Sotziu Turisticu
Comunu de Tonara
Pro Loco Tonara
Sotziu Peppinu Mereu
Cuncursu de poesia "Peppinu Mereu"
Poesias 2014
Sotziu Peppinu Mereu
Sotziu Peppinu Mereu
www.peppinumereu.it
[email protected]
© – Collettivo Peppino Mereu Via della Regione 08039 Tonara - Tutti i diritti riservati
2
Cuncursu 2014
Sa Giuria
Presidente - Gonario Carta Brocca
Franca Marcialis
GianPaolo Mele
Peppino Floris - Segretariu
3
Sotziu Peppinu Mereu
.
4
Cuncursu 2014
SETZIONE REGIONALE - SONETO
5
Sotziu Peppinu Mereu
6
Cuncursu 2014
EST UNA 'OGHE....
Est una 'oghe pasida ch'intendo
una campana 'etza e atonada,
mi sonat druche druche in sa notada
cando corcadu sa paghe pretendo.
Da ue arrivat subitu cumprendo
pro chi non nd'ido pius sa pupada,
ma s'anima non s'abarrat serrada
issa est libera e deo non la prendo.
Una 'oghe ch'arrivat da lontanu
da segus de sas nues, da cudd'ala,
da cuss'illacanadu mundu arcanu,
finas chi mi serrat sas puppias
delicada che movida de ala:
est mama, chi mi cantat sas ninnias.
Angelo Maria Ardu – Flussio
S'lSTRATZU BETZU 88
Esodau, custu lumene balente
imbentau dae dotores geniales
chi connoschen remedios naturales
in su mundu battios dae rechente,
remedios de risparmiu e mala sorte
unu lu giaman ammortitzadore,
su trabagliante no at prus balore,
nemmancu s'est robustu sanu e forte,
nemmancu s'est brillante, intelligente
li mantenen su minimu rispettu,
anzis prus galu li bortan sas palas.
Chin sas siendas delocalizadas
su trabagliu li truncan dae nettu
tramudandel'in Cina e in Oriente.
De sa produzione est unu petzu
e nde l'imbolan che istratzu betzu.
Lorenzo Brandinu – Orani
7
Sotziu Peppinu Mereu
IN SU DUAMIZEBATORDIGHESIMU
In su duamizebatordighesimu
est sucess'un'eventu in custu mundu,
ca duos Pabas de su millenoighentesimu
hana fattu Santos chin coro profundu.
Su primu est Zuanne vintitresimu
e poi su Polacu Paulu segundu,
e isperamus da-e su Chelu giocundu
chi assistat su gener'umanesimu.
Ca in custu mundu prenu de malfatores
tenimus bisonzu de protezione
protezione de sas beneitas manos.
Custos Pabas sien sos nostros protetores
e chin s'insoro Santa benedizione
c'assistana tottu cantos sos umanos.
E ca duos Pabas los han beatificados
custos duos Pabas sun santificados.
Alberto Capra – Torpè
A VINT'ANNOS
A vint'annos su menzus messadore,
cun sa frache acutz' e sa pudatza,
punghet che tzegu, a sa maconatza,
e bolat artu... artu che i s'astore.
A sos chimbanta, abile pintore,
ca faghet solu pintos de arratza.
A settanta ddi ch'est bortada s'atza
E sulat solu cun su suladore.
E prus imbetzat e prus bassu òlada,
sa tinta lena... lena... non colòridi
si su pinzellu in sa tela còlada.
Nieddu... canu... e posch'isbisòridi,
su tempus a sa muda ddu collònada
e iss'a bellu a bellu si che moridi.
Basilio Carta - Sedilo
8
Cuncursu 2014
A UNU MISERABILE BURRICU DOTORADU
Giovanu miseru dotoradu
pintau ghignu t'apo in murales.
Telefonas. No mi as rispetadu,
connotu t'amos totu chi no bales.
Burricu falzu , vile ses istadu
naras so mandrone e tantos males.
Magumadas t'ada cundannadu
infame ses cun dies uguales.
Deo so che a tie dipendente
certu, no che te, de bassu profilu.
ln Pianalza lassa istare sa zente,
po cantu vives ammentadilu.
Ma si s'idea tòrrada at mente
limba ti sichede che-i su pilu.
Giovanni Giuseppe Contini – Flussio
SA SANTIFICATZIONE DE SOR DUOS PAPAS
Bintisètte Aprile in Vaticànu
s'ènd'in tottu su mùndu collegadu
sor dùos Papas as santificàdu
unu Polàccu e unu Italianu.
E dùos Papas an rapresentàdu
in cùssu incancellàbile manzànu
e in tottu su regnu Cristiànu
mai simile fàtu est capitàdu.
Dua mìzza de ànnos e pìusu
crociffìssu cun tàntu patimèntu
cando fù mòrtu e risòrtu Gesùsu.
Oe cun cùstu ràru avenimèntu
in cùstu mùndu corròttu e confùsu
ùe s'invocat paghe ògni momèntu,
lu dimòstrat s'aflùssu de sa zènte
arrivàda da dògni continente.
Salvatore Demurtas - Teti
9
Sotziu Peppinu Mereu
A UNA CICALA
Cicala oe dae mesu die
mi ripetis sos mutos de calura.
In ramos de suerzu e de cresura
has a callare a tardu merie.
Non pensas a s'ierru cando nie
tando muda sa vida 'e ventura.
Tue sa fatiga e sa premura
la lassas a formigas e a mie.
Notas a sole non ti das alenu
mandas invitos a las musicare
a tonu 'e sos grillos de cussertu.
Sero cun su tuo cantu amenu
magicos sa risposta t'han'a dare
si unidos sos cantos han' abbertu.
Salvatore Frau - Desulo
SA PEUS RAZZA DE SOS IMPOSTORES
Cust'istoria 'e suprema delinquenzia
chi hat postu in motu su clero mondiale,
quasi mi lassat in s'indiferenzia,
ca già nde connoschia calchi signale;
ma su chi dat affrontu e sufferenzia
est chi b'hat mostros chi dan tantu male,
ca non possedin un'unza 'e cussenzia
siat papa, monsignore o cardinale.
Duamiz'annos truffende sa zente
chi cun sos mitos restat credulona
'ene cunvinta cun falsos destinos.
Ajò ponzemus a su giustu mente,
ca cussa zente 'e s'ingannu padrona
est formada de ladros assassinos,
e finimula de lis fagher inchinos!
Bobore Marceddu - Oniferi
10
Cuncursu 2014
TORRA A DOMO
Chin su coro de dolore aradu
de torrare t'aspetto fizu meu.
De mama tua tue su recreu
in su turmentu m'as abbandonadu.
Iffatu a sas drogas ses annadu,
rutu in mesu 'e unu munnu feu
ube solu turmentos e anneu
non pache po sa mente as acatadu.
Canno ses rut'in su primu canneddu
intradu ses in sos campos froridos,
ma in su ludu ti acatas como.
Rutu a terra su vanu casteddu,
tottu ti torren sos bonos sentidos!
Ti preco, coro meu, torr'a domo.
Antonio Mariani - Orune
FIORES DE POESIA
Massajos cun afutas e suore
dae terra iscruada incunzant trigu,
e binzateris in su logu aprigu
pastinant matas chi dant bonumore.
Poetas comente friscu lentore
ispricant versos e cantigu amigu,
mentovant impare tempus antigu
chi prapat angustias e dolore.
Lassant ficadas a sos benidores
mudadas cun sintzera bramosia
bundantes isperas, gosu e recreu.
Abovande tristuras e s'ispreu,
donzi versu cantadu in poesia
at esser mítza 'e terrenos amores.
Giovanni Antioco Mura - Ghilarza
11
Sotziu Peppinu Mereu
LUNA GALANA
Candida luna! Palas a su muru,
in pes de su nuraghe ap'isetadu
che unu pitzinneddu innamoradu
chin su cor'a toccheddu. So siguru,
chi cantu l'amo, m'amad'issa puru
ca prus de milli 'ortas mi l'at nadu.
S'apuntamentu a noghe mi l'at dadu
prite solu mi lassad'a s'iscuru?
Luna galana! Bae a u'est issa
nara-li chi innoghe as bidu a mie
e amenta-li sa fata promissa.
Ca si non benit prima 'e fagher die
m'an agatare che sa Sa Crabarissa
tostu che preda, frittu che su nie!
Giovanni Pira - Orgosolo
ISPIJOS
Caros ispijos, fissos bos parades
brivos de coro e sena fantasia
ojos teracos intro 'e domo mia
de su chi chelzo, totu mi contades.
Ma mancu si bos prego mi cuades
cando faltzu est su risu 'e s'allegria:
d'oriolos, edade e maladia
mudos che crastu totu ischipiades.
E de cunfortu pagu mi nde dades
ca sezis bidru, rena solamente
indeorada e fissada a su muru.
Ma sos segretos tenzo in su siguru:
solu su fora 'idides de sa zente
ch'a parte 'e intro certu non b'intrades.
E s'andat male su chi mi mustrades
cun-d-unu colpigheddu bos cagliades.
Augusto Flaminio Piras – Suni
12
Cuncursu 2014
TIU ANGHELEDDU
Fit bonu 'e coro e sabiu de cherveddu,
in mente m'est restada sa figura
dae sos tempos de sa gioventura,
de cuddu biadu de tiu Angheleddu.
Si tuccaiat innanti 'e fagher die
bertula in coddu donzi zorronada
trazende s'aineddu in sa pigada
lassendesi sa 'idda e andende a inie.
In cussa tanca manna, solu, solu,
a tribulare finz'a s'intrinada.
Su sole fit cumpanzu e fit consolu.
Su sero, a domo, istraccu torraiat
cun frutture o coccoi in sa sacchetta,
ierru o istiu, sempr'in tribulia!
Dae subra, l'at a essere abbaidende,
sa tanca abbandonada.... pianghende!
Giuseppina Schirru - La Maddalena
AMÌGA CHI SÙNFRIS
Fìntzas chi tènis pìlus cun fròccu
tèmpus no stròbat pipia notzenti
degàda cràtzas crapita cun tàccu
tèmpus no castiat chi tènit arànti
Sa màla sòrti ti màndat su tòccu
àintre'è dòmu s'atzìccat sa gènti
chi tènit in còru pùnta de stòccu
po mòrti chi pìgat strìntu parènti
De cùstu cèlu tui spèras chi bènit
càndu su santìdu ti est aberrèndi
sa fòrtza mànna chi Fidi ti dònat
A sa sunfridùra no dèpis arrèndi
po sa Devotzioni chi ti procùrat
de agattai sèmpri pàxi preghèndi
Sergio Seu - La Maddalena
13
Sotziu Peppinu Mereu
BALENTIAS MAHAS
Amus fama de zente ospitale,
in totuve husta bella nomea,
no la vantada su cuntinentale,
la honnoshede s'Europa intrea.
Pro s'istranzu, su trattare cordiale,
de s'Orgolesu est sa prima idea,
a l'hada in su sentidu naturale
dae prima de su regnu de Arborea.
Abortas, però, b'at honcas de melone,
hi non suni su vantu'e sa Sardinna
pro attos de mahine criminale.
ses leziu dae pahu in su giornale
i hana alluttu, in manera indinna,
sos pilos, a unu turista capellone.
Antioco Spanu - Orgosolo
14
Cuncursu 2014
SETZIONE REGIONALE - RIMA
15
Sotziu Peppinu Mereu
16
Cuncursu 2014
S'ISCRITTU
A chie non credet in s'iscrittura,
non credet mancu ca s'agatat deu.
E certos i naran in modu feu,
ca d'han formadu simile figura.
Attestende s'iscrittu est impostura,
pro fagher crere a su mund'intreu.
Neghende cantu s'istoria trattada,
nende ca Crist'e santos non s'agatada.
Sa veridade negat zerta zente,
chie naran chin s'iscrittu b'at ingannos.
Si bos naro ca Gesùsu a doigh'annos,
esperta bi jughiat giai sa mente.
A zert'edade piseddu innozente,
bi disputeidi cun dottores mannos.
E creide no est un'impostura,
ca bene lu cunfirmat s'iscrittura.
E si bi cito calc'unu miraculu,
chi Gesù Crist'in vida at operadu:
infermos d'ogni male at sanàdu,
e tue oe non ponzas ostaculu,
ca su toppu lu torrat sena baculu,
e tantos mortos hat resuscitadu,
in pius at preigadu sa dottrina,
in Galilea e in sa Palestina.
Sa dottrina si fit de l'osservare,
unu bene mannu pro d-ogni umanu.
In fratellanza su bene mundanu,
godire totus uguale a pare
e de non bocchir'e de no furare,
sunu a s'ateru nos dar'una manu
lassende a parte odiu e gherra,
pro vivere cuntentos in sa terra.
17
Sotziu Peppinu Mereu
In fine d'ogn' iscrittu immortaladu,
deve restare eternu monumentu,
de Troia su grave patimentu,
cand'aian sa zittad'incendiadu
e de cand'a Roma ian tracciadu,
cun totu sos cunflittos ch'ana tentu.
Fattos suzzessos de antigamente,
ma cun s'iscrittu l'idimus presente.
Giovanni Agus - Villagrande Strisaili
18
Cuncursu 2014
FORSIS... MAJU
Allentados vigores,
ispinghen cras alteru,
in ballallara dudas e tzertesas.
Boghes de bandidores
cuan su deaberu
cun sas tramas veladas de pretesas.
Aghedados suspiros
in arrastu 'e regiros,
chiliran cussas folas non cumpresas,
pro sas lestras ispozas
de chimas noas, gia cun grogas fozas.
Lotas, chi ment'isperrant
e solvent in papores
cuddos rempruddos, sírigos de coro
ch'istracos, contierrant
cun ultimos vigores
pro non perder su nébidu decoro
tra imbidos dorados
de sos iscostumados
chi leant s'etzessu pro siddadu insoro
e pro sutzare venas
brincant balentes, làcanas anzenas.
Prite, ammentos duros...
arressos in sas laras,
mustrant semados totu cuddos basos?
Prite, sulcios siguros
de avrèschidas giaras,
tra melodias de bolos e pasos,
in sas tintas aeras
cun sas birdes isperas,
mi ses torrende a bisos romasos
barigadas promissas
intrapuladas tra nues afissas?
19
Sotziu Peppinu Mereu
Partende sun isteddos,
pibinidas de lughe
mirende de sa luna, trista cara,
ca coros a marteddos...
sun ciaitende rughe
cun sazos de sas dudas pro s'ampara
trobeida in s'inserru
de frita tramuntana
chi tinghet biaita cussa lara!
Chie l'ischit si maju
at a sulare nuscos... pro s'ispaju?
Antonio Altana - Buddusò
20
Cuncursu 2014
OJOS DE FOGU
Attentzionosa sa mastr''e s'iscola
cando un'iscolanu fit Boele
a lu lassare pasidu a sa sola
pro no iscadenare in isse fele.
Ca si bi la faghiat pagu torta
in sa cara impassibile e ridente
li bessiat s'ojada de serpente
e issa si fuiat in sa porta.
Gai a mannu diventat famosu
e leat de sicariu s'attestadu
chi sa caratza in cara s'at faladu
ben'impostadu dae log'umbrosu.
Si unu li poniat un'isfida
isse diventaiat unu bundu
li faghiat sa ruche a s'atrivida
e nde lu bogaiat dae su mundu.
Luca s'atteru zobanu giamadu
chi pro su bonu modu tenet bantu
nemigu de Boele est dae tantu
ca mai sas familias b'an trattadu.
Ojos d'anghelu l'aian zistradu
onestu ma detzisu de carattere
chi mai pro niente s'at lassadu
ponner sos pedes supra dae attere.
Pastores ambos duos su cuile
tenian in sa lacana 'e sa tanca
divisos a sa dresta dae tracile
de muros e de rete a manu manca.
Ma Luca una die a s'arveschida
connoschet su manitzu de su male
b'est Nazarena in s'istalla frundida
morta chin odiu a colpos de istrale.
21
Sotziu Peppinu Mereu
«Poberu Caddu sa fronte isteddada
a ruju ti l'an cherfida pintare
ma supra e mama mia app'a giurare
chie l'at fattu at sa die signada!».
Gai murmuttat Luca a cuss'offesa
falende s'oju de iras pienu
bidet mesu cuada tra su fenu
una lepedda istranza pattadesa.
E sa lesortza dat sa presentada:
«sa maniga est de corru 'e bacca
so nota ca su mere m'at marcada
a lumen suo m'at fattu s'intacca».
Intrat su sero Luca a su tzilleri
ue Boele in manu a sa borìa
in mes'e amigos in tant'allegria
mustrat un'atter'animu brulleri.
Cussa leppedda li tirat a dossu
giamende a s'attentu su padronu
gridende chin sa oghe a forte sonu:
«custa est tua e t'iscabat su fossu!»
Boele che survile tirat fora
a cuss'isfida sa mirada fea
e l'at rispostu:«andes in mal'ora
de sa tumba preparadi sa chea!»
De isteddos sa luna tenet corte
sa zente restat franta ammudulida
inue sos profumos de sa vida
s'arrenden a sos fragos de sa morte.
Che sa bibblica sesta dae chelu
che raju falan in su disaogu
sas miradas de ojos de anghelu
pro isfidare a ojos de fogu.
22
Cuncursu 2014
Similes a Cainu chin Abele
chi tando su mortore fit Cainu
inoghe s'est mudadu su destinu
ca su chi rughet siccu est Boele!
A bias est a seperu sa sorte
non moris betzu si protzedis male
mai bi nias chi ses immortale
ca semper bind'at unu pius forte!
Roberto Argiolas - Oniferi
23
Sotziu Peppinu Mereu
IDENTIDADE
Sardos semus pro naschida, natura?
Fizos de su pobulu chi puresa
est intrad'in intragnas e bellesa
at brotadu in sarda criadura?
Su esser sardos beros, bonaura
imprentat coros finas a betzesa
e faeddende in limba comuna
fortigat raighinas totinduna.
Coladas sunt sas dominasciones
chi in terra nostra ant fatu linna,
lompid'est su riscatu de Sardinna
cun bandela de fortes traisciones
mai mortas. Como in campu pones
tue, sardu, cun seru, cabu, pinna
tota sa possa de s'autonomia,
ammustrende sa tua balentia.
Già est beru chi semos e ferida
nos ant lassadu sos dominadores
chi sende oe modernos astores
in peddes de anzone, sa muida
faghent in su caminu de sa vida
pro trassare a mannos e minores.
Sardos, est tempus de parare fritza
sena prus prender canes a saltitza.
S'identidade nostra est ligada
a nodu mortu a tempus coladu,
ch'in bene e male nos at lassadu
e tribulia mai olvidada
daghi fimis zenia disterrada.
Issa in benidore at puntadu
dissignos bonos de sabia mezoria
intr'ordinzos de sarda istoria.
S'identidade in tempus presente
si fraigat zuilende “forza paris"
mezus impitende sos dinaris,
tzachende in s'impresa coro, mente.
