Punts
Nr. 142
mars
3/2006
annada 12 / Glion / pretsch frs. 45.–/onn
Editorial da Maurus Blumenthal
3
tscheiver e gigina e cunscienzia da Silvana Derungs
4
Punts
fa Cureisma
Pertge ans bittain nus dad in extrem en l’auter? Sche insumma.
Ramadan sainza tramunt dal sulai 5
da Flurina Badel
«Vaseir quant bagn tg’ins ò antras la
renunztga»
intervista da Gianna Sonder cun Sarah Caminada
6
«Nus gegünains per ans algurder» da Mevina Feuerstein
8
Profil dal mais: Thomas Cathomen 10
da Silvana Derungs
La WG: Auto-wg-grafia (part 2) 12
Las schibettas dal mais: Dada (ante
portas) / DANKO JONES / Placebo 13
tuppa schnorra: giuanna II. 14
La Regiun Surselva sco organisaziun
dad Ursin Lutz
15
inflammau da Carin Caduff
16
Container 16
Impressum 17
Engiavniera 17
Seria meinsila da fotografias:
Fadrina Hofmann da Marc Bundi
18
Editorial
da Maurus Blumenthal
L’emprim hai jau ponderà da laschar far curaisma l’editorial da PUNTS. Ma lura m’èn tut
quels e quellas vegnì endament che na fan
betg curaisma da leger l’editorial da PUNTS
uschè ch’jau ma sun tuttina decis da scriver
insatge.
Far curaisma vul dir giginar en ina furma u
l’autra durant il temp avant Pasca che cuzza
var set emnas. En autras culturas chattan ins
er temp d’abstinenza nutritiva, sexuala u da
consumar products da giudiment u autras
chaussas durant in tschert temp. Bleras giadas èn quels temps avant ina gronda festa –
l’intent è da schubregiar corp e spiert.
Ma tgi fa anc ozendi curaisma? Ozendi cura
che Nadal e Pasca èn las duas sulettas festas religiusas che han anc in’influenza sin ils
blers da nus en ina furma u l’autra. Ma tuttina giginain nus stediamain. Quantas reclamas
per dietas has ti vis oz legend gasettas u guardond televisiun? La probabilitad è vaira gronda. Ozendi na giginain nus betg per esser bels
dadensvart mabain per esser bels ordadora. La
vita ordadora è impurtanta, auter che tar ils
psicologs.
Jau giavisch a vus, chars lecturs e charas lecturas, ina buna lectura e forsa in u l’auter impuls
per giginar sin ina moda u l’autra, giginai però
betg cun leger las PUNTS per plaschair!
Mesjamna dalla tschendra. Finiu. Finiu cul
barlot. Finiu cun cantar e sunar e saltar e
secamberlar da scalas da combras siadora.
Finiu cun Fifferlottas e fifferlots. Finiu cun
beiber bubrondas da confetti e magliar patlaunas – medemamein surtratgas cun confetti.
Finiu cun gugas e guggas e cuccaloris. Finiu
cun dents da colur e tgaus che mordan da
peruccas veglias. Finiu cun bagordas tut bletschas dil suau e dil flad condensau. Finiu cun
ureglias suordas ed in tgau balurd dalla musica crutscha. Finiu cun tschitschar caffès luz
tochen ch’ins ei eivers. Finiu cul tscheiver.
Mo pli las restonzas da confetti blaumellentgietschenverd per las vias entuorn, formond
ensemen cun la neiv vedra ina biala busecca,
dattan perdetga da quei temps. Uss entscheiva
la cureisma. Temps eis ei. Suenter varga treis
meins (minus quels dis entuorn Nadal) astga
quei saltergnem paganil per vias ed ustrias
entuorn ussa calar.
Il temps da cureisma ei avanzaus ad ina secunda schanza per ils propiests da Silvester /
Daniev. Cugl avantatg che la durada per tener
la dira ei limitada cheu a 40 dis e buca forsa a
quels 365 digl entir onn (minus las excepziuns
sco natalezis, fiastas da fatschenta, giubileums,
situaziuns da stress ed autras situaziuns excepziunalas che valan la peina da festivar andantamein e schar d’in maun ils buns propiests).
Tgi che vul duei pia giginar – che quei seigi lu
cun reducir las purziuns sil taglier, il consum
da televisiun, la raziun dad sms, la grossezia
dalla sminca sin fatscha, la quantitad da cigarettas …
Tgi che vul. E tgi che vul sa metter il venderdis sogn in rap dapli el satget d’unfrenda tgietschen-violet e quietar aschia quei ch’el vul
quietar.
Ei ha num far penetienzia – ch’ins hagi lu
fatg puccaus ni buc; ch’ins stetti mal per quels
«puccaus» ni buc. Brattar il vestgiu gagl da
confetti cun il vestgiu da penetienzia. Schar
metter tschendra sin tgau – patratga, carstgaun, che ti eis puorla e daventas puorla (la
problematica dalla concentraziun da puorla fina sepresenta dad ina nova perspectiva).
Desister da quei ch’ins ha, mo astga buc haver
bugen. Giginar. Resister. Acceptar egliadas
uiarschas da quels che sesentan disturbai da
tiu magun ramurond. Smaledir quei temps.
Esser loschs da sesez suenter igl emprem di.
Sedumandar, daco e per tgi ch’ins fetschi insumma da quellas semurtiradas. Per la sanadad (era numnau wellness)? Per examinar il
caracter? (tgei ei pli ferm: la veglia ni la carn?)
