STORIA
Pula est una bidda de setimilla e
duxentus personas chi s’agatat in sa
província de Casteddu acanta de su
mari. Tenit unu logu mannu setanta
chilometrus e de custus binti funt in sa
costa e dexi funt de ispiàgias bellas
meda. Sa strutura de sa bidda est
cussa
chi
dd’ant
donau
is
paras
mercenàrius in su XVII seculu candu
funt benius a bivi in custu logu.
Sa bidda s’agatat a tres chilòmetrus de is arrestus de s’antiga Nora ca s’agatat a sa fini de
sa punta de su “Capo di Pula”. Nora est una de is cosas prus bellas de su logu impari a su
mari e a is montis.
De Nora no scieus meda, ma de certus arrestus si pentzat fessit unu logu innoi ant bíviu
gentis nuràgicas. Su nómini etotu fait pentzai a s’arrèxini *nor/*nur e incapas dd’at pigau
de s‘eroi Norace ca, comenti si narat, at fundau sa bidda.
Scieus parò ca est nàscia comenti a centru de sa costa fatu de is Fenicius in su IX – VIII
seculu prima de Gesu Cristu e ca depiat éssiri arricu meda in su V seculu. Candu funt
arribaus is Romanus, Pula bessit sedi de su governatorau.
A Nora funt istétius agataus is prus antigus documentus
epigraficus de totu sa Sardigna e in d’unu de custus ddoi
est po sa prima borta su nómini “Sardigna”.
Intra su 456 e su 466 apustis de Gesu Cristu, is invasionis
barbaricas ndi dd’ant fata arrui fintzas a s’acabu po crupa
de is arabus. Fintzas a su millenoixentuscincuantadus
Nora est abarrada tudada. Si biant scéti arréstus chi iant
giai biu in su Cincuxentus e in s’Otuxentus visitadoris
nomenaus. Chi s’avisitat Nora si podit biri unu mundu
antigu ca abarrat in sa conca comenti a unu sonnu: is
termas, su teatru, sa funtana nuragica, is marmus de
dónnia colori, is colonnas de is domus arricas de is sennóris romanus e su santuariu de
Esculapio. Oi is turistas podint biri totu custas cosas e in su propriu tempus podint castiai
su panorama meravilliosu de su mari in s’interis chi bint is ispetàculus chi si faint me in
s’anfiteatru romanu. Áteras nobas e cosas de importu mannu si podint biri a su Museu
Archeologicu de Pula ca s’agatat in su centru de sa bidda. Áterus logus de importu istòricu
funt sa cresia de Sant’Efis e sa Villa Santa Maria, progetada in sa prima mitadi de
s’Otuxentus de s’architetu nominau Gaetano Cima. In su logu de Pula si podint biri puru
tres turris ispagnolas fatas prus o mancu in su V seculu po castiari is navis de is predonis
moriscus: sa Turri de San Macario, sa Turri de Coltellazzo e sa Turri de Cala d’Ostia.
Cussa de su Coltellazzo, ca is istudiosus tzérriant de Sant’Efis, est sa sola in Sardigna ca
tenit su torrioni, e po custu is espertus dda cunsiderant comenti a una forteza.
SU LOGU
Mancari sa bidda siat totu in pranu, