La Quotidiana 27-10-2009, p. 02
«Mes giavisch fiss ch’i dess Giuvens Verds en il Grischun»
Inscuntrada cun ina giuvna politicra e studenta
mantsch grischun saja ina via raschunaivla.
In onn pli tard ha Zimmermann redigì sia lavur da matura ed ha inoltrà ella per
ina concurrenza da «Scienza e giuventetgna/Schweizer Jugend forscht».
DA CLAUDIA CADRUVI / ANR
■ Nesa Zimmermann è co-presidenta
dals Giuvens Verds da la Svizra. Ella
emprenda sursilvan a Friburg, perquai
ch’insatge ha adina mancà en sia vita.
Ina notizia a l’ur d’ina gasetta da la dumengia: «Nesa Zimmermann e Martin
Neukom presidieschan ensemen ils Giuvens Verds.» Nesa? Quai è bain in prenum
rumantsch? L’anr inscuntra la giuvna politicra e studenta.
Malgrà ch’ella è creschida si a Turitg sa
senta ella da chasa en il Grischun e discurra perfin dialect da Cuira. «Sch’jau vegn
tar noss mises a Trin u sch’jau arriv cun
auto da posta en Val Müstair e mes enconuschents ma retschaivan a la fermada ed
ils uffants seglian enturn mai, lura ma sent
jau da chasa.»
Ina segunda famiglia en Val Müstair
Nesa è naschida avant ventg onns a Turitg. Sia mamma – burgaisa da Trin e creschida si a Cuira – n’ha sezza betg emprendì rumantsch e n’ha pia era betg pudì dar
vinavant la lingua dals antenats a la figlia.
Linguas hajan adina plaschì ad ella, raquinta Zimmermann. Gia en scola primara haja ella cumenzà ad emprender talian. Betg perquai che talian avess plaschì
aparti bain, igl è simplamain stà la suletta
lingua estra ch’ins ha purschì. Las vacanzas da stad e d’enviern haja ella savens passentà en il Grischun. Cun 15 onns haja ella visità la Val Müstair ensemen cun sia
mamma. «Nus avain vulì vegnir a savair,
co che mia onda, ch’era morta cura ch’jau
avev tschintg onns, aveva vivì ils ultims
onns en questa Val», raquinta Nesa. Ellas
han emprendì d’enconuscher ils amis ed
enconuschents da pli baud da sia onda.
Nesa Zimmermann
sa senta da chasa
a Trin e Valchava,
era sch’ella n’ha
mai abità en il Grischun. FOTO C. CADRUVI
«Quella glieud è daventada mia segunda
famiglia ed jau sun adina puspè turnada
la stad a far fain.»
Cumenzà cun vallader
«Jau hai svelt sentì che la glieud a Valchava discurriva pervi da mai tudestg. Cun ils
uffants na pudev’jau gnanca discurrer»,
raquinta Zimmermann. Perquai haja ella
cumenzà ad emprender vallader. Ma
d’emprender tut persula ina lingua saja
stentus e cun il temp haja ella dà si.
Pli tard, cun la lavur da matura, ha ella
vulì far ina segunda emprova. Ella avess
vulì emprender rumantsch e scriver sur-
lunder. Ma il scolast ha giavischà ina lavur pli scientifica. Igl è stà curt avant
ch’ins ha introducì il rumantsch grischun en las emprimas scolas. Zimmermann è sa dumandada: «Tge pensan ils
scolars insumma da la nova lingua da
scrittira?» Ella ha concepì in questiunari
per interrogar scolars dal stgalim aut en
Val Müstair e scolars rumantschs da la
scola chantunala. Radund 150 scolars
han dà resposta. En Val Müstair han ils
scolars exprimì pauca simpatia per il rumantsch grischun. A Cuira, nua ch’ils
scolars avevan gì singulas lecziuns, è il resun stà pli positiv en il senn da: Il ru-
Cuntinuà cun sursilvan
Dapi tschintg semesters studegia Zimmermann a Neuchâtel giurisprudenza.
Quest semester ha ella cumenzà in curs da
sursilvan tar Renzo Caduff a l’Universitad
da Friburg. Els sajan ina classa da var
diesch students, raquinta Zimmermann.
Intgins fetschian il curs plitost per rimnar
puncts. Ma i haja trais u quatter students
sco ella che hajan parents u auters lioms
cun il Grischun. Senza il rumansch manchia simplamain insatge, constatescha
Zimmermann. Quai sentiment hajan exprimì anc auters scolars cun lioms.
En sasez avess ella pli gugent emprendì vallader per pudair baterlar cun ils enconuschents a Valchava. Ma per il mument na dettia quai nagin curs ladin e sursilvan saja er en urden, pertge sia famiglia
derivia gea da la Surselva. Era la mamma
da Nesa ha cumenzà avant intgins onns
ad emprender sursilvan a la Scol’auta populara a Turitg.
In giavisch politic?
