La Quotidiana 25-9-2014, p. 15 ■ CUSSEGL DAL PUBLIC SRG.R Redacziun en chasa federala e rapports dal campiunadi mundial sut la marella (cp) La sesida dal settember dal Cussegl dal public SRG.R (CP SRG.R) è stada quella giada extra muros a Casti. En questa sesida è il CP SRG.R s’occupà cun ils rapports da RTR Radiotelevisiun Svizra Rumantscha or da la chasa federala a Berna. En pli è ina gruppa da lavur sa participada a l’examinaziun naziunala da tut ils cussegls dal public da la SRG SSR davart il Campiunadi mundial da ballape 2014 da la Fifa en la Brasilia. La gruppa ha examinà la purschida da RTR e cumpareglià quella cun l’offerta da las autras regiuns linguisticas. La nova directura da RTR, Ladina Heimgartner, ha participà per l’emprima giada a la sesida dal CP. Il Cussegl dal public lauda ils rapports da RTR Radiotelevisiun Svizra Rumantscha or da la chasa federala a Berna. Adrian Camartin e Claudio Spescha persvadan cun lur cumpetenza linguistica ed in’excellenta tscherna da tematicas. Ils auditurs e las audituras survegnan infurmaziuns fundadas davart las activitads politicas. Las contribuziuns survegnan il spazi d’emissiun necessari e las tematicas vegnan messas en il dretg context. Ils rapports tractan per gronda part cuntegns relevants per il chantun Grischun ed ils parlamentaris grischuns vegnan a pled. Il CP SRG.R deplorescha la midada da Claudio Spescha en la redacziun da la «Tagesschau» da SRF Schweizer Radio und Fernsehen. Sia successura è Anna Serarda Campell. Il concept da RTR Radiotelevisiun Svizra Rumantscha per il Campiunadi mundial da ballape 2014 da la Fifa en la Brasilia è stà fitg cumplessiv. L’entschatta da zercladur hai dà ils emprims rapports dal CM da ballape. Durant il turnier han ins intensivà ils rapports. Per l’emprima giada ha RTR commentà per rumantsch partidas da ballape da la squadra naziunala svizra via livestream. Quest experiment è sa sviluppà per RTR ad in highlight da quest campiunadi. Il livestream cun commentari rumantsch ha chattà grond interess tar il public. Il CP SRG.R fa ina bilantscha positiva dals rapports da RTR ed è surprais da la diversitad dals differents rapports sin tut ils vecturs. Las aspectativas èn pli che accumplidas ed igl è stà in plaschair da participar cun RTR al CM da ballape. Ils reporters n’han betg mo intermedià resultats, mabain han er furnì infurmaziuns cumplementaras davart la Brasilia sco pajais ospitant. RTR n’ha tuttina betg pudì rapportar da tut las partidas. Ils gieus da la squadra naziunala svizra han pudì vegnir persequitads cun commentari rumantsch via livestream. Tut las autras partidas èn stadas da vesair sin ils emetturs da SRF u sin ils emetturs da las autras unitads da l’interpresa. RTR vegn a rapportar per rumantsch via livestream sin la pagina www.rtr.ch er davart las partidas da qualificaziun da la squadra naziunala per il Campiunadi europeic 2016 da l’Uefa en Frantscha. Las emprimas difficultads tecnicas cun il livestream han ins schlià gia durant il CM da ballape. Il CP SRG.R giavischa in schlargiament da questa purschida e vul laschar sclerir sch’ins pudess porscher il commentari rumantsch sco bi-chanal sin l’emettur SRF2. En la proxima sesida il november 2014 s’occupa il CP SRG.R cun las contribuziuns per giuvenils da «Battaporta». En pli vegn reglada la successiun da Martina Schudel-Noggler che sa retira per raschuns persunalas sin la fin da l’onn dal CP SRG.R. Andreas Wieland e Romand Dobler han rapportà per il Radio Rumantsch dal Campiunadi da ballape 2014 en Brasilia. MAD ■ FORUM Nua ei la solidaritad? Questa fin dalla jamna decida il suveran grischun davart la nova ulivaziun da finanzas. El decuors dils davos dis e dallas jamnas vargadas ei vegniu scret e discutau savens e cun dabia emoziuns davart quei tema. Jeu seregordel aunc bein alla semeglionta discussiun a caschun dalla introducziun dalla nova ulivaziun da finanzas federala ida en vigur igl emprem da schaner 2008. Duront beingleiti siat onns funcziuna quei instrument bein e garantescha ina certa efficienza d’exequir las incumbensas e segirar prestaziuns statalas favoreivlas. L’ulivaziun da finanzas federala mitighescha las differenzas denter ils singuls cantuns. Era sin palancau federal existan cantuns che pagan ella ulivaziun ed auters che retrain daners. Schebein che buca tuts ein cuntents resta la solidaritad ina impurtonta petga dil sistem statal svizzer. Nua sesanfla quella solidaritad el cantun Grischun? Cheu vulan in pèr vischnauncas beinstontas dar da crer che la plipart dallas vischnauncas e dalla populaziun grischuna spiardi entras la nova ulivaziun da finanzas. Quei ei nuot auter ch’acrobatica da cefras e tenor miu avis pura polemica per segirar ils agens interess. Grischunas e Grischuns appelleschan bugen alla solidaritad naziunala. Pertgei essan nus buca promts da viver quella solidaritad denter las vischnauncas grischunas? Cun perschuasiun vegnel jeu a votar gie a favur dalla nova ulivaziun cantunala da finanzas. Aurelio Casanova, president dalla vischnaunca Ilanz/Glion e deputau dalla pcd
Scarica
pdf
