Communicaziun a las medias, museum d'art dal Grischun
Ester Vonplon – Pertge è la quietezza da la cuntrada uschè dad aut?
Il museum d'art dal Grischun sin visita en la galaria da la citad da Cuira
Galaria da la citad da Cuira, 17 fin 23 da december 2014
Sco artista è Ester Vonplon ina cunfinaria. Quai vala per la moda co ch'ella tracta il medium da
la fotografia gist tuttina sco per sia confruntaziun cun ils cuntegns, che la maina en lieus
lontans ed en zonas nunenconuschentas. Vonplon ha survegnì il premi d'art da quest onn da la
Somedia. Il premi è collià cun ina publicaziun. Questa publicaziun vegn preschentada en il rom
da l'exposiziun dad Ester Vonplon en la galaria da la citad da Cuira.
Il punct da partenza da l'artista fotografa Ester Vonplon (*1980) è adina puspè la cuntrada. Specific n'è
qua betg il lieu geografic concret, mabain il fatg che la cuntrada cumpara ad emprima vista cunzunt
sco materia furmabla e suonda cundiziuns elementaras: Nus vesain il grip, la naiv, il glatsch, il sablun,
il desert, ils nivels sco differents stadis d'agregaziun en in process cuntinuant da vita e mort. Ester
Vonplon sa mova cun sias lavurs sin in spitg stretg. La fotografia reflectescha bain anc il mund
vesaivel, ma a medem temp sa manifestescha il medium sco tal tras sia applicaziun fitg experimentala
e lascha reflectar las cundiziuns spezialas. Las fotografias èn uschia tant concretas sco er abstractas.
Sco observaturs stuain nus chapir la cuntrada sco maletg ed il maletg sco cuntrada e drizzar nossa
attenziun sin ils elaborats che vegnan differenziads or da las materias primas. Mintgatant survegn quai
furmas fitg concretas, en auters lieus tutga l'artista la sava dal nunvesaivel. Ils maletgs dad Ester
Vonplon han ina gronda forza suggestiva: Sias lavurs na daventan betg mo in'aventura visuala,
mabain pon er vegnir experimentadas fisicamain, ed ellas ans van a cor. La cuntrada e la fotografia
fusiuneschan en quests maletgs ad in'expressiun da l'existenza umana. Er qua chatta Ester Vonplon
cunfins: Ella na sa ferma betg a la surfatscha, mabain sfunsa adina en la profunditad. Ella sondescha
locals nunchapaivels, en ils quals mancan puncts da referenza ed emprova da tschiffar quai che fugia.
La Somedia sustegna dapi l'onn 2006 cun l'acziun "Art en la Svizra sidorientala" la lavur artistica
actuala en la regiun e surdat dapi l'onn 2012 in premi d'art. La retscha da cudeschs ch'è colliada cun
quai cumpara en collavuraziun cun il museum d'art dal Grischun a Cuira.
Vernissascha da l'exposiziun e dal cudesch:
Mardi, ils 16 da december 2014, a las 18.00, galaria da la citad da Cuira
Bainvegni ed introducziun: Stephan Kunz, directur dal museum d'art dal Grischun
Surdada dal cudesch d'art: Andrea Masüger, CEO Somedia
Apero
Atelier per uffants – istorgias bufatgas
Ils 17 da december, da las 14.00 fin las 16.00
Annunzia necessaria sut [email protected] u 081 257 28 72
Publicaziun:
Ester Vonplon. Warum ist die Stille der Landschaft so laut?,retscha art en la Svizra sidorientala, cun
ina prefaziun da Stephan Kunz, ediziun Somedia Buchverlag e
museum d'art dal Grischun, Glarus/Cuira: somedia-Buchverlag, 2014, 80 paginas, 38.– francs
Lieu da l'exposiziun:
Galaria da la citad da Cuira
Rathaus
Poststrasse 33
7000 Cuira
Avertura: mintga di da las 12.00 fin las 18.00
Maletgs per las medias
Sin la pagina d'internet dal museum d'art dal Grischun stattan a disposiziun maletgs. Els pon vegnir
chargiads giu sut: www.buendner-kunstmuseum.ch/medien.html
Resguardai per plaschair las legendas dals maletgs.
Contact
Stephan Kunz, directur dal museum d'art dal Grischun
T +41 (0)81 257 28 68, [email protected]
dr. Katharina Ammann, conservatura dal museum d'art dal Grischun, responsabla per la
communicaziun e per il project
T +41 (0)81 257 28 62, [email protected]