Torret profetu a sa sarda zente
24
Cuncursu 2014
sena ch'istranzos nde fetant safaris
c'ant furadu sas mezus richesas
in tancas, in marinas e in mesas.
Istevene Arru - Putumajore
25
Sotziu Peppinu Mereu
IN MEMORIA
Tonara po su tou campione
Organizadu has custa bella festa
Sos poetas acudin a cumone
A recitar'una rima modesta
Ca de Tonara su mannu leone
Restat po tottus una manu dresta.
Mereu est che poeta immortaladu
E b'est perenne su lumen'iscrittu
Ca s'opera chi a nois hat lassadu
De tant'ammiru tenet su diritu
Ca si a betzu mannu fit campadu
Hait tentu prus mannu su merittu.
Ma! Finas gai, send'in giovanìa
S'opera sua est imbidiada
Ca fit abile chin sa poesia
chi l'est naschida, che donu 'e vada.
Pecadu, chi sa bruta maladia
Est istada chin iss'ispiettada.
Mereu, dai annos, intendiat
Chi fit sa vida sua in decadenzia
Ma forzis in su tempus non b'aiat
Dottores abbastanza 'e cumpetenzia
Ma ca sa fine arrivende bidiat
Hat iscrittu sa sua isperienzia.
Hat descrittu sa vida e-i sos logos
De sa patria sua tant'amada
Firm'in sos versos, sena vanos giogos
S'opera sua s'est inmortalada.
Hat iscrittu disgustos disaogos
De sa vida comente l'hat colada.
Ca b'hat postu su sensu in s'iscrittura
Tessidu bene chin abilidade.
Tzapat unu lettore in sa lettura
Un'opera de arta calidade
Chi paret de la ider in figura
Sa visione, d'una realtade.
Giovanni Boccoli - Posada
26
Cuncursu 2014
IN D-UN'ATTIMU
In un attimu fia in s'Appenninu
brinchende sas isterridas de mare
sa mente chi m'aggiuad'a bolare
fattende pius affaca su caminu;
Fecunda inzeniosa fantasia
chi faghes sas intragnas pius cuadas
bescire po leare sas faladas
de tantu intendimentu e armonia!
Che fia che unu lampu in su Bernina
e poi in sa muntagna 'e sa Maiella
happ'ìdu chi de aberu già fit bella
sighende sa giografica cartina.
Su giru fatto largu in s'orizonte
de tottu sas muntagnas e alturas
pienas de ghiacciu o de caluras
segundu latitudine 'e su monte:
Sun tottu poderosos, ma cuntentu,
su mare torro ancora attraessare
po idere e po poder'ammirare
su monte nostru sardu Gennargentu.
Nanni Brundu - Usini
27
Sotziu Peppinu Mereu
DA L'ALBA A LU TRAMÒNTU
Faèddha, un silènziu prìpputènti
in ùna dì di primmaèra,
cu un vèntu di punèntí
e pàssa, indistulbàtu illa sèra,
in ùna vèldi campàgna fiùrita
di un nòu germògliu
cu l'ària sana e pùlita
e tu sèi pusàtu sòpra unu scògliu
cu prufunda miditaziòni
in un riffissìvu pinsèri
ill'equilibràta attinziòni
chi cunnìsci tànti mistèri
di chìsta terrèna esistènzia
pièna di pròa e misaricòldia
e cu palsimùnia e cu cussènzia
è complizi la cuncòldia
e vòlani li gabbiàni
lìiberi e licèri
illi bòni stasgiòni sàni
sèmpri sincèri
di un tempu passàtu e prisènti
posìtivu pà lu futùru
cu un sincèru prisidènti
affettuòsu e sicùru,
pà la pàci illu mòndu
pà l'amòri di l'umanitài
chi ghjra ghjùsta e in tòndu
cu onestà e umiltài.
Intàntu da l'alba a lu tramòntu
è sempri attentu lu Signòri
mi rendi còntu
in tùtti l'ori,
di lu nòstru cumpultamèntu
ghjùstu o sbagliàtu,
sènza lamèntu
ni pìddha àttu,
pàlu ghjudiziu universàli
28
Cuncursu 2014
cu bòci càlma e sevèra,
sènza, rivàli
faè ddha da lu matinu a la sèra,
allòra cànta la tèrra
pièna di felicitài e di ciòia
pà li naziòni senza più ghèrra
e sènza più nòia.
cussì la paùra è passàta
cu li sòi mìseri umàni,
la passòna no è più assustata
palchì privàli li princìpi sàni;
illa muderna societài
no è più piriculòsu
lo scandalo illa rivaliàti
e d'essè permalòsu
pà sempri è distruttu l'antìcu avversàriu
da la Signora Onnipotènti
cu in manu lu rusàriu
è apparsa in tùtti li cuntinènti
è la Mamma di lu Redentòre
e a tùtti ci sàlva e ci currègghj,
cu gràzia e cu splindòri
e cu dulciùra ci pruttìgghj.
Anna Buonuomo - Sassari
29
Sotziu Peppinu Mereu
ÀNGHELU MEU
Fizu amadu, de mama fis su lizu
Pagu tempus cum megus ses istadu
Prestu Deus a te at giamadu
Pro mi lassare in penas e fastizu.
Imbaradu t'aia cun disizu
Ite gioia su die chi ses nadu
Un'àngheulu parias de paradisu
Delicadu, in laras già su risu.
Cant'afetu proadu, ite cuntentu
Felice istringhendedi a su sinu
Sentza ischire crudele su destinu
Chi furende mi fit cussu momentu.
Chimbe meses passados sunt che bentu
A lamentu che unu poverinu
Su male at consumadu sa carena
S'ànghelu meu mi faghiat pena.
Sentza poder sa sorte cambiare
L'abaidaia estende dolente
A cussa suferèntzia impotente
Sentza curas de lu poder sanare.
Sas notes passaia a lu izare
Cun s'ispera de una diferente
Ogni ora lu bidia peorende
Sa morte pianu pianu lu fit leende.
Non bastaiant premura e contivizu
Mirendelu nde fia disisperada
Sa suferèntzia in cara marcada
tot'iscavada dae su marturizu.
Andende ti che fisti caru fizu
Frita e triste fit s'ùrtima ojada
Unu lamentu e ses ispiradu
Anghelu meu a ue ses andadu.
30
Cuncursu 2014
In coro e in ojos m'est restada
Sa note de tristura e turmentu
Cando fritu in bratzos t'apo tentu
E cun Deus mi so' arrabiada.
Ma poi chi in sinnu so torrada
A issu apo fatu giuramentu
De non pianghere pro custa criadura
Su vicinu lu tenet e nd'at cura.
Vittoria Calzaghe - Laerru
31
Sotziu Peppinu Mereu
FUNTI PRONTUS PO SA GHERRA...
Funti prontus po sa gherra.. i lio'is
no disizzanta sa paghi...is anzo'is
funti prontus po sa cass'e su sriboj
...cuncodraus cun sa conca in su skidoj
su tzaraccu no disizzada sa marra
...ma su meri in peddi sua sink'ingrassada
s'unnu tejdi u'a stoja abia po lettu
...s'attru tancas binzas bestiamin'e casteddu
funti prontus po sa gherra ..i lio'is
no disizzanta sa paghi...is anzo'is
funti prontus po sa cass'è sa brabei
...cajnc'u anzo'i ad'abarrai for'e mammai
esti pronta po su furriu..kusta terra
...e su so'i in paua sua zai aspettada
e sa lu'a kì a issa poid'in fattu .... ._
a su mare canta a contra e bassu.
funti prontus po sa gherra...i lio`is
no disizzanta sa paghi...is anzo'is
funti prontus po sa cass'intzenia'us
...funti prontus cun cranzzoffas affittaus
funti prontus a guvernai is intellitzentis?
...o è mezzu ki a sa natura pontzant'immenti
...po no deppi..pranghi sa dì infattu
.....su ki oj podiast'....e no at fattu
funti prontus po sa gherra...i lio'is
no disizzanta sa paghi...is anzo'is
funti prontus c'ungra manna e dentigojs
funti prontus po cravvai....is anzo'is
fizzus ma'us asi tentu...o mama terra
fizzus maus...ki pagu t'arraspettan
si nd'iasta tentu...prus intellitzentis
t`jantai srebiu e rispetta'u...umilmenti!
funti prontus po sa gherra..i lio'is
no disizzanta sa paghi...is anzo'is
kè CAINOS funti pronus i lio'is
amasedaus kè ABELES is anzo'is
Tommaso Cappai - San Vero Milis
32
Cuncursu 2014
DIA PICCARE SU VOLU
Si adio potitu 'ughire dia fughita
Dae custa vita prena 'e tribulìa
Paret chi m'apan fattu sa maghia
D'essere pro semper afrizita.
Dia piccare su volu che astore
In chirca 'e vita nova e de amore.
Sendhe in lettu su notte a sa corcata
De lacrimas mi si prenan sos ocros
Pessandhe a cussos tristos malos jocos
Chi sa vita in peleas mi l'an zirata
Chircandhe de azustare cada cosa
Che perdo nuscu e fozas che sa rosa.
E su tempus in presses est colandhe
Mi paret eris chi'ippo pitzinneddha
A s'iscurtha currendhe che crapeddha
A iscarcàllios de risu o cantandhe
Jocandhe in bichinatu a ziru in tundhu
Pariamus nois sos meres de su mundhu.
Su mundhu nostru fit biddha e campannas
E in istiu sos rios pro impojare
Metas no adiana vistu mai su mare
Ma ischian de cada zassu in sas muntannas
Pro balentia metas jocos e fertas
Catziandhe colovra e thilichertas.
Sos ammentos mi colana muindhe
De sa bellesa ch'est sa pitzinnìa
E galu prus m'intendho a disanìa
Pessandhe a tottu su chi so' patindhe.
No mi pento 'e s'amore chi apo datu
Ca est cussu su chi m'at prus cossolatu.
Dae babu e mama cust'apo'imparatu
Non b'at dinare chi pachet s'amore
Ma a bortas est propiu su dolore
Su chi ti narat cantu bene as datu.
In chirca 'e vita nova e de amore
Dia piccare su volu che astore.
Maria Elisa Carrone - Onifai
33
Sotziu Peppinu Mereu
SU BERANU
Solu seu, in su sàrtu, caminèndi !
De is fràgus, seu, imbriagàu.
Su soli, in cèlu, est calentèndi
nèbida, de sa terra, at artziàu.
Sa natura si ndi scìdat, vigoròsa.
Sa boxi de sa circuri, si fàit intèndi
su cucu arrespùndit a dònnia còsa
de su bird”e is arròlis, cantèndi.
Tott'unu seu, cun issa
parti nodìa de sa vìda
est comènti sia, a mìssa
s'anima mia, cun Deus, unìda.
A pìtzus e a sùta de mei, ascurtu
su pàlpitu d'esistèntzìas, cuàdas.
Ddas intèndu tremèndi, de suncùrtu.
Est sa mazìn' etèrna de is fàdas.
Si 'nd'artziat su card"e molenti
in s'oru de s'arrùga, impruinàda.
Su bèntu dd'incrùbat frecuènti
In sa carrèra de su sàrtu, assolitàda.
Unu biàxi de mànnas e pitìcas còsas
est isparessèndi, in dònnia lògu.
Po sa natura, mancantzias doloròsas
ma s'òmini 'nc'at furriàu s'ògu !
Antonio Renato Cocco - Gesturi
34
Cuncursu 2014
SA MERE
Che-i sa vida amo sa natura
pro ca m'atirat sa sua bellesa
chi mustrat tant'amore e gentilesa
però tantos nde tenen paga cura.
Nos dat vida, respiru e alimentu
pro meda tempus fatiga e sudore
e tantas bortas sufrinzu e dolore
ma finzas oras de divertimentu.
Su recrèu de muzeres e fizos
e s'incantu de caros nepodes
issa meritat infinidas lodes
a da chi nos'apagat sos disizos.
Sa terra cultivada pro provista
campos in festa cun tantos colores,
totu sa flora bestid''e fiores,
lughe e orgogliu pro sa nostra vista.
Costas, buscos, sas baddes, sos montes
da ue falan rios e traìnos
chi sun pro nois che donos divinos
cuss'incantu de bellos orizontes.
Binzas, zardinos, ortos, olivarios
chi s'omine b'hat postu su talentu
pro los fagher e de cust'est cuntentu
ca sunu in sa vida necessarios.
Su ciclu de sas batoro istajones
de su tempus nos mustrat s'andare,
in su veranu s'intenden cantare
cun melodia totu sos puzones.
Ma sa natura chèret rispetada
siat in terra in mare e in chelu
ca issa non nde tenet maluzelu
de su c'hamos bisonzu a nois dàda.
Cussos chi sunu de ideas malas
e la ferini de tantas maneras
ispintos dae vanas violeras
menefreghistas li ziran sas palas.
35
Sotziu Peppinu Mereu
Sos chi pretenden tot'a prepotentzia
chirchet de lis mudare su morale
chi sun decisos solu a fagher male
faghende a issa dogni violentzia.
E non cheret ofesa o isfidada
dae s'omine faghendeli afrontos
ca medas vortas presentat sos contos
e no est bella cando est airada.
Sos chi non faghen s'onestu dovere
avidos, chi si cherene irrichire
in tantos modos lis faghet ischre
cumandat issa ca est semper mere.
Francesco Columbu - Oliena
36
Cuncursu 2014
LU CHI LACU
Lu tempu chi passa e no laca
un mumentu pà sintillu meu
tuttu l'impegnu postu no paca
ma l'anni passani ed è greu
passani e tu li curri infattu
da candu nasci a candu mori
a stentu ti gadagni lu riccattu
ma senza zidì mai lu to' onori
l'onori chìssu c'ài ereditatu
d'altu cosi no ài autu nienti
pà eredità chistu t'àni lacatu
li toi no erani pussidenti
nienti casi nienti tarreni
lacatu t'àni onori educazioni
lacatu n'àni calasci pieni
ti poi considerà gran ricconi
e chissu lacu a mè fiddholi
è siguru chi sarani cuntenti
li lacu chissi dui cosi solu
candu sarani chissi mumenti
straccatu mi socu di currì
ancora l'impegnu sé agabbatu
lu testamentu ancora decu scrì
ma lacu lu chi m'àni lacatu
l'educazioni e lu mè onori
biatu lu babbu chi li po' lacà
li fiddholi manni o minori
è siguru saparani apprizzà.
E cussì lacaragghju illa ghjaca
Tuttu lu pussidimentu intreu.
Lu tempu chi passa e no laca
un mumentu pà sintillu meu.
Angelo Contini - Arzachena
37
Sotziu Peppinu Mereu
IN CUSTA TERRA
Arrimadas
is fraches de messongiu
e in custa terra lasso
pìlissos e liongiu...
Mi ch'ando arrèolada
a is sabores de s'Atongiu
custa vida m'est sinnada
in is passos de sa note.
E tando mala sorte!
in d-un alenu 'e fele
mi pratzis a sa muda
de custa terr'antiga.
M'impresso a fort'a forte
a is trincias de a-regodu
e pentzo a-i cuddu 'olu
chi torrat fac'a domo.
E puru ancora como
dd'intendo che mai mai
s'atzapulu 'e is telargios
e contos de istrinas
de is fadas filòngianas...
Areste in ghenn'angena
in padentes de orrùo
m'est grae custa pena
ma chi potzo mi che fuo!
In tancas de tristura
ch'innoigo sa trobea
e torro in custa terra
de trigu, e de pintura...
Anna Paola Demelas - Atzara
38
Cuncursu 2014
SA TANCA IN LUTTU
Sa tanca totu birde e frorida
frores apertos de milli colores,
dipintos los ant tantos pintores
po ddos ammirare totu vida.
Suta is orgiastos chi parent'altares
sas bèstias si godin sa friscura,
padentes de laore e de pastura
domos de janas e antigos nuraghes.
De abba cristallina sa funtana
in s'umbra de su crecu seculare,
oras bellas si che poden passare
pro godire profumos e aria sana.
Fines a cando sa manu cancarada
cun su luminu su monte at allutu,
frores, matas e bingias c'at distrutu
at totu sa tanca isfigurada.
Su sartu nieddu, matas ispilias
non s'annidana prus mancu pugiones,
isparin sos conillos e tribones
totu sas bestias parene atrudias.
Is crupevoles bèngiant cundannaos
sena rimorsu e sena rimpiantu,
non mèritant sa tumba in campusantu
ma in su fogu abarrare abrusciaos.
Antonio Demelas - Atzara
39
Sotziu Peppinu Mereu
PINTADA MARIPOSA
Po m'alligrai su coru
M'imbentu unu dillu
Ndi boddu unu lillu
Po candu m'innamoru
Mi pòngiu a cantai
Amostendi alligria
lntonendi in sa bia
Su chi tèngiu de ti nai
Ti naru prexeri
Candu t'atòbiu
A domu non contòniu
Ca de mimi ses meri
Diainci mi strinas
Unu mannu tesoru
Pitziori in su coru
Che puntas de ispinas
M'intendu dolori
E meda drucesa
Custa est sa bellesa
Chi aporrit s'amori
Caminu baddendi
Cun frimu sentidu
Su càbudu fridu
Est giai callentendi
Po s'amori scrieus
Sighendi a cantai
S'imbìdia at a nai
Su chi non seus
Atzuda e marigosa
Lassaus chi nerint
S'amori no ddu ferint
Pintada mariposa.
Valerio Mauro Demuro - Villanovatulo
40
Cuncursu 2014
FEMINA E MAMA
Mama! Mama! Mama!
Cramada:
mama mia! mama mia!.......
Una oghe de azudu e de piantu.
Mama de totus, tue ses su antu,
ti cramamus fin'a morte dae nadìa.
Cramas mama e ses mama "mia",
ca s'omine tue as criadu:
est fizu tou: cussu bene amadu.
Unu lamentu de dolore, non creia!
Che ido sufferente mama “mia”,
femina disperada, in mesu a zente.
Sa carre che li furan,
est comente,
la punnalen'a traittorìa.
Su corpus abusadu e aturdìu,
est rutu in terra, prus mortu che biu
sos ogros isprammados.
Avvilidos, si sun poi cuados:
ca vanu est su profettu, est ischìu,
Ah! Si lezere podìa,
in tzinnidu de ogros sentimentu,
de mama mia, tantu patimentu,
de vivere felitze in angustìa.
lte tristura!.... lassademi sonniare,
In sinu sou cherzo reposare.
M'intendho seguru solu inie:
pro su fìzu, issa morit onzi die.
