Incumbensa: organ da coordinaziun per defender ils interess en connex cun las reits
d'aulta tensiun.
La suprastonza dalla Regiun Surselva vegn incumbensada da crear ina cumissiun per
defender ils interess dallas vischnauncas e dallas persunas privatas en Surselva en connex
cun las reits d'aulta tensiun.
Argumentaziun:
La Surselva ei tangada da numerusas reits d'aulta tensiun. L'infrastructura ei vegnida
construida a basa da cunvegnas contractualas denter ils possessurs da terren e
l'administratura dalla reit corrispundenta. La sensibilitad dalla societad visavi lingias d'aulta
tensiun el liber ei carschida fermamein ils davos onns. Differentas leschas che pretendan in
pli grond risguard dils basegns dalla natira e dalla populaziun ein entradas en vigur.
En Surselva scrodan proximamein numerusas cunvegnas che ston vegnir contractadas da
niev. Ultra da quei eis ei planisau da construir novas lingias sin ils trassés existents (VFF;
Sargans-Sedrun), era quei pretenda adattaziuns dils contracts. Las vischnauncas e las
persunas privatas pertuccadas en Surselva han probablamein grond interess da menar
communablamein las tractativas concernent il trassé, las indemnisaziuns, etc. cun las
administraturas dallas reits.
Cun crear ina cumissiun duess ei esser pusseivel da tener quen da quels interess. Tut las
vischnauncas e las persunas privatas pertuccadas duessen saver surschar sin basa
voluntaria alla cumissiun las tractativas respectivas. La cumissiun havess era l'incumbensa
d'eruir eventualas midadas d'utilisaziun "taciturnas" – p.ex. installar cabels da fibras da
veider sin las reits d'aulta tensiun – e pretender dall'administratura dalla reit corrispundenta
d'adattar ils contracts resp. las indemnisaziuns.
La finanziaziun dalla cumissiun stuessen ils usufructuaris da quella surprender.
Cantieni Roman, Deplazes Walter, Nay Donat, Berther Pancrazi, Berther Lucrezia, Caduff
Richard, Caduff Rudolf, Camathias Toni, Casty Roman, Columberg Giusep, Fontana Hans
Peter, Gassmann Markus, Maissen Carmelia, Pally Emil, Sgier Sievi, Tuor Roger
Glion, ils 18 da november 2009
Glion, ils 5 da matg 2010
0217-2010pr/DB/nc
Incumbensa Roman Cantieni pertuccont in organ da coordinaziun per proteger ils
interess concernent las reits da tensiun aulta
Risposta dalla suprastonza regiunala:
Ils 18 da november 2009 han Roman Cantieni ed ils consutsignaders incumbensau
la suprastonza dalla Regiun Surselva da crear ina cumissiun per proteger ils interess
dallas vischnauncas e dallas persunas privatas en Surselva concernent las reits da
tensiun aulta.
Tenor art. 40 dils statuts dall’associaziun san gruppas da lavur surcommunalas
vegnir creadas per tractar problems e per sligiar incumbensas. Aschia fuss ei
pusseivel d’incumbensar ina cumissiun speciala per motivs puramein formals.
En quei connex setschenta denton la damonda, sch’ina tala cumissiun fa senn en
vesta dalla legislaziun superiura e sche quei gremi limitass buca l’autonomia
communala. Tenor la lescha davart ils implonts electrics (LIE) ei la construcziun ed
il menaschi da tals implonts suttamess alla survigilonza suprema dalla
Confederaziun. Per construir ni midar tals implonts sto igl Inspectorat federal
d’installaziuns a current ferm, sco autoritad d’approbaziun, acceptar il plan (art.
1618 LIE). Il medem artechel fixescha ch’ei vegnien accordadas cun l’approbaziun
dil plan tut las permissiuns necessarias tenor il dretg federal. Permissiuns e plans
cantunals ein buca necessaris. Plinavon vegn explicau che projects
ch’influenzeschan considerablamein il spazi ed igl ambient pretendien da principi
in plan sectoral tenor la lescha davart la planisaziun dil territori.
En pli ei la suprastonza regiunala dil meini ch’ina tala cumissiun limitass las
cumpetenzas da decider dallas singulas vischnauncas. Sa ni sto la regiun
semischedar els fatgs communals che stipuleschan buc ina delegaziun tenor ils
statuts?
Co reagescha ina vischnaunca pertuccada, sch’ina cumissiun regiunala
semischeida tuttenina en tractativas cun ils proprietaris da lingias da tensiun
aulta? La suprastonza regiunala ei digl avis che quellas tractativas s’audien buca
tier las incumbensas centralas dalla regiun. Plinavon stuess la cumissiun operar
permanentamein, perquei ch’ils contracts cun ils possessurs dallas reits ston buca
vegnir renovai tuts il medem mument. La suprastonza regiunala vul buc
incumbensar cumissiuns sin reserva.
Sch’in agir communabel vegn denton consideraus sco nizeivels e raschuneivels,
duein vischnauncas pertuccadas dil medem trassé da lingias s’unir ad ina gruppa
da lavur surcommunala. Ei dat gia buns exempels che demuossan cun resultats
legreivels che quella collaboraziun funcziunescha bein.
La finala dubeta la suprastonza regiunala che las vischnauncas e persunas
privatas respectivas cedessien lur dretgs concernent las reits da tensiun aulta ad
ina cumissiun regiunala.
Sin fundament da quellas ponderaziuns propona la suprastonza regiunala da
refusar l’incarica Roman Cantieni pertuccont in organ da coordinaziun per
proteger ils interess concernent las reits da tensiun aulta.
-2-