Per motivs religius? Per solidaritad cun Jesus?
Per esser in? Per cumpensar las orgias da
tscheiver?
E quels e quellas che han buca fatg tscheiver? Cheu dat ei negin pardon. Stgisas à la
«jeu hai buca fatg tscheiver, ergo drovel jeu
era buca far gigina» quentan buc. Sez/za la
cuolpa. Tgi ch’ei memia marschs, pruds, serraus ni semplamein in amitg da pantoflas e va
buc a tscheiver ei sez la cuolpa. Il senn ei gie
buca (buca mo) da giginar naven las calorias
dallas patlaunas frittadas e magliadas la gievgia grassa – ch’ei aschidadir igl orgassem dil
temps da tscheiver. Na – quei duei esser in
temps meditativ per daventar in cun sesez,
per s’approfundar en las atgnas sferas spirtalas, per superar heroicamein quei temps spir
empruaments plein rampigns. 40 dis cumbatter las queidas. Nus duein seregurdar dil
temps el desiert da Niessegner Jesus Cristus
ch’ei vegnius tentaus leu da Lucifer.
tscheiver e
gigina e
cunscienzia
da Silvana Derungs
Ramadan
sainza tramunt
dal sulai
da Flurina Badel
– «tü spüzzast jo our da bocca»
– «hai, eu gegün»
– «ma sbattast!? Voust tour giò da pais?»
– «na, eu nettai meis corp.»
– «hai uschè savurast eir … ha ha. Ma uossa
seri, eu n’ha let cha geünar nun es jo gnanca
uschè san pel corp …»
– «ma che … sast fingià avant 2000 ons ha
Hippokrates applichà il gegünar per terapias
medicinicas. Ed eir dal temp roman ed ähm i’l
muond arab ed i’l temp d’immez han meidis
curà cun gegünar …»
– «ö ö schon bun – i’l muond arab aha … ma
baivast almain o fast ramadan sainza tramunt
da sulai? Eu nu sun bun d’incleger sco ch’is
po avair voluntariamaing uschè ün nosch flà
… e vairamaing guardast oura stangla, ün pa
sblacha … na, tü guardast jo oura fommantada!»
– «fom s’haja be ils prüms pêr dis ed eu nu
sun bricha na stangla, gegünar nu nettaia
nempe be il corp e fa regiuvnar ma i rinforza eir ils sens, riva il orizont e güda da tour
ün pa distanza da problems da’l minchadi e da
chattar soluziuns …»
– «ah back to the roots … gegünar es jo pervers! Patir fom per resentir cha no eschan
vairamaing be animals … nüzziar oura – na –
stramantar nos instinct chi voul be surviver ed
esser high da l’adrenalin ch’el dà. Maltrattar il
corp cun avair la schfuoira da’l sal da Glauber
e lura lichar la paraid e pensar tuotta di be vi
da patlanas e pommeschips … para d’esser
üna flotta roba – gegünar. E …»
– «ma schmetta e taidla üna vouta sainza m’interrumper tuotta pezza! Prümas fom
s’haja be ils prüms per dis e quai es sà be üna
roba aint il cheu. Seguondas eu baiv circa 4
liters aua mincha di. E per chi cha quist es
massa radical a quel fessa eir bain da simplamaing passantar ün per eivnas sainza nicotin,
alcohol, fastfood e café … o prouva üna vouta
da star be ün di sainza natel … eir quai po
esser üna fuorma da gegünar chi fess bain a
corp ed orma …»
– «oho il apostel da la morala … tü’m fast jo
temma e gegünast eir amo our da raschuns
religiusas e legiast uossa la bibla? … ma be per
tuornar amo ün pa sün tia dieta … sast che
ch’eu n’ha let üna jada? Schi’s gegünescha
duos eivnas s’as perda ün mez kilo musclas e
cun quai reduzischa eir il bsögn d’energia …
cur ch’is mangia darcheu s’as piglia pro pero
be grass – il effet da’l jojo …»
e. u. i fin cha ün a gnü fom e l’auter said ed
els s’han seperats per ir a chasa.
«Vaseir quant bagn
tg’ins ò antras la renunztga»
intervista da Gianna Sonder cun Sarah Caminada
Sarah Caminada è nascheida igls 31
da matg 1987 e carscheida se a Vattiz.
Ella e la sia famiglia èn cristians.
Ella è ossa pero ansemen cun Çerim,
en moslem. Uscheia ò ella amprandia
a canoscher la religiun digl islam ed
antschet a la practitgier sezza. Scu
per exaimpel ramadan, lour gigigna
tgi corresponda alla curesma digls
cristians.
Tge è ramadan?
Ramadan è igl taimp dalla gigigna digls moslems e cozza 30 deis. Igl muteiv tg’ins fò ramadan è creia igl madem scu tigls cristians da far
curesma, numnadamaintg d’angrondaneir
la vista, da reflexiun e da vaseir quant bagn
tg’ins ò antras la renunztga. Igl termin da
ramadan n’è betg fix cunchegl tgi la religiun
moslema sa drezza siva igl calender dalla gligna. Uscheia varieschigl adegna. Chest’onn
ègl anturn igl settember/otgover.
Dantant da ramadan n’ins pò simplamaintg
betg magler e bever cura tg’igl è cler. Las ouras
vignan fixadas siva igl suglegl e chegl per mintga martgea separo.
Pertge fast te ramadan? Er or da muteivs dalla peisa?
