Communicaziun a las medias
Museum d'art dal Grischun, dal 1. da zercladur fin ils 25 d'avust 2013
Uninhabitable Objects – Chasas tranter imaginaziun e realitad
Cun "Uninhabitable Objects" vegn examinà en il museum d'art dal Grischun ina tematica ch'è
d'ina relevanza sociala generala. Ina chasa – e saja quella anc uschè rudimentara – ha ina
impurtanza existenziala per l'uman. I sa tracta en questa exposiziun d'ina discussiun
subjectiva ed imaginativa cun imaginaziuns da spazi e d'abitar: "Cura è insatge abitabel?",
"Tgi abitescha là?" u "Pudess jau viver là?".
Las lavurs elegidas renvieschan tuttas en l'ina u l'autra moda a la realitad. Igl èn maletgs u models da
chasas ch'èn u ch'eran bain realisads realisticamain che n'èn dentant facticamain betg passabels u
abitabels per las aspectaturas ed ils aspectaturs e provocan perquai lur imaginaziun. Gist perquai che
las chasas èn in champ central e dal mintgadi da nossa vita, chaschunan las realisaziuns artisticas
betg cleras tant irritaziun sco er fascinaziun. Per exempel ha Rachel Whiteread laschà cuvrir ina
chasa victoriana cumplettamain cun betun e demolir la cuverta, uschia ch'il spazi d'abitar anteriur ans
scuntra sco monument mit da l'absenza. Cuntrari a quai sveglia il pèr artistic Gabriela Gerber e Lukas
Bardill a vita il vitg d'attrappas militar Answiesen, cun stgaffir cun tun e cun glisch l'illusiun che las
chasas sajan abitadas. Bianca Brunner construescha en sia retscha da fotografias Uninhabitable
Objects ovras da protecziun provisoricas e las fotografescha en ina moda che na lascha curiusamain
betg determinar tant lur funcziun sco er lur relaziuns da grondezza. Benjamin Appel construescha in
object or da mobiglias veglias che tschiffa il spazi, ch'è da grondezza natirala ma ermetic e che dat
l'impressiun dad esser a medem temp famigliar e refusant. Not Vital da l'autra vart ha realisà per propi
numerusas da sias "sculpturas abitablas" en il Niger, en l'Engiadina ed en Patagonia. Tuttina ha lieu il
viver en ils objects per motivs politics, climatics u geografics er en quests cas savens mo en
l'imaginaziun.
Tar questa exposiziun na stat betg la chasa sco simbol da status en il center, mabain sia impurtanza
fundamentala per l'uman. "Il senn da la chamona" è medemamain d'exequir ina funcziun da
protecziun fisica sco er la pussaivladad da porscher "da siemiar en pasch" (Gaston Bachelard). Baud
stgaffeschan ils uffants cun meds e materials simpels chasas per sa zuppar dal mund e per avair in
lieu per sasezs. Gist en noss temp ed en nossa societad bainstanta, en la quala las bleras persunas
han in domicil fix en ina chasa stabila vegn la chamona puspè impurtanta sco lieu da retratga e da
reflexiun. Il plaschair da construir che nus avain en nossa uffanza cuntinuescha er en ils concepts
artistics che s'occupan tuts cun il passar ed il passentar mental dal spazi. Mussads vegnan objects,
installaziuns, fotografias e videos da Benjamin Appel, Bianca Brunner, Gabriela Gerber/Lukas Bardill,
Catrin Lüthi K, Christof Rösch, Thomas Schütte, Gaudenz Signorell, Not Vital e Rachel Whiteread.
Quest siemi d'independenza e da segirezza, represchentà oriundamain en la simpladad provisorica
d'ina chamona, furma la basa per ina purschida speziala per uffants. En stretga collavuraziun sviluppa
la curatura Katharina Ammann e l'intermediatura d'art Alexa Giger in plazzal d'uffants en l'iert da la
Villa Planta istorica. La stad vegn construì là – sut surveglianza professiunala – cun artistas ed arists
sco er cun mastergnantas e mastergnants ina villa d'uffants, en la quala las fantasias da spazi e
d'abitar pon vegnir empruvadas plain plaschair.