Gavino Dettori - Anela
41
Sotziu Peppinu Mereu
TZEGU
Su sole t'hat negadu sa virtude
De lu idere su manzanu a s'aurora
A bon'ora ispuntat sorridente
E tue innotzente restas ischuru ancora
Proite est ingratu su desthinu
Cun tegu poveru innotzente
Su coro pianghet amaramente
Custha pena chi tantu t'hat afflittu
Sa mamma pianghet cun dirittu
S'amore sou tantu isfortunadu
A deus hat dimandadu, proite tantu dolore a mie
Cun su sole rinnovat ogni die
Poveu Tzegu isventuradu
Ti mancat sa bellesa a d-ogn'ora
Miseru sa natura ti hat fattu
Sufferente in pitzinnia e betzesa ancora
Sos carignos ritzeit in cara sua
Connoschendhe sa manu de sa mamma
Su die chi carignat chie t'ama(t)
Non poder bidere sa casa acua
Non poder pedire unu carignu
Proite sa natura t'hat negadu custhu onore
Non ti disperat su valore
lntantu su sole ti est benignu
T'accumpagnu cun affettu e tantu amore
Chi deu siat benignu cun tottue
Cancellet dae coro custha nue
E t'allebiet cust'umbra dae oe
Gavino Proto Gianuario Falchi - Portotorres
42
Cuncursu 2014
MAMA-IDDA
Sa luche chi si cuat tott'in d'una
addenotte si mustrat in sa luna
chin issa pro cumpanza torro a fura
a intender cudda oche 'e zoventura.
Su sonu 'e su sonette pianu pianu
dilicatas m'aporrit in sa manu
vriscas lavras e caras risulanas
bisos arcanos de durches seranas.
Sa oche 'e su cantu 'e su tenore
melanconicu arrambatu a su contone
mi garrigat d'ammentos coro e sinu
ch'aberin in sa mente unu caminu
ive imbuco durches nuscos e sapores
d'isturditos innossentes amores.
E s'umu de sas pacas zimineras
alènu d'una terra in finitèra
nde crompet a sos campos de s'aèra
unu disizu e una preghiera:
sos versos sos prus artos de unu cantu
Deus meu ti peto pro unu antu
de chie intro sa entre caentosa
tessitu m'at chin manu premurosa.
In s'àlinu 'e su entu los cheria
tancare chin amore e dilichia
pro chi nd'ispargat sacra melodia
a sa zente donzi lacana e zenia
chi issa istracca, etza e conchi cana
in eternu m'at a esser semper mama
Gino Farris - Lodè
43
Sotziu Peppinu Mereu
SU CONTU DE DUOS PASTORES
Duos vétzos sètzen in su dzannìle
a contare contos de pitzinnìa
po poner sa dzénte in armonìa
contan istòrias de su cuìle.
De crapas e vervechés ini pastòres
Su chi sentian it s'afficu mannu
s'ispèra chi sìat bona s'annàta
ponian in manos de su sennòre
po sa carèna su vrìttu it dannu
si caentain chin una cantata.
Murghendhe in sa mandra 'e cuìle
sonniain de s'amòre su vasu
achèndhe frue, recòttu e casu
su lapiolu it in su ochile.
Po tènner marjane e grassile,
jann'e muru, b'it sa matzonèra
cussa dzài it sa deféssa vèra
amparandhe andzònes in cuìle.
S'istrìnta 'e manu e s'amistade
it su cuntrattu mére chin pastòre
dandhe sa paràula de onòre
issos bi tenìan a s'onestade.
It témpus béllu chin clima serénu
su cussidéru it unu valòre
b'it su bisòndzu ma péri s'amòre
Si rispettait su bene andzénu.
A sa èsta torraimus a biddha
po sa missa e po sa professòne
po gudire in dòmo su maméntu
naschindhe de amòre s'ischintiddha
ponendhe a su ballu passiòne
po conchistare sa prèndha cunténtu.
Bardilio Gaetano Fenu - Galtellì
44
Cuncursu 2014
LIGADU A ISSA...
Non bad'attera rejone,
non bad'atteru argumentu
est sa sola attinzione
su solu pensamentu;
Tui as bisonzu de a issa
non bi podes rinunziare,
est sa tua idea fissa
no la podes cambiare;
Ti l'abbaidas incantadu
chi s'idea l'asa affissa,
a cadena ses ligadu
ligadu ses tue a issa;
Chi ti potat consolare
non bad'attera istella,
ses in cue a l'adorare
non b'at cosa piùs bella;
Tue as bisonzu de a issa
faghet parte da a tie,
e sa tua idea fissa
chi ti passat notte e die.
Francesco Fiori - Sassari
45
Sotziu Peppinu Mereu
A PEPPINU MEREU
Sunt coronas de laru a lughe rara
fìchidas in pedrosas raighinas
chi brinchende sas cristas montagninas
ant dadu fam'a sa idda 'e Tonara.
Poete tra poetes soberanu
fatu sos annos a lugore prenu
as lassadu a su tempus chena frenu
versos de seru e de tonu galanu.
Comente s'aba chi brotat sa vida
in sa funtana de su nara nara
inue Galusè a lughe jara
dat asselenu a sa musa sidida.
E tue frimmu ancora in su contadu
cun su gosu e sa pena post'in cantu
tra làstimas cundidas de piantu
durches in versos chi nos as lassadu.
Ma com'in friscas baddes de memòria
de su regnu de Flora intro sas tancas
tra campuras de nèulas biancas
pasas selenu in nuraghes de glòria.
Deo chi t'apo lèzidu a bistentu
biadu de sas tuas prendas raras
in su cantare mi torrat in laras
su numen tou a respiru tentu.
Si fit a cos'a ti podes donare
pro su bonu retzidu una dadiva
ti tia dare una note briva
de penas pro ti poder ninniare.
E isteddas de chelu a una una
ti tia dare postas in corona
cun totu cuddas musas de Elicona
pro ti cantare a zirf”a lugh"e luna.
Stefano Flore - Anela
46
Cuncursu 2014
DISIGIU DE TORRAI: A SA GIOVENTÙDI
Torressint is bellus annus mius
po provai su schìssiu de una dì
candu is beranus fiant frorius
e arrubius che fogu a su merì.
Seu che caddaxu arruinau
bèciu, stracu e sentz"e prus pretesa
coment'e petiolu stonau
chi sonat is oras 'e sa 'ecesa.
Is fèminas de imoi si nd'arrinti
biendimì che una canna trota
certu chi tenia is annus binti
mi lassànt oberta dònnia porta.
Tremi - tremi, totu timoria
manc'un'ossu portu prus deretu
perfetu unu tempus mi creia
e oi centu e prus de unu difetu.
Beccesa! Che mata sene frori
ne cambu ne folla portat prusu
neghendi su frutu de s'amori
e nendi a sa sorti amengesusu.
Non s'incrarat soli e mancu luna
su bisu morit in s'oru'e s'enna
e sa vida est totu cundenna
ca prus no sciu it'est sa fortuna.
Candu dentis tenia po arroi
non tenia pani po campai
e oi chi non potzu matziai
lìngiu pitzicorrus de cocoi.
Puru sa chèscia depu lassai
ca ascurtu non tenint is lamentus
mi prengu sa becesa de amentus
non podendidda bendi o imprestai.
Antonio Grifagno - Sinnai
47
Sotziu Peppinu Mereu
VOLANDE IN S'lNFlNlDU
In su chel'isteddau mancat solu
Bandulera sa luna a bolu istesu
Issa chi totu l'ischit l'at cumpresu
Ch'intro 'e cherveddu mi vuddin disinnos
D'idere isteddos faghendemi azinnos
E deo in mesu issoro andande a bolu.
Chi bisu siat ! Su entu mi trazat
Tessinde bolos d'oro, lepieddu
Tentu a sa manu cun dun'anzeleddu
B'ido de palas su sole pasande
E in s'iscuru istinchiddas ballande
Sa terra istraca, che nue viazat.
ln camineras de bjda mi jughet
A legher coros de rosa e nieddos
Nandemi tottus diventana isteddos
Sos ch'in sa terra ant pastinadu amore
Fizu de s'onestade, in su dolore
lsperas artas e noas allughet.
E volande, volande in s'infinidu
lssu cun megus, tentos a sa manu
Cando mi mustrat s'Arzola 'e Zerdanu
Sun sos massajos a manizu antigu
Dae sa paza seperande trigu
Pro su poveriteddu ch'est famidu.
Bragande cun s'Isteddu 'e Chenadorzu
Sos Sette Frades cantandesi in coro
Che cando in sa butega 'e s'arte issoro
Tessinde pinzos de preju e valore
Cun sos Vacheddos e Su Truvadore
De s'universu su ver'ascusorju.
48
Cuncursu 2014
S'Isteddu de S'Arveschida, apparidu
Tancat sa janna a sa notte, aperinde
Un'atera a su sole ch'est naschinde
Pro nd'ischidare sa zente assonnada
E deo conto su gosu chi dada
Ider su chi non bio essende ischidu.
S'incantu 'e su criadu, una pro una
De sinu sas cussorjas solianas
Sos bellos visos chi nos dant mattanas
Camineras de sole, isteddos, luna.
Salvatore Ladu - Mamoiada
49
Sotziu Peppinu Mereu
SU XELU
Su xelu ddu bisi in su bolare
andendi lestru chenze iscurare:
luxi prena e gioiosa
delicada e prena cummente una arrosa.
Una nui in custu mengianu
est manna cummenti un'aereoplanu
po si donai tottu sa paxi
chi s'ammancada ma si praxi.
Graziasa su xelu po is difficoltadisi
domandasa graziasa a chini bividi in custas disi:
Cristu Santu nostu sempri cun nosu
lassaddu sempri essi fantasiosu.
Biveusu imparis sa difficoltadi
po essi presciausu de custa edadi:
cuntentusu impari de bivi immoi
fottisi, po essi eroi.
Castia in attu
e beni beni: sogna su gattu
chi scarraffiada, ma su meli.
Nisciunusu est malu cummenti paridi
in su mundu tottu continuada e no scomparidi
graziasa a su coru nostu
e a sa trabballada su logu candu est nostu.
Claudia Lai - Carbonia
50
Cuncursu 2014
NON PODES PIUS...
Non podes pius oh chercu seculare
fagher'umbra a sa frisca funtana;
abbas chi trazzadu attesu ch'ana
bisos chi non poden pius torrare.
Passare oras amenas solìa
sutta s'umbraghe tou maestosu:
in sa funtan'a s'abbrazz'amorosu
magos e fadas in sonnos 'idia.
Unu foghu alluttu ses pesadu,
de s'iferru nd'haiat sa figura;
in dun'istante 'e sa tua friscura
unu truncu siccu b'hat restadu.
Idende covacare su nie
sa terra cun su sou biancu mantu
in coro m'est torradu su piantu
a s'ammentu tristu 'e cussa die.
Die cussa pro me de angustia,
ca toccàda trista m'est sa sorte
de ider in su lettu de sa morte
s'amigu pius caru chi tenìa.
S'in pensamentos bolo s'aurora
luminosa in chelu mir'ispuntende,
in mesu a tanta lughe andende
a manutent'a issu m'id'ancora.
Istracu, in caminos assolados
chirco a tant'affannu su reposu
ca s'andare m'hat rendidu penosu,
ammentos chi pius tristos sun torrados.
S'in sonnos mi frimmo a reposare
sutta cuss'umbra, in cussa funtana
ansìdu chilc'ancora ogni gana
ogni disiz'e poder'appagare.
Sonnio e m'ido cun cuss'amigu
sèzzidu oh chercu a s`umbra tua,
iscultende dai sa oghe sua
contados de unu mund'antigu.
Giovannino Manca - Siligo
51
Sotziu Peppinu Mereu
ALLIZADA IN SU TEMPUS
Intendio, su fele 'e su maestosu Maestrale.
Intendio, su lamentu 'e s'ispiga in s'artura.
Apo fatu faghere su caminu a sa natura,
sena adderetzare nudda a cropos 'e istrale.
Ismentigau apo sos ierros e sos istadiales,
cando froriant sas prìmulas e moriant sas rosas
e ti promitia una die de ti giùghere isposa,
meda in antis de bènnere a ti ddu cunfessare.
Pro sos modos gentiles, m'as giutu a ti bramare.
Pro sos carignos de amore, e sas tuas atentziones,
chi oe no ismèntigo e ti nde fatzo cunfessione,
ma chentza pretesas, solu pro dd'amentare.
Iscusame, sos mortos non si devent mentovare.
Ma si narant mortos sos chi non bivent prus..
Tando si los mentovo non fatzo perunu abbusu,
semper si tue no as finghiu mortos sos bios.
Tzertu, si non los abbas morint fintzas sos rios,
ma cando morit sa ena, bivet eternu su trainu,
su chin coro tou at fatu dimora pro destinu,
e niunu e nudda dd'at a podere iscantzellare.
Alberto Marceddu - Norbello
52
Cuncursu 2014
SU CABOR'E SU BENTU
M'at nau, caminendu in sa ìa
una picciocca pagu prus che pippìa...
De una sposa intendu nài
ca su bentu est biancu che lillu
cument'est su bistiri po si coyai.
De unu piscadori, basendu su fillu,
ch'est asullu cument'est su mari
candu friscu carinniat s'istadi.
Poi m'at nau unu pastori
ch'est bidri cument'a una matta
candu frisca aspetat su frori.
Ma, est arrubiu cument'est su xelu
candu sa dì salludat sa terra,
po unu messayu chi pinnigat su fenu.
Nieddu cument'est sa gherra!!!
Tzerriat timendu unu sodrau
chi a domu no est prus torrau...
Naramì...a chi deppu crei?
Tui ca ses mannu, de siguru ddu scisi.
Domandas a mei?
Ses tui chi ddu bisi:
candu t'imprassat, castiadì aintru...
de cussu cabori su bentu s'est tintu.
Aldo Marcis - Villasor
53
Sotziu Peppinu Mereu
NON PARET BERU !
Mama ditzosa 'e poetas e Santos
as dadu tita a Frantziscos e Dantes
e a tantos famosos navigantes
chi t'an bestidu de fama e de gloria
e arrean iscritos in s'istoria
Colombo chin Vespucci e sos ispantos
si contan galu de àteros mannos,
de s'Ammiragliu Doria e, si bi crese,
de Duran de La Penne e de Borghese,
chi solu in duos, in s 'urtima gherra,
an custretu sa barra 'e s'Inghilterra
a bestire de nou ùmiles pannos.
E non poto olvidare a Calamai,
su cumandante prontu a si lassare
morrer in sos abissos de su mare
chin sa nave, s'onore e chin s'ostinu,
però s'irgonza manna de Ischettinu
s'Italia nostra non l'at bida mai !
Inferros, gurgos, percas, oceanos
aberide s'intragna a che ingullire
tanta vilesa e fachide isparire
sas mantzas de infamia e disonore
chi uficialeddos de pacu valore ,
an imbratadu chin pedes e manos.
Ma pro fortuna, in sas dificultades,
eroicas virtudes essin a campu
e zente de gabbale in d-unu lampu.
chena bestire divisas de gala,
che "cireneos " s'ana postu a pala
sas ruches ispinosas de sos frades.
54
Cuncursu 2014
E in cussa grande gara 'e bonucoro,
naschida 'esesi in su mamentu grave,
sos primos a lassare cussa nave
sun bistados malaidos e pitzinnos,
custos, in veridade, sun sos sinnos
ch'in mesu a su ruinzu.... acatas oro !
Non paret beru, ma s'unda 'e s'amore
d'ùmiles valorosos "cireneos"
at cucuzadu difetos e neos
d'unu tzertu Ischettinu chena onore!
Santino Marteddu - Orotelli
55
Sotziu Peppinu Mereu
CANDU TI PENSU
Candu la notti ti pensu
sinn'allegra lu me cori
e mi torra chidd'amori
ch'era radigiadu e immensu.
Era immensu e radigiadu
folti più d'una cadena
e avà mi fagi pena
che un'alburu sfugliadu.
Aggjiu pessu lu me oru
in una notti vintosa
m'ha sfugliaddu chissa rosa
tenta contu che un trisoru.
Che trisoru tenta contu
chi spantava tanta jenti
e che soli trasparenti
mai vidia lu tramontu.
M'è tuccadda la cundanna
pugnalammi a li me spaddi,
avà arrancu i la me vaddi
cu l'eddài assai più manna.
Più manna 'aggjiu l'eddài
e più intoppi i lu caminu,
senza avetti più viginu
canta pena chi mi dai.
Si m'acchiaru i lu me ponti
pensu a l'eva che scurridda
e lu tempu si l'ha bidda
no mi torra mai li conti.
Li conti mai mi torra
di tuttu lu c'aggjiu spesu
v'aggjiu drentu un fogu accesu
chi mi muld'i la pittorra.
56
Cuncursu 2014
Si da luntanu mi pensi
m'è la notti di cunfoltu
la me balca approda in poltu
galligend'i l'und'immensi.
L'undi immensi galligendi
sempri affrontu la burralca
mancu felta m'è la Palca
sempri a te sogu pinsendi.
E lu mari ci sipara
a giumpallu veni mali,
s'era auddu a volti l'aIi
pa videtti la to cara.
La to cara pa videtti
buladd'era che pigioni
pa te scrivu li canzoni
pignendi li me sigreti.
Domenico Mela - Castelsardo
57
Sotziu Peppinu Mereu
NAVIGHENDE
Dugone de naviu in altu mare
in undas chi ti moven a donz'ala,
contivizos los giughes sempre a pala
ch'in s'arriscu ti ponen de affundare,
pisches mannos ti toccat de affrontare
in mesu 'e abbas mòvidas e mala'.
Da-e lontanu giassu ses partidu
atracchende bramosu in donzi poltu,
as fatu de sas òperas traspoltu
onorende sos tretos chi t'an bidu,
domos as addobadu in donzi lidu
e clientes ufanos t'an acoltu.
Da-e barca fatu asa bastimentu
cun marineris de Pelau espertos,
navigadu azis in mares abbertos
puntuales a donzi appuntamentu,
connoschinde sa mòvida 'e su 'entu
e de s'ispinta giusta sempre tzertos.
Sulchende in varia diretzione
sa nave as ghiadu a ispalta vela,
balta l'asa mantesa sa bandela
rispetend'e cun bona intentzione,
conchistende sa parte in su muntone
cuntentu 'e nd'aer nessis una tela.
Ma su tempus boltadu at in tempesta
e burrascas sa nave an intaccadu,
in sa meglia infustura b'at bintradu,
bentu furridu e ària funesta,
e dae s'abbissu cun ira molesta
Netunu s'afoghizu at doppiadu.
58
Cuncursu 2014
Cun pischecanes ghiradu at in tundu
mustrende cun sa bae donzi sanna,
brincadu at subra 'e onzi unnada manna
pro che jugher su naviu a fundu;
cherias bessire da-e su rotundu,
ma fit bene serradu e chentza janna.
Sùrvile malos de s'Oceanìa
t'an sutzadu su samben e bideas,
a su pressosu rùppere t'arreas
ca siccu t'as in bucca sa salia.
Canes marinos!... Peus de traschia!
De restare a galla oe ti peleas.
Fortzadu fis custrintu a s'approdu,
sa tzurma chentza doverosu gaggiu,
non podinde adempire a su pedagiu
ancoradu t'an sa barca a malu modu,
impedidu de fagher unu nodu
affundadu che ses cun s'echipagiu.
Giovanni Melas - Bonorva
59
Sotziu Peppinu Mereu
SI MERITAT MONUMENTU
Est sa crapa mannalìta
sempes siat beneìtta
ca su populu hat redentu.
