CLUB DEI POETI DIALETTALI DEL LEGNAGHESE
Fondato da Sante Zamboni nel 1979
Presidente Franca Isolan Ramazzotto
POESIE
presentate nella 37° serata
11 Aprile 2015
Teatro Mignon di Porto di Legnago
Serata in onore di
LUCIANA SBAMPATO
Pro manuscripto
1
Comitato formato da:
1997 –1998
Bruno Zanatta
Nando Caltran
Franca Isolan Ramazzotto
1999 al 2001
Presidente:Franca Isolan Ramazzotto
Consiglieri:
Dino Barbieri
Franca Bovolon
Albino Calonego
Sergio Polo
Pasqualina Marin
2002-2003
Presidente: Franca Isolan Ramazzotto
Consiglieri:
Dino Barbieri
Ida Benedetti
Franca Bovolon
Albino Calonego
Sergio Polo
2003-2004
Consiglieri: Idem più Giovanni Boninsegna
2004-2006
Presidente: Franca Isolan Ramazzotto
Consiglieri: Idem più Giovanni Boninsegna
2004-2006
Presidente: Idem
Consiglieri: Idem più Fiorello Stopazzolo
2006-2008
Idem:
2008-2009
Idem più Nicola Chinaglia
Pasqualina Marin
2009- 2012
Presidente: Franca Isolan Ramazzotto
Vice Presidente: Fiorello Stopazzolo
Consiglieri:Idem
Tesoriere: Nicola Chinaglia
2013-2014
Idem
2
ALBO D’ORO DEL CLUB - Poeti ospiti d’onore e festeggiati
Serate tenute a Porto di Legnago
1979 - Ospiti Poeti Veronesi
1980 - Ospiti Poeti Veronesi e Legnaghesi
1981 - Bruno Tosi +
1982 - Angelo Poli +
1983 - Attaro Zamperioli +
1984 - Giovanni Bronzato +
1985 - Gianpaolo Feriani
1986 - Dino Coltro + dec. 2009
1987 - Dino Limoni +
1988 - Olga Ghirlanda
1989 - Ermanno Bianchini +
1990 - Sante Zamboni
1991 - Alfredo Tognetti +
1992 - Lino Ramarro +
1993 - Nando Caltran
1994 - Ernete Vaccai +
1995 - Romana Menegazzi Stragapede
1996 - Luciano Rossi
1997 - Franca Isolan Ramazzotto
1998 - Bruno Zanatta
1999 - Franca Bovolon
2000 - Nerino Tognon e comm.
del Musicista Legnaghese Antonio salieri +
2001 - Alfonso Belluzzo
2002 - Pasqualina Marin
2003 - Fernando Rossi +
2004 - Mites Parladore
2005 - Otello Lonardi
2006 - Giovanni Rocco Mastella
2007 - Achille Frameglia
2008 - Dino Barbieri
2009 - Licia Pesente
2010 - Silvio Tedesco
2011 - Margherita Liliana Soave
2012 - Maria Teresa Venturi Boninsegna
2013 - Lucia Beltrame Menini
2014 - Anna Maria Lavarini
3
ETORE
Etore
l'è el nome del me can,
dispetoso ma no vilan.
El gà du oci da furbeto
e la coa sempre in movimento.
La boca sempre spalancà
e cossì qualche smorsegon
el me lo dà.
Dopo el vien sfregolàrse,
el me vol ben,
el se vol scusare.
DILETTA ROSSI BARBIERI, LEGNAGO
4
EL VOTO
Caminava a testa bassa,
davanti la scola m'ò fermà,
dovéa essare interogà.
Su che la materia
me l'avéa desmentegà
ma pian pian son entrà.
No m'avéa gnancora sentà
che la maestra... “Diletta vien qua!”.
Mì? Par prima?... sarìa scapà!
De colpo tuto m'ò ricordà
e un bel diese me l'ò ciapà.
DILETTA ROSSI BARBIERI, LEGNAGO
5
CIAO NONI
I noni spesso li fémo 'rabiar
ma lòri senpre ne sà perdonàr,
la nona le fole me s'à contàr
co l'acolto me par de xolàr.
Se casco me fo male i zanòci
éla co i so basi me suga i oci.
Se fò i salti so 'l letòn
éla me osa e.. po' la me dà on basòn.
I noni co i zuga co i neodìni
i torna a sentirse oncora butìni,
cossì i veste e i pètena le banbole
metèndoghe capelini e ciàpole.
Cari noni, ve volémo ben co tuo el cor
e gavarì senpre el nostro amor,
par i neodi si' come rose profumà
e noantri i vostri fiori tanto amà!.
Ciao noniii....
ELISABETH ROSSIN, PRESSANA
6
L'OSELIN
Oselìn de la me vigna
dove porti chela pigna?
La porto a che 'l sioròto
che 'l me dà fregole de biscoto,
la porto al Gufo sagio
che 'l me dà del formagio,
lo porto a Zelegachira
che la me dà 'na piuma de l'oselin Lira,
la do a l'Alodola
e de grani me ne dà 'na ciotola,
ghe la do al Bò e a l'Asinelo
par scaldàr el Bambinelo.
Infine la sùpio lassù
parché la porta on basìn a Gesù.
ELISABETH ROSSIN, PRESSANA
7
CALARE
Caminare, corare, sudare,
ginastica a tuto nare,
solo par calare.