Ia fatsch ramadan or digls muteivs tg’ia va
numno avant. Na, per la figura na fatscha
betg chegl. Cler, an chel meis peglia giu en pêr
kilos pero siva 3 deis ènigl chels puspe se.
At nizzegia ramadan ensatge?
Ea. (Betg perveia dalla figura!) Chel sentimaint da tschantar ansemen ve da meisa e
pudeir magler è grondious. Ena banana so
neir en past da festa. Ed uscheia am vignigl
pertschert tgi dat blers carstgangs tgi n’on
propa navot da magler. Scu fiss chegl da veiver uscheia?
Tge puncts positivs e negativs veist
te ainten chella furma da gigigna?
Positiv è per franc eneda tg’ins na maglia betg
ansomma navot, mabagn tg’ins pò magler
cura tg’igl è stgeir. Digl reminent n’ins pò betg
fimar e bever alcohol, chegl catta super. Betg
bung catta tg’ins na pò er betg bever tranter
de. Ia va schizont ligia tgi en spiritual moslem
vegia detg tgi sch’ins survigna ena sprezza
dantant da ramadan ins stò piglier siva chel
de. Chegl seia quasi er bavia. Chegl vo mengia gliunsch per me. Ia bev adegna, pero angal
ava. Ins stò simplamaintg far siva sentimaint.
Ta cattast betg mengia restranscheida?
Na, ia bev gio er tranter de. Eba, ia fatsch chegl
siva sentimaint. Ia stò vaseir igl senn ainten la
tgossa alloura am plai’la. Ma tar tscherta gliout saia bagn ma metter avant tgi vignan sfurzos da far ramadan.
Stosst te surpiglier la religiun digl
ties flup u vot?
Ia sa daple digl islam tgi el! Ia va scretg la mia
lavour da matura sur dalla sia fugia e va mez
stuia tschartger infurmaziuns dalla sia religiun. El n’è betg strantg cartaint. Per la sia
famiglia ègl simplamaintg impurtant tg’ins
creia ansomma. A mè plai chella religiun simplamaintg.
Schi scu veist te igl islam?
Scu mintg’otra religiun. I dat fitg positivas e
fitg negativas varts. Digl reminent dapendigl
adegna scu tg’ins interpretescha igl coran u la
religiun an general.
E la posiziun dalla donna?
Donnas èn navot sainza igl om. Chella religiun è nascheida dantant da gheras ed an
chels muments na vevan las donnas betg da
deir ena massa. Also tar la famiglia da Çerim,
igl mies flup portan las donnas er nigns faziels
sen testa. Faziels èn an l’Albania fitg rars oter
tgi tar baras ins porta en faziel alv.
Tg’igl om è aint igl center è ansasez tradiziun
e betg religiun. El pò er maridar tantas donnas
scu tg’el so nutreir.
Fon tot igls moslems ramadan?
Na. Igls fundamentalists bagn.
Pertge vign or da tia vista pitost fatg
ramadan tgi curesma?
Els n’on betg anc fatg chel pass. Igl illuminissem n’è betg nia anfignen tar els. Pero
chegl vign franc anc, pass per pass.
Moslems fon simplamaintg daple siva reglas
tg’igls cristians.
Cuntinueschast cun ramadan er schi
te n’ist betg ple ansemen cun Çerim?
Ea per franc. Ossa vaia er collegas tgi fon ramadan. Per me fogl simplamaintg schi en
grond senn.
Angraztg fitg per l’intervista.
Fatg gugent.
«Nus gegünains per ans algurder»
da Mevina Feuerstein
I n S v i z r a v i va n va r 1 7 ’ 0 0 0 G ü d e v s .
Da quels nun abitan bod üngüns in
Grischun, ed a nu do neir üngüna
comunited. A Turich do que trais
comuniteds güdevas, minchüna es differenta. Noemi R. es creschida sü in
üna da quellas ed ans quinta perche
ch’els gegünan.
La basa religiusa
La religiun güdeva as basa sül Vegl Testamaint
e sül Talmud, il cudesch cun scrit sü las interpretaziuns chi sun gnidas fattas a buocha
ed in scrit aunz var milli ans e cun aint eir
tuot las reglas da la vita güdeva. «Che possi
manger, cura stögli urer, che possi tuot fer la
sanda e perche?». Per mincha dumanda do
que differentas respostas, pelpü üna pü severa, ün’otra ün pô main. Minchün stu savair
svess che reglas ch’el voul observer. Tres que
do que pels Güdevs fich bgers differents möds
da viver. A do quels fich religius chi observan
tuot las reglas fich conscienzchusamaing, oters
chi nu’s tegnan insomma na vi da las reglas e
tuot ils oters chi vivan üna da las bgeras variantas traunteraint.
Infra ün an do que quatter dis da quaraisma chi vegnan observos aunch’hoz. Trais da
quels sun our da tristezza e per s’algurder da
la devastaziun dals duos tempels. Scha ün da
quels dis crouda sün üna sanda vegna’l spusto sülla dumengia; la sanda es pü sencha cu
quels dis da quaraisma.
Il di da quaraisma il pü important es desch dis
zieva il cumanzamaint da l’an nouv güdev.
Que es Jom Kippur, il di da la reconciliaziun.
Düraunt ils prüms desch dis da l’an s’ho temp
da’s concilier cun Dieu, cun se svess e culs
conumauns als quêls a’s vo a dumander per
pardun. Que es eir il di per s’algurder da tuot
ils evenimaints da l’an scours e per as preparer mentelmaing per l’an nouv. A Jom Kippur
a’s gegüna per pudair as concentrer sül urer.
