SURSELVA
GLINDESDI, ILS 17 D’AVUST 2009
Ussa suonda la fasa dalla pratica
Il venderdis ha giu liug l’avertura festiva dalla Scola da talents Surselva a Glion
DA HANS HUONDER / ANR
■ 15 scolaras e scolars dall’entira
regiun visetan uonn la Scola da talents Surselva a Glion. Il venderdis
suenter miezdi ei l’avertura da quella vegnida festivada pompusamein.
Da tuttas varts ei il pass curaschus
ed innovativ dil Consorzi da scola
Glion e contuorn vegnius ludaus.
Avon rodund dus onns han Martin
Candinas da Rabius, Adelin Pfister da
Sursaissa ed Alex Pfister da Glion mess
en discussiun la realisaziun d’ina scola
da talents per il scalem secundar I.
Quella idea ei arrivada tier ils responsabels dil Consorzi da scola Glion e
contuorn e lezs ein semess cun anim
vid quei project ambizius. Biaras sedutas e preparativas ein stadas necessarias
avon ch’il president dil consorzi, Martin Gabriel, sappi annunziar la naschientscha dalla scola. Quei ei succediu questa primavera ed il venderdis
vargau ha la scola clamau ils emprems
scolars, lur geniturs, hosps dalla politica, dalla scola e dil sport alla fiasta
d’avertura. Igl ei stau in act particular
ell’aula dalla casa da scola a Glion. Prominenza da tuttas varts ha laschau plidentar da vegnir egl emprem marcau
spel Rein per assister a quei mument
extraordinari. A Glion exista ussa
numnadamein l’emprema scola da talents pil scalem secundar I dil cantun
Grischun. Sco quei ch’igl ei stau d’intervegnir, ein ulteriuras scolas da talents planisadas, denter auter a Cuera,
el contuorn Tavau/Claustra ed ell’Engiadina aulta. Glion presta denton lavur da piunier e quei vegn renconuschiu generalmein.
S’adattar al singul scolar
15 scolaras e scolars da Flem entochen
Mustér visetan uonn la scola da talents.
Sco quei ch’il menader da scola Gieri
Tschuor di, ein els da duas annadas. La
gronda part dallas lecziuns ordinarias
da scola visetan els communablamein
en ina stanza. La scola lavura tenor in
concept pedagogic detagliau ch’ei vegnius elavuraus a Glion. «Sin fundament da quei concept savein nus prender risguard dallas fermezias, respectivamein dallas fleivlezias dil singul scolar. Cheutras savein nus preparar el per
sias finamiras professiunalas dil futur»,
di Gieri Tschuor. Quater entochen
tschun gadas ad onn vegn la cumpetenza sociala, la prestaziun, l’instrucziun e
la lavur evaluada. Duas gadas ad onn ei
previu in’examinaziun entras igl inspectorat da scola. En tuttas evaluaziuns ein ils scolars e scolasts e per part
era ils geniturs involvi. Neginas concessiuns ha il cantun fatg concernent la
tabla da lecziuns, aschia che quella sa
Martin Gabriel, president dil Consorzi da scola Glion e contuorn, en cumpignia dallas empremas scolaras e dils emprems scolars dalla Scola da talents Surselva.
buca vegnir reducida sco en auters cantuns (26-22 lecziuns). Per quei motiv
frequentan ils giuvenils a Glion 30
lecziuns. Duas ulteriuras ston vegnir
cumpensadas cun duas jamnas da project. Treis ulteriuras lecziuns fuorman
in «atelier d’emprender». Sper las lecziuns da scola usitadas seporscha als 14
sportists (skis alpin, skis nordic, ballapei) ed alla musicista (clavazin) la caschun da sededicar intensivamein a lur
spartas da sport e musica. Per optimar
il menaschi ha la Scola da talents Surselva engaschau in coordinatur en pensum parzial. Tenor informaziuns dil
menader da scola Gieri Tschuor vegn
igl emprem onn da menaschi dalla scola a custar denter 200’000 e 300’000
francs. La finanziaziun vegn garantida
cun agid dil maun public, da sponsurs
ed entras ils daners da scola. In’uniun
da fauturs porscha medemamein
maun.
In di da fiasta
Rodund 200 hosps dalunsch e damaneivel, dalla politica, dalla scola e dil
sport ha il president dil Consorzi da
scola Glion e contuorn, Martin Gabriel, saviu beneventar il venderdis. En
siu beinvegni ha el plidau d’in di da fiasta pil consorzi ch’ei purtader dalla
Scola da talents Surselva. Il president
dil marcau, Martin Montalta, ha sut-
lingiau las stentas da francar Glion sco
liug da scola regiunal.
En quei connex appellescha el allas
vischnauncas dalla regiun da sustener
quels sforzs. Sco anteriur sportist da
prestaziun ei il president dalla regenza
grischuna, Hansjörg Trachsel s’exprimius: «Cun quella partenza daventa ina
purschida realitad che biars geniturs,
uniuns da sport dil Grischun e segiramein era biars scolars dil scalem superiur han spitgau daditg.» Igl anteriur
vicecampiun mundial da bob taxescha la purschida per il scalem secundar I sco excellenta cumpletaziun dils
gimnasis da sport ch’existan el cantun
Grischun dapi biebein diesch onns.