Se te ghe disi
magna manco e va laorare
te ris-ci de ciapàre.
I crompa scarpe,
'na tuta de qualità,
dopo la terza setimana
no i ghe la fa.
La colpa l'è sempre
de quei là
che schei no i ghe ne dà,
o pochi.
L'è 'na canzon vecia tramontà
ma lori i se tien tacà.
El tempo che l'è galantomo
el te vole insegnare...
che no serve corare, sudare,
ma laorare.
DINO BARBIERI, LEGNAGO
8
SALGARO E PIOPA
Un salgàro vecio carolà
el ghe dise a 'na piopa
l' vizzìn 'pena piantà:
“Mì son nato tanti ani fa,
no servo più
e presto vegnarò tajà!”.
A la piopa el gà fato pecà,
“Ma te farò ombra e te ciapare fià”.
El salgàro el sbassa 'na rama
e 'na carezza el ghe la fa,
la piopa la gà tremà.
Anca la piopa la s'à piegà
e... i s'à 'brazzà,
co le rame incrosà
e do lagrime jè cascà.
El salgàro de colpo
no l'èra più rugà,
l'èra stà 'pena piantà
e la natura
la gà premià du inamorà
DINO BARBIERI, LEGNAGO
9
ON VENTO CHE VIEN
No l'è par nostalgia
che on bresparo de oze me sconbate
soto la pergola de i giorni
che me resta.
Me piasarìa sentire verso sera
quela che un dì
m'à roversà 'nte 'l brolo de la vita
e m'à insegnà la strada
da ciapare
par caminare drita verso 'l sole.
On vento che vien sù da la canpagna
me rùgola tra i piè odor de viole.
Vorìa che te savessi, tera cara,
quanto che m'è costà nar via dal nial:
catarme pene e paje forestiere
par no morir de stenti e de fadighe.
'Desso te baso e strenzo sora 'l pèto
come se fusse l'ùltima me sera.
LUCIA BELTRAME MENINI, VERONA
10
OZE E SILENZI
Destendo tra le ràpole del tenpo
fissè col ciaparin ne la me mente,
oze e silenzi vissùi da butina:
el nono inpisocà sul caregoto,
el gato inbogonà su le so zate,
la nona che ropeta drio 'l seciaro.
Me fradeleti in corte i ziga forte:
“Mi fago el prete e ti fa el cotarolo!”.
A scola la maestra me zigogna
parché n'ò mia studià le tabeline,
la canpanela sona el so din-dan,
ne la cartela sbate el penarolo.
Se po' mi rumo tra le tante oze
che m'è restà par senpre in te la testa,
ghè quele de butini che ò arlevà,
el s-cioco de chei basi che ogni sera
me spaciugava in facia el picenin.
Ma chel che pi me dìndola in te 'l core
l'è 'l scroco de 'na ciave in te la porta...
E 'desso nel silenzio de la casa
rivivo in lontananza 'sta sequela,
on cìnema che vedo da mi sola
e me conpagna fin che ciapo sòno.
LUCIA BELTRAME MENINI, VERONA
11
LA TERA DE LA BASSA
L'è antica la tera de la bassa.
'Na tera impastada con acua,
sudori e sacrifici de brazzi
par deventar 'na tera bona.
La gà pazienza, la tera de la bassa
la speta el sol, la nebia,
la neve e la pioa...
La gà man larghe,
la tera de la bassa, la ciapa l'acua
che el cel ghe dona,
po' la le basa, la le carezza,
e la le lassa 'ndar ne la val,
zò!...zò!..a sbrogolar nel mar,
par 'scoltar 'na vecia ninanana
e la possa sognar,
de ritornar tra le fadighe e le speranze
de l'antica tera de la bassa.
MARIO BISSOLI, GAZZO VERONESE
12
POETA DE PAESE
Son poeta de paese
senza onori ne pretese.
Me piase zugàr con le parole
anca se i-è po' intorcolade.
No gò fato scole alte
ma zapa, slote e monto vache.
Gò la parlada de la me gente
che ara campi e sparpaia somenze,
o che suda fora casa
senza andar mai in spiagia,
gente che sgàgna la vita
come on pomo agro,
che, guarda caso
stà sempre in zima a l'albaro
e bisogna rampegàr con fadiga
senza scale o asensori.
Gente che se sforza a far quadràr i conti
parché no i gà amici tra i politici
gente però
che no perde la speranza
parché i crede ne la zòca sana
de questa nostra bela Italia.
MARIO BISSOLI, GAZZO VERONESE
13
LE STAJON DE LA VITA
Sentè fianco a fianco mi e me mojère,
strachi, vardèmo la television,
sempre soli par longhe sere intiere,
soli a spetare che passa le stajon.
Vint'ani... l'è passà la Primavera,
e n'è spanìo zincoe fioi in casa,
che l'istà gà maurà da matina a sera
fra on mùcio de stenti, senza bombasa.
Adesso ghémo coalche foja zàla,
coalche magagna rivà in te l'Autuno.
E l'inverno che stà vegnendo avanti
el ne fa sordi co la vista che cala.
In casa gh'è fredo e manca el profumo
dei fioi vegnù grandi ormai 'ndè distanti!