Uschè s’es dastrusch al Segner e nu s’ho «dabsögn» da manger. Jom Kippur es ün di pü
important cu la sanda, que voul dir cha vain
gegüno eir scha’l di crouda sün üna sanda.
Düraunt ün di da quaraisma velan las listessas reglas scu la sanda. Illa religiun güdeva es
la sanda il di da repos. Quel di nu’s stess fer
üngünas lavuors scu per exaimpel a nu’s po
lavurer, cuschiner (la glieud fich religiusa ho
plattas eletricas chi s-chodan automaticamaing
que chi haun cuschino il di aunz), impizzer
la glüsch u purter qualchosa (per il maz da
clevs do que tschintas aposta cha’s po fer ferm
il maz, per cha quel saja part da la tschinta e
vela scu part dal vstieu). A nu’s po neir fer
üngüns prozess da müdamaint, que voul dir
p.ex. s-charper qualchosa u laver ils mauns
cun savun dür (quel as schoglia cull’ova).
Düraunt ils dis da quaraisma velan impü las
seguaintas reglas: nu manger u baiver, nu der
sü bellet, nu trer aint s-charpas da chüram,
üngüna sexualited e nu’s laver.
ura tuottadi. «Minchataunt suni eir ida cun
collegas a kino u cha vains fat uschigliö qualchosa insembel per fer passer il temp», disch
Noemi.
La comunited es fich importanta illa vita d’ün
Güdev. Pervi cha nu’s po fer ünguotta la sanda
e düraunt ils dis da festas s’ho temp dad ir a
visiter ad oters ed a nu’s stu fer otra roba. A
nu’s po neir ir cul auto, uschè cha fich bgers
vaun a pè. Que sarò eir il motiv perche cha
bgers Güdevs guardan d’abiter ün dasper l’oter
per pudair ir in visitas ed illa sinagoga. Impü
do que be pochs Güdevs sün tuot il muond e
perque prouvan almain quels da viver lur cultura per cha la nu giaja a perder. (Els sun üna
minorited, scu eir ils Rumauntschs).
Il prüm cult divin es la bunura. Quel düra fin
a mezdi, zievamezdi es il prossem e la saira
do que auncha ün cult divin per s’algurder
da tuot ils morts. Zieva l’ultim cult divin boffa
quel chi disch sü las urazchuns aint in üna
corna da greg per sdasder la glieud simbolicamaing e dir da fer attenziun. Quist ultim cult
divin es a fin cur cha splenduran las 3 stailas
al tschêl. Lura vaun tuots a chesa a manger.
La famiglia da Noemi organisescha minch’an
quella tschaina, inua cha’s mangia il prüm
bacun zieva il di da quaraisma Jom Kippur.
Tuots s’allegran per manger, haun fam e
sun cuntaints. «Que do roba ligera per nu
surcharger il stommi scu per exaimpel buoglia
da Bircher, salata d’aringas, salmun, tuorta e
paun».
Be ils fich religius tegnan aint quels trais dis
da quaraisma, ma a Jom Kippur gegünan vairamaing tuots.
Il manger i’l giudaissem
«Nus mangiains fich gugent», disch Noemi.
«Scha s’es invido tar qualchün a manger, nu’s
po bod na dir cha nu s’hegia pü fam, a’s survain adüna dapü da manger. Perque d’heja eir
piglio tiers uschè bger in Israel».
In venderdi saira do que suvenz tschainas
grandas cun tuot la famiglia. Noemi, chi es
creschida sü tradiziunelmaing, as chatta üna
vouta al mais cun tuot la famiglia, que sun
var 20 persunas.
Il manger dal minchadi es in generel coscher,
que voul dir traunter oter cha las bes-chas
staun gnir s-channedas, a nu’s po masder prodots da lat cun charn, a nu’s po manger üngün
chucal ed üngüns peschs sainza s-chaglia. Scu
dit pü bod, mincha umaun decida svess che
per reglas ch’el tegna aint. Noemi per exaimpel nu mangia chucal, ma charn cun sosa da
gramma.
Tuot las festas las pü importantas vegnan festagedas illa famiglia granda da Noemi. «Mincha
festa es tar ün’otra famiglia, e tuots vaun tar
quels, que es adüna fich flot.»
Ün di da quaraisma
Scu eir las sandas cumainzan ils dis da festa
fingià il di aunz cul tramunt dal sulagl e düra
fin al di zieva cur cha’s vezza trais stailas al
tschêl, var 25 uras.
«Aunz cha’l sulagl tramunta mangiains qualchosa chi tegna, scu per exaimpel schoppa
clera cun cnödels speciels, lura do que charn
lessa cun verdüra ed ardöffels, salata e dessert.»
Noemi R. ho 23 ans ed es creschida sü a Turich. Ella
ho visito la scoulina güdeva, es lura ida illa scoula primara scu eir al gimnasi public a Turich. Zieva la matura eir’la ün an in Israel a stüdger la lingua ebraica ed
a lavurer aint in ün kibbuz. Uossa stüdgia’la a l’ETH.
Düraunt l’infanzia ho’la piglio part ad üna lia da giuvens Güdevs chi ho eir organiso champs da vacanzas
cun otras gruppas güdevas da tuot il muond. Daspö
cha ella stüdgia è’la illa suprastanza da la societed da
students güdevs.
