425.130
Ordinaziun davart la scola media commerziala (OSMC)
dals 08-11-2011 (versiun dals 08-11-2011)
sa basond sin l'art. 45 al. 1 da la constituziun chantunala1) e sin l'art. 19 da la lescha
davart las scolas medias en il chantun Grischun2),
relaschada da la regenza ils 8 da november 2011
1. Disposiziuns generalas
Art. 1
Champ d'applicaziun
1
Questa ordinaziun regla la promoziun da semester, las cundiziuns per far cun
success l'attestat federal da qualificaziun da commerzianta/commerziant, furmaziun
extendida, sco er la maturitad professiunala per las scolas medias commerzialas cun
maturitad professiunala che vegnan manadas tenor las disposiziuns dal dretg federal.
2
Reglaments da scolas medias privatas che divergeschan da disposiziuns da questa
ordinaziun basegnan l'approvaziun da la regenza.
3
Uschenavant che questa ordinaziun na cuntegna naginas regulaziuns expressivas,
vegnan applitgadas confurm al senn las disposiziuns da l'ordinaziun davart il
gimnasi3) sco er las disposiziuns federalas davart la furmaziun fundamentala
professiunala.
Art. 2
Durada da la scolaziun
1
La scolaziun dura fin a l'acquist da l'attestat federal da qualificaziun da
commerzianta/commerziant, furmaziun extendida cun maturitad professiunala, per
regla 4 onns. Ella è dividida en ina furmaziun scolastica a temp cumplain da 3 onns
ed en in praticum da manaschi dad 1 onn che sto vegnir absolvì suenter la furmaziun
scolastica.
1)
2)
3)
DG 110.100
DG 425.000
DG 425.050
* tabellas da las modificaziuns a la fin dal relasch
1
425.130
Art. 3
Plan d'instrucziun
1
Instruì vegni tenor il plan d'instrucziun ch'è concepì tenor las directivas dal dretg
federal ed approvà da la regenza.
2. Promoziun
Art. 4
Roms da promoziun
1
Ils roms da promoziun èn:
1.
ils roms fundamentals emprima
lingua
chantunala (Deutsch,
rumantsch/Deutsch, italiano), segunda lingua chantunala (tedesco, franzos,
talian), terza lingua (englais), istorgia ed instrucziun civica, economia
publica/economia da manaschi/dretg e matematica;
2.
il rom d'accent finanzas e contabilitad;
3.
ils roms cumplementars geografia e scienzas natiralas sco er ils roms
d'instrucziun supplementars infurmaziun/communicaziun/administraziun,
parts praticas integradas, projects interdisciplinars.
Art. 5
Promoziun da semester
1
La promoziun al proxim semester ha lieu, sche la media betg arrundada da las
notas dals roms da promoziun cuntanscha almain ina nota da 4,0, sche maximalmain
3 notas èn insuffizientas e sche la summa da tut las divergenzas da notas da la nota
4,0 vers engiu na surpassa betg la valur da 2,5.
2
Tgi che n'ademplescha betg questas premissas, vegn promovì provisoricamain.
Suenter ina promoziun provisorica ston las cundiziuns da promoziun vegnir
ademplidas en il proxim attestat. Uschiglio ston vegnir repetids ils ultims dus
semesters.
3. Certificat da furmaziun scolastica
Art. 6
Termin dals examens
1
Ils examens en scrit ed a bucca han lieu avant las vacanzas da stad a la fin dal
3. onn da scolaziun. La matematica vegn terminada 1 onn pli baud.
2
Il departament fixescha il termin dals examens.
Art. 7
Admissiun
1
L'admissiun pretenda per regla la frequentaziun d'ina scola media commerziala en
il chantun Grischun durant almain ils 2 ultims onns avant la terminaziun da la part
scolastica da la furmaziun.
2
425.130
Art. 8
Integraziun da las scolas autas spezialisadas
1
Las scolas autas spezialisadas ston sa participar adequatamain a la realisaziun dals
examens finals.
Art. 9
Roms d'examen
1
Examinadas en scrit vegnan l'emprima lingua chantunala, la segunda lingua
chantunala,
matematica,
finanzas
e
contabilitad,
infurmaziun/communicaziun/administraziun.
2
Examinadas a bucca vegnan l'emprima lingua chantunala, la segunda lingua
chantunala, la terza lingua, economia publica/economia da manaschi/dretg, istorgia
ed instrucziun civica.
3
Per il rom infurmaziun/communicaziun/administraziun vegnan dadas dieschavel
notas, per ils ulteriurs roms mesas notas e notas entiras.
Art. 10
Notas dal rom
1
Las notas dal rom vegnan fixadas en ils roms fundamentals cun effect sin la
promoziun, en il rom d'accent, en in rom cumplementar ed en il rom
infurmaziun/communicaziun/administraziun, e quai tenor las suandantas
disposiziuns:
1.
en ils roms, en ils quals ha lieu in examen, mintgamai per la mesadad sin basa
da las prestaziuns da l'ultim onn da scolaziun e da l'examen;
2.
en il rom cumplementar sin basa da las prestaziuns da l'ultim onn da
scolaziun, durant il qual quel rom è vegnì instruì.