NANDO CALTRAN, LEGNAGO
14
GUSTO: “A LA MENTA “
Da tempo anca la “bio” s'à sentà a tola
cambiando i gusti de tanti 'taliani,
tuto “sà da menta”, da éla sola
la domina el marcà dei gusti strani.
Gò fato, coi saladi, 'na griglia
'na sera in casa mia coi parenti,
i-à magnà tuto, no ghi n'è vanzà,
e iè né ìa, che i gèra contenti.
Invezze mi, che porto la dentiera,
che co 'na polverina la se bloca,
a son restà deluso, che la sera!
A gò finìo col raspeghìn in boca:
la polverina nova, “a la menta”,
la m'à roinà, salado e polenta!
NANDO CALTAN, LEGNAGO
15
A SPASSO
Cavéi bianchi tuti du,
magari co 'l baston,
a brazéto opur par man,
senza pressia, a spasso i va
contàndossela senza idee contrariàr.
Da quaranta, zinquant'ani insieme,
par capirse basta 'n'ocià;
i se vole un ben vero
senza pi' bisogno de dìrselo.
I-é guardo
con la me uda solitudine
e... 'na ponta de rabia,
ma... tra mì e mì
con la tenerezza del cor ghe digo:
“Fin che Signor ve lassa
stè senpre insieme;
dopo...la vita se tasforma
in un gnente senza senso”.
TERESA DONATELLI, ISOLA RIZZA
16
DRIO I VERI
Che la vecéta drio i veri sentà,
pochi denti, bòna vista, bianchi cavéi,
tuto 'l giorno indafarà
con uce, uciaròl, uncineto, corona.
'Na cavàgna de ani su le spale,
ma... de contarli la s'à fermà,
a otantazìncoe l'è 'rivà,
el resto... l'è regalà.
El calendario pì no la segue,
el cambio lire /euro non l'à fato;
i fioi in fotografia nel dì de noze
pì non la sa ci sia.
Un saludo al panetàr, al postin,
a ci la conusse e anca a ci non l'à mai visto;
cossì la se sente 'na s-cianta in conpagnia.
Vecéta senza senza pi' pressia né preocupazion
ogni giorno nòo l'è preciso de ieri,
ma te me acògli senpre con un soriso
e ogni tanto... con la to serenità
te intòni: “Fin che la barca va”.
Canta vecéta, canta,
el canto tuo el mete 'na s-cianta de chiete
anca al cor mio.
TERESA DONATELLI, ISOLA RIZZA
17
LE NOSTRE INFERMIERE
'Na olta, le nostre infermiere
no le gavéa 'na vita 'sì dura,
le 'ndava in pension ancora butine
e a malapena le faséa 'na puntura,
se fa par dir ma..........................
Al dì de anco', in verità le vedo frustade;
le me fa gran pecà:
stipendio de uno, laoro par tri e... via...
agiornamenti a destra e a sinistra,
de qua e de là.
Zà, le sognava 'na bela pension.
Toh! Calchedun gà tirà un gran bel bidon .
Guardo 'ste done in coa... al Patronato:
“Cara me siora, se la vol riposar
ghe toca sicuro la casa impegnar!”.
Eco che alora altre scuse no gh'è.....
avanti, forza!... e laorar
che oltre i sessanta bisogna 'rivar!
E par sopravivar fin a la pension
le bee siropi, le magna boconi...
Disìme voialtri... ma 'sti governanti
ei mia un po'... birboni?!?!?.
RENATA FELIS, GAZZO VERONESE
18
PAR AMOR
Te m'avéi dito: “Ghémo 'l Porto”.
Za me faséa le fantasie de posti da diporto!
Quarant'ani che ghe stemo al Porto,
sì ma quel de Macacari orpo... orpo!
Ma l'amor, se sa, el gà i oci sarè.
A vint'ani du cori, 'na capana... no se vol piassè!.
Così se scominzia l'aventura matrimonial:
del preo, de la stua, del vaso da note
quarcià co un tòco de giornal!
Te me diséi: “Te porto co la rete a passarìne”
'Na bela scusa par farme caminar 'n te le slote
co le me bele scarpetine!
Da la cità piena de comodità
par gòdarse calcossa emo tanto tribulà.
Ne i ani a contar tute 'ste robe, quanto s'à ridù...
ma tornar indrìo ghe sarìa...
ghe sarìa da pensarghe su!!.
RENATA FELIS, GAZZO VERONESE
19
L'ISTA' 2014
No gò ricordi de on istà
come l'an passà.
Coante nugole nar de corsa gò visto
a ciapàrse el posto
par védare temporài che crìa,
tempeste a ponzare la tera
e po', piànzare de compassion.
E on sole gran pitoco
che faséa baèto
e po' se scondéa de colpo
par no èssare visto,
e...el so termometro no ' gà mai misurà
la féera trentaoto!
E, coanta confusion par girare:
strade che paréa fossi,
fossi a rìsigo la tera
parché jè stà strupà.
Insoma, on istà che,
come l'è nà l'è nà!
Di c'èla la colpa?
Ghe saràla oncora l'istà giusta?
Starémo in bona fede
par l'istà del domìlacoìndese!!.
FRANCA ISOLAN RAMAZZOTTO, LEGNAGO
20
LA VITA
La vita
l'è come 'na piantina de rose.
Le raìse jè le nostre passion
che se taca a la tera
e no le pole levarse in alto.
