“ Oh sù, sù, se il mont si strucje / cualchidun lu dreçarà. / La justizie ‘e fate a gucje: / no si pues plui sopuartâ! “
Insumiâsi di gambiâ il mont te crosere de Europe
daûr tradizion dal timp destinât a gaiôs ribaltons…
CARNEVÂL CIVIC STUDENTESC FVJ 2014
RICUARTS E IDEÂI DI CITADINANCE SUI BANCS DI SCUELE IN FRIÛL VIGNESIE JULIE
Sbrocs di goliardiche rivoluzion tal inovâl dal prin grant alçament popolâr de storie europeane moderne:
la “Joibe Grasse” o “Crudel Zobia Grassa” furlane dal 1511…
Un libar avigniment di culture civiche zovenîl
soflât dal Moviment Civic Culturâl Alpin-Adriatic “Fogolâr Civic” e dal Circul Universitari Furlan “Academie dal Friûl”
in concuardie particolâr cul Club UNESCO di Udin e cu la partecipazion di scuelis, sorestants e societât civîl dal puest
A Carnevâl i sorestants di Vignesie a vevin tradizion di butâ jù a racladis dodis formis di cjistiei par simbul de prossumade prepotence dai siorats
dal Friûl, che cuintri di lôr il popul furlan al è saltât sù cun grant scjas a la fieste de Joibe Grasse dal 1511. Dal 2000 incà un circul universitari e un
moviment civic a puartin ator la cerimonie storiche dal ribalton dai cjistieluts di Carnevâl, tirant dentri int, scuelis e sorestants intune ocasion par
imagjinâsi di gambiâ il mont scancelant in simbul i mâi che lu cjalcjin e ancje rionzint ideâi e costums di comunitât antîcs e particolârs de bande
“euroregjonâl” alpine-adriatiche…
Il mont “justât” dai students de citât mari de regjon storiche su la crosere di Europe
in ricuart dal ribalton di popul furlan de Joibe Grasse dal 1511,
uçât di un scjap di cavalîrs vignût fûr di chê vile istesse,
e memoreant i 610 agns dal disfortunât e dismenteât riviel locâl citadin dal 1404:
il “Complot di Bertul” cussì clamât…
CIVIDÂT
Miercus ai 26 di Fevrâr 2014
(in câs di brut timp, joibe ai 6 di Març)
Place Delaide
Aes 10.30
Sdrumade rituâl di toratis simbolichis imbastidis e batiadis dai fruts di scuele cui nons des necuiziis dal vivi di vuê,
cu la partecipazion ferbinte de Scuele Mezane “Elvira e Amalia Piccoli” dal puest
e l’invît a direzi la fieste mandât a ducj i sorestants dal Comun,
incoronâts dai students in simbul
cu la bachete e il spadon di len,
rimant a segnacui di autoritât
de tradizion
“euroregjonâl”
“Fisc” goliardic di “toratis di autôr” te capitâl de “Joibe Grasse” furlane dal 1511
tal inovâl e tal cjadalan dal grant ribalton storic cuintri dai nobii de Rinassince
scomençât tal cûr politic de regjon
par dopo slargjâsi ator pardut te antighe Patrie dal Friûl…
UDIN
Joibe ai 27 di Fevrâr 2014
(Joibe Grasse)
Place Lionele
Aes 9.30
Imposizion di cjapiele rustiche e consegne di baston dal comant al sindic de capitâl morâl dal Friûl,
rivoc di mots e di ideâi civics antigons de tradizion “euroregjonâl” alpine-adriatiche,
un tant pe sdrumade cerimoniâl, te Sale dal Popul dal Municipi, de
TORATE SIMBOLICHE DE INDIFERENCE
batiade cul non de lidrîs prossumade dai mâi dal Om,
opare dal artist innomenât di Udin prof. Michele Galliussi
sovignût dai siei students di li de Scuele Statâl Superiôr “Bonaldo Stringher”…
FOGOLÂR CIVIC -ACADEMIE DAL FRIÛL -Vie Ciconi 18 -33100 Udin -Friûl Vignesie Julie -Italie -Europe [email protected] -www.aquileianova.eu