«Als giuvenils seporscha la caschun
da sepreparar per ina carriera da sport
ni musica, e quei senza stuer acceptar
deficits en scola. La scola sto surprender pensums che san buca pli vegnir
adempli d’autras instituziuns. El sport
plaidan ins buca d’in agir social, cheu
vegn el era praticaus», di Hansjörg
Trachsel.
In pass curaschus
Claramein en favur dalla scola en cumbinaziun cul sport ha era il cusseglier
naziunal e president dil Club da hockey Tavau, Tarzisius Caviezel, plidau.
Il club da hockey impunda mintg’onn
rodund in milliun francs ella promo-
ziun dils affons e giuvenils denter 6 e
18 onns. Il success ch’il club ha san ins
lu era buca surveser. «Jeu gratuleschel
per quei pass curaschus e quei grondius project. Quella scola da talents ei
in’empermischun vicendeivla da scolars e magisters. Mo tgi ch’empren sa
prestar», di il cusseglier naziunal liberaldemocrat. Ella medema crena ha siu
collega dil parlament, cusseglier naziunal e president dalla Pcd Svizra, Christophe Darbellay dau: «Nus duvrein ina
ferma scola populara. Quei che pertucca il sport sil scalem secundar I eis ei
vegniu fatg memia pauc entochen oz.
La scola promova respect e prestaziun.»
Semegliontamein ein era il president
da Swiss Ski, Urs Lehmann ed il president dil parlament regiunal dalla Surselva, Roman Cantieni s’exprimi, sco
era il president dall’Uniun grischuna
per sport, Stefan Zürn.
Auguris ein era vegni dil goli
dall’equipa naziunala da ballapei Diego Benaglio, dil skiunz Carlo Janka da
Sursaissa e digl anteriur cusseglier federal Samuel Schmid. La fiasta d’avertura
ei vegnida embellida musicalmein da
Rilana Cadruvi e Clau Scherrer, sco era
dall’absolventa dalla scola da talents,
Sina Halter. Per conclusiun dalla fiasta
han la predicanta Nora Blatter e sur Alfred Cavelti dau la benedicziun alla nova instituziun.
3
■ STUSSAVGIA
Viseta dil reservat
d’uaul Aclatobel
(anr) En connex cun siu giubileum da
100 onns organisescha la Pro Natura
sonda proxima, ils 22 d’uost 2009
in’excursiun el reservat d’uaul Aclatobel denter Versomi e Tenna. Sco guids
dall’excursiun stattan igl inschignier
forestal regiunal Maurus Frei ed igl inschignier forestal Ruedi Zuber a disposiziun. Allas participontas ed als participonts vegn cussegliau da prender
vestgadira adattada all’aura. Annunzias san vegnir fatgas per e-mail [email protected] ni era via la pagina
d’internet www.pronatura.ch, sco era
per fax 061 317 92 66.
Il reservat d’uaul Aclatobel ha ina
grondezia da 365 hectaras. En sia varietad e natira selvadia eis el unics. Buca meins che 44 differents loghens
d’uaul ein vegni registrai entochen ussa. Vidlunder vegnan fasas dil svilup
d’uaul dil stadi da piunier sin terren
criu e terren da bloc entochen tier las
differentas fasas da vegliadetgna. Il fau
sesanfla agl ur da sia derasaziun naturala. Co vegn el a sesviluppar en connex cun las midadas dil clima? Ferms
ischals ed imposants pégns fan impressiun als visitaders dil reservat. Ultra
dils camutschs, cavreuls e las tscharvas
vivan cheu era pli pigns animals
lactonts. Igl uaul dat spazi a biaras sorts
da flurs e libellas. La cavorgia dalla Rabiusa procura per ina dinamica tut speciala. Ils participonts dall’excursiun
san guder quella varietad ed obtegnan
in’investa ella historia e la geologia dil
pli grond reservat d’uaul dil nord dil
Grischun. La Pro Natura ed il cantun
Grischun han susteniu finanzialmein il
reservat ed ils possessurs dil terren.
■ DIOCESA DA CUERA
Nominaziuns
(anr) Uestg Vitus Huonder ha recepiu
ella baselgia dil seminari da s. Leci a
Cuera Clau Martin Bieler, da Rabius,
sco candidat per dil diaconat e presbiterat (admissio).
Sur Klaus Rohrer, tochen ussa plevon-administratur da Domat, ei vegnius nominaus niev ceremoniar digl
uestg. - Niev plevon-administratur
dalla pleiv da s. Flurin a Martina daventa sur Christoph Jakob Willa e sco
niev plevon- administratur dalla pleiv
dalla ss. Trinitad a Tarasp ei sur
Kryzstof Malinowski vegnius nominaus.
reclama
Shorley –
für natürlich
frische Energie
Shorley ist die Mischung von
60% Schweizer Apfelsaft mit
40% natürlichem Mineralwasser. Der Gehalt an Fruchtzucker und Fruchtsäuren des
Apfels, und Mineralstoffe
der Mineralquelle Passugg,
machen Shorley zum
erfrischenden Durstlöscher.
Shorley – das natürlichste Getränk!
Il president dalla pcd svizra, cusseglier naziunal Christophe Darbellay, ha sutlingiau l’impurtonza d’ina ferma scola populara.
Il Sursilvan Tarzisius Caviezel, cusseglier naziunal e president dil Club da hockey Tavau,
ha ludau il project per la scola da talents.
FOTOS H. HUONDER
www.moehl.ch
Mosterei Möhl AG, 9320 Arbon, Tel. 071 447 40 74