Damonda Kevin Brunold concernent
la relaziun futura denter il spital regiunal e la corporaziun regiunala
Damonda:
Il spital regiunal Surselva ha ina gronda muntada per la Surselva. Sco center da
cumpetenza regiunal sil camp da sanadad offerescha el diversas purschidas per indigens
e hosps dalla Surselva. Cun ca. 280 conluvrers/conluvreras ei il spital regiunal plinavon in
impurtont patrun ella regiun.
Ord vesta organisatorica ei il spital regiunal cumparegliabels cun la Regiun Surselva. D'ina
vart consista il purtader per gronda part dallas medemas vischnauncas e da l'autra vart
prestan las vischnauncas ina contribuziun finanziala che sebasa sin ina clav da finanzas.
Ils davos onns ei vegniu delegau pli e pli biaras incumbensas per las qualas las
vischnauncas regiunalas ageschan sco purtadras alla Regiun Surselva. In exempel actual
ei il center da formaziun Surselva. Sin fundament da quei svilup duess era vegnir definau la
relaziun futura denter spital regiunal e Regiun Surselva. Per quei motiv vegn la suprastonza
regiunala incumbensada da rispunder allas suandontas damondas:
1.
2.
3.
4.
Co vesa la suprastonza regiuanla la relaziun futura denter il spital regiunal e
la corporaziun regiunala?
Fuss ina integraziun dil spital regiunal ella corporaziun regiunala d'avantatg?
Sch'ina integraziun fagess senn, en tgei interval duess quei succeder?
Ei la suprastonza promta d'exequir ina consultaziun tier las vischnauncas
purtadras sco era tier la corporaziun dil spital?
Brunold Kevin, Nay Donat, Deplazes Walter, Berther Pancrazi, Berther Lucrezia, Buchli
Simon, Caduff Richard, Caduff Rudolf, Camathias Toni, Cantieni Roman, Columberg
Giusep, Derungs Gian, Epp René, Jörger Reto, Sgier Sievi, Tuor Roger
Glion, ils 17 da november 2010
0509-2010pr/DB/nc
Glion, ils 11da matg 2011
0158-2011pr/DB/nc
Damonda Kevin Brunold concernent
la relaziun futura denter il spital regiunal e la corporaziun regiunala
Risposta dalla suprastonza regiunala:
Ils 17 da november 2010 han Kevin Brunold ed ils consuttascribents tschentau
differentas damondas en connex cun la relaziun denter il spital regiunal e la
corporaziun regiunala. Tenor l’opiniun dalla suprastonza regiunala sto quella
relaziun vegnir considerada claramein dil punct da vesta dallas proximas
refuormas communalas e territorialas. El messadi corrispundent explichescha la
Regenza claramein ch’ei drovi per ademplir incumbensas regiunalas in nivel
denter il Cantun e las vischnauncas sco purtadras dallas incumbensas. Denter
auter fan era ils spitals regiunals part dallas eventualas incumbensas che san
vegnir delegadas allas regiuns futuras. Ei vegn denton era menziunau
explicitamein ch’ei segien era pusseivlas sligiaziuns pli differenziadas ellas singulas
regiuns. En connex cun las damondas fatgas pren la suprastonza regiunala
suandontamein posiziun:
1.
Co vesa la suprastonza regiunala la relaziun futura denter il spital regiunal e la
corporaziun regiunala?
Gl’emprem sto vegnir constatau en quei connex ch’il spital regiunal ei ina
corporaziun da vischnauncas da dretg public el senn dalla lescha
communala. Per quei motiv eis ei buca l’incumbensa dalla corporaziun
regiunala da disponer unilateralmein dil futur dil spital regiunal. Plinavon sto
vegnir risguardau en quei connex ch’il territori cumpligliau ella corporaziun
regiunala corrispunda buc agl intschess dil spital regiunal. Gest en
consideraziun dalla formaziun dallas regiuns futuras savess in agir precipitau
da vart dalla Regiun Surselva esser cuntraproductivs. Tuttina ei la suprastonza
dalla Regiun Surselva aviarta per ina strategia communabla en vesta al futur
dallas duas instituziuns. Quei denton cun las claras premissas ch’il spital
regiunal persequiteschi d’ina vart la medema strategia e che las
vischnauncas incorporadas sappien da l’autra vart decider era egl avegnir
sezzas a tgi ch’ellas vulan s’associar.
2.
Fuss in’integraziun dil spital regiunal ella corporaziun regiunala d’avantatg?
La corporaziun regiunala savess tuttavia s’imaginar ch’il spital regiunal vegn
integraus el futur ella Regiun Surselva. Quei denton cun las premissas
suranumnadas. In tal proceder corrispundess era allas intenziuns strategicas
en connex cun il nivel mesaun che sto vegnir creaus da niev. Cun in tal pass
savess ins trer a nez sinergias che laian parer in’integraziun sco raschuneivla.
Igl ei denton era evident ch’ils organs dalla corporaziun regiunala savessen
strusch menar a moda effizienta in’interpresa d’ina tala dimensiun e
cumplexitad sco in spital regiunal. Consequentamein stuess il menaschi vegnir
organisaus en ina fuorma giuridica independenta.
3.
Sch’ina integraziun fagess senn, en tgei interval duess quella succeder?
Il termin adattau dependa dallas decisiuns strategicas da vart dallas
instituziuns cumpigliadas.
4.
Ei la suprastonza promta d’exequir ina consultaziun tier las vischnauncas
purtadras sco era tier la corporaziun dil spital?
La suprastonza regiunala accentuescha aunc ina gada ch’igl ei buca caussa
dalla corporaziun regiunala da decider unilateralmein davart il futur dil spital
regiunal. La suprastonza regiunala ei denton promta da sclarir sin incarica dils
responsabels dil spital regiunal in proceder communabel.
-2-