Il di da quaraisma es cò per ir illa sinagoga, as
retrer e passanter temp culs conumauns. A’s
Profil dal mais: Thomas Cathomen
da Silvana Derungs
Co ta descrivessas ti cun quatter
plaids?
en speronza. piars. sincers. sensibelets.
Tge fa nauscha conscienza a tai?
jeu rispundel mails e brevs pér suenter meins
ed onns.
Il nos puntissimo dal mais è «curaisma». Trais chavazzins che ti associeschas cun quest plaid?
il rom religiun en scola. cura; purificaziun
dall’olma pil nirvana? carisma ei meglier che
cureisma. forsa.
Tge è luxus per tai?
ina duscha cun aua caulda mintga di. e da
haver enqual problemet. con lungurus fuss ei
senza.
Duas chaussas, dallas qualas ti sas
nunpusseivlamain desister?
speronza e damondas.
Tge è «patria» per tai?
nua ch’il cor ei dacasa? gl’ei dapli. jeu sai, jeu
sai. jeu sai buc.
Co cuntinuassas la frasa: «Dunnas èn
per mai sco...»?
vess jeu gia da saver quei? bien, dunnas ein
buca sco, mobein ein in grondius misteri.
Tge persuna na vulessas ti betg entupar duront tias vacanzas?
memez en desperaziun.
Tge cudesch legias ti actualmein? Tge
è spezial vid quel?
gl’ei dapi meins treis parallelamein, e cun buc
in vegn jeu giu dil flec. in d’els tematisescha il
senn dalla veta. special? jeu capeschel gnanc
la mesadad. hai probablamein aunc da viver
in mument per scuvierer quel. il senn.
10
Sche ti pudessas eleger il retg / la
regina da la Rumantschia, tgi fuss
quella persuna? E tge stuess quella
persuna midar sco emprem tenor tai?
anarchia en rumantschia, ni? bein bein: ina
monarchia fagess nuota donn. empau scandals per che la quotidiana hagi zatgei da scriver. aber tgi? bials ed intelligents munglass
el esser. enzatgi che sa empermetter, aber e
tener. enzatgi cun dabia cor. stuess pia esser
ina dunna! e clar: rumantsch sto ella e saver.
Tge giavisch vuls anc absolutamein
ademplir a tatez?
in per siemiets hai jeu aunc. il pli grond giavisch ei denton: semplamein viver.
Tgi duai esser il proxim profil dal
mais?
dei aunc ina schanza a mi, forsa ch’jeu hai
per la proxima gada empau meglieras rispostas. aber per garantir in’interessanta lectura:
envidei la pia valär sco hosp dil meins. engraziel.
Thomas Cathomen
data da naschientscha: 23 da november 1976
professiun: scolast. ed in techet (dapli) cantautur
domicil: mexico
animal da casa: tartaruga
canzun preferida: astgass jeu la proxima gada haver
in tec dapli plaz per quella risposta? ok, ina: «inside
of love» da nada surf.
11
La davosa giada eran nus arrivads fin il
Welschdörfli. Il Welschdörfli, mia segunda
staziun da wg. Segunda staziun, ma en sasez
l’emprima dretga wg che jau aveva cun mia
cunstanzista dal Florentini. En duas eran nus
damai scappadas dal rest dal femnom da la
«casa F». Ma era en duas essan nus betg restadas ditg sulettas, nossas ex-amitgas ed excunabitantas dal Florentini vegnevan numnadamain savens per ans far la visita cur ch’i
aveva num «Berlin Berlin» u «Sex and the
City» en nossa televisiun (mia televisiun). Il
mardi saira vegneva grad duas giadas «Sex
and the City», ina giada a las nov e lura anc
ina giada a las indesch. Vul dir che las visitas
tatgavan sin noss canapè fin tard en per la
notg (suenter l’emissiun stuvev’ins gea anc
reflectar ensemen sur da quai ch’era capità).
Perquai avain nus adina pli savens gì il basegn
d’esser sulettas per da guardar mo en duas
«Sex and the City» e perquai n’avain nus
mintgatant simplamain betg avert la porta cur
ch’igl ha scalinà. Il di suenter cun la stgisa che
nus n’hajan gnanc guardà televisiun, che nus
sajan stadas a currer enstagl! (Ha!) Suenter
in temp ha mintgina da nus però survegnì il
basegn da guardar tut suletta «Sex and the
City», vul dir da star suletta. Aschia essan
nus idas dapart. Ma betg lunsch, mintgina
mo circa 100 meters davent dal Welschdörfli.
Jau sun ida a star en la citad veglia da Cuira.
Il bel landervi era che la furnaria, ch’ha avert
er la dumengia, era mo trais pass davent da
mia abitaziun, la Werkstatt mo tschinch ed il
plaz da lavur mo ina minuta cul velo e che la
televisiun era mo per mai. Il main bel vi da
mia nova abitaziun era: la disco en il tschaler,
la glieud che gieva en questa disco e lur fastizs
il di suenter, las festas da citad las fin d’emnas
cur che jau stuveva lavurar, ed … esser suletta
cun mia televisiun. Cur che jau sun ida davent
da Cuira nun esì perquai mai stà ina dumonda sche jau veglia ir a star en ina wg u na a
Friburg. Ma quai era avant dapli che in onn …
ussa fissi però ina dumonda e la resposta forsa
in pau differenta, jau na sun numandamain
betg pli uschè persvadida da questa moda da
viver. Nus avain gist gì dispita en nossa wg.