El gambo l'è coel
che ne dà forza de stare in piè...
Le rame jè brazzi vèrti che 'speta
domande, risposte e tanti parché...
Le foje verde jè le nostre speranze
che ne lìga forte
e ne fa alzare i oci al celo...
I spini? I spini jè dolori
che fa patire el nostro io
e coéi che ne stà pì vizzìn....
Le rose spanìe de colori
jè l'amore, la fiama del nostro core,
ma... anca gelosia che brusa 'l zzarvèlo...
Sì, la vita l'è 'na piantina de rose,
se te la curi ben co l'anima de umiltà
la pol darte sodisfazion.
FRANCA ISOLAN RAMAZZOTTO, LEGNAGO
21
VITA DA NONO
Tre volte ne la mia
gh'è stà la to mama.
El me mondo
quando te la strenzi.
Te si' la me vita.
Con tì come
on butìn me sento
on sbresegolìn.
E quando
son stornìo,
ai noni che
no gò visto
penso...
On strucon
“nono fasolon”
de colpo
meto i
piè a tera...
PAOLO LANZA, LEGNAGO
22
AUTUNO
'Na penelà,
colori incantà,
spampanà
nel prà dal vento.
Pien de foje giale
on grande àlbaro.
Vento che vien,
ne la vita.
Te gira el mondo.
Come i me ani
passà en prèssia.
Tempo passà
che mai più tornarà.
'Na vita de primavera brusà.
Vecio striminzìo,
'desso te 'speti
on altro ano.
Come la foja
che pian pian
la se stende
sul prà.
PAOLO LANZA, LEGNAGO
23
VECIO CALENDARIO
L'è pronto 'l calendario novo,
da tacar in bela vista
al posto de quel vecio.
Poro diario de fameja,
'desso 'l to viaio
longo 'n ano l'è finìo.
Un gropo me sera la gola,
vardando quele date
oramai passade, che no serve più.
E mi, sfojo una par una
le to pagine scrimaciade
de date da rispetar, de bolete da pagar,
compleani, aniversari dei vivi
e dei morti, da ricordar.
A olte no ghe staséa tuto
'n te la stessa riga;
apuntamenti co la scola,
co la cesa, co dotori...
e giornade segnade in maiuscolo
de gioie e dolori.
Mi, le sfojo a pian, par no farghe mal.
E... sora 'l calendario novo
giorno dopo giorno,
scriveremo tuto quel
che se g'àvarà da ricordar...
...par no desmentegar.
ANNA MARIA LAVARINI, VERONA
24
LA TO GIACHETA
Massa sanmartini 'n te la me vita
de ti papà ò podù tegner d'aconto
poco o gnente; la foto de fameja,
ti co la mama e noialtri siè fioleti,
'na coronzìna che te m'è regalà
il giorno de la Prima Comunion,
la to carta de identità,
'l to capel de alpin; relichie che mi
co amor tuto ò serasù drento 'na scatola
co balete de carbonina.
Ma la to giacheta de fustagno
quela che te te metéi tuti i giorni
l'ò tegnùa drento a l'armaron
tacà insieme a le me robe,
cosìta gò a portata de man
'l ricordo de ti papà.
Te vedo vegner a casa dal laoro straco,
con le mane e cavéi bianchi de calsìna
che mi co 'l petenin te la tiravo via e
ti te me ciapàvi in brasso
fracàndome la testa sora la to spala
e mi, me perdèa nel profumo de ti,
impregnà 'n te la giacheta.
E 'n te giornade grise come ancò
me vestisso de éla e me la struco
e ghe parlo, come ti te faséi con mi.
ANNA MARIA LAVARINI, VERONA
25
COME BUSI NERI 'N TE L'UNIVERSO
Tuto scuro atorno,
no se vede la fine de la nera galarìa,
incubi e sogni paurosi,
i se perde fra i brassi de 'n sono agità,
sperando che 'l sol diman
no 'l risveja ancora ilusion.
Le speranze brusè su 'n altar pagan,
el vivar 'n grandessa l'è stà facile
sì ma oramai tuto se paga,
come busi neri
giren par l'universo,
magnandose drento.
'Desso se serca la pace,
cambia le stajon, cambia i ani
ma mi no posso mia cambiar,
son come l'ultima foja su 'n albaro,
quando la casca l'è fenìa.
Amor, cor, sentimento,
i se sfanta in te 'na pocia
de palta sporca...
...e naturalmente
'na piera sora...
a la fine, finalmente!
GIUSEPPE LAVARINI, ISOLA RIZZA
26
TE RIDI, MA...
Te fè védar che te ridi,
che te si' contento,
ma drento de ti
el rùzeno te consuma.
El tic tac de 'l reloio
i-è smartelè che te cioca su 'l cor.
Ven ciaro dopo la note,
ma no tuti i vede 'l sol,
a la stessa maniera.
Anca ti come on simioto
te magna la banana che ogni giorno
te passa la vita.
Le telarìne del to sarvel, le ingarbuja i pensieri,
ma ti ridi e scominzia impipàrtene de tuti.
Spera fortemente in te 'l destin,
forsi cambiarà calcossa,
e ti come quel là
no stà vardar in giro,
passa e tira drito!
GIUSEPPE LAVARINI, ISOLA RIZZA
27
LIBERI PENSIER
Sol mar le stele in celo,
d'argento le stende on velo.
