Dedicato
A tutti i Brindisini
sparsi nel mondo che sono dovuti
andare via dall’amata città non per
propria volontà, ma per scelta di vita.
Le frasi scritte in questo lavoro, sono tratte da un libro
Scritto in vernacolo da Fortunato Montanaro Brindisino
Verace, classe 1918.Le immagini sono state
tratte da una raccolta fotografica di
“sfondi desktop” . Ciò che andrete a vedere
è stato realizzato da Maurizio Passante
BUONA VISIONE!!!!
O terra mia quantu si’ bella
Tu addo a nata rumani eterna.
Tu ca sinti matri natura
Ti nisciunu tu tieni paura.
Na vota stu paisi era puvirieddu,
Senza turnisi però era fattu pi viteri
Ca tinia nu mari miravigliatu
Pi comu era furmatu.
Allu casali nu bellu sciardinu
Cu setti ottu caseddi e nu villinu
A da mienzu comu pecuri spatriati
Cu pirsuni senza pinzieri e scuscitati,
Pircè ca ti lu nienti si cuntintava
C’alla megghiu si ‘ranciava.
Puru cu la giacchetta rivutata
Ti la bonanima ti lu tata.
Lu prisepiu si facia a Natali
Cu picurieddi, pasturi e ri Magi,
Cu tanta e tanta belli ricali
E nui cu pettuli, purcidduzzi, ‘ncartiddati
Po’ rivvava la bifana puviredda
Cu cenniri e craunedda cu na pupa ti pezza
Cu cavallucci e quarche trumbetta
E pi nù vagnuni era festa.
Po’ rivvava sant’Antueni
cu maschiri e sueni
Cu la focra ti botti e sarmienti
Li vagnuni ca giraunu comu pizzienti
Ca quiddi erunu tandu li divertimienti.
A Santa Pulinara faciunu la millunata
Cu puddichi, vinu e quarche frittata.
Ballaunu e cantaunu tutti cuntienti
Cu taieddi chini ti brascioli e purpetti.
Ti li vindegni cu traini e travineddi
Cu cavaddi e ciucciarieddi
Cu belli uarnamienti, cu fittucci e campanieddi
E lu mustu ca sculava totta la strata ti ‘ddurava.
‘ Ncera na vicchiaredda ca la ‘ngiuravano trapunarella
Bachisi ca scia a ‘ngiru cu rafanieddi rumanella,
Giardinu cu li gilati ca critava:
“gilati,crema e cioccolata”
“lecu quattru sordi na liccata”.
Carosi e giuvini ca sciucaunu cu li nuci
E si li uardaunu anziani e vicchiarieddi
Sittati allu friscu culli siggiteddi.
Sciucaunu tutti riuniti
Li vagnuni sotta
alli luci ti li lampiuni
Cu tutti li sciuechi
cchiù cumuni.
Ce tiempi comu parunu luntani,
Pari ca mai ‘nciannu isistutu.
E puru iu ti sittant’anni
‘nciaggiu statu e aggiu vissutu.
Ma lu cori mia quandu si ricorda
chiangi e si enchi ti gioia
Ca era atru tiempu atra vita
Era tutta n’atra cosa
Stu Brindisi ti na vota
Ma veramenti stu Brindisi quantu’ndè passatu
E comu l’annu cumbinatu quiddi c’annu cumandatu,
Ca solu ca lu tennu cussì ‘ntrassatu e ‘mbucatu
Ca lu verdi ti li ioli e di li giardinetti sta tuttu siccatu
Anveci prima era tuttu bellu virdisciatu
E comu era bellu furmatu,
Cu quiddi murigghioni e furtezzi
Ca tiniunu stu Brindisi tuttu circundatu,
Ma moi quiddu murigghioni
addò è sce spicciatu?
Ma iu ticu: addai eruna
asce fari la spiculazioni?
Cu fannu di ‘nfitiscimienti
Ti abitazzioni?
Cu ‘mbucciunu la storia
Ti li rumani e di li borboni?
Menu mali ca quiddi furtezzi l’annu lassati,
armenu quandu vennu li stranieri tennu ce anna
futucrafari, cussì si ricordunu ti stu Brindisi
e di l’antichi rumani.
Ma iu penzu ca quiddi ca cumandaunu tandu
No’ erunu propia brindisini
Ca si no quiddi cosi no’ li faciunu.
Ma siccomu ca ticunu
Ca San Ghiatoru
È amanti ti li furastieri
Vennu a Brindisi
Li tannu lu cumandu
E comu volunu loru fannu e sfannu:
O ‘ndrizzunu o sbagliunu.
Ma quiddi ca figna a moi annu cumandatu ormai è tuttu passatu
E visamu quiddu ca Brindisi l’ava ministrari
Sobbra alla minestra cu ‘nci metti assai Sali,
Propia cu nò si po’ mangiari
E a iddu ci ‘nci manca lu Sali
E no’ sapi propia ministrari
Ticimu alla brindisina
Allora cu va caca a mari
O cu si va mena propia a mari.
O Brindisi quantu
Sinti particulari,
Pi quiddu nomi
Ca t’annu tatu
Ca ti tutti sinti amatu
E a tutti li festi
Tu sinti numinatu
E puru fistiggiatu
E ti brindunu tutti
Senza tistizziuni:
Uemmini, femmini e vagnuni,
Cu li bicchiri ti mitallu,
Ti creta e di cristallu.
Chini ti sciampagna e di vinu ti la campagna
Ti tanta belli culuri,brindunu tutti puvirieddi e signuri.
Ca già na festa lu Brindisi no vinia fattu,
Nisciunu rumania sutisfattu
E quandu tu si numinatu
Nui brindisini ti tei ‘ndi ricurdamu,
Ti quiddu bellu mari e di lu puertu comu è furmatu,
Ca ti l’atri paisi sì’ curtiggiatu
E ‘ndi faci ricurdari ti lu passatu,
Ca comu si tici ca assa’voti
Tui a statu tirrimutatu
E li veri brindisini iannizzari
Sempri tisu t’annu ‘mpizzatu
E veramenti ti l’à miritatu.
E non comu quiddu tispiratu
Ca a stu Brindisi si ‘nde vinutu
Comu n’emicratu
Ca a stu Brindisi
L’annu nu picca tiscratatu
Ma tui brindisinu iannizzaru
Puru ca t’annu misu du sobrannomi
Tu tieni sempri n’atru valori.
Ma moi iu ca no sontu iannizzaru
E mi sentu veru brindisinu,
Cu loru mi sentu vicinu.
Ma iu ‘nci vulia a facia
Nu Brindisi all’usu mia,
Ma ti vinu assai ‘ndi vulia,
Ci ‘ndi putia averi nu valiri
Cu brindu cu tutti li veri BRINDISINI.
BRINDISI
NEL
CUORE