La WG
da Chatrina Josty
Auto-wg-grafia (part 2)
La «WG» – Chatrina Josty è studenta a Friburg e scriva dal mintgadi en la «WG» – la cuminanza d’abitar.
12
Las schibettas
Dal mais
da P.
DADA (ante portas): «Superbixen»
Ils Lucernais DADA (ante portas) èn cumparids avant insaquants onns sco band da scolasts per buna luna a festivals sco era sin CD.
Chantadurs cun ina bella fatscha, in zichel
carisma, in zichel rock’n’roll – buna maschaida, sco ditg, per sound da buna luna. Però
betg la massa substanza! Chanzuns cun melodias d’uffants, in pau yeahyeah, in pau huhuhu, in pau lalalalala …
Ils temps èn sa midads e cun els era DADA.
Schont l’ultim album «Seasons Change»
ha fatg cler la nova direcziun: dapli melanconia, damain lalalalala = dapli substanza!
DADA è daventà ina band endretga che fa
in pass anavant album per album! Ed il nov
album «Superbixen» cuntinuescha là nua che
«Seasons Change» aveva gia inditgà la direcziun. Gronda musica da pop che vegn dad ina
band che sa era far il rocken!
Bellezza balladas + buns rockers = DADA (ina
coola band svizra)
•••••••
DANKO JONES: «Sleep is the Enemy»
Nagut nov da collega schweinerock DANKO
JONES! E tuttina fa el il rocken pli che mai!
Il nov album «Sleep is the Enemy» è 101%
rock’n’roll, 102% DANKO! Quest chantadur e
ghitarrist canadais e ses dus attatgaders vi dal
bass e la battaria conuschan ina suletta tactica
da gieu: anavant! Nagin fa il rocken sin tala
moda offensiv ed agressiv!
Sche DANKO pretendeva anc avant dus onns
«if you wanna know how to play the blues,
get yourself a woman …», dastga el sgrignir oz
or el mund senza surfar «if you wanna know
how to rock, get yourself a DANKO …!»
••••••••
PLACEBO: «Meds»
Cun l’ultim album «Sleeping with Ghosts» è
reussì al trio englais PLACEBO il sigl sisum
las paradas mundialas, dentant han ils fans
da l’emprima ura laschà crudar els, gist pervia da quest album! Memia bler pop, memia
pauc PLACEBO – uschè han ils arguments
tunà. Cun il nov album «Meds« empermetta
PLACEBO in pass anavant! Dentant è «Meds»
tochen qua l’album il pli poppig da PLACEBO!
Empermischuns, empermischuns …
Tuttina, «Meds» è era il meglier album da
PLACEBO tochen qua!
•••••••
Fotos: DADA (ante portas) (su) e Placebo.
13
igl aug testa legia. cudisch. da cureisma. religius.
prefaziun: «ei dat en quei script mo ina persuna. la papa giuanna II. ella duei vegnir giugada d’ina dunna cun pareta fetg feminina sur
curonta.»
citat: «igl apostel havevi detg ch’ellas hagien
da quescher en sia baselgia.
mungias, gliez bein.
keusche groupies, die bei den auftritten der
monsignori in bänken schmachten – mintga
egliada in applaus. mintga gesta in’ovaziun.»
kopfertelli, tratga el. e legia vinavon.
tgei caussas, tratga igl aug testa. e legia vinavon.
citat: «habemus papessam.
ja, sehen sie mich an.
ina dunna.
per l’emprema ga.
la frisura duei muntar nuot. sco ei vegn raquintau, haveva jesus cristus era cavels liungs,
ed era in um.»
testa capescha nuot.
vinavon.
citat: «doch hier: zwei brüste.
dazu bestimmt, kinder zu nähren.
e sut quella rassa: eierstöcke, eileiter, gebärmutter.»
heiliga bimbam, tratga gl’aug testa.
citat: «ungenutzt. alles vorhanden. confirmau
dils miedis ils 3 da fevrer digl onn 2014 e publicau ellas gasettas. sin miu giavisch.»
citat: «cun quitordisch miu emprem contact
cul catolicissem.
1991 mia emprema messa.
il tgierp da cristus, amen.
il saung da cristus, amen.
in nomine patris...»
citat: «jeu hai elegiu il num giuanna la segunda.
joanne secunda.
johanna die zweite.
joan the second.
giovanna seconda.
juana segunda.
jeanne deuxième.
denn ei ha gia dau inaga en nossa baselgia ina
papa.»
ach?!, tratga testa.
citat: «ella haveva num giuanna ed igl onn
855 sevestgida d’um fraudulentau la sutga.»
tgei schuendel, tratga gl’aug testa.
citat: «havevan lu fatg seser ella silla sutga
cun ruosna e tuccau. e lu smenau ord nuegl.
amen.»
tgei caussas, tratga el.
capeschel mo a mesas.
gleiti ei pastgas.
tgei bi, tratga gl’aug testa.
aug testa capescha aunc pli pauc.
pausa.
la muaglia spetga. ha fom.
duas uras vargan.
ei va vinavon.
14
tuppa schnorra
dad Arno Camenisch
giuanna II.
La Regiun
Surselva sco
organisaziun
La Regiun Surselva ei ina corporaziun
dad Ursin Lutz
e la tgina dil Rein al Péz Badus cun
da dretg public cun atgna persunalitad giuridica. La Surselva cumpeglia
il territori denter igl Uaul Grond
las valladas lateralas Lumnezia,
Stussavgia e Medel. La Surselva dumbra 45 vischnaunca e cumpeglia ina
populaziun totala da 25’275 persunas.