In su tempus de sa gherra
nudda b'haiat paponzu
fimis tottu in bisonzu
de pane nessi una perra
ca che son' tott'in sa gherra
sos chi produin'alimentu.
Su latte fit su sustentu
De su popul'affamàu
Po sar vidas c'hat sarvàu
Si meritat monumentu.
Po la pasche' in sos pippios
O carchi 'emin'anziàna
Fimis mortos de sa gàna
Miraculu si semus bios
De zertu mortos famios
Si non fit dae cussa titta
De sa gherra s'iscunfitta
Fid'istada de su 'amene.
Sa Dea de su bestiamene
Est sa crapa mannalitta.
Tottu fidi a ratzione
Chentu gramos fin' de pane
Tottu cascande che cane
Sor viveres non be sone
Po vortuna in dun'ungrone
Fit creschende sa crapitta
ei sa proenda isquisitta
Es po sa mamma chi non fùidi
Po su latte chi prodùidi
Sempes siat beneìtta
Non b'had'atteru animale
gasi de bonu melèdu,
de passiessia e masèdu
60
Cuncursu 2014
ca ubbudit puntuale
nessunu li cheret male
dae tottu hat gradimentu
po cussu est cust'amentu
chi li 'aco chin rispettu
e meritat profundu affettu
ca su populu hat redentu
Michele Pireddu - Dorgali
61
Sotziu Peppinu Mereu
TROPU LESTA
lte bregùngia ite cosa mala
iat nau Santu Pedru candu dd'iat biu
no iat acutu a nasci su pipiu
no iat mancu donau u' corpu 'e ala
no iat acutu a ndi stupai 'e su niu
ca sa mama ci dd'iat giai abortiu.
In cielu dogna santu ddi fait festa
ma sa morti sua est stétia tropu lesta.
Bellu a si chesciai mancai siat santu
ddu cettat una mama disperada
ca su fillu dd'ant motu men s'istrada
e su tempus no dd'assèbiada su prantu
potàt scéti dex'annus pobereddu
candu dd'anti studau coru e cerbeddu.
In cielu dogna santu ddi fait festa
ma sa morti sua est stétia tropu lesta.
lnsandusu deu ita depia nai?
murrùngiat u' piciocu de bint'annus
ca su tempus dd'apu spéndiu po istudiai
sentz'acudi a fai is tràssas de is mannus...
Sa vida mia est istétia u' bellu pa'i
nàrada serrendu su murrùngiu
ma totu croxu e cun pagu ingaùngiu.
In cielu dogna santu mi fait festa
ma sa morti mia est stétia tropu lesta.
M'anti segau is Cogas a arresoja
su filu de sa vida sa die 'e sa coja,
duas dis apustis ca trint'annus ia fatu.
Spantada si ndi fiat totu sa bidda
po u'a fèmia fiuda prima 'e essi pobidda
e fiuda at continuau a bivi infatu.
In cielu dogna santu mi fait festa
ma sa morti mia est stétia tropu lesta.
Dèu apu lassau totu u'a famiglia.
Candu de ànnus nd'ia sceti coranta
e fiat prena de vida sa butìglia
62
Cuncursu 2014
su coru s`est frimau baddendu u' dillu
sonau ca fiada nasciu u' atru fillu.
Apu traixu is chi m'istimànta.
In cielu dogna santu mi fait festa
ma sa morti mia est stétia tropu lesta.
De u' séculu nd'apu biu sceti metadi...
Si parrit giustu morri a cust'edadi?
Cun Déus éusu fatu a mesapari,
ma issu s'at pigau sa parti bella
sa domu, su treballu, sa pivella
miga funt cun mei benius impari.
In cielu dogna santu mi fait festa
ma sa morti mia est stétia tropu lesta.
Certu. Bosatrus teneis meda arrexioni
ma a sessant'annus fragas 'e pentzioni
Apustis totu u'a vida de treballu
iat essi giustu arriciri su dinai
po nci passai su tempu a si spassiai,
ma sa musica at spaciau prima 'e su ballu
In cielu dogna santu mi fait festa
ma sa morti mia est stétia tropu lesta.
A mei mi nd'at pigau in su mes'e maju
a settant'annus non fiada s'ora mia
mind'at furau su gosu 'e is nepodeddus
arratza 'e brulla, arratza 'e traitoria.
Cumenti po'int cussus piciocheddus
essi prexiaus sentz'e teni aiaju?
In cielu dogna santu mi fait festa
ma sa morti mia est stétia tropu lesta.
A ottant'annus connoscis sa bellesa
de podi bivi sentza 'e pensamentus
no tenit prus valori mancu su tempus,
ma a cust'edadi ti morris po becesa.
Una guta m'a pigau totu in d-u' orta
fia bia ancora a mangianu, a meri fiat morta
In cielu dogna santu mi fait festa
ma sa morti mia est stétia tropu lesta.
63
Sotziu Peppinu Mereu
A norantannus ses torra u' pipiu
narasa tondidadis, piscias su letu
e nemus si permitit de nai cosa
poita totus portant arrispetu
poita s'importanti est de essi biu
e sa vida est lébia che folla de rosa.
In cielu dogna santu mi fait festa
ma sa morti mia est stétia tropu lesta.
E deu ca fia acanta a arribai a centu
de essi de mei e totu 'u monumentu
po spaciai no fiat u' bellu momentu
po minci po'i in d-u' stampu de ciumentu.
Nanca is becius funti meda mannus
ma deu iat bofiu bivi atrus cent'annus.
In cielu dogna santu mi fait festa
ma sa morti mia est stétia tropu lesta.
In cielu totus is santus fainti festa
ma dogna morti est sempri tropu lesta.
Samuele Montisci - Cagliari
64
Cuncursu 2014
S'ARCUSA
Cando in su barantasese
fini prenas sas piatzas
sos cìarlattanos de ratza
beniana a chimbe a sese
chentza bottinos in pese
e cun paga cosa in matta.
Ca fi manna sa pelea
pro buscare sa cadrea.
Pro buscare sa poltrona
finas a Deus han traittu
bi l'hana postu s'impittu
ca s'idea tza fi bona
finamentas in satrona
sa politica hana fattu
como de nudda s'incuran
traittores che a Zudas
Tando in su barantasette
sa costitutzione han fattu
a su populu distrattu
si lu han postu sutta 'e pese
e de Reìnas e Rese
nde han fattu disacattu
ca regnare non depiat
solu cussa dinastia.
Cussos tza fin metzorados
ca dae meda fin regnande
custos solu manigande
sun dae cando sun bintrados
tando fini fadigados
como sun che porcu in lande
e de chie hat dadu su votu
sind'ammentan cando est mortu.
65
Sotziu Peppinu Mereu
Dae cando sun bintrados
s'han fattu s'immunidade
pro podere mentzus furare
chentza essere cundennados
gai si sunu ingrassadps
chentza tenner piedade
issos miliardos furan
chentza brincare cresura.
Chie pro poder campare
est a furare andadu
lu han certu cundannadu
ca non est parlamentare
mentzus biste fadigadu
ca non si podet sarbare
ca sa catza ei sa fura
est a chie l'hana in ura.
Tzertu non pensana a tie
ma a s'insoro interessu
si andada a tie e travessu
tottu a su prus si nde riene
si andada de travessu a tie
a issos li faghe pressiu
sia binu nieddu o ruzzu
han sempre oriolu a su matuzu.
Sas prommissas fini tantas
chi mancu issos bi creiana
tottu su chi promittiana
tzughiat curtzas sas ancas
in bidda mia sas tancas
pro sos votos hana dadu
ca pagu li est costadu
su komune han'orfanadu.
Cussas tancas chi una orta
fini tottu a komunale
hana fattu cosa torta
a che las ispatzettare
ma depiana accuntentare
66
Cuncursu 2014
sos chi tzughiana a costas
e pro si dare resone
sind'han lassadu un'uccone.
Promittian chi su Tirsu
totta s'abba chi attiada
arroccare la depiana
pro nde tennere piusu afficcu
gai onzi poberittu
impreare la podiada
in su sartu pro abbare
pro aer logu a triballare.
Però s'abba a su mare
ch'est andada chena vallu
e chie cheria triballu
si ch'est devidu emigrare
abbitzandesi 'e s'ingannu
non podiat abbarrare
lassadu hada a mala gana
mutzere, fitzos e mama.
Elettore tene a mente
cando andas a votare
mi non ti lessas brullare
dae cussa brava tzente
chi cun boghe cumbinchente
chircan su votu e lir dare
s'increas chi los as votados
si nde sunu irmentigados.
Hana dadu pro sos votos
s'italianu confine
bruttos canes cossoines
nessi rispettu e sos mortos
gobbeddos e anchi tortos
dannistos e manighiles
pro issos fit manna cosa
sa politica merdosa.
67
Sotziu Peppinu Mereu
In debbadas est bistadu
sos sordados chi sun mortos
sos politicos cumplotos
cun baffone disumanu
in Napoli su pianu
tza bi fin puru sos nostros
ei sos mortos in gherra
si ortana in sutta terra.
In su Carsu onzi pedra
podet contare un'istoria
sas trinceas finì prenas
de meda sambene e gloria
de Caporetto memoria
de Coldilana sa vena
de su sambene chi hat curtu
onzi cutzone hat infustu.
Su Piave chi a murmuttu
sos ritzolos los retziada
ei s'abba si tinghiada
de lamentos e de lutu
onzi prantone hana infustu
cun s'insoro balentia
tottu est bistadu e badas
s'isettu de medas mamas.
E cantas e cantas mamas
han debadas isettadu
su fitzu issoro istimadu
e cun lamentu lu giaman
a oju a chelu han pregadu
intro su coro sas bramas
e lagrimas in su chizu
no nd'han prusu in assimizu.
Antonico Motzo - Bolotana
68
Cuncursu 2014
PUITE SU CORO INTREGAS
Iscurta a mie donosa,
s'anima no la vendas po dinare;
sa vita est ispantosa
solu s'istimas e aches istimare:
cantu es bellu, oddeu
a t'intender mutinde, amore meu!
Deus t'hat fattu ermosa
e po cussu la depes lautare;
vinas in s'allegare
sa voche tua est armoniosa:
mai po disizu veu
ponzas atteru coro in anneu!
Sa vita es pacu cosa,
cando la picas de mala zenìa;
si ses frore de rosa
puite ti aches frore de tirìa:
mai s'amore veru
isposat sentimentu passizeru!
Puite su coro intregas,
a fura e chin trassa ingannosa
e in faulas negas
chi has isortu su ligazu 'e isposa:
yurande notte e dìe,
tue ses su bene meu, istimo a tie!
Un amore in trampas,
no es mai d'afettu unu disizu;
dolat intranna e pizu
e ti sinnat su passu, cantu campas:
dande dispiagheres
a chie naras ch'istimas e non cheres!
Allega a sa crara,
lassa perder s'amore a mesanìa;
dàili mente e lara
po iscrier chin issu poesia:
in manera chi crasa
siat certesa 'e gosu su chi dasa!
Salvatore Nanni - Orosei
69
Sotziu Peppinu Mereu
NOTTI E DI'
Calani l'umbri longhi di la sera
e li culori pa incantu paldini briu,
lu soli torra straccu da undi s'era
pisatu, la mani chizzu, beddhu iu
chi lu bugghju, a di notti, arrea pricisu
spignendi di lu dì lu sò sorrisu.
Ghjugna mani chistu miraculu avveni,
a lianti, suai, lucica l'aurora,
la natura, illu mumentu, si culora
e coa, di la notti, li sò peni,
tuttu'n tundu so luci e soni,
ghjochi di steddhi e sbeuli d'agnoni.
A lu soli la ita s'incendi,
s'animigghjani cussogghj e cittai,
ghjugna locu riluci e splendi
e lu dì pari no compria mai
ma a chiddh'ora l'astru si prona
lachendi la luna, di lu celi, patrona.
E apparini, cussì, speri palduti,
di campanili e turri si sciutani misteri,
tocu di campana e spiriti in carreri,
reuli vagabundi di biancu istuti,
omini pinsosi e pienti di minori
ill'occhj la tristura, in cori lu dulori.
Cussì la notti pruzzedi, olfana di soli,
in sulitai ghjoca la sò paltita,
lu primmu a sciuttassí è lu pastori
a li primmi raggi ch'attraessani la pultita
ammintendili chi è ora di mugnì
e chissu è lu signali ch'è fendi dì.
Chistu è lu chi avveni ill'inticatr'ori,
notti e dì si dani la mani
ghjugnunu cu li so culori,
e arru e branu ghjà la sani
chi la diversitai no è un difettu
70
Cuncursu 2014
ma è lu chi rendi tuttu perfettu
e si lu mundu è cussì variu
è palchì tuttu è neccessariu.
Di lu Criatu è misteri tuttu
ma tuttu è avveru currettu,
cal'à cussì ulutu
aia in capu un gran progettu
pinsendi ghjugn'ultima soluzioni
pà arrià all'assoluta perfezioni.
Giovanni Maria Pala - Tempio Pausania
71
Sotziu Peppinu Mereu
IERRU PURU EST POESIA
A s'isgiariàda 'e sas aèras
d'una notte ammantàd 'e iddìa
sol'eo su silèntzìu segaìa
andènde in sas frìttas caminèras,
immaculàdas sutta s'astraòre
ìdrinu 'e su frìzidu manzànu
c'a su prim'ispuntàre soliànu
estìat sas bàddes d'ùnicu isplendòre
tìntas de incantèvole majìa
esaltènde che die premiàda
cùdda solidùdine imprateàda
sùbra ogni mundàna fantasia,
pesènde che intzènsu a sa lugura
sos nìbidos tepòres de su rìu
dìligos che in chèlos de istìu
sas càndidas nèulas de s'altùra.
confusos cun balsàmicos alènos
ch'ebbìa cùssos àttimos vivìan
ùe incrèdulos sènsos avvertìan
in messàggios divìnos che terrènos
a làcanas d'un e àtera realtàde
cuntrappòstas in cùssos momèntos,
cùddos nòbiles benèficos evèntos
cun sas presèntzias de s'umanidàde
c'ògios pròprios non tenìan merìtos
d'assìster inìe e cuntempràre
tale immènsu, po càntu laudàre
nde pòtan cun rùzos iscrìttos.
Pinuccio Pinna - Usini
72
Cuncursu 2014
SI TORRO A BIDDA
Cando penso: si torro a bidda mia,
cantas cosas mi 'enint a sa mente.
Bido logos... ue minore fia,
chi non vìsito tropu frecuente.
Nde so' lontanu e cun sa fantasia
b'ando allegru e bido bella zente.
Mi los ammento, cando in gioventude
mi nd'ant cundidu 'e raras virtude(s).
Si bi podia, torrare a piseddu,
pro giogare cun sos cumpagnos mios.
Cùrrere isculzos in su giardineddu,
cuntentos d'èssere ancora 'ios!
Lezeros meda fimis, ca nieddu
fit bistadu su fàmine e a rios
curriant làgrimas, ca dies funestas
de gherra, passadas fint sas tempestas!
A cussos logos, torrar'in veridade,
si fit possibile, andare bi cheria.
Est unu logu 'ue b'at caridade,
ch'est doda pius manna 'e zente mia.
Sunt ricos, de sa mezus dignidade
e cando passant...ti mudant sa via.
Dia cherrer, ma dev'istare in tzitade,
ue sa vida at paga calidade!
Amus connotu àteros sentimentos
e-i su rispetu fit règula sana.
In tzitade che tirant malos bentos,
non si càlculant, ne saludos dana.
In bidda aimis movimentos lentos,
ma 'e fagher su dovere fit sa gana.
Giambad'est como, forsis, puru inie,
mai che inoghe...ch'est fritu che nie!
Ma oras tristas dan'ammentos caros
e si bi penso...mi brincat su coro:
torrare cheret a ue versos giaros
intendimis dae poetas d'oro.
73
Sotziu Peppinu Mereu
Issos, de 'ighinados fint sos faros
e de sa discendèntzia mi nd'onoro.
Cantaiant d'amore e onestade,
benes pretziosos pro s'umanidade!
Salvatore Pinna - Cargeghe
74
Cuncursu 2014
S'ISTRIONE
Oh Sardigna chilca in sa memoria
is invasores de sa preistoria,
poite non mi narasa s'edade
cant'annusu i tenede su nuraghe,
i sel naschida in s'antighidade
cullada de is ondasa de su mare,
i tenese unu sole isplendente
e populu ospitale e accogliente.
A manzanu candu biu sa lughe
pensu a Cristusu e mi fattu sa rughe,
l'at mandadu deusu comente umanu
l'ana crocifissu ca fu cristianu,
si fiada ebreu oppure musulmanu
in deliana segadu sa limba e una manu,
in sa vida nixiunusu est perfettu
moridi in sa rughe a su postu de su lettu.
Candu iscriu su miu testamentu
affidu s'anima mia a su entu,
in su xelu imparana a bolare
e cavalcare is ondasa de su mare,
a sa risurrezione torrada in terra
pronta a cumbattere un'attera gherra
s'esperienza le fattada de guida
po cumbattere in s'attera vida.
Giovanni Antonio Pisanu - Tertenia
75
Sotziu Peppinu Mereu
S'AUNDADA
Chelu nieddu e cuguladu,
pioende chena sessare,
sidis terrenu podiat catzare
colpu 'e abba mai frimmadu.
Poi de dies, su manzanu,
mare e chelu in abbolottu,
assucconàdos fimus totu,
Gesus' meu Soberanu!
In su trabàgliu che 'a onzi die
e sighinde abba a tracheta,
dimandende a zente isperta
si deviamus nois fuire.
Abba istentada e sighìda,
sos piseddos chena pasare,
e nendelis de apasigare
gioghittos fena a s'essida.
In s'ispestantu unu piseddu
pabìru pedit de pinturare,
cominzad'at a mi mustrare
chelos nieddos che su tintièddhu.
Eo costoia chi fia angustiada,
in su balcone tott'inciarados,
preguntende parian avocados,
èo assebeltende, ma fia ligada.
A su sonu de sa campana
paria ja sera iscurigada,
in s'aera fid'annunziada
dilgràssia manna e soberana.
Babbos e mamas fatende a bolu
supridos sono a si coglire
fizos e fizas a los recuire
brinchende trainos in d'onzi oru.
76
Cuncursu 2014
'Ettende abba fid a caltos
su dilùviu tempestosu,
lampos e tronos chena pasu,
s' Universale in sos ammentos.
Eo in domo jà fipo in altu,
chin su piséddhu jà recuidu,
ma in fora bi fi' su mundu
de zente amada chen'asetu.
Pariat de idere 'ijòne mala,
sirenas sonende e rios currende,
boghes chi zente fimus pèrdende.
Como m'ischido ed est passada!
Apidu amus sa rispòsta,
sos fàdos malos fini sinnados,
jà fit abberu, maleventurados,
mortos fin frades de terra nostra!