Empè d'in catalog d'exposiziun classic cumpara ina publicaziun, tar la quala l'idea d'intermediaziun
furma il mussavia. Ella cuntegna ultra da las infurmaziuns davart las artistas ed ils artists er propostas
ed instrucziuns davart las realisaziuns praticas en il sectur da construir e d'abitar.
Katharina Ammann
Vernissascha
venderdi, ils 31 da matg, a las 18.00
bainvegni: Barbara Gabrielli, manadra da l'uffizi da cultura
introducziun: dr. Katharina Ammann, conservatura dal museum d'art dal Grischun
Visitas guidadas publicas
las gievgias, a las 18.00: ils 6 ed ils 20 da zercladur, ils 4 da fanadur, ils 25 da fanadur, ils 22 d'avust
las dumengias, a las 11.00: ils 9 da zercladur, ils 25 d'avust
Answiesen Visitation
inspecziun da l'implant da cumbat St. Luzisteig cun Gabriela Gerber e cun Lukas Bardill
sonda, ils 8 da zercladur, a las 20.30
lieu da scuntrada museum d'art dal Grischun, il dumber da participantas e da participants è limità
s'annunziar sut 081 257 28 68 u sut [email protected]
Publicaziun
Uninhabitable Objects – Behausungen zwischen Imagination und Realität, edì da Katharina Ammann
e da Alexa Giger, cun contribuziuns da Katharina Ammann, da Alexa Giger, da Anna Joss e da Nicole
Seeberger, Museum d'art dal Grischun a Cuira, CHF 28.– / CHF 24.– per commembras e per
commembers da la UGA
Project da construcziun "villa d'uffants"
Dis da construcziun per classas:
zercladur: ma 4/gie 6/ma 11/gie 13/ma 18/me 19/gie 20/ma 25/me 26/gie 27
Construir durant las vacanzas:
dals 2 fin ils 5 da fanadur per uffants a partir da 10 onns
Festa da ventschida da la villa d'uffants
ils 5 da fanadur, a partir da las 17.00
Introducziun per persunas d'instrucziun
Ils 5 da zercladur, da las 17.00 fin las 19.00, annunzia necessaria
s'annunziar sut 081 257 28 72 u sut [email protected]
infurmaziuns: http://www.buendner-kunstmuseum.ch/ru/educaziun/occurenzas.html
Occurrenzas NAIRS Center d'art contemporan, Scuol
Partind da l'exposiziun en il museum d'art dal Grischun organisescha Christof Rösch en il NAIRS
Center d'art contemporan a Scuol in'exposiziun parallela ch'examinescha pli detagliadamain sut il
medem titel "Uninhabitable Objects" la relaziun tranter sculptura ed architectura.
venderdi, ils 14 da zercladur, 18.00
vernissascha Uninhabitable Objects – architectura senza intents specifics e niz da l'art
mardi, ils 6 d'avust, 20:00
NAIRS FILM: Rachel Whiteread „House“ 1993, introducziun da Katharina Ammann
mesemna, ils 7 d'avust, 19.30
in discurs tranter architectas ed architects, tranter artistas ed artists sco er tranter il curatur Christof
Rösch e la curatura Katharina Ammann
Orientaziun a las medias
gievgia, ils 30 da matg 2013, a las 10.00
bainvegni e gir tras l'exposiziun: dr. Katharina Ammann, conservatura dal museum d'art dal Grischun
Maletgs per las medias
Maletgs stattan a disposiziun sin nossa pagina d'internet. Els pon vegnir chargiads giu sut:
http://www.buendner-kunstmuseum.ch/ru/medien.html. Resguardai per plaschair las legendas dals
maletgs.
Contact
Katharina Ammann, conservatura/communicaziun, tel. +41 (0)81 257 28 62
[email protected]