En Romandia ha la studenta cumenzà a
s’engaschar l’emprim tar Greenpeace. Ma
ella ha svelt remartgà ch’i na basta betg da
s’engaschar mo per la natira. Per chattar
soluziuns dovri era la politica, uschia
ch’ella è entrada en la suprastanza dals
Giuvens Verds a Neuchâtel. «Tar nus po
mintgin fa part da la discussiun.»
Ils Giuvens Verds vulan mantegnair la
natira sco basa da vita per las genera-
Cuverta dal cudesch.
ziuns vegnentas. Perquai promovan els in
stil da viver che sa cumporta cun l’ambient. I dettia mintgatant collegas che dumondian sch’ella na saja betg frustrada da
cuntanscher mo pauc cun tant engaschament politic. «Mia resposta è adina: Quai
m’è tuttina. Jau emprov da m’engaschar e
da far mes pussaivel. Pertge jau sun persvadida che nus avain quasi ina obligaziun – ed a medem temp la schanza – da
prender enta maun e da furmar noss futur.»
La suprastanza dals Giuvens Verds da la
Svizra n’aveva fin da curt nagin presidi. Ins
na vulevia avair naginas ierarchias. Ma cun
il temp hajan ins remartgà ch’i saja bun
d’avair in president per communitgar cun
ils meds da massa e per il contact cun las
autras partidas giuvnas. Uss partian ils
Giuvens Verds il presidi sin duas persunas
ed hajan fatg bunas experientschas.
E sch’ina diala vegness e dumandass
tge giavisch politic che la co-presidenta
dals Giuvens Verds da la Svizra avess? Tge
fiss lura la resposta? Zimmermann na targlian gnanca secunda: «Jau giavischass ch’i
dess ina secziun dals Giuvens Verds en il
Grischun.»
Curt e bun
Naschida: ils 11 d’avust 1989
Abitescha: a Neuchâtel
Colur preferida: cotschen
Spaisas preferidas: pulenta u
capuns
Musica: Vivaldi e Liricas Analas
Autur: Gabriel Garcia Marquez
Lieu preferì: Lai da Cresta
«Auto» preferì: il tren
MAD
Ina scappada en Russia
(cp) La davosa fermada als Dis da litteratura da quest onn vegn ad esser in
grondius viadi cun il tren. Dumengia, ils
8 da november a las 14.00 dastga il public
accumpagnar l’actur Thomas Sarbacher ed
il contrabassist Peter Nobuo Gossweiler sin
in viadi ad auta procentuala da Moscau a
Petuschki.
Filosofar sut influenza d’alcohol
Il teater che Thomas Sarbacher e Peter Nobua Gossweiler preschentan a Domat sa
basa sin in poem dal autur russ Venedikt
Erofeev (1938–1990).
Il protagonist Venja viagia cun il tren da
Moscau a Petuschki, nua che sia amanta e
ses figl al spetgan. Tgi che vul viagiar cun
el sto dentant cumportar dapli che be in
magiel vin. Anc sturn dal di avant sa metta Venja en viadi vers la staziun da Kursk a
Moscau, en maun ina cofra cun regals e
bavrondas alcoholicas en gronda quantitad. Bavrondas ad auta procentuala per el
sez sco era per il conductur Semjonoytsch
che fa pajar ils viandants cun vodka per kilometer.
Da staziun a staziun, da buttiglia a buttiglia daventan ils monologs ed ils discurs
pli abstrus. En il deliri vegn filosofà davart
istorgia, litteratura, l’amur – davart la vita.
Valurs moralas e spiertalas vegnan demontadas cumplettamain.
Inscenaziun da Helmut Vogel
En l’inscenaziun che Helmut Vogel ha uriundamain fatg per il «sogar theater» a Turitg è Thomas Sarbacher en viadi sco eroe
e bavader. L’actur è enconuschent a blers
atras sias producziuns da televisiun en Germania (tranter auter «Der Elefant»). Il contrabassist Peter Nobuo Gossweiler agescha
sco ses alter ego.
Stuair e pudair esser uman
La comica dad Erofeev ha bleras fassettas.
Descripziun, satira, nonsens – la realitad
caotica vegn mussada en las pli differentas
manieras. «Moskva Petuski» è in poem
cumplex, ina tragicumegia plaina dad allusiuns, il spievel d’ina societad desolata
senza speranza e motivaziun. Ina parabla
da l’uman modern che bagliaffa e crititgescha deblezzas socialas, ma che na craja tuttina betg che las relaziuns possian sa midar.
Il toc fa giu quint cun l’istorgia sovietica, tematisescha la discrepanza tranter
l’ideal e la realitad. Igl è in rapport davart
il baiver ed il vomitar. Davart il sa sentir
mal sch’ins baiva e sch’ins na baiva betg. Igl
è in monolog davart il stuair ed il pudair
esser uman.
Ils Dis da litteratura han lieu dals 6 als 8 da november en la halla Tircal a Domat. Dapli davart
il program: www.litteratura-rumantscha.ch