Chin su pedine de zente 'e domo,
proaia a faeddhàre chin neta mia,
poi 'e un'iscùtta chi in ansias fia,
ischidu 'nd'appo de chie aio in coro.
Ispàlghidos fini totucantos,
chie in domo sua impedinudu,
chie dae su riu 'ogadu arrocadu,
a taIdu mannu los ana ajuados.
Oras malas s'an coladu
s'abba intràiat chena picchiare
e resessiada a 'nde imbolare
poltas e benes chi at imbiccadu.
A s'ispessada s'est intesu
unu tzocu chin muida manna,
pariana contos de minnanna,
preghende fimus su coro 'e Gesu.
Issos in subra accuccàdos,
su mare pienu in sas carreras,
sas machinas parian bàlchittas,
a s'andhalitòrra e atremenados.
77
Sotziu Peppinu Mereu
Cando su riu est abbasciadu,
chin volontade son supridos
òmines 'onos, parian chèrridos,
dae su chelu s'ajudu accudidu.
Tempus b'aiat de s'abbizare,
distruidos fin sos sacrifìtzios,
chi aian fatu in medas annos,
tando fid ora de ringratziare.
Su s'incràs, a manzanada,
mobbìlia e traste fin'imbolados
pienos de lùdu e frazigàdos,
muros ifustos e zente isporàda.
Ma no fid die de prammizare,
de acontzare totu sas cosas,
sas vidas fini pius pretziosas,
fíd'ora 'e piànghere e saludare.
A nos istrìnghere a famìlias colpàdas
fid importànte in cussu momentu,
sos benes peldidos in su tulmentu,
fin cosa paga, pessende a sas vidas.
Su mundu intr'eu est acudidu
chin ajudos o chin pessònes
a illebiare custos dolores
e no est como totu finidu!
Biddas meda si sono apènadas,
a chie podiat acudire prima
a imbiare benes, fina dae Cina,
immentighende sas campanas.
Poi de sas lagrimas e de sos dannos
son sighidas sas cuntièrras
chilchende culpas e mancàntzias
de amus àere pro medas annos.
78
Cuncursu 2014
Ancora logos semus acontzende:
istradones, pontes e meda domos,
timende de retzìre affrontos,
'nde semus sempre chistionende.
Sa natura si est cuntrastada
e pro 'alanzos no si cunsideran
sos printzìpios chi la cumandan,
issa est potente e l'amus pagada.
Onzunu, dae custa malesaura,
segundu impreu in su trabàgliu,
cumprèndhere devet si b'at imbaglìu
e issinzare 'ene onzi criadura.
Deus nos salvet dae sas timpestas,
nos ajuede a remediàre,
a no torrar'e a imbagliare,
e chi potemus fàghere pius fèstas!
Vanna Sanciu - Buddusò
79
Sotziu Peppinu Mereu
FÈMINA 'E BARBAGIA
Labiolos, teruddas e tazeris,
'iscos de casu e palas po su furru,
las bendiat cun d'unu caddu murru,
unu òmine 'e Barbagia, paret deris.
E bèrtulas, chiliros, canisteddos,
bàttiles bellos, riccos de colore,
indorados cun tramas de lentore,
tèssidós a sa lughe 'e sos isteddos.
In telarzos ordidos de mudore,
da' fèmina ch'in coro at sa ricchesa,
sola in domo, de raru amore inchesa,
lughente che ispiga de laore.
Su ranu, bellu e riccu che siddadu,
cun sas laras pintadas da' sa rosa,
sos pilos dae una mariposa,
che funtana bundante at allatadu.
In su coro cant'est su pensamentu,
po cuss' òmíne a caddu chi ch'est fora,
de l'abbratzare est isettande s'ora,
si b'at novas dimandat a su 'entu.
Ma non connoschet rittu cussu coro,
est ammuntadu 'e seda e de belludu,
ispantadu su chelu addurat mudu,
mirande de s'isposa su decoro.
'Enit s'iscuru e dromidi su frore,
sa mama invocat santos e Maria,
làgrimas, gosos e pregadoria,
po chi torret a s'ama su pastore.
Sos ànghelos 'olande in s'aeras,
dae chelu an intesu su lamentu,
cun lestresa leadu s'an s'appentu,
de dare vida a sas chi fin isperas.
In su caminu ormìnas de sentidos,
e bramas de affettu, de disizu,
a manu tenta 'olade mama e fizu,
curride umpare, sezis torra unidos.
80
Cuncursu 2014
Ses fèmina galana, ses donosa,
pilos d'oro che làcanas in chelu,
sos ogros birdes paren d'un anghelu,
ses mama, mere 'e domo, ses isposa.
Antonio Sannia - Bortigali
81
Sotziu Peppinu Mereu
CA SES BELLA TONARA
Ocannu puru in sa poesia
ca totu ti saludo veramente
che puru che cuntentu su Messia
ca totu che su tou su torrente
comente una mamma sorridente
tottu ses bella ses in sa clesia
ca ses bella Tonara ses fioria
in terra sarda de custa armonia
Basilio Sarai - Samugheo
82
Cuncursu 2014
POVERA ITALIANA NATZIONE
Povera Italiana natzione,
prima fias sa prus invidiada,
oe puru in totue ses famada:
Ma po imbroglios e corrutzione.
Partimos dae sa classe dirigente,
chi devet essere sa prus esemplare,
ma isperperan su publicu dinare:
A discapitu de sa povera zente.
Cando faghene campagna eletorale,
illudene totus chin tantas promissas,
ma cando tenen sas poltronas fissas
non pensan prus su poveru mortale.
In sa regione o in su parlamentu,
tenene totu a dispositzione,
su poveru in disocupatzione:
Est avilidu tristu e discuntentu.
Tantos babos chi an fizos minores,
son bivende in tristura e in turmentu,
pensende a procurare s'alimentu:
Chin dignidade e non che petidores.
Cussos de custos males non s'incurana,
sa paga issoro es bundante e sicura,
non si birgonzana de tanta brutura:
Cando podene a manos prenas furana.
Sono uguales totus sos colores,
no importat si est ruju o biancu,
si an sicuru s'issoro fiancu:
No intendene lamentos de dolores.
Su poveru po bivere dignamente,
como est torrande a s'emigratzione,
classificadu no est che persone:
Est solu abandonadu e impotente.
83
Sotziu Peppinu Mereu
Sos politicos senza dignidade,
prosighini incurantes de su male,
tantu sa paga issoro est uguale:
Aprofitana in donzi facultade.
Isperamos chi cambiet su bentu,
ca prus in bassu non podim'andare,
de totu coro cherjo augurare:
Chi torret s'armonia e su cuntentu.
Cosimo Secci - Meana Sardo
84
Cuncursu 2014
A TONARA
Ocannu puru felitze ammentu
rendes pro Mereu o Tonara
e onzi poeticu argumentu
illustret sa figura sua cara
de Mereu su gloriosu testamentu
ammenten tottu che opera rara
chi cun sa manu sua at iscrittu
l'ammenten cun giustu meritu
Donz'annu a sa festa 'e su turrone
preparas Tonara cun allegria
isfruttende sa bell'occasione
de ponner in mostra sa poesia
gai a onzi sardu li propone
de isprimer sa musa a zenìa
chi t'iscrian da tota sa Sardigna
pro te Tonara ca ses digna
S'impronta chi Mereu t'at lassadu
la soles sempre cunselvare
patrimoniu c'as ereditadu
mai lu podes ismentigare
su fitzu 'e s'Elicona amadu
ca nisciunu lu podet negare
sempre lu siat oe che a poi
cun amore veru lu costòi
Costòi tottu cun ver'amore
che bonu segretu in sinu
ca tottus ti faghen onore
ammentende a fitzu tou Peppinu
ca issu cun veru fervore
at abeltu 'e sa musa su caminu
caminu chi potas prosighire
cun ateros zovanos in s'avvenire
Ses tottu e Tonara fentomada
ca in te sa zente es laboriosa
po su turrone sa pius famada
distinta in pius de una cosa
85
Sotziu Peppinu Mereu
a su tribagliu sempre dedicada
zentile a s'istranzu amorosa
Tonara cun simpatia e rispettu
jà ti saludo cun tant'affetu
Giovanni Sedda - Gavoi
86
Cuncursu 2014
SA DISPEDIDA
Bae in ora bona izu haru,
trattenendem'in s'abbrazzu mamma,
finzas homo diat ponner reparu,
ma hando s'ateru triballu bramat
issa lacrimas est ponend'in craru:
dolendesi ha biet tale dramma.
A santos tottus promissas est dande,
si gal'in bida mi biet torrande!
Trista he nue, oje, la so biende!
Motibu mi benit de illepiu,
imprevistu rientru promittende:
de su minore ishire hat deppiu,
premiu de ishola hi l'attendet
po aer atu menzus presepiu:
Sos babbos de ses izos emigraos
da sos nepodes prestu bisitaos
<<Ahiebos semper bibos izos mios
gai mamma tenet honsolu mannu.
Mancari in lacrimas sos addios
a manera ahie nessi donzi annu,
de che torrare hun tottu sos crios,
e non mi promiteas hun ingannu.
Sa vista mi torrat in prus luhore
si de rientru vostru piho sentore.
Mamma oje s'hat bidu su regalu
hi semper aviat a prus disizu:
su telefono non tenia galu,
po bohe prus accurtzu de su izu.
Su hi intendo non siat de malu,
in sarvamentu 'e tristu fastizzu!
Notissias hoente Deus heret,
ha de nois est issu su mere.
87
Sotziu Peppinu Mereu
Galu un'abbrazzu po bos lassare,
liberos in su terrenu destinu.
Humprendende hi depies torrare
a ube su triballu est continu.
Prehadorias po bos ahumpanzare
hando b'est passos longos de haminu.
Dàzebos attentu, izos istimaos
da s'attobiu de mal'afideaos!>>
Tore Soru - Gavoi
88
Cuncursu 2014
PAPA FRANCISCU
Fattu anti Papa Franciscu
beniu est da s'Argentina
sa vida sua ponit a riscu
po curai mellus sa dottrina.
Omini de paxi e animu bonu
po distribui beni sa ricchesa
in su coru ddu teni de donu
po chi respirit sa poberesa.
Trasparenti po sa beridadi
a conoscenza de dogna mali
de su scunfortu in sa societadi
in su mundu interu e tali.
Po podi bivi beni in su mundu
e dottau de bonu programa
po toccai is crais de fundu
po cumbatti sa mala trama.
lspirau de bonu cristianu
riccu de saggezza e amori
po costrui in su modu sanu
siat aggiudau de su Signiori.
Non si stancat de predicai
de usai su bonu rispettu
po chi ogniunu pozzat gosai
in custa terra tenit dirittu.
De custu nou eventu
in su mundu est osservau
de isperanza e cambiamentu
da Franciscu est su predicau.
ln su mundu est aggradessiu
po sa sua imposta manna
de s'incarrigu e minesciu
onorau da dogna mamma.
89
Sotziu Peppinu Mereu
Ddi augureus longa vida
de saludi sempri prenu
chi s'imposta sia cumprida
po torrai mundu serenu.
A Franciscu cantu in rima
po sa saggezza cristiana
deu ddi offru fiducia e stima
portit beni a sa razza umana.
Savino Spiga - San Sperate
90
Cuncursu 2014
SETZIONE REGIONALE – VERSOS LIBEROS
91
Sotziu Peppinu Mereu
92
Cuncursu 2014
A MAMA MIA
Ti prangiu, mama mia chi m'as lassau,
dogna dì ti prangiu ca abastanza non t'apu stimau,
vida de sa vida mia.
In su sonnu t'apu biu ca ses torrada e t'apu basau;
prangesta mera e cun dolori po t'essi agatada
sola in mesu de murus arrutus
de sa domu aui seus nascias.
Ti cerriai cichendidì in mesu de is rovinas,
andendi a che tui e non as prantu prusu.
Una pipia orfunedda
de mama e 'nu babu fridu
e pagu presenti in sa vida tua;
una mama mandara de Deus
as connotu de pitichedda;
issa t'at cresciu e istimau
cun is manus amorevulis de su coru.
Cant'abisungiu at passau sa familiedda nosta!
pobiritteddus in dunu logu desolau, sperdiu.
Cantu spigas eu fatu impai, mama mia, in su mes''e lampadas!
Su sudori a istiddius, fei de totu po ghi sa spiga mia
fessi manna e bella coment''e sa tua.
Sa cuntentesa mia candu ti meravigliasta de mimi.
In dogna cosa bella de Deus ses presenti,
angiulu de is pipius mius
m'as lassau in su dolori, ma in su cunfortu de Gesusu.
Iscultu s'anima tua chi mi fueddada
m'ara bolli nai a non prangi prusu..
Silvana Aresu - Santadi
93
Sotziu Peppinu Mereu
UMBRI
Tanti cappitti nieddhi
svilgani illa carrera buggjosa
undi si pesa un attittu.
Lu dulori s'à furàtu ancora li làgrimi
e lu cori è divintàtu di pétra
palchì no proia più
un sintimèntu d'amori.
Passòni chènza cuscènzia e chènza Déu
ani dizzìsu
di no lassà manc'unu signàli
palchi nisciùna manu
possia lampà un fiori illi palcùssi
chi s'àni inguddhìtu ancora li pinséri.
Fèlma solu calche ùmbra
pa invuccà lu paldònu o la 'indìtta.
E pa l'omu no c'è viritai
mancu illa mòlti.
Piero Bardanzellu - Santa Teresa di Gallura
94
Cuncursu 2014
DUDAS E... ISPERAS
Est giaru
su manzanu, su chelu
nettu, chena nues...
Proite duncas ti preguntas
si galu potant èssere
dies de amore sas nostras
e de passionu?
Unu frore
non si dimandat
s'est bénnidu su tempus de frorire,
frorit s'in laras intendet
su caentu 'e su sole
o si lu ninnat amorosa
una bàula 'e 'entu,
puru si no est beranu.
Est beru ch'est menzus
a si lassare
intames de non s'èssere
abbojados mai!
Ma non fetas però
chei cudda 'olta
chi cun su rossetto,
lasséndemi, in s'ispiju
aias iscrittu
de mi cherrer galu 'ene.
Ammenta chi
fintzas sas istellas sunt
mìseros pertusos bóidos
da inue però paret chi colet
sa lughe 'e s'infinidu,
pro lòmpere finas a nois.
Antonello Bazzu - Sassari
95
Sotziu Peppinu Mereu
PIBIONIS DE ORU..
Pensamentus nous..
Trulus.. spollincus..
Deu no!
Pilus de oru..
Fradi miu,
Deu no!
Pensamentus de oru..
Deu eia!
Pibionis de oru
Tippius a pari
Pendint a terra
In tronis de oru.
Tronis de oru
Pendint a terra
De fundus carrigus,
De fundus in filas..
Longas e derettas..
De bingia sola,
Birdi, de munzionis
Antigus chi suint
In terra giusta!
Fundus spollincaus
De pampini birdi
Po ponni asutt'e soli
Tronis de oru.
Pibionis de oru
In binu cristallinu
In butteglias prenas
lmpari a pensamentus
Rexinaus in celu bonu.
Pampini birdi
Lassau a ingroghiri
Po i' brebeis, petia
Spollinca abettendi
De floriri un'atra borta..
Pensamentus nous,
Trulus e spollincus,
96
Cuncursu 2014
Comenti a omini antigu,
Postus asutt'e terra.
Deu no!
Pibionis de oru..
Anima' bonas
Rexinadas in celu.
Deu eia!
Giovanni Bellisai - Selargius
97
Sotziu Peppinu Mereu
CUMME IN BOOMERANG
U ciöve u l'aiva aregalau
freschessa a mattin
e u muschio de prie antighe
u l'èa divegnüu verde smeraldo.
Dexidiova stò sula pe in mumentu
dopu belle paule d'amù
u cö u l'arestova cuncentrau
'nta so nöa bellessa.
L'èa bellu caminò
'ntu silensiu
e nu so perché
m'uaiva ben pe cumme sun aua,
libera de sercò de piaxai ai otri,
cunsapàive de mè imperfesuìn,
de mé scunfitte,
favurendu u canò de dulure
versu u mò, pe lascioio anò
pe sentime libera.
Dexidiova spantegò
rivi de calù
cumme fa u “Sù” dell'amù
ninte dai otri me aspéitova
me abastova quella emusiùn
de sentimentu
perché cumme in boomerang
u saiè rìturnau. . .foscia
forte cumme u muschio de prie antiche
bellu cumme a freschéssa da mattín
dopu u ciöve.
Amiandu “ntu sé sercova i mé angi.
Mariatina Battistina Biggio - Calasetta
98
Cuncursu 2014
IN ONORE DE PEPPINU MEREU
Mi gherizisi leade s'isperanzia,
s'ispassu, sa cosa più bella de sa pizzinnia;
ma deo sigo s'andela de sa vida cun corazu et onestade;
Mi gherizisi arruinade
ma deo happo tentu insegnamentu de bonos sentimentos
dai mama chi narat sempre: “ totta sa zente ajouade!”;
Mi gherizisi furade sos sonnios mios,
mi hazis nadu “lassa sa tua poesia”
ma deo, ispero chi cumprendide,
happo sempre s'ajoudu de nostru Segnore
et po cussu, cun forza et recreu,
ando innanti cun onore.
Ohe, cun s'affettu prus mannu de su coro et meda umilidade,
so partecipende a su cuncursu de Tonara,
intituladu a “Peppinu Mereu”,
giovane poeta sardu, chi no poto irmentigare mai,
ca issu est su più lughente
tra sos isteddos de s'intreu firmamentu
faru de lughe po s'intera umanidade.
Giovanna Antonella Boette - Alghero
99
Sotziu Peppinu Mereu
MALINCONIA
Su langori tou m'iscorada,
Sento unu boidu chi m'opprimit
Boghendimi s'alenu
Non m'attrivo abbaidaremi su chelu
Chi unu tremizolu mi leada
E mi solobrat s'anima
Sene podere acattare paghe
Tottu inziru a mia est mudesa!
Su coro isdobbada e tentada sa ripresa
Pro istesiare custu triste momentu
E prego su chelu chi mandhede unu entu
Pro mundhare custa malinconia
E l'isperdere in altu, in sas nues
Pro chi su chelu la possat subire, gittendesilla.
Malinconia, comente una fozza in su entu
Tue mi giuches via!
E comente unu fiore alligau
Falo sa conca e piango!
Augusto Boi - Cagliari
100
Cuncursu 2014
DE SU CORO SU SENTIDU
Cando a chitzo
tocat lughe a sa ventana ,
mi fuit de su sonnu
s'urtimu cabudu 'e unu bisu
Non m'arregordo chi fiat frocando
o chi fiat frore 'e mendula ,
su chi mi frandigat i' manos
Seguru est...
ca aperindo is ogos
apo bidu un'iscampiu 'e sole
E intendiu in buca unu druche sabore.
Est in cuss'ora chitzulana chi de chelu
ruent majas in petorras de sa terra
E in s'ebra lughent sogas de arangiolos ,
che seda tessia in pannamentas de vida
Est nuscu de frores mi passant in nares
chi m'imbriagant ....e m'incantant.