La luna inpiza la luceta
e ilumina la marina scureta.
Co spunta l'alba rosata
i colombi inbocan la nidiata.
So la canpagna indormezà
canta el galo e tuti fa svejar.
Quando l'aria el sole scota
soto le ale i pulzìni ciama la cioca.
I canpi de spighe dorà
so le pigne de vento i se fa dondolar.
Mi, “birillo” de 'sta valata
so sbrìndoli celi me fò trasportar:
lasso libera l'anima inbroncià
e tra pajari de stornèi vò a sognar.
PASQUALINA MARIN, PRESSANA
28
AI CARI NONI
La vita ve gà cortegià
tra gràmole de sorisi
o la ve gà spintonà
tra sgrunbià de bisi.
Nei dì velà dal dolor
ve gà iutà la fede del Signor,
se el sentier l'era spinoso
el soriso de on neodin lo faséa radioso.
In te la vita gavì tanto amà
e a la fameja tanto gavì donà
e oncora bate drento el cor
zeste de tanto amor.
Le man xe tremole, nodose
no le xe pì forti e calose.
I corpi i xe curvi e stanchi,
so la testa 'na corona de cavéi bianchi.
Oncò che xe la festa dei Noni
femo 'na grande magia:
voaltri si' tuti Re sentà sui troni,
noantri semo i pageti
che ve festegia co afeto e sinpatia!.
PASQUALINA MARIN, PRESSANA
29
NONI
El lampadario de la tera
smorzàndose pian pian
el sbrìssia zo senpre pi fiaco.
El cupolòn da azuro
'l deventa de veludo blu,
e l'inpizza i primi fiori
che pare oci de diamante.
Jè tanti assè, come la sabia
che incornìsa el mare;
'speta 'n s-cianta, gh'è on buso:
aah... manca le zìncoe steline,
che le fiole le gà pensà ben
de tirar zo, faséndone Noni.
Creature che s'à stanpà nel core
come òpere d'arte e d'amore:
con carezze e con tanto ardore
le ne tira su istà e inverno.
“Nonino, Nonina, siamo qua!”,
e zo tanti bas-eti e strucadine
e scopia on mondo de felicità.
GIOVANNI ROCCO MASTELLA, LEGNAGO
30
A DIO PIAS-ENDO
Mezo balon, color griso rabià,
'l querze el mare, la spiagia,
le prime case e on po' pi in là.
Le onde le rùmega svoltolàndose,
on ventesèlo 'l fis-cia ne le rece.
I gabiani i galégia su l'aria
co le ale ferme in cros-e.
No gh'è pì nessun in giro,
solo on nono e la so veceta
sentà vizzin, come da morosi,
su la sàbia, ancora caldina,
e con on sugamàn su le spale.
Sù, le cros-e le va e le vien,
zo, i ricami spiegazzà su l'acoa,
lori i se sbircia co la coa de l'ocio
girando le pagine del so romanzo:
jè contenti, de la trama e i pensa
de tirarla par le longhe, a Dio pias-endo!
Ai primi gozzòti, che màcia la sàbia,
i se avìa, dindolàndo, verso casa
e con on soriso i se ciàpa par man.
GIOVANNI ROCCO MASTELLA, LEGNAGO
31
NATURA
Amare la natura ne convien,
quel che femo ne vien ricompensà.
Gavéo 'na pianta de cotogno
e in primavera tuta de rosa l'èra infiorà.
In autuno i so fruti i èra bei grassi
e ben impolpà.
Mi felisse me faséo 'na mostarda de prima qualità.
Par ani 'sto ciclo l'è durà
ma un dì la pianta s'à malà,
l'è morta e gh'è restà do brazzi incrosà
ma de cavàrla no ghe gò pensà,
la me faséa pecà parché tanto la me gavéa donà.
La primavera dopo come par magia
sbassando par caso i oci, soto el so tronco
gò catà 'na s-ciocarà de funghi
da restare impapinà.
Ela, par do volte a l'ano la m'à ricompensà.
Questa l'è pura verità.
MITES PARLADORE, MINERBE
32
TELETABIS
Scoltar la musica de 'sti cartoni animati
a 'sta nona ghe vien nostalgia.
Me neodo el se svejàva
a la matina in un supion
el coréa in cusìna meso nudo
par vardare i so carton.
Co la scudeléta de late soto i oci
el pociava i so biscoti,
e par vardare el so conejéto
el fasèa el so pastroceto.
Mi ghe diséa: “Presto Mateo,
el pulmin l'è drìo 'rivàre!,
te si' tuto da cambiare!,
e a l'asilo te gh'è da nare!.
Su, su, 'sto grembialéto,
ghèto el fasoléto?
Nétate el naseto, dame on bel baseto
e fa el bravo mostraiéto!.
MITES PARLADORE, MINERBE
33
BUFERA, PIOVE
Piove... piove... piove...
gozze sempre pì grosse
vie zo dal cel scuro scuro.
Urla el vento de tramontana
i rami scorla de i albari
che i s'intorcola sempre pì.
In prèssia ariva un'onda
de gran fogo: par che tuto
in on momento se brusa.
Mi, sola in casa, impaurìa
me 'rìva 'na s-ciopetà: urlo
ma... subito digo 'na preghiera.
Me calmo e... intanto...
anca 'sta volta la bufera
l'è passà!.