Historia dalla Regiun Surselva
El decuors dalla historia ha ei adina puspei
dau iniziativas da sligiar communablamein
ils problems dalla regiun, d’encurir la discussiun sur ils cunfins locals pli stretgs sco
era da promover la collaboraziun regiunala.
En quei grau dat ei pia ina liunga tradiziun
che va anavos tochen el temps medieval tardiv. Ins patratgi en quei connex per exempel
all’allianza da Glion 1395 ni alla fundaziun
dalla Ligia Grischa 1424 a Trun.
Sco exempels dil temps modern san ins
numar la fundaziun d’ina uniun da traffic
dalla Surselva all’entschatta dil davos tschentaner ni la fundaziun dall’uniun purila sursilvana igl onn 1917. In punct culminont
en quei liung svilup ei franc la fundaziun
dall’organisaziun Pro Surselva stada ch’ei vegnida fundada igl onn 1967. Sigl 1. da schaner
1977 ei la Pro Surselva vegnida remplazzada
dalla Corporaziun da vischnaunca Surselva da
dretg public.
Il svilup ell’economia, societad e stadi han giu
per consequenza che pli e pli bia problems
ston vegnir sligiai sur ils cunfins communals ora. En quei connex san ins menziunar
las incumbensas sil sectur dalla planisaziun
alla coordinaziun dil traffic individual ni dil
traffic public. Era sil sectur dalla promoziun
dall’economia sa ei vegnir fatg diever da certas mesiras mo en in context regiunal. En quei
connex ston ils emprests d’agid d’investiziun
dalla confederaziun vegnir numnai. Premissa
per quei instrument da promoziun fuorma in
concept da svilup approbaus.
Per motivs organisatorics e finanzials vegnan
certas incumbensas praticas sligiadas cun
avantatg sur la Regiun Surselva. Aschia ei
quella purtadra dalla scola da musica e dil
survetsch logopedic, ella meina il post regiunal da coordinaziun da SPITEX e procura en
44 vischnauncas l’economisaziun dil rumien.
Sper quellas incumbensas da tschep representa la Regiun Surselva era ils interess anoviars,
iniziescha e tgira agens projects regiunals,
defenda ils interess dalla regiun e procura sco
center regiunal da cumpetenza per in bien
scomi d’informaziun enteifer la regiun.
Tenor ils statuts remplazza la Regiun Surselva
el rom da ses pensums las vischnauncas colligiadas. El decuors dils davos 15 onns ha la
Surselva fatg atras ina gronda midada da
structura ed ella ei vegnida bein a strada cun
quella situaziun. Ellas branschas cun gronda
creaziun da valur ha ei dau numerusas novas
plazzas da lavur. En tut eisi vegniu creau denter 1985 e 2000 dapli che 1000 plazzas da
lavur ni pli che 10% digl entir diember da
plazzas da lavur. Quella midada structurala
demuossa la gronda vitalitad dalla regiun.
Incumbensas dalla Regiun Surselva
- Promover l’economia publica cun ina promoziun activa dall’economia
- Exequir la planisaziun directiva regiunala
- Procurar l’economisaziun dils rumians
- Menar la scola da musica Surselva
- Menar il survetsch logopedic dalla Surselva
- Menar in post da coordinaziun da SPITEX
- Examinar e preparar projects regiunals
- Representar la regiun enteifer ed ordeifer la
regiun
- Sustener e coordinar projects regiunals
- Elaborar il concept da svilup e realisar projects che resultan da quel
- Post da contact per damondas regiunalas
- Promover l’identitad regiunala
- Support en damondas surcommunalas
- Dar sclariment sco era garantir il scomi
d’informaziun enteifer la regiun
- Prender posiziun enviers projects federals,
cantunals e communals
Activitads dalla Regiun Surselva
La Regiun Surselva ha per mira da migliurar
a liunga vesta las cundiziuns economicas e
socialas dalla regiun sco era da promover la
collaboraziun regiunala. Sco purtader regiunal
da svilup renconuschius dalla confederaziun
e dil cantun tenor la lescha federala davart
igl agid d’investiziun s’occupescha la regiun
surselva denter auter cun l’intermediaziun
d’emprests d’investiziun per l’infrastructura
da basa e da svilup, denton era cun la planisaziun directiva regiunala e cun l’economisaziun
dil rumien. Plinavon meina ella la scola da
musica ed il survetsch logopedic.
15
Fotos: Il president Sep Cathomas (su) ed il secretari
Duri Blumenthal procuran ch’ei marschi adina zatgei
tier la Regiun Surselva.
Radis scauldan tia fatscha
Radis che lain inflammar il fiug intern
Fuostgas neblas ein svanidas el lontan
La clarezia ha victorisau la stgiradetgna
Egliadas aschi profundas – infinitas
Glisch ch’ei cumparida ord il nuot
– Nunspitgada – nunplanisada
Pli e pli gronda daventa ella
Magia che striunescha tei en autras dinastias
Quella magia che lai crescher alas a ti
Ti sgolas aschi damaneivel dil sulegl
sco aunc mai
Nuot para pli d’esser da gronda impurtonza
Sulettamein la persuna che regala a ti satisfacziun cumpleina
Inflammau
Maurus e returnà
Container
Suenter in semester ad Amman en Jordania
è Maurus puspè turnà chasa. El è restà pli u
main il medem, sulettamain ch’el tschantscha
u scriva magari in pau da quai curius uss. Mo
bain, il team da PUNTS sa legra en mintga cas
da puspè avair il secretari.
da Carin Caduff
La GiuRu
Il hailait! Sonda, ils 11 da mars ha lieu la radunanza generala da la GiuRu a Trun en il
hotel Dulezi. Suenter la radunonza organisescha la giuventetgna da Trun in program vast
cun turnier da tschutti e cun in super concert
da la nova band rumantscha «Pobufibanox».