E de su coro su sentidu, est su
chi intendo po cust'alenu 'e sole... in cuss'ora
Cando a chitzo... s'acrariat lughe
..... ..a sa ventana .
Rosa Corongiu - Atzara
101
Sotziu Peppinu Mereu
IN DISTERRU TRASTAMANDE...
Cun sentidos in gherra
trastamo deo disterradu
peri caminos de apprettu
cun passos mori - mori
isperantziende poder torrare
in sinu a terra nadia:
"Bantzigu issa de primu albore!
Chentza asseliu ne accunortu,
buscadore de sustentu
in antzenos terrinos
no apo cussentzia giara
bivende addae lacana tirrena.
Apo lassadu terra 'e naschida
cun abitu, familia e traditziones
atzesu de isperantzia...
a ontz'isterrida 'e passos
m'assaltiant dudas d'esser partidu
cun sentidos bola - 'ola
pro incuntzare su nudda
gia' connottu "sunessi"
cando fia padronu
de me in terra sarda!
Bivende in spatzios anneulados
chentza sole amigu
ne isteddos lughentes,
trastamo tempus bajulende sentidos
cun ammentu de muzere e fizos
abbrazzados in domo de amargura
cun sustentu de pane istantiu
fermentadu in lagrimas innotzentes!
Peristantu... mirende attesu
trastamo a s'enidore
pro m'ider ficchidu in s'isula
brottada in mare tirrenu...
sighinde lughe indittadora
a primu apusentu de mai
olvidada terra mia "semper" nostra!...
Filippo de Cortis - Sassari
102
Cuncursu 2014
PRO ANTONI PÌLLARU
E chertoranne
sicuras urminas nadìas
tue as apertu,
o Antoni,
annatthas nobales d'isperas
pro sos sardos carrales
de custas cussojas anticas.
Ma oje
apprantados d'isporu,
battileddos de carrasecare
issoccados
dae meres istranzos,
son perdenne sos sardos
sa chintorja de s'identidade.
E galu
non si pesat
dae custas muntagnas abradas
unu nobu balente
chin su coro 'e brunzu
chi sia' de tene
e de nois
su mindicadore.
Giuseppe Delogu - Orune
103
Sotziu Peppinu Mereu
DRUCHE MELODIA
Falat sa mudiesa
tot' in d-una in tundu a noi.
E fungutas miradas
ischidant sos disizos
Che foza lizeru mi sento bolare
in cussa druche melodia
ch'ifeschidu m'at su coro
So chentza padronu ,
in custa note perdularia
ufrana de isteddos, cando sas laras
tuas, serentant sas mias
L'intendo sa oghe tua
cando ballas a passos lebios
E tando... in cuss'ora
mi perdo in sos nuscos tuos
In sos bratzos tuos nuos...
Mario Demontis - Ossi
104
Cuncursu 2014
INGIRIAU DE STEDDUS
Notesta
bollu una bresca 'e luna
e cras
una scussura 'e rajus de soli
ca bollu preni, a intibu,
de bellesa e durciura,
totu is furriadroxus
de dogna coru.
Nd'acullu pispisalla
de is steddus
e ddus 'mperu che arramadura
po infroriri 'ogna mori
in tristura
aundi passant
mamas e pipius disterraus.
Un'arreddossu 'e caridadi
apu arrebussai
in su fràbicu 'e s'amori
chi, su 'entu prenu 'e axiori
torrit a furriai
e si sperdat in su sperefundu
chene fini;
tandus, a coru prenu,
deu puru apu a fai festa
ingiriau de steddus prexosus.
Dante Erriu - Silius
105
Sotziu Peppinu Mereu
DE UNU BISU ...PRESONERIS
(un' amore chena tempus benídore)
Subra chelos, baddes
e campuras. ..
cun alas de disamparu,
sos sentidos bolan
chena pasu
...subra campuras , baddes
e chelos. . .
In cale mundu 'e fadas
sos ojos mios
as miradu?...
e in cales
dies chena cras
amus a istare?. .
Intra majias
de vidas coladas
e de vidas benidoras...
de onzi brama
su coro nostru
amus amadu...
E fuen sas isperas,
che frinas de bentu,
in s'aera...
e in s'ànima butiat
su dulcore
de sas paràulas tuas
...chi su mele
a sas abes
an furadu...
Lassadu t'apo
in custa trama 'e dies,
irrobbadu de su risu afranzosu
chei s'urtima foza atunzina,
in s'anneu,
tue... m'as lassada...
S'ammaju 'e s'andera,
de un'amore chena tempus,
106
Cuncursu 2014
sigo a sighire...
pro imberriare unu bisu
ch' 'in sa vida
s`est cuadu...
Rachel Falchi - Sassari
107
Sotziu Peppinu Mereu
DISIZU
T'istringo forte a su pettus
anzoneddu sena alenu
pro t'imprimer su calore
chi su samben no ti dada.
Ti diera 'e sas intragnas
su vigore chi mi restat
solu pro haer s'ispera
de bider in cara tua
torrare caldos colores
chi sos càvanos biancos
ti tingheran un'aizu.
Ti fattera unu carignu
cun sa manu trimulante
in sas laras biaittas
pro las iscanzare appena
e tenner s'illusione
de t'intender murmurare
una sola invocascione
innidu anzoneddu frittu
sena alenu ne calore.
Vittorio Falchi - Bonorva
108
Cuncursu 2014
M'ABISONGIAS
Ddu scis chi m'abisongias meda
in custa terra frida,
chi mi fait intendiri sola e rimitana
a bortas?
Non mi bollu arrendiri.
Sighiri custu viaggiu bollu,
cun cuntentesa e tristura
a bortas.
Ma tui m'abisongias,
candu m'arregordas
e seu trista et chentza nisciuna forza.
Ma tui sempri m'arregordas
e sempri m'abisongias.
E ita at 'essiri sa virtudi de sa vida?
Su soli chi nascit,
sa luna e is stellas,
su sentimentu chi mai morit.
E tui, imoi ses parti de sa luxi
e mi donas meda forza
in custa terra chi mi bidit aici diversa.
Ddu scis chi m'abisongias sempri,
imoi chi seu manna
e sonniu sa bellesa de sa vida
e su durciori de su bonu sentimentu?
Ddu scis chi m'abisongias?
E tui m'as abisongiai sempri,
po totu su viagiu in custa vida.
Susanna Furcas - Cagliari
109
Sotziu Peppinu Mereu
SENTIDU DE AMORI
Una notti chi fia sezzia in sa friscura,
penzendu a is cosas de sa vida,
perdia in su sonu de su bentu,
appu intendiu in coru una tristesa.
Castiendu su cieu steddau e sa luna prena
M'ei benia a conca una preghiera;
luegusu appu invocau Nosta Sennora
e dd'appu nau su chi pottà in su coru:
"Oh, mamma mia santa e bella,
Tui, chi de su mundu conoscis su segretu,
chi no si castias, tra lambrigas e sorrisus,
nara: cummenti aressi su destinu miu?
Fia andara a mi croccai a mengianeddu,
sa conca no accabara de penzai.
Ma appustisi mi seu rasserenerara:
immoi ollu fai unu bellu bisu.
Candu fia drommia, in su prus bellu,
un angelu mi ndei accostau accanta
pottàra is pius biancus e sa cara bella
fariara propriu prexei a ddu castiai.
"M'anti mandau nottesta a ti fai sciri
ca tui astessi una sposa fortunara
cun d-un ommini pru mannu unu pagheddu
ma giovunu de coru sia de aspettu;
t'ara sempri pigai cun mera amori,
po issu tui astessi una regina,
sa prenda prus preziosa de sa vida:
attra cosa no asta pori domandai".
Cun custus feddus mi ndi fia scirara
e prestu unu diciu appu inventau:
"aberri sa fantana, fai intrai s'aria
cicca sempri de allirgai su coru".
Antonella Lampis - Arbus
110
Cuncursu 2014
UNA DIE DE PASCA MANNA
Sa die de Pasca Manna,
de su Signori sa resurretzione,
die de allegria e de amori,
sa die de sa famiglia,
de s'incontru de animas,
de pappai bonu e de su perdonu.
Trint'annus e die de trumentu
in cussa ruga de sa vida,
nisciuna consolatzione
in sa die de Jesu Cristu
de issu sceti spinas
in cussa ruga de dolori
cicchendi sa fini in sa cruxi
po arribai a sa paxi.
Non ci fiara orizzonti
cun soli tepidu o cun mari birdi
ma unu ponti in s'acqua scura e firma
chi promittiat sa paxi de Pasca Manna
non de resurretzione
sa paxi de sa fini, sa fini de su trumentu.
Una boxi però hat nau ca non fiara s'ora,
una boxi non de omini
ma de unu cuaddu biancu
chi abbasciu de su ponti
pascìada in sa costa 'e s'acqua
e castiendimi pariada chistionasse:
aspetta e castia,
de su ponti de sa vida
s'acqua pori essi limpia e frisca.
Is ogus de una bestia m'anti bogau is spinas,
una die de Pasca Manna.
Susanna Loddo - Cagliari
111
Sotziu Peppinu Mereu
UNDAS TEMPÈSTOSAS
In notis scurìosas,
chentza de pièdadi scumbattint
custas animas stibadas
che sardinas in barrili,
cun barcas arròscias de bivi.
Funt umbras in sa noti
cun sa peddi niedda
e dentis biancas,
chi sonant sbatendi
po su frius e su fàmini
e luxint candu cascant,
dis e dis chi non bint pani.
Pipius, atàccaus a sinu maternu
suendi su latti chi non c'est,
in ogus lagrimas marìgosas
scurrint arrius,
santzìaus in custa barca
in sa crista de s'unda,
sparèssint e cumpàrint
si non andant a fundu.
Custu est su pretziu,
chi pagant po sa libèrtadi
e medas non dda binti mai
ingùrtius de su mari,
avolòtaus e prangendi.
Atrus stremaus s'aferrant
a sa sperantza,
chi una manu, bianca o niedda
stringiat s'insoru.
Finsas a candu
non ndi podint prus
de abetai
e si lassant andai a su destinu
ddi essi partius e mai arrìbaus.
Raffaele Lussu - Selargius
112
Cuncursu 2014
LI PINZIÙNADDI DI L'ÌPÌZIU
Una dì pusàdda i lu muragliòni
affàccu a la gesgia dì Santu Preddu
tra li pinziunaddi di l' ìpiziu
zèschu una faccia famigliari
ma è inuturi, no l'acciàppu!
Inogghi, zèschu un cuntàttu
un mòdu di ridì, di buffunà
e allòra l'acciàppu propriu inògghi.
Ilgnunu mi cònta la so' isthòria
e m'abìzzu chi so tutti cumènt'èrani
babbu e mamma
un poggu tristhi e marincònigghi
chi aisèttani lu passà di lu tèmpu.
Lu sòri di primabèra l'ischàsdha
ma babbu e mamma no vi so più
a gudì di chissu caròri.
Eju sòggu cuntènta
chi li mè'vecci
babbu, mamma e puru giàia
no hani auddu la disgràzia
d'andà i' ipìziu
zì ni sèmu intirissàddi
noi figliòri
ma sobràttuttu eju acchì
èra la più libbara e chena figliòri.
Oggi, àggiu sòru un rimpiantu
da lu mamèntu chi la vidda
s'è allungàdda, caschùnu
podarìsctia assè ancòra vibu
sobratùttu mamma,
acchi lu mamèntu
più tristhu di la vidda mea
èra affàccu a me,
edda è isthàdda un gran cunfòsthu
e cunsuraziòni
acchi eju àggiu auddu propriu
una mamma ipiziàri
113
Sotziu Peppinu Mereu
e pà chìsthu
no la pòssu immintiggà mai!
Fedelina Masala - Sassari
114
Cuncursu 2014
A S'ACABU DE SU BISU (A MONIA)
Arribamus a s'acabu de su bisu
aundi noti e die s'amesturant in licori de ammentos.
Nemus at a podi olvidai mai cuss'assèliu.
Luxiat in is pibiristas mias su celu sintzillu
a lassai is ogus in disamparu de làcanas de annùgiu.
No pensis imoi a tempus de spinas,
a tempus de disisperu e de nudda.
Imoi esistit feti s'alentu a sa nua,
s'alentu chi si spollat de tristuras.
Imoi esistit feti su soli chi si spollat de nues de prantu,
sa cara tua ch'interrat notis aintru
fintzas a essi feti boxi e sonu de prexu.
Gianni Mascia - Cagliari
TOBÀCÌUS (= TEULÀCÌUS)
Ariseu pura - acotzendu sa faa
apu aghetau unus cantus teulàcius
de-i cuddus smartaus - de biancu e asuletu
e de bidri 'e galantza.
Deu ndi ddus 'oddu sempri totus.
Bai e circa chi - duxent'annus a oi
custa genti
chi ndi perdiat arìllias - e bruculitus
e pratus bellus e cìcar' 'e cafei
a su pròpriu de mei- me in su pròpriu cungiau
marrendu su lori
ndi aghetàt teulàciu - bèciu 'e duxent'annus
dumandendusidda puit'est.
Francesco Maxia - Cagliari
115
Sotziu Peppinu Mereu
IN SA CAMPAGNA
Morit su sero,
umile focu
chi s'istutat.
Supra in sos montes
abbarrat carchi brasia.
Ruttu est s'arbore
in su caminu biancu,
bestiu de lacrimas e
de piedade,
ocros a chelu.
Lontanu un'umbra
t'isettat,
chin amore.
Angelo Maria Mingioni - Nuoro
116
Cuncursu 2014
FIGIOS DE SU ENTU
Figios de su 'entu
sentza 'oghe
disterraos
lassau eis sa terra nadia
cun su sonnu e s'ispera
de ndet agatare un'atra
inue non ch'at
ne ingiustizia ne gherra.
In su desertu
in fila che fromigas,
iscraos sentza cadena
de su tempus de oe
cantais is cantos de sa dispedida
zerriu 'e disisperu de s'anima
de su coro fertu
ca afetos eis lassau,
in cussa terra
brusciada de su sole
inue non curret s'abba
in is errios.
Os'ant promintu is alas po bolare
cara a sa libertade
e alas non s'ant postu
ma os'ant bendiu
a chie de s'umanu
est faendo mercau,
su pane chi ant promintu
est pane marigosu
ca impastau est cun amargura.
Osi ponent in mare
in carretas sentza seguresa
prenas a isticu.
Bidendoddas
paret chi pipios,
apant prenu 'e fromigas
cogociolas de nughe
postas apustis in s'abba po giogare.
117
Sotziu Peppinu Mereu
Cantu gioventude ant ingurtiu
is abissos profundos de su mare
e undas piedosas
dd'ant giau sepoltura.
Sa luna, indiscreta,
mandat lamas de Iughe
a fundu de su mare
in cussas tumbas, inue
mai, lambrigas de mama,
ant a calare unu frore
postu de manos amorosas,
at a giare singiale.
Maria Murgia - Sorgono
118
Cuncursu 2014
DOMO DERRUTA
Matones frazados,
pedras iscusseltadas,
in su mudine,
ammentant rìsidas dindilinas
de fèmina cun bisos de isposa
immurinada e consumida
a mundare e arremonire
rennoende su tumbu 'e su telarzu
semper ubbidende
a cumandu coriale
de mama ostera e dadivosa.
Sos muntones de calchinatzos
galu murmutant
de unu piseddu
chi giogaiat a boccia
in su pamentu 'e matones
cun d-unu 'atu
chi 'essiat dae sa tana segura
in sa mata 'e figuindia.
In s'istallita 'e s'àinu
est ancora intrea
sa mandigadorza 'e pedra
chi retziat su fiadu istracu
de un'istratzone
in giambu de una farca 'e linna.
Puru s'mpedradu, in su sole,
torrat a bìvere
su lùlluru tebiu
de notes giaras
allughidas
da una luna manna
de paghe.
Mario Nurchis - Sassari
119
Sotziu Peppinu Mereu
SA CRESURA
No isco ite bulluzat
in palas de sa cresura....
Ma, de securu,
esseres incantaos.
A s'isparada 'e su sole
lusingat
unu enticheddu lizeri
e in chelu s'abbassan
sas alas luchentes
de s'astore,
e craru s'intendet
su mutu a sos fizos :
est eccolla s'ora 'e los nutrire.
S'intrada in su coro
de sas cresuras
fattu e sos camminos,
a custode 'e s'anima
de sas birdes campuras.
T'accollozini
che morbidu mantu
e prenas de colores sa mura,
s'intendet
s'alinu 'e su entu.
Su cane da-e terra
mirat, forzis imbidiosu,
sos bolos de s'astore,
de non podere
mirare da-e su chelu
sa meravilla
de custu locu incantau.
Un'arvore
maestosu-solitariu atonzinu
ispettat, briosu, de risplendere,
a su eranu imbeniente.
Silvia Pira - Nuoro
120
Cuncursu 2014
SCINITZUS
Bandat a cuaddu,
aboboscau castiat su logu, castiat a giru a giru,
i' murus e i' domus circhendi su giassu,
cument' u'' margiani candu,
impostau in d-unu coili seguru,
fragat dogna perda, cun su nuncu provat a ddas sa movi,
e girat, girat e castiat a sus e a basciu,
non ndi ddu importat de s'aqua 'e su xelu
chi ndi calat a sricias,
e pagu ddu strobat su bentu arranegau in sa notti iscuriosa.
A s'atera parti 'e su muru i' brebeis serenas e assentadas
cun is angioneddus cos'insoru segurus e fatu fatu belant,
nci stesiant e is mamas ddu' su circant,
e custu ponit scinitzu a su margiani,
ddi ponit afogigiu e prus famini,
crescit su sghintzu po is pegus chi non podit tocai.
Custu est su maniagu avantzau
E nc'arrumbiat in sa morti,
su sangui" currit intra mes' 'e is bellas faturas cos' 'e issu,
e sa conca s'ingarrutzat in su coddu:
cument' u' frori candu,
bogau de s'arau,
si carigat morendisì,
o cument' i' babaois ca nc'incrubant
sa conca in su tzugu fadiau,
candu s'aqua 'e su xelu ddus sciundit.
Custu est su mabasortau
Est unu sighi sighi,
unu curri mei' bias de sa 'idda,
cument' faint i' fromigas assentadas,
candu, inpensamentadas po s'ierru,
apubant de tesu unu muntoni de trigu,
nci tragant is pisus a sa domu insoru.
Andat aici in mes' 'e su sartu
sa cumpangia niedda,
in mes''e s'erba in su mori strintu
121
Sotziu Peppinu Mereu
e nci portant is pisus mannus a coddu,
e si faint fortza pari pari boghendinci is mandronas.
Mauro Pittau - San Gavino Monreale
122
Cuncursu 2014
BISUS STRAMANCAUS
Cun bussa de axìu prena,
beninti a trumas - disterraus morus
bestius de abettu e cara scìda,
attruessanta montis
e desertus de arena
sighendi unu isu chi luxit de gosu.
