Communicaziun a las medias, museum d'art dal Grischun Cuira ed institut per construcziuns
en il territori alpin, SATE Cuira
Quatter sairas davart il tema "spazi e temp"
Il museum d'art dal Grischun sin visita tar la SATE Cuira
SATE Cuira, ils 27 d'october, ils 6 da november, ils 20 da november, ils 4 da december 2014,
mintgamai a las 18.30
En il rom da las represchentaziuns ospitantas dal museum d'art dal Grischun ha lieu ina
retscha d'occurrenzas a la SATE Cuira: Classichers da l'art da video scuntran posiziuns
actualas che sa fatschentan cun il spazi a maun da meds cinematografics. Artistas ed artists,
architectas ed architects preschentan persunalmain lur lavurs davart ils differents concepts da
spazis reals ed immaterials.
Il museum d'art dal Grischun, sut la direcziun da la conservatura Katharina Ammann, organisescha en
collavuraziun cun Daniel A. Walser da l'institut per construcziuns en il territori alpin (ICTA) da la SATE
Cuira ina retscha da films davart il tema "spazi e temp". Partind dals piuniers da l'art da video e
d'artistas e d'artists che sa fatschentan explicitamain cun il spazi e cun l'architectura, vegn concepì in
program per quatter sairas. Mintga saira vegnan mussads documents da film u videos che vegnan
introducids cun in referat, commentads da las artistas e dals artists u accumpagnads d'in discurs
tranter artistas ed artists u architectas ed architects. Las lavurs da video tanschan da classichers dals
onns 1960 e 1970 sco Bruce Nauman, Gordon Matta-Clark, René Bauermeister, Jean Otth e Valie
Export fin a posiziuns giuvnas sco Zilla Leutenegger, Anina Schenker, Teresa Hubbard / Alexander
Birchler e Veronika Spierenburg. I sa tracta d'ina vart dals svilups specifics entaifer l'art da video dals
ultims 40 onns. Da l'autra vart vegnan tematisadas dumondas relevantas per l'architectura sco per
exempel, co che l'uman sa posiziunescha en il spazi, tge impurtanza che spazis intermediars han u co
ch'il spazi immaterial sa cumporta envers il spazi real en il video. Ils architects Anne Ullmann e Men
Duri Arquint mussan en quest connex, co ch'els reageschan sin concepts artistics en lur construcziuns
u co ch'els collavuran sezs cun artistas ed artists. La finamira da la retscha d'occurrenzas e da
l'exposiziun en il foyer da la SATE a Cuira è quella da porscher in'avischinaziun artistica al tema
"spazi" en in ambient per gronda part architectonic sco la SATE Cuira.
Exposiziun:
dals 27 d'october fin ils 4 da december 2014, da las 8.00 fin las 20.00
En il foyer da la SATE Cuira èn exponidas permanentamain durant la retscha d'occurrenzas
installaziuns da video da Zilla Leutenegger ed Anina Schenker. Tras quellas vegn la tematica dal
spazi e dal temp intermediada er ordaifer las sairas da las occurrenzas, e quai en spezial a las
studentas ed als students.
Occurrenzas:
ils 27 d'october 2014, a las 18.30
"Examinar spazis architectonics" – Bruce Nauman / Veronika Spierenburg
Katharina Ammann e Daniel A. Walser cun Veronika Spierenburg
L'artist american Bruce Nauman vala sco in dals artists ils pli impurtants da la segunda mesadad dal
20avel tschientaner. En sias lavurs da video e da performance che van savens fin a ses cunfins fisics,
sondescha el las relaziuns pussaivlas tranter il spazi ed il corp. La giuvna artista svizra Veronika
Spierenburg mesira en sondagis sensuals medemamain la scala ed il material dal spazi architectonic.
ils 6 da november 2014, a las 18.30
"Preschientscha fisica en temp e spazi" – René Bauermeister / Jean Otth / Anina Schenker
Katharina Ammann e Daniel A. Walser cun Anina Schenker
Ils piuniers da video svizzers René Baumeister e Jean Otth examineschan en differentas emprovas
processualas il medium cinematografic areguard sias pussaivladads spazialas e performativas.