LICIA PESENTE, TERRAZZO
34
IN CESA
A la doménega mì vò
a la cesa de Terrazzo
par 'scoltar la Messa,
dir ben con devozion
tute le me orazion.
'Scoltar el prete
le so prediche da professor,
el so canto da gran tenor.
In te 'l bel mezo de tanta
devozion e predicazion
me trovo a vardar in su.
Circondà da rami verdi,
de bela fruta e gran fiori,
vedo i cassetoni del sofito
con su disegnà e scrito
in tanti bei colori i più
bei simboli de la nostra
cristiana religion.
Vardo incantà e tanto meravejà!.
Gh'è la ciave de San Piero.
El sole, el Vangelo
con in mezo 'na spada.
Signore mio, perdoname,
de pèrdarme a vardar lassù,
de no seguir pi la Messa.
Me ciapa un'emozion...
me par d'essar 'rivà
in te ch'el posto là dove
gran festa sempre se farà!.
LICIA PESENTE, TERRAZZO
35
EL ME NADAL
Ne l'angolo pì fresco de la casa
'na setimana prima de Nadal,
con quatro zoche e 'na sbrancà de paja,
faséa insieme a me nono la capana.
Tre statuine, 'na qualche pegorìna,
un speio roto par far el lagheto,
tante stradine fate de farina,
da gnente nasséa un picolo presepio.
Sul sfondo, no servéa farghe le stele,
ne chel canton le stele, jèra la brina.
E 'rivàva finalmente el dì de Nadal,
gh'èra l'usanza alzarse presto la matina,
un passo davanti a 'naltro e caminar,
andar in cesa par scoltar la messa prima.
A mezodì, se catàino tuti insieme
intorno a 'na gran tàola imbandìa,
preparà con tanta cura da le done,
de poco pì siora de quela de Betleme,
par consumar el pasto che de solene,
nei me ricordi... gavéa apena el nome.
SILVANA PICCHI, MINERBE
36
LA CASA IN DO SON NATA
Ne la casa de campagna in do' son nata,
l'èra la miseria farla da parona.
D'inverno se sentàino intorno al camin
davanti a un fogo de legna che frizéa e,
faséa 'na fiameta che poco la scaldava.
In tun canton me mama la sferuzava,
in te 'nantro me nona filava la lana,
intanto i omeni bevéa goti de vin brulè
zugava a carte e, un po' alterà i ciacolava.
Le done più “giudiziose” le se daséa da far,
le me faséa guanti, calze e fanèle,
me le metéa e no finéa più de gratar,
ma dovéa tasar, parché gh'èra solo quele.
Da la fanèla me ricordo,
vegnéa zo du astichìni
che i era fissà streti a du botoni,
in fondo le ghe fasèa do asoléte,
le servéa par tegnèr su i calzetoni.
Ai piè, le sgiavarete nere bordà de rosso,
jèra sempre de do misure in più,
in ponta, le me metéa la paja
par tegnèrme calda e, parché le stesse su.
Cunzà cussì l'èra fadiga anca caminar,
par tuto el peso che gh'èra da portar.
Però, se gò da dir la verità...
tornarìa in che la casa de campagna
a sentire ancora su la pele la careza,
de la miseria che regnava sovrana...
SILVANA PICCHI, MINERBE
37
LA FORETA
Co se mete la testa
inzìma a la foreta
strachi, nervosi o
pieni de problemi
no gh'è de mejo altra medizina
senza contradizion
par l'armonia.
Ela, come on fiore de bonbaso
l'è pronta 'scoltare
i to pensieri,
le godurie, i progeti, i... dispiaseri.
E la matina – che malinconiate la bandoni lì
senza darghe un baseto.
Oh cara nugoleta piasolina
lo so che te me 'speti a la sera
candida gonfia e neta,
'desso, col dì davanti
in te la zuca
a torna el duro,
ma mi
lo scarabocio in bruta copia,
in bianca e bela par far bona figura
- se capitar dovesse nar de soradame la man.
ROMANO SALGARELLO, LEGNAGO
38
EL NOME DE LE ERBETE
Gò visto i to passi nare ìa
da noaltri ormai cosìta ciàri
a tegnerse tachè a 'sta fregola de tera
anca se inbonbegà de suòre. Avéa
za capìo che te navi a bruasarte
de framezo a castei de ilusion
ma, col gropo in gola no podéa
dirte de stare: t'eri massa ciapà
da in do' i conta no essarghe fadighe
ma slusori e... là te gh'è perdù
el core stesso de le to raìse.
Torna, vorìa mostrarte una par una
le erbete noèle, ciamàndole par nome
come jé mizonémo qua oncora... A',
te vedessi i fiori salvèghi co i sbocia,
quanto jè bei i buti co i se verze!
Ma... te si' lì, imamà drento
a 'sti bussolòti che te mena ia, e
che i spampàna colera 'n ti 'sfalti busiari.
Sèntito mia 'sta ozze che te ciama?
che la gà robe bone, de natura.
Tuto ne vien da éla; a te zigarè
se te la péti; ricordate però che
a la te 'speta, la vol darte el core,
tiente anca in-a mente che
da che l'è mondo nisuni mai
te giuro la gà tradìo!