2
Diploms da lingua ch'èn renconuschids da l'uffizi federal cumpetent pon furmar ina
part da la nota dal rom en ils roms correspundents. En quest cas vegn la nota dal rom
calculada mintgamai per la mesadad da la nota da l'examen per il diplom extern da
lingua e da la media da las notas dals attestats dals ultims dus semesters.
Art. 11
Attestat da notas
1
L'attestat da notas cuntegna las notas da l'examen final dal rom, las notas d'ulteriurs
roms sco er la nota per gimnastica e per sport. Ils diploms externs da lingua
acquistads vegnan menziunads.
4. Certificat da scolaziun manaschial
Art. 12
Praticum
1
L'uffizi per la furmaziun media-superiura relascha – suenter avair consultà las
organisaziuns cumpetentas dal mund da lavur, l'uffizi per la furmaziun professiunala
sco er las direcziuns da scola – directivas concernent la concepziun dal praticum
manaschial dad 1 onn.
3
425.130
2
Las emprendistas ed ils emprendists tschertgan sezs lur plazza da praticum. La
scola sustegna las emprendistas ed ils emprendists a tschertgar ina plazza da
praticum.
3
Durant il praticum vegnan las emprendistas ed ils emprendists accumpagnads d'ina
persuna d'instrucziun da la scola.
Art. 13
Giudicament da las prestaziuns
1
Il giudicament da las prestaziuns per il certificat da scolaziun manaschial cumpiglia
ils suandants quatter secturs:
1.
duas situaziuns da lavurar e d'emprender durant il praticum;
2.
mintgamai in'unitad da process en il rom da las parts da pratica integradas e
durant il praticum;
3.
parts da l'examen en scrit ch'èn prescrittas centralmain e ch'èn specificas per la
branscha, che sa basan sin las finamiras da prestaziun davart la furmaziun
pratica professiunala;
4.
in examen a bucca specific per la branscha.
2
Las prestaziuns en quests quatter secturs vegnan valitadas tenor las disposiziuns da
la confederaziun.
5. Attestat federal da qualificaziun e maturitad professiunala
Art. 14
Attestat federal da qualificaziun
1
Tgi che terminescha cun success la part scolastica e la part manaschiala che vegnan
valitadas tenor las disposiziuns da la confederaziun e ch'èn necessarias per l'attestat
federal da qualificaziun survegn l'attestat federal da qualificaziun da
commerzianta/commerziant, furmaziun extendida.
Art. 15
Maturitad professiunala
1
La maturitad professiunala è reussida, sche la media betg arrundada da las notas
dals roms senza infurmaziun/communicaziun/administraziun cuntanscha almain ina
nota da 4,0, sche maximalmain 2 notas dals roms èn insuffizientas e sche la summa
da tut las divergenzas da notas da la nota 4,0 vers engiu na surpassa betg la valur da
2,0.
Art. 16
Repetiziun d'examens
1
Tgi che n'ademplescha betg las cundiziuns per acquistar la maturitad professiunala
a la fin da la furmaziun scolastica, po far anc ina giada ils examens suenter avair
repetì la classa finala.
4
425.130
2
Tgi che ademplescha las premissas per reussir tar la maturitad professiunala, betg
però quellas per acquistar l'attestat federal da qualificaziun, po absolver il proxim
termin ordinari d'examen ina giada in examen cumpensatoric en ils roms
insuffizients da l'attestat federal da qualificaziun.
Art. 17
Attestat federal da qualificaziun senza maturitad professiunala
1
En cas d'ina nunreussida tar la maturitad professiunala vegnan las notas da la part
scolastica midadas a norma da la confederaziun en notas per l'attestat federal da
qualificaziun.
2
Sche las disposiziuns per l'attestat federal da qualificaziun vegnan ademplidas
suenter che las notas èn vegnidas midadas, vegn concedì l'attestat federal da
qualificaziun, furmaziun extendida.
6. Disposiziuns finalas
Art. 18
Execuziun
1
L'execuziun è chaussa da l'uffizi.
Art. 19
Disposiziun transitorica
1
Per scolaras e scolars che frequentan l'onn da scola 2011/12 la segunda u la terza
classa da la scola media commerziala valan las disposiziuns vertentas da l'ordinaziun
davart la scola media commerziala en il chantun Grischun.
Art. 20
Entrada en vigur, aboliziun dal dretg vertent
1
Questa ordinaziun entra en vigur retroactivamain per il 1. d'avust 2011 e remplazza
l'ordinaziun davart la scola media commerziala en il chantun Grischun (OSMC) dals
25 da zercladur 20021).
1)
CUL 2003, FUC 3090 e CUL 2004, FUC 2773
5
425.130
Tabella da las modificaziuns - tenor conclus
Conclus
08-11-2011
6
Entrada en vigur
01-08-2011
Element
relasch
Modificaziun
emprima versiun
Publicaziun en la CUL
-
425.130
Tabella da las modificaziuns - tenor element
Element
relasch
Conclus
08-11-2011
Entrada en vigur
01-08-2011
Modificaziun
emprima versiun
Publicaziun en la CUL
-
7