Bisus! Ch'in-tra nuis oscuras
in poderi de su entu maimòi,
arrodiant in mari burrascosu
innui svanessint visionis de vida.
Iscampaus de dannu - bòlanta
cun alas de illusionis e s'anima atrivia,
andant impinnius de prexu
in su camminu de sa speranzia,
circhendi farinalla de libertadi.
Libertadi! Dudosa e sunfrìa,
pedendi cuscienzia umana
in bias alludadas de bregungia,
innui s'arremat s'anima ferìa
e sa peddi loriada - de arrungia.
Andanta matzulendi surrungiu
in s'animu - ancà naxit axìu e morint-is bisus - impruinaus,
in rugas de s'indiferenzia.
Sighinti cunbintus, scabudaus e
perdius - in cungiaus de disamori,
appetighendi moris che crabolus
de monti - chenze fronja,
po si stumbai cun sa trista realtadi in sa terra chi anti sonniau!
Anti perdiu sa speranzia.
Vincenzo Piu - Nurri
123
Sotziu Peppinu Mereu
LACCANA
Pò arribbai aj custu mundu,
ddu est`u'a laccana............
e, istuppau ki dduj siast'
ataras nd'agattas...........
si camisas no ndi tejs
ni crappittas e ni be'is
....assentas laccanas antze'as
....cun sufferentzia e cun penas
ma jnnu' est sa terra tua
kì pò laccana tej maris
ni tzaraccus e ni meris
e a guvernu sa natura...?
po istuppai a s`attru mundu
ddu est u'a laccana...........
e arribbau ki ddu i siasta
...gremmis agattas...!
jnnoga ze s'ista' be'i
ni tzaraccus e ni meris
e sa laccan''e su mari
pru' ne serrat e ne s'apperit
ma laccana ddu est matessi
...e de jngui pru no ndi essis
mancai nudda est tancau
jngui ses accambarau...
Andria Puliga - SanVero Milis
124
Cuncursu 2014
S'ETERNU DROMMIRE
ltte sorte est sa hi m'isettada?
ltt'ad' a essere s'avenire?
Una hosa antiha e honnotta
mai dae su tempus hambiada,
una hosa vile de sa vida.
Talmente abbituaos a s'idea
hi nemmos si vrimmada a la pessare.
Vrittiu dae su sihuru vattu
hi pro tottus est hust'avvenire,
ishontau es s'eternu drommire.
Ma cada unu ischanzellada
de sa mariposa sa vigura,
a est tropp'ispinosu a l'atzettare.
Su vrittu mi ponet sa resone,
ha atzettamos thanatos tristos
mancari hi sa honca isticcat su dolore,
ha pro vivere velitzes non bi pessamos.
Non hi si podada hambiare halhihosa
però semos cullados de isperansia,
una horza interiore hi nos ahumpanzada
de deus s'eterna dimora...
Giuseppe Rendini - Orgosolo
125
Sotziu Peppinu Mereu
TORRAMI LU SONNIU...
Torrami lu sonniu chi insembi aèmu azzìcatu.
Undi l'hai pultatu?
Forsi a cunfundillu cu li fantàsimi di lu passatu?
Hai ghjà sminticatu li disìciati attési,
li prummissi scambiati,
la lisingadóri cumplicitai di li nostri córi?
Si so', forsi, spaldiziati,
come frondi a lu 'entu,
illa timpistài di lu sintimentu,
o, forsi, aspettani lu ghjustu mumentu
pà turrà a vita più folti
da lu tulbamentu di lu dubbiu?
Torrami lu sonniu...
Ancóra troppu ciòanu
pà sfugghì a li tramói di lu córi.
L'hai forsi distruttu
chena pinsà a lu dulóri di cà a iddhu s'era aggrampatu?
Torrami lu sonniu.
Tribbulìa di dugna me' ciurràta,
torrammillu,
ancóra in iddhu spéru e crédu.
L'agghju a dà ali noi
pà bulà altu
illu me' céli limpiu chena néuli .
Torrami lu sonniu ,
siddhu no n'hai più bisognu.
Quirina Ruiu - Telti
126
Cuncursu 2014
DISISPERU
Camminemu suspesi
in chistu tempu in affannu
Incelti, pruati
in equilibriu subbra lu
debili filu di la spiranzia.
Affruntemu una 'ita
chi no prummetti dumani.
Lu tempu passatu
t'afflighj, ti figghjuli
indaretu e vidi
tutti li sonni furati.
L'occhj trattenini
lagrimi di scunsolu,
nisciunu asculta
lu silenziu di la dispirazioni.
Li mani liati
imbrigliani puru li pinsamenti,
e lu mulinu è avvinculatu.
Disaminati, di siguru
aemu solu la molti,
chi no è cussì trista
cantu la rassignazioni.
Comu neuli,
lachemu a lu entu
lu nostru distinu,
aspittendi chi
un guttigghju d'ea
infundia lu
diseltu di l'anima
Maria Antonietta Sacchi - Tempio Pausania
127
Sotziu Peppinu Mereu
ARRIBADA SA NOTTI
Arribat dogna dì
sa notti susunca
chi pottat cun sei
unu jeu nieddu cummenti craboni.
Si cittit axebiau s'oxrali,
e su passerillanti intrepidu
bobada aditzu aditzu
in su nudda lassau de su sobi.
Cantat in su mentrisi su cuccumeu
ca s'oscuridadi est vida po issu.
Lebias lompint is stellas
chi mamma lua
at tentu in fascias
e impari alluxentant su jeu.
In custa notti mesta,
luxenti est su mori
cummenti su fari fari
e su ludu prima orogangiu
diventat cummenti de oru.
Giogant allirgas impari
is janas in mesu de is froris
e delicadas sciundint is cambus
cun lagrimas de lentori.
Cittida est sa bidda
fatta de pedra antiga.
Dromit s'ommi cuntentu
de su nudda chi tenit;
drommit su fillu
accanta de su coru de sa mamma.
Giungit de tesu una preghiera
chi de su sattu arribat in jeu.
Unu sabiu pastori accanta de sa pampa
contat a sa lua
cussu chi at lassau e no podit pru torrai.
Giovini fiat stettiu s'ammori
chi chigliat a sei dogna ommi
e no ddu abbandonat mai;
128
Cuncursu 2014
becciu fia stettiu su trummentu
de una misera vida priva de issu.
Arribat sa notti
chi donat paxi a s'animu umanu.
Francesco Scano - San Gavino Monreale
129
Sotziu Peppinu Mereu
NOTI SERENA
Dromit sa terra, dromit
su bentu
Non si movit una folla,
Deus miu
Comenti un 'oxralli
biancu
tremit su mari
Abillendi a su scurìu
intendis
su tempus
aciuvai...
Giancarlo Secci - Nurri
130
Cuncursu 2014
RAIU 'E LUGORI
Una nui s'incrarat
in su celu craru
e si firmat unu momentu.
Contu is oras
ca mi parit chi no passant mai.
In is ogus si sprìgant
is steddus
candu càstiu su creau.
Tui,
bella che frori 'e beranu,
iast a bolli portai
alas de prata
po ti pesai in bólidu,
toccai cun su sentidu
sa beridadi
e sa nui
chi t'at intristau sa cara.
Oi speras
in su benideru
chi nci scelit sa nui
e lessit tretu a sa luna
po ti podi ricamai
sa cara
cun rajus de lugori.
Teresina Secci - Silius
131
Sotziu Peppinu Mereu
RIFAGHINZU
"DA SU PATRIOTTU SARDU A SOS FEUDATARIOS"
Procurade de ch'accabare
Sa tirannia o politocos
ca bos amus botaos
po faghere sos interessos
nostros, non sos bostros,
e su populu ch'est istraccu
de su bostru malu manizu.
S'accuntentare su populu
deppet essere su primu pensamentu,
non su pensare e s'istipendiu bostru!
Procurade de ch'accabare
sa prepotensia e s'ipocrisia
ca de sas bostras malas attias
non de podet prus chie si sia.
Chi siezis de destra o de sinistra
non at peruna importansia,
ca s'onestade non tenet colore,
a pensare a su bene de sa nassione
est su bostru sacrusantu dobere
e non lu mustreis che su fagher bene!
Procurade de ch'accabare
depudaos e senatores
nassionales e rezonales
s'abusu e su malu esempiu,
bos amus botaos cun bonu intentu
e semus biende petzi tradimentu.
Che semus in terzu millenniu,
custu manizu malu e antigu
ch 'est foras de su tempus
dae tottus e in tottube criticau!
Procurade de ch'accabare
sas brigas tra partidos,
siades sempere unidos
po sos problemas de sos disoccupaos,
po sos sudditos isperansiosos,
132
Cuncursu 2014
po sos problemas de sos esodaos,
de sos zobanos istudiosos,
de sos betzos e de sos pitzinnos,
chi lottant po sos dirittos
chi lis benint negaòs!
Procurade de ch'accabare
de andare a bratzette cun su potente,
pensae a su pagu abiente,
a chie non tenet niente
e bibet miseramente,
e bois pensae solu a sa brente!
Pensae a sos dannos de s'ambiente
inquinau e faghie una bona leze
chi a custa frigunza ponzat fine
una borta po sempere e zustamente!
Procurade de ch'accabare
cada casta de malu manizu,
ca si su populu est iscuntentu
podet pesare carchi bullizu
chi bos faghet calare dae caddu
faghindebos torrare a pes in terra,
po meditare chi sa bida non est una gherra
e chi onziunu depet colare s'esistensia
cun serenidade e chentza amargura
comente Deus cumandat po cada creadura!
Mariangela Sedda - Gavoi
133
Sotziu Peppinu Mereu
A CRAMMA RISPONDE
Si! Ma da-e solu,
non si podet bivere.
Bidendelu sese
cussu nidu da-e nu' essit
cussu ziulu 'e puzone,
ispettande sa mamma po s'addescu?
E a cale prou,
si non b'esseret
un'attera oche,
po cummentare s'armonia
de custu
culazzu 'e mundu?
Oje su cuccu
est essiu cantande
primma 'e su sole
e tue,
ommine d'oje,
a nue andas, mi dimando?
A cramma risponde
depp'essere,
chin cuddos frades
chi jeo non connosco,
sos de cudd'ala 'e mares lontanos,
ma eppuru hane su propriu dolu
in sa 'oche;
e chin uguales penas;
uguales sos disizos,
e-i sos gosos, che-i sos puzones
est muttinde su Tempus.
Tempus chi est trummuzande sa Terra.
Ommines
de nou naschidorzu
e d'atteras iscolas,
han'a unire manos de azudu,
e paraulas po vrorire
universales Poemas de amore.
Pietro Sotgia - Dorgali
134
Cuncursu 2014
LU TEMPU CONTA LI DÌ
Lu 'entu polta curréi
ch'eu no cumprendu,
è calcu pòddini
cu branchi di frundi
e la cruci di lu campanili
trema sutt'a lu so' dumìniu.
Socu naichendi illi trami
di la frìzia, cilchendi
accìmu illi bracci stracchi
di la notti.
Un siminzaggiu d'amalgura
aggju ereditatu ill'imbùlio
di la 'ita.
Una stella trimula m'offèri
solu una scia di pallida
mimoria chi mi trasginiggju
cu pedi straccu.
La notti ha pili sciolti
e siminiggja umbri
imbriachi di strimata
sulitài.
Stiddi di malincuniòsa
tristura tòrrani comenti
runduli a lu nidu.
L'occj vìggili di la notti
ciulmiminiggja lu me' campà,
no pàldi mai lu nummaru
illu cuntammi a l'indarétu
l'ori e li dì chi leni miminiggjani
illu tragittu di la 'ita.
Maddalena Spano Sartor - Valledoria
135
Sotziu Peppinu Mereu
BÀSGIA LI LABBRI A LU SOLI
Lu bùffiu di lu branu ha spaldiziaddu
l'iganti àrburu di néuli pisaddu
cu' li ghjeli. La luna è trasparenti,
tonda, un'ostia, di magghju prufumma
rocchi ed evi, l'ammenti
puru, i' li stintinnaddi di disigi
chi mi crèscini a òsu
razzoni, spinnicchjèndimi lu cori
si a nivra mi torra l'ùmmulu
pàlpiddu di lu pettu toiu, tècchju
d'amori, e odori
cumenti l'erba a poi una muddina.
Nudda dura, lu soggu, e la luna
torrarà frullana a missà
finza li pinsamenti drentu a noi,
no t'affannà a circalli, dugna cosa
fini, dugna ischjariadda
ha la so' incrinadda ma no sempri
v'è risposta a una dummanda.
Assaóra lu to' tempu, bàsgia
li labbri sbambarriaddi di lu soli,
suminègghja la vidda
in mezzu a una tuppa di papàvari,
alluntana lu lìmpiu
dulori di li cosi, a me làssami
solu un aìggiu di frina
a mimmulammi lèbiu lu to' innommu...
Giuseppe Tirotto - Castelsardo
136
Cuncursu 2014
PEPPI ZAPPUS
De s'impedrau de sa ja de su xiau de “pisitedda”,
scoi scoi Peppi Zappus nd'è pesau
arrenegau, bruttu, scruzzu, scorriau,
pofinzas ammaranduau.
Che mraxiai in tupp'e mutta,
ogu alluttu e piu tirau;
in s'arraprau s'è appostau
ajntru de sa Cresia de Santu Nicobau,
cun is bonas e cun' is mabas,
atturanta is picciocheddus
de sa primu Comunioi,
po imparai a memoria s'insegnamentus
de is dexi cumandamentus.
A sa fini de sa dotria,
che frumini de monti,
ci stuppanta is cunfrimandus
e sa metta preferia?
..... ..S'arraprau in gui accanta.
Inghizzanta a giogai, a tappus,
biriglias, buttonis e a dinai:
Seu su primu, esti su miu,
bruttu burdu,
...a sorri tua, .....a mamma tua.
Infogaus inghizzanta a certai;
cun su nasu screfau
cumenzada a sanguentai
Peppi Zappus appostau,
che lampu in benau
ndi assodia su dinai
e che sirboni sighiu de balla,
ci torrada a cabai.
Peppi Zappus ......
..iada torrau a furai!
Mario Usai - Guspini
137
Sotziu Peppinu Mereu
NON L'ISCO
Non l'isco
s'est su sonu de sos frores
chi noales s'abberin
saludande s''eranu
a mi dare cunfortu.
O s'aera prus tèbia
condo lèbia carignat
cun sa diliga manu
timòrias coladas.
O alas coloridas
de mariposas friscas,
bolande in su mudine
durche che su mele,
prenu ebbia
de su tempus colande
intzertu e piedosu
subra su chi creia
pérdidu gosu
chi m'affranzat ancora.
Non l'isco
s'est sa gana de ammentos
isbioridos,
cando torran fadados
a m'istringher su coro,
ube sulan che bentos,
battìndemi
s'insoro nuscu antigu,
cun pintadu su logu
de sos appentos mios.
O at a esser solu
sa 'isione
chi sa mente cunfundet
in rampos intritzados
da' sa edra.
Fortzis est un'ispera,
ma non l'isco.
Giangavino Vasco - Bortigali
138
Cuncursu 2014
SETZIONE LOCALE
139
Sotziu Peppinu Mereu
140
Cuncursu 2014
IS CARRATTONERIS
A sa loriga de su leminargiu,
su caddu cun sa paggia accapiau
dae su mere sempere mirau
e su mele moriganno in su cheddargiu.
Carrattones in d'onnia ungrone,
ambulante prontu a viaggiare,
teniat pagu tempus po pausare
carriganno sa castagna e su turrone.
A s'ottada de S'Antoni non mancada
Carrattones e caddos in processione,
a turnu sa bandiera si passada.
Pobiddas e figgios in s'organizatzione,
giogos e ballos fianta a s'istrossada
po cugnare, dae su toni, fogos a muntone.
Maria Carmela Carboni - Tonara
NUES
lmmarada in s' arena,
iscaggiada in su suore,
in sa pedde su calore
e sa mente calat lena.
Ballat su mare, su sonu;
s'abba 'e funtana 'attia
istiddiat in armonia
e mi tzannigat a tonu.
Su sole in su concale,
s'erriu 'e pitzirimasa,
su cricu in su funnale.
Una lagrima pigat is alas
liggera, in cara mi basa(t)
Selia, mi furrio a palas.
Maria Giovanna Carboni – Tonara
141
Sotziu Peppinu Mereu
SA POESIA MIA
Chi mi dda sento,
in su meu tribulare
ca seo che a is bentos
a dognia ora de cambiare.
Sa giusta diretzione
in duas rigas chi iscrio
ai custa partecipatzione
de sos megnus brios
deo is suas poesias
canno seo ligennoddas
de realtade non fantasia
pargio in su momentu bivennoddas
canno seo in tristura
is versos suos mi ispensierant
ca mi faent de cura
segura e meda sincera
po cantu deo bivo
de brios e sonu
seguru ca non mi privo
de umperare custu donu
pitica ma chi sia gentile
delicada che i bentos de beranu
temperatura de titta de arbile
chi frorit su logu isolanu.
Piero Battista Demuro - Tonara
142
Cuncursu 2014
PAGE
Su fogu allutu,
cun tzitzones
de linna sicada.
In sa trebide
unu testu
de castagna.
Babbu iscrabidat.
A furriu a furriu
de sa geminera manna
in bangheddos
e cadireddas
oloìa est
totu sa familia,
ibetanno,
chi cotzat sa castagna.
Atognu,
cun su primu 'entu,
cumente fumu 'e geminera,
mi nne torras a 'atire,
durtze
che i sa castagna bene cotta,
caentosu
che i cussu fogu,
s'arregordu
de sa page chi tenia
canno fia pitia
in sa domo
inue seo naschia.
Francesca Dessì – Tonara
143
Sotziu Peppinu Mereu
A TONARA
Po esses una idda montagnina
sempere ses istada ingeniosa
sa gente tua onesta e orgogliosa
e no amante a i mala faina.
Coìas perda e faias carzina
mattone teula e ghavasa arenosa
fogagias po crabone bunnanzosa
mrughos, burdones, taulas, traversina.
Mastros de pannu meda e sabateri
faias carros, cubeddas, cannela
e de lama e de lima tantos trastos
Tiu Grallinu seddazos e imastos
fressada fanuga e de orbace tela
su turrone famosu de gherreri
Gesuino Garau - Tonara
144
Cuncursu 2014
I SA ZONA DE S'ARBUSTU
I sa zona de s'arbustu
in s'artisticu monte
giranno bio s'umbra colorada
chircànno logu infùstu
m'ispuntàd in s'orizzònte
sa fantasia indimoniàda
e mi nad ista prudènte
in sa cussòrza de attera gente.