(Entrada libra per ils commembers)
Dapli infos sut www.giuru.ch e www.giuventetgnatrun.ch
uniuns.giuru.ch
11-3-2006 Casti/Tiefencastel: Teater e notg libra
11-3-2006
Sala polivalenta Tinizong: ALL4ONE-Party
05-4-2006
Turitg: Dis da film da la giuventetgna
6-5-2006 Caldera a Parsonz: Wallstreetparty detagls
Dapli infos sut uniuns.giuru.ch / chalender
16
Impressum
chauredactur:
Ursin Lutz, Bankstr. 6, 7000 Cuira
[email protected], 076 434 10 26
redactur/a:
Mevina Feuerstein, Dennlerstrasse 36, 8047 Turitg
[email protected]
Annatina Nay, Pustget 42D, 7166 Trun
[email protected]
Silvana Derungs, Hauptstr. 117, 1715 Alterswil
[email protected]
Gianna Sonder, Sumvei 77, 7462 Salouf
[email protected]
collaboratur/as en quest number:
Flurina Badel, Maurus Blumenthal, Marc Bundi,
Carin Caduff, Arno Camenisch, Chatrina Josty, P.
concept layout:
Theres Jörger, Pfingstweidstrasse 31b, 8005 Turitg
[email protected]
layout nr. 142 e dessegns:
Donat Caduff, Vilada 194, 7152 Sagogn
[email protected]
secretariat:
Punts, Maurus Blumenthal, Casa Grischuna,
7154 Ruschein
[email protected], 079 394 52 86, 081 925 43 47
stampa:
Spescha e Grünenfelder, Glion
pretsch d’abunament:
45 francs ad onn, Raiffeisen Laax 70-6699-9
editura:
GiuRu, chascha postala 312, 7002 Cuira
[email protected]
internet:
www.punts.ch, www.giuru.ch
avis:
Las opiniuns dals auturs en quest numer na ston betg
correspunder a l’opiniun da la redacziun da PUNTS.
PUNTS è commembra da l’Associaziun da la Pressa
Svizra dals Giuvens.
Engiavinera
Cun in pau savida e cun ina lectura attenta da
questas punts è questa engiavinera nagin problem per tai! Il pled da soluziun trametta per
plaschair cun indicaziun da tia adressa a chasa
a: Ursin Lutz, Bankstrasse 6, 7000 Cuira, scriva in e-mail a [email protected] u in sms a 076 /
434 10 26.
Qua sco pitschna motivaziun per schliar l’engiavinera
ina curta resumaziun dals premis che nus avain mumentan:
2 CD Bulais «Fanzögnas»
2 CD Mario Pacchioli «Vias»
2 CD Liricas Analas «Analogia»
1 CD «Lain Fabular – Ils Beatles per Rumantsch»
3 t-shirt GiuRu L per giuvens
3 t-shirt GiuRu L per giuvnas
3 cudisch «Il stgazi da la Delfina»
1 cudisch «Flurin Spescha – Fieu e Flomma»
1 cudisch «Derib – Jo»
5 cudisch «Theorieprüfung»
3 PUNTS ediziuns 130 (cun suttascripziuns da Sens
Unik)
Num d’artist dal profil dal mais en quest’ediziun.
Quest um applitgava avant
2000 onns la gigina sco terapia
medicinala.
Temp da curaisma per l’Islam.
Tar Sep Cathomas stat il num curt Sep
per …?
Il di principal da gigina per ils gidieus.
17
seria meinsila
da fotografias
da Marc Bundi
Fadrina Hofmann, ex-cauredactura da PUNTS
La seria meinsila da fotografias en colur vesas mintgamai sin marcbundi.ch
18
inserat aurax
19
AZB 7130 Glion
fin da redacziun per il nr. 143:
16 da mars 06
Punts 143 cumpara entschatta
avrel 06
Ve commember da la GiuRu
La GiuRu sustegna Tai a finanziar, com­muni­tgar e realisar Tes project rumantsch e giuvenil. Ti survegnas sco commember­/­bra da la GiuRu
regularmain infurmaziuns dals projects actuals e la pussaivladad da Ta partecipar ad inscunters internaziunals ed ad autras activitads.
Jau vuless daventar commember/bra da la GiuRu:
/ / Jau vuless las infurmaziuns per e – mail
/ / Jau vuless las infurmaziuns per posta
num e prenum: _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _
adressa: _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _
tel: _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _
e-mail: _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _
Trametta il talun a la suandanta adressa:
GiuRu, Chascha postala, 7000 Cuira, u T’annunzia sut www.GiuRu.ch.
Abunescha PUNTS
/ / Jau abunesch PUNTS – la gasetta giuvna per mo 45 francs ad onn
/ / Jau regal in abunament da PUNTS – la gasetta giuvna
/ / Jau fatsch in test – dus ediziuns gratuitas da PUNTS
num e prenum: _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _
adressa: _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _
Trametta il talun a noss secretariat:
PUNTS, Maurus Blumenthal, Casa Grischuna, 7154 Ruschein, 081 925 43 47, 079 394 52 86, [email protected],
20