ROMANO SALGARELLO, LEGNAGO
39
ON FOJO BIANCO
Cala la sera, sparisse el giorno,
me guardo intorno, no so cossa fare,
on fojo bianco 'speta in disparte
ma l'è uda la mente, la man no la parte.
Preparo la tòla par la me zéna
ma l'è oncora presto par 'sto piasere,
guardo i minuti longhi a passare
no cato risorse par el me pensare.
El fojo bianco sempre in disparte,
la television me tien compagnia,
ma tra le fandògne e disastri del mondo
me sento cascare nel scuro profondo.
La man sempre pronta sol telecomando
parché tuto me stufa e gnente me ciapa
fin che la sera la ciama la note
ma con el sòno mì fò sempre a bote.
Intanto decido de nare a dormire,
prima te saro ne i me pensieri
ma se guardo vizzin al me fianco
gò on fojo de carta ch'el resta bianco.
LUCIANA SBAMPATO, LEGNAGO
40
CATERINA
Come on fiore che spunta tra i sassi,
te si' rivà a portar maraveja
come 'na stela che sluse nel celo
te gh'è ravivà on griso sentiero.
Te si' 'na lanterna che segna el passo
quando el scuro lo fa pesante
te porti la musica verso 'sto core
par darghe solievo e anca calore.
Par i me giorni de scarse risorse
te si' la voja de guardare la vita,
l'aria che suga strani pensieri
'na forza che stòfega i dispiaseri.
Quando te vedo vegnèrme incontro
par regalarme on tenero baso
ancora la luce me rìva intorno
te porti vigore drento el giorno.
Po', te sento ciamarme nona,
devento legera come farfala,
se move el corpo lo sento vibrare
e come 'na volta mì torno a volare.
LUCIANA SBAMPATO, LEGNAGO
41
LA RUA DE LA VITA
M'è vegnù in man 'na fotografia de tanti ani fa,
vardàndome gò dito: Varda come so cambià,
par forza, no gh'è pì la gioventù, i ani jè passà,
gh'è rivà i malani e la rua de la vita la và...
parché coésta l'è la vita, 'na rua che va 'torno
che no se pol fermare, gnanca par on giorno.
'Na rua che gira, co le gioie e co i dolori
la te 'compagna fin el giorno che te mori.
Coando te si' contenta, te piase védarla girare
ma coando te si' zò, te la voressi anca fermare
ma te gh'è fameja e fiùi, alora te ghe pensi
cussì te la lassi nare, con fadiga e a stenti.
Ciapàrsela no convien, ciapémola come la vien,
tanto... 'sa se pol fare? Ah, gnente, serve piànzare o zigàre.
Bison torla sù come l'è, e zercar de volerse on poco de ben,
tirare sù el fià, fare on bel soriso alzando la testa,
lassàr che la rua la gira, dire sempre che la vita l'è bela
e............. avanti co la festa!.
MARGHERITA LILIANA SOAVE, RONCO ALL'ADIGE
42
EL POMO DE ADAMO
Coando che Dio el à creà Eva
el gà proà 'na gran sodisfazion
savendo che co Adamo l'è completa
par dare inizio a la generazion.
Però, no 'l gà insegnà come se fa
ma soto a 'na pianta de pomi el la gà sentà,
de no magnare i pomi el gà racomandà,
chi pomi bei... che ghe èra là tacà.
Adamo el vardava entisiasmà 'sta Eva
con che le bele curve al posto giusto,
pensando... “Dio el m'à fato 'na compagna
che solo a vardarla mì ghe cato gusto”.
Ma on bel serpente on dì sora la pianta
el se gustava on pomo tanto belo
diséndoghe a Eva: “Pora santa,
magna 'sto pomo che l'amor l'è belo!”.
El desiderio l'èra tanto forte,
cussì tentà no la à resistìo,
e lì par lì,la gà sfidà la sorte
magnando ch' el bel pomo proibìo.
On toco anca Adamo el l'à magnà,
in prèssia, par paura che Dio lo veda,
sconto dedrìo on figàro el se gà catà
co 'l pomo che so 'l gosso gh'è restà.
Da alora tanti secoli gh'è passà,
de pomi proibìi no ghi n'è pì
ma tanti òmini oncora 'desso i gà
on pomo come Adamo coà ingropà!.
MARGHERITA LILIANA SOAVE, RONCO ALL'ADIGE
43
NONI DE ADESSO
Adesso, con tuto 'sto progresso
a zinquanta ani se deventa noni.
No ghe sarìa gnente de male
se te si' in condizion bone
par dar 'na man ai fioi
che al giorno de ancò
i va tuti a laorare.
Ma gh'è anca el lato belo:
avèrghe un neodìn par casa,
sentire la so vocina,
tegnèrghe streta 'na manina
parché l'impara a caminare.
E se più avanti el tempo
el farà el so dovere
e te trovarè in testa qualche filo
bianco, no importa
e se anca el nostro passo el sarà
straco, la nostra consolazion sarà
de essar ricordà.
GEMMA TOBALDINI, LEGNAGO
44
EL SFRATO
Soto el cornison de la me casa
gh'è du gnari de rondene
un poco dirocà.
Drento ghe abita
un passeroto o useléto.
L'ano passà g'hè cascà i rondenìni
e éle no le s'à più ris-cià tornar.
E l'useléto a ciamar tuto el dì
ne la speranza
che 'na compagna ghe vegna vizzìn.