Chi s'importante viaggiu
no rinnova s'importànza
cun sa forma de sa connoschenzia
ca s'uguale linguaggiu
mischianno sa sustanza
a bicculos faghe sa prudenzia
e su muinu fastidiosu
pro su cunfròntu diventa dannòsu
Chi s'omine rimpiazzada
s'arte cun nobilesa
e modu sensadu cun giudiziu
cun ispiritu abbrazzada
sa paghe e sa bellesa
e de pèrde su malignu fiziu
e faghe pubblicidade
chi si riflore sa sinzeridade
Su tempus a s'istruttura
li forma su colòre
chi dured a s'edade naturàle
e chi no li serva cura
mai a su vigore
cun su sensu bonu e gioviàle
ca chi difèttos presentada
se bellu e s'anima turmentada
Su giògu alternàdu
una bòrta est binchente
su sògnu de su che est istruidu
s'atteru risultàdu
145
Sotziu Peppinu Mereu
pro s'accordu est pèrdente
ca lan dae prima istabilidu
e su dimòniu lu sorriede
pro biere su chi no si biede.
Mauro Garau – Tonara
146
Cuncursu 2014
MARE NOSTRUM
Cosa comune est diventanno sa morte,
bastat a alluere sa televisione:
poberas animas, ite triste sorte
procurat su drama de s'imigratzione?
Movet tottu s'Africa famìa
istrinta in una barca malannada
afflitta dae sa peus carestìa
criccanno sa fortuna istimada.
Perigulu connottu est su mare:
s'imbarcatzione s'est furriada in viaggiu
e po chie no ischit giubbare
non podet bastare solu su coraggiu.
Chi su destinu est giai signau
e at istudau fintzas s'errisu
po chie est meda isfortunau
s'apergiat nessi su Paradisu.
Claudia Mascia - Tonara
147
Sotziu Peppinu Mereu
ARREGODU
In die mala e di'ona
cantanno seo po te
ca ti tegno in coro e mente
datu ca mi ses dimora.
Po ch'ateros sessantunu
e de ddo biver non creo
ma po d'onnia circostanza
deo versos apo a tesser
in modu 'e non faer tortu.
A chie cantat a frores
e a su mutu amore hat tentu
e in su tempus passau
mutos po carrasegare
in binnenna e in incugna
in corruncones de muru
chissà cantu serenadas.
In toneri e bie 'e susu
ne frore ogat ne fruttu
tottus nanta non se' onu
asi s'antigu recreu
su tempus c'agatat lassada.
In die mala e di 'ona
Onnia die chi passada
s'attristat su coro meu
po su totale abbandonu
e chi ha tentu su mutu:
bezzos non ne canta prusu
giovonos non ne ddu ada,
e ne ddu ad'aer puru
ma neddisis pared'ergugna.
ma chi provanta a pensare
ca su mutu est istau
s'unicu divertimentu
po decantare s'amore
po cumpagnia e cunfortu
e solu no apo a essere.
148
Cuncursu 2014
E tegno ancora isperanza
ca chi non canto prus' deo
ddu ad'aere aterunu
chi versos canted'ancora
po allirgare sa gente.
Torres o mutu su re
a ti ponne' sa corona.
Giantomaso Mura - Tonara
149
Sotziu Peppinu Mereu
LAUDE A I' MAISTOS
A pipìa in iscola ap'imparau
ca s'arte prus manna est sa pintura
poite dae una tela chentza neu
pigat forma unu munnu de recrèu.
Ma non tenìat arresone sa maìsta:
s'artista no est solu su pintore
merìtat lode e onore fintzas chie
s'opera sua nne pesat die po die.
Canno sa vida fiat prus grae de oe
onnia idda fiat prena de Maistos
chi fessent de soga o de muru
s'arte issoro connoschiant de segùru.
Mancari chentza istudiu e chentza libru
ischìanta acantzare onnia disigiu.
Narau hat Michelangelo una orta
ca su geniu depet liberare
sa forma presonera in sa materia.
Deàsi faiat babbu, Maistu 'e pannu,
cun s'istofa istèrria in pitzu 'e bancu.
Cun passione, atentzione e abilidade
dae agu e filu a pagu a pagu essìat
su bellu estire nou, chi allichidiat
s'omine fieru in sa die nodìa.
Ma como chi su munnu est camìau
e sa gente onnia cosa agatat pronta
haus perdiu cussu magicu profumu
chi essiat dae su trastu fatu a manu:
ca mai peruna machina hat a tennere
s'amore e su suore 'e s'artigianu.
Anna Paola Sau - Tonara
150
Cuncursu 2014
RIMAS PO PEPPINU
Seo etza e istracca
c'appo perdiu sa vista
e non potzo faer prusu
nessuna concuista
Comente a tie Peppinu
as perdiu sa gioventude
in sa tenera edade
ca poeta sanu e bonu
in Tonara ses naschiu tue solu.
Faet effettu finas a s'istragnia
ca de mente nobile est sa tua poesia.
In sa idda 'e Tonara
as giau cunfortu a sa terra tua amada.
A chie liget is versos tuos sinceros
ibettat satziu e magnu
non ne ddu at attèros.
Giovanna Sau - Tonara
151
Sotziu Peppinu Mereu
SU CANTAREDDU
Cala cala cantareddu,
cun sonos de melodia,
c'alligras sa fantasia;
fatu t'has a coffiggeddu
in sa perda, su signale,
in funnu 'e su laccheddu
parent toccos de marteddu
ma ses cosa naturale.
Calas da intro 'e su monte
calas da intro 'e s'intragna
e dd'alligras sa campagna
calas finas a s'orizonte.
Tue das ristoru e ghia
a ogni essere vivente
e m'inchino riverente
a sa tua abba pulia.
Deo frimu pogno pè
ti castio cun ammiru
ogni tantu unu suspiru,
chi m'agatto in Galusè,
inue tempos passaos
tantas bortas has intesu
cuddu vate tonaresu
cun sos canticos alaos.
Calas friscu in su cuzone
e formas un'errizolu,
e a tottus gias consolu.
E sidiu unu pigione,
iscutulanno is alas,
s'appagat e si nne olat,
a dognunu canno colat
non ddi furrias is palas.
152
Cuncursu 2014
Si frittit unu ezzone
e dda prenet sa uppada,
unu basu issu ddi hada
a s'umbra 'e su costone,
tottugantu est suerau,
ma cuss'abba cristallina
est che sa manu divina,
chi Deus dd'hat inviau.
Buffat unu pitzoccheddu
e giogat e ischizzat s'abba
non dda finit non d'accabbat
cala cala cantareddu.
Tanno passat s'animale
troppu carrigu e sidiu
issu arribat imarriu
e si nn'annat chentza male.
Pustis unu cadditteddu
s'accorziat ai cussu laccu
istancu fut e fiaccu,
cala cala cantareddu.
Ogni casta 'e animale
ogni essere vivente
est cun tue riverente
ca sanas onnia male.
E s'orroda 'e su molinu
giras po molet frumentu
e nne salvas prus de chentu
da un'amaru destinu.
Calas in samunadorgiu
tra colpittos de taeddas
e sorrisu de pitzoccheddas.
Calas in s'iscassadorgiu,
in su calu intras a s'ortu
de faiggedda e de patata,
cresches puru onnia matta,
gianno friscu e accunortu .
153
Sotziu Peppinu Mereu
Ca gias vida e gias cuntentu
a su genere umanu,
po terrenu cristianu
ses licore e alimentu.
Po su munnu vegetale
chi t'ibettat in su situ
inue firmu has s'abitu
ses che frade coriale.
Cala bene preziosu
non ti frimes un'istante,
sempere cala costante
senza un'attimu 'e riposu.
E cun is tuos collegas
chi atobias in caminu,
formais unu trainu,
terras roccas tue segas.
E s'umanu geniale,
de idea e de talentu,
faet unu isbarramentu,
ma non perdes su signale.
Ti trasformat s'energia
e das forza a su motore
de ierru calmas su frittore
e de istade caloria.
Cresches onnia pastura,
massim'in su mese 'e Magiu
aggiudas onnia taggiu,
senza metro e ne misura.
T'ibettant in Campidanu
in ue tottu est arsura
faes onnia virdura,
e cuntentu est s'ortulanu.
154
Cuncursu 2014
Ca de abba est s'elementu,
tottus su chi vida tenet
e po cussu ti pretenet,
campen deghe o annos chentu.
T'istiman ti cunsiderant,
chi mancas tue est sa morte,
segura finis sa sorte,
ca in te tottus isperant.
E pustis intras in mare,
e a opera cumpria
ti torrat su sole in via
faennodi evaporare.
Tento unu cunsideriu,
e in ue has a naschire
e da ue has a benire,
ma est dificile misteriu.
Po me ses unu tesoro,
pagu importat tottugantu,
po me ses su megnus santu,
bales cantu e prus de s'oro.
Lino Sau - Tonara
155
Sotziu Peppinu Mereu
SA CASTAGNA DE CURADORE
lstanca deo a bratzos in aeras
donnia die passo sa vida mia,
in s'istiu ischida e in s'ierru ormia
e tegno setteghentas primaveras,
in tonaresas terras, tantu fieras,
de Curadore, inue seo naschia.
Como sola che unu monumentu
cumbattinno ancora nie e bentu.
Mudo custu logu bene frugnia,
donni'annu daghi arribat eranu,
prus no intenno, su bellu sonu arcanu
de pittiolos, po mimi cumpagnia.
Cussa musìca allirga est finia,
e mudu, custu logu est fitianu.
Che unu monumentu seo sola
in pitzu meu mancu mimiola.
Cun-i su sole iscamio foeddu
cann'incarat, e issu mi faet s'ogu,
ddu faeus ognora custu giogu,
dae canno fia unu prantoneddu.
Issu su mannu e de adeie isteddu,
semper meletzat de mi ponner fogu.
Abba, nie cun bentu cumbattinno
a sa calura puru arresistinno.
A costaos meos, ite tristura!
Malaidu est su truncu, ite dolore!
Custu logu no tenet prus colore,
rispettu no ddu at po sa natura.
In s'oru meu est prenu de brutura
e a buca mi nn'arribat su sabore.
E chi sighit ancora custu crisu
acoitu mi calant in chinisu.
In terra sarda seo sa prus manna,
e dae punta amiro Gennargentu.
I naes mi ddas zannigat su 'entu
e sa luna mi cantat ninna nanna.
156
Cuncursu 2014
Una orta beniant Chicca e Giuanna
a 'oddire, cantanno cun talentu!
Bellas ottadas, mutos de amore,
no intenno innoge prus, ite dolore!
Fuit su tempus tirannu e fraitzu
dae nanti passada m'est s'istoria.
I figios meos mortos po sa gloria,
in tantas gherras chi porto in pitzu,
ddos arregodo a lumene e a ditzu
e mi nne leo in coro sa memoria.
Po servire su Re, o sa Reina
istratziaos dae cust'arraigina.
Benint sempere a mi bisitare
e Tonara de me si nne faet vantu
su turista mi cardiat cun ispantu
sutta meu si ponet a brincare
daghi benit s'ora 'e si nn'annare
a totucantos dd'is fuit su prantu.
Cussas lagrimas de sinceru amore
abbant sa castagna de Curadore.
Francesco Elio Sulis - Tonara
157
Sotziu Peppinu Mereu
ARREGODOS
De nou torro a mi manifestare
pustis de unu silentziu sentza iscusa
ma potzo narrer chi sa mia musa
non m'at crefiu prusu ispirare.
Oe cun un'aria prusu decorosa
est torrada a mi bisitare,
invitannomi a partecipare
ai custa gara de poesia e prosa;
pero essenno in edade avanzada,
creo chi fintzas cun iss'a fiancu,
non seo seguru chi m'innessa francu,
de non faere peruna isgarrada.
Ma pentzanno a sa patria nadia,
e ismentigannomi de s'edade,
paret chi mi torret sa facultade
de su briu chi unu tempus tenia;
a canno chi essia in serenada,
a cantare unu mutu a una pitzocca,
a canno chi in pitzu de un'orrocca,
auaia a sa mia amorada;
a canno chi artzaia a su noratzu,
e cun totu sa mia fantasia,
mi pariat cun sa cardiada ebbia,
de giare a totu sa idda un'abratzu.
Amiraia totu sa vallada
cun i sa bella vegetazione,
s'erriu de s'Isca e i s'Istatzione,
e i montes chi n'est coronada.
Oe po chi de cui ne sia assente,
canno intenno cussa nostalgia,
serro is ogos e in s'idea mia
totu cussu mi ddu bio presente.
Tanno intenno una ligeresa in coro
chi m'inniliberada de onnia male
e Tonara ca m'at giau su nadale
158
Cuncursu 2014
d'essere figgiu suo mi nne onoro.
Cun custos versos de pagu sustantzia,
mancari chi de cui ne sia lontanu,
manno i saludos a donnia paesanu
e m'iscuso de sa mia mancantzia.
No, no isco canno ad esser sa die
chi apo a torrare a ti bisitare,
ma su chi potzo bene assegurare,
es ca su coro est ibetau inie.
Luigi Zedde - Tonara
159
Sotziu Peppinu Mereu
160
Cuncursu 2014
Indice
Setzione Regionale - Soneto
Ardu Angelo Maria
Brandinu Lorenzo
Capra Alberto
Carta Basilio
Contini Giovanni Giuseppe
Demurtas Salvatore
Frau Salvatore
Marceddu Bobore
Mariani Antonio
Mura Giovanni Antioco
Pira Giovanni
Piras Augusto Flaminio
Schirru Giuseppina
Seu Sergio
Spanu Antioco
Est una ‘oghe
S’istratzu betzu
In su duamitzabatordighesimu
A vint’annos
A unu miserabile burricu dottoradu
Sa santificazione de duos papas
A una cicala
Sas peus ratza de sos impostores
Torra a domo
Fiores de poesia
Luna galana
Ispijos
Tiu Angheleddu
Amiga chi sunfris
Balentias mahas
7
7
8
8
9
9
10
10
11
11
12
12
13
13
14
Setzione Regionale - Rima
Agus Giovanni
Altana Antonio
Argiolas Roberto
Arru Istevene
Boccoli Giovanni
Brundu Nanni
Buonuomo Anna
Calzaghe Vittoria
Cappai Tommaso
Carrone Maria Elisa
Cocco Antonio Renato
Columbu Francesco
Contini Angelo
Demelas Anna Paola
Demelas Antonio
Demuro Valerio Mauro
Dettori Gavino
Falchi Gavino Proto Gianuario
Farris Gino
Fenu Bardilio Gaetano
Fiori Francesco
Flore Stefano
Grifagno Antonio
Ladu Salvatore
Lai Claudia
Manca Giovannino
Marceddu Alberto
Marcis Aldo
Marteddu Santino
S'iscrittu
Forsis... Maju
Ojos de fogu
Identidade
In memoria
In d-un'attimu
Da l'alba a lu tramontu
Ànghelu miu
Funti prontus po sa gherra....
Dia piccare su volu
Su beranu
Sa mere
Lu chi lacu
In custa terra
Sa tanca in luttu
Pintada mariposa
Femina e mama
Tzegu
Mama-Idda
Su contu de duos pastores
Ligadu a issa...
A Peppinu Mereu
Disigiu de torrai a sa gioventudi
Volande in s'infinidu
Su xelu
Non podeus pius...
Allizada in su tempus
Su cabori 'e su bentu
Non paret beru!
17
19
21
24
26
27
28
30
32
33
34
35
37
38
39
40
41
42
43
44
45
46
47
48
50
51
52
53
54
161
Sotziu Peppinu Mereu
Mela Domenico
Melas Giovanni
Michele Pireddu
Montisci Samuele
Motzo Antonico
Nanni Salvatore
Pala Giovanni Maria
Pinna Pinuccio
Pinna Salvatore
Pisanu Giovanni Antonio
Sanciu Vanna
Sannia Antonio
Sarai Basilio
Secci Cosimo
Sedda Giovanni
Soru Tore
Spiga Savino
Candu ti pensu
Navighende
Si meritat monumentu
Tropu lestu
S'arcusa
Puite su coro intregas
Notti e dì
Ierru puru est poesia
Si torro a bidda
S'istrione
S'aundada
Fèmina 'e Barbagia
Ca ses bella Tonara
Povera italiana natzione
A Tonara
Sa dispedida
Papa Franciscu
56
58
60
62
65
69
70
72
73
75
76
80
82
83
85
87
89
Setzione Regionale - Versi liberi
Aresu Silvana
Bardanzellu Piero
Bazzu Antonello
Bellisai Giovanni
Biggio Mariatina Battistina
Boette Giovanna Antonella
Boi Augusto
Corongiu Rosa
De Cortis Filippo
Delogu Giuseppe
Demontis Mario
Erriu Dante
Falchi Rachel
Falchi Vittorio
Furcas Susanna
Lampis Antonella
Loddo Susanna
Lussu Raffaele
Masala Fedelina
Mascia Gianni
Maxia Francesco
Mingioni Angelo Maria
Murgia Maria
Nurchis Mario
Pira Silvia
Pittau Mauro
Piu Vincenzo
Puliga Andria
Rendini Giuseppe
Ruiu Quirina
Sacchi Maria Antonietta
162
A mama mia
Umbri
Dudas e isperas
Pibionis de oru...
Cumme in boomerang
In onore de Peppinu Mereu
Malinconia
De su coro su sentidu
In disterru trastamande...
Pro Antoni Pìllaru
Druche melodia
Ingiriau de steddus
De unu bisu... presoneris
Disizu
M'abisongias
Sentidu de amori
Una die de Pasca Manna
Undas tempestosas
Li pinziunaddi de l'ipiziu
A s'acabu de su bisu
Tobàcius
In sa campagna
Figios de su entu
Domo derruta
Sa cresura
Scinitzus
Bisus stramancaus
Laccana
S'eternu drommire
Torramì lu sonniu
Disisperu
93
94
95
96
98
99
100
101
102
103
104
105
106
108
109
110
111
112
113
115
115
116
117
119
120
121
123
124
125
126
127
Cuncursu 2014
Scano Francesco
Secci Giancarlo
Secci Teresina
Sedda Mariangela
Sotgia Pietro
Spano Sartor Maddalena
Tirotto Giuseppe
Usai Mario
Vasco Giangavino
Arribada sa notti
Notti serena
Raiu 'e lugori
Da su patriottu sardu a sos feudatarios
A cramma risponde
Lu tempu conta li dì
Bàsgia li labbri a lu soli
Peppi Zappus
Non l'isco
128
130
131
132
134
135
136
137
138
Setzione Locale
Carboni Maria Carmela
Carboni Maria Giovanna
Demuro PieroBattista
Dessì Francesca
Garau Gesuino
Garau Mauro
Mascia Claudia
Mura Giantomaso
Sau Anna Paola
Sau Giovanna
Sau Lino
Sulis Elio Francesco
Zedde Luigi
Is carrattoneris
Nues
Sa poesia mia
Page
A Tonara...
I sa zona de s'arbustu
Mare nostrum
Arregodu
Laude a i' maistos
Rimas po Peppinu
Su cantareddu
Sa castagna 'e Curadore
Arregodos
141
141
142
143
144
145
147
148
150
151
152
156
158
163
Sotziu Peppinu Mereu
Stampato da
Copyleader srl
Via Basilicata, 51/53 Cagliari
Tel. – Fax 070.3511869 - 070.274437
164