la creaziun d’ina regurdientscha durabla en honur da Carlo Janka
Risposta dalla suprastonza regiunala:
Ils 4 da zercladur 2010 han Jakob Cabernard e consutsignaders incumbensau la
suprastonza dalla Regiun Surselva da crear ina regurdientscha durabla en honur
da Carlo Janka. Cun mieds adattai duei vegnir procurau persuenter ch’il num
„Carlo Janka“ vegni francaus aunc ditg ella regiun turistica dalla Surselva, che sia
muntada resti e che la Surselva sappi profitar en differentas fuormas da quei
grondius skiunz.
La suprastonza regiunala selegra da cor sur dil success da Carlo Janka ed ha era
exprimiu quei pliras gadas cun surdar ad el premis da renconuschientscha. La suprastonza regiunala va d’accord cugl incumbensader e culs consutsignaders che
Sursaissa e l’entria regiun han survegniu ella persuna da Carlo Janka ina persunalitad da sport da format extraordinari. Igl ei nundispiteivel che Carlo Janka vala
cun sias prestaziuns excellentas sco ferm ambassadur per l’entira Surselva, mo tonaton eis ei da trer en consideraziun en connex cun la creaziun d’ina regurdientscha durabla per quei sportist extraordinari certas damondas da principi che survargan in pulit tec il rom d’ina incumbensa parlamentaria. Ei setracta en quei
connex denter auter co ei vegn valetau prestaziuns extraordinarias en nossa societad, dalla damonda dall’identificaziun cun vischins da nossa regiun cun grond
success, mo era dalla damonda dalla solidaritad vivida enteifer l’entira Surselva e
dalla participaziun dall’entira societad vid il success dil singul. Concret setracta ei
dalla damonda da principi da crear regurdientschas per persunas viventas, dalla
fuorma da tals monuments, digl eventual liug da tals e dils mieds finanzials necessaris persuenter.
Damai che quellas damondas ein buca semplas da rispunder ord optica dalla
suprastonza regiunala pledescha ella per ina gruppa da lavur parlamentaria che
duei consister da treis persunas. Quella duei rispunder cun agid dil schef dil departament responsabel quellas damondas da principi. En quei connex duei vegnir
elaborau criteris co tractar oz ed el futur talas prestaziuns. Exponents extraordinaris
sco Carlo Janka han ina funcziun d’exempel en nossa societad e da quei aspect
duei vegnir teniu quen tier la definiziun dils criteris da prestaziun. Da beneventar
fuss, sche quels criteris savessen vegnir defini en ina clara directiva. Quei proceder
ei insumma buca d’interpretar sco risposta negativa enviers ils giavischs digl incumbensader, mobein duei gidar ad anflar ina via praticabla co agir oz ed el futur en connex cun prestaziuns extraordinarias.
La suprastonza regiunala ei promta d’acceptar l’incumbensa da Jakob Cabernard el senn dallas explicaziuns per gidar aschia a sclarir quellas damondas da
principi co undrar prestaziuns extraordinarias da persunas dalla Regiun Surselva.
Per sclarir quellas damondas propona la suprastonza regiunala da nominar ladinamein suenter l’acceptanza dall’incumbensa ina gruppa da lavur.
-2-