No gh'è stà verso d'intesa
parchè se sa che el gnaro par lori no l'è lì.
Invezze i omeni i vive in case
ben sicure, de le olte anca blindà.
In 'sti tempi che vivémo
g'avémo tanti forestieri
e i stà in case dirocà,
senza sicurezza par la so incolumità.
Almanco l'useléto el gà le ale
ma l'omo nò.
Cossa fa la socetà par sanare
el sfacelo de la gente sfratà?.
GEMMA TOBALDINI, LEGNAGO
45
VERSO SERA
Quando l'omo el se sente verso sera
l'è tentà de proar malinconia
ma, se 'l fa conto del barlme che ghe resta,
el pol gustarse tuto quel che l'à mucià:
L'esperienza, i raporti con la gente,
i risparmi, se 'l jà fati onestamente,
la salute che 'l se cata oncora in man,
tamisando tuto quanto nando pian.
Po' pì tardi, quando el dì l'è ormai finìo
e la sera lassa el posto a note fonda,
no ghe resta che fidarse del bon Dio
acetando... e sarà quel che sarà!.
SANTE ZAMBONI, LEGNA\GO
46
EL “SIGNORIN” DE MALESINA
Ne la vita padronale, lì in paese,
abitava un certo Pasti, ai tempi mii,
riverìo dai paesani a scapelade
che in lù i saludava el “signorin”
riverisco, riverisco!
Rispondea lù con un “ciao” de suficenza
quasi fusse un gran disturbo scomodarse
e, coi cani che ronzava sempre atorno,
lù, 'l podea nar a zonzo, sicurà.
Paron de tri quarti de paese,
con la tera mandà avanti a mezadria
serve in casa e butele a far la gara
iludendose de poderlo un dì sposar.
E lù”drito”... acetàa le loro grazie,
qualche fiol 'l gà fato far a più de una
ma, viliaco, no l'à fato gnan 'na piega
e a la fine lù l'è morto “signorin”.
Case e campi l'à donà in beneficenza
a la cesa e a conventi qua e là;
de sicuro el pensaa a la Providenza
che ghe desse un posto belo anca de là.
Ma mi credo che, se Dante 'l se n'à incorto,
a l'inferno el l'abia messo de sicuro
parché almanco dopo el salto de 'sto muro
la giustizia finalmente ghe sarà.
SANTE ZAMBONI, LEGNAGO
47
A TUTI I NONI
Cari, son felice
portar 'sta poesia par i noni
parché son nona anca mì.
Quanti ani gh'è passà,
bei, bruti ma mai desmentegà.
Cari, gnente desperarse,
no semo soli nel nostro cor,
tegnémo un tesoro...
Lù l'è un Sapiente,
el sa tuto de la nostra vita.
I ani che segna la testa bianca
no jè mia cavéi ma fili de argento,
i soméa stele filanti.
Sentémose felici
parché semo tuti noni de Gesù
e Lù el ghe vol ben a tuti
specialmente ai noni soli
e quei che sofre.
Semo al primo posto nel So cor.
AGNESE ZORDAN, OPPEANO
48
UN VIAIO MISTERIOSO
Ma 'sto viaio no saémo come 'l sarà,
tuto l'è sorpresa.
Qua su 'sta tera che caminemo
semo solo pelegrini,
ghémo perdonà cì n'à umilià
l'ultimo minuto della nostra vita terena,
el Signore el ne ciama a giudizio.
Lù el sa tuto del nostro tempo che ghémo passà,
se el perdono se l'èmo merità
Dio el ne mete le ale
parché podémo volare come on missile
sbusando le nugole,
entrando in che la luce senza confine.
Là, incontreremo le persone che n'à volù ben,
e mì porto con mì carta e pena
par scrìvare oncora poesia
e tuti me scoltarà....
Questo l'è un viaio senza ritorno
ma l'è un viaio de grande speranza
e tuto l'è mistero...
AGNESE ZORDAN, OPPEANO
49
RINGRAZIAMENTI
A nome del CLUB si ringraziano
tutti gli SPONSOR riportati nel retro della copertina.
Le Dirigenti della Biblioteca Comunale Fioroni
in particolar modo Ferruccio Nalin.
I Sacerdoti per l'annuncio in Chiesa.
Il Quotidiano l'Arena.
Il Periodico “Il Basso Adige.
Ringraziamenti a Teresa Donatelli
per i rapporti con gli Sponsor
di Isola Rizza.
Libretto redatto e serata organizzata
dal Cav. Franca Isolan Ramazzotto.
50
INDICE DEI POETI
Pag. 4 Diletta Rossi Barbieri
6 Elisabeth Rossin
8 Dino Barbieri
10 Lucia Beltrame Menini
12 Mario Bissoli
14 Nando Caltran
16 Teresa Donatelli
18 Renata Felis
20 Franca Isolan Ramazzotto
22 Paolo Lanza
24 Anna Maria Lavarini
26 Giuseppe Lavarini
28 Pasqualina Marin
30 Giovanni Rocco Mastella
32 Mites Parladore
34 Licia Pesente
36 Silvana Picchi
38 Romano Salgarello
40 Luciana Sbampato
42 Margherita Liliana Soave
44 Gemma Tobaldin
46 Sante Zamboni
48 Agnese Zordan
51
CON IL PATROCINIO
RIELLO CULTURA
52