L'artista Anina Schenker che tutga tar ina generaziun pli giuvna tschertga medemamain ils cunfins
fisics ed imaginars dal spazi cinematografic. Er ella metta las cundiziuns tecnicas dal medium "video"
en ina relaziun da tensiun cun stadis originars fisics e psichics.
ils 20 da november 2014, a las 18.30
"Il spazi infinit" – Valie Export / Zilla Leutenegger / Birchmeier/Uhlmann
Katharina Ammann cun Zilla Leutenegger ed Anne Uhlmann
L'artista austriaca Valie Export s'occupa dapi la fin dals onns 1960 explicitamain da las dumondas da
la feminilitad e da la localisaziun da la dunna en la societad ed en il spazi. Zilla Leutenegger sa
preschenta bain er savens sezza sco protagonista en sias lavurs da video, mussa però in maletg da
l'uman pli androgin e general. Ella cumbinescha savens dissegns e projecziuns cun installaziuns
cumplexas dal spazi. Leutenegger entra en in dialog cun l'architecta Anne Uhlmann davart la relaziun
tranter l'art e la construcziun. Birchmeier Uhlmann han construì differents edifizis en il Grischun,
tranter auter l'engrondiment da la chasa evangelica da persunas attempadas e da tgira a Tusaun
(2012), la construcziun nova da las abitaziuns per persunas attempadas Kantengut a Cuira (2009)
ubain l'engrondiment e la sanaziun da la chasa da persunas attempadas e da tgira "Casa Falveng" a
Domat (2013).
ils 4 da december 2014, a las 18.30
"Spazis intermediars en l'architectura ed il film" – Gordon Matta-Clark / Hubbard/Birchler
Katharina Ammann e Daniel A. Walser cun Men Duri Arquint
L'artist american Gordon Matta-Clark era architect diplomà ed ha stgaffì tras sias scultpuras radicalas
en edifizis demolids novs spazis e novas interpretaziuns. Il pèr artistic american-svizzer Teresa
Hubbard ed Alexander Birchler sondeschan cun lur fotografias e cun lur films il potenzial narrativ da
spazis. Cun construcziuns da spazis, cun montaschas da maletgs e cun moviments da la camera
subtils stgaffeschan els spazis imaginars fascinants tranter l'intern e l'extern. L'architect Men Duri
Arquint lavura medemamain cun spazis intermediars. Sias construcziuns, sco per exempel la
biblioteca en la chasa Plaz ad Ardez (2011) funcziuneschan grazia a l'elavuraziun dal spazi
intermediar. Qua tras resultan novas versiuns, però er andaments funcziunals che mettan en scena e
rendan perceptibel il spazi en ina nova moda e maniera.
Tut las occurrenzas pon vegnir visitadas gratuitamain. Silsuenter è mintgamai averta la bar.
Lieu d'occurrenza:
SATE Cuira, aula
Scola auta da tecnica ed economia
Pulvermühlestrasse 57, 7004 Cuira
+41 (0)81 286 24 24
www.htwchur.ch
Ulteriuras infurmaziuns:
www.htwchur.ch/bau/events
www.buendner-kunstmuseum.ch
Maletgs per las medias
Sin la pagina d'internet dal museum d'art dal Grischun stattan a disposiziun maletgs. Els pon vegnir
chargiads giu sut:
www.buendner-kunstmuseum.ch/medien.html
Resguardai per plaschair las legendas dals maletgs.
Contact
prof. Daniel A. Walser, responsabel per il project, SATE Cuira, institut per construcziuns en il territori
alpin, T +41 (0) 81 286 24 64, [email protected]
dr. Katharina Ammann, conservatura dal museum d'art dal Grischun, responsabla per la
communicaziun e per il project, T +41 (0)81 257 28 62, [email protected]
Stephan Kunz,directur dal museum d'art dal Grischun, T +41 (0)81 257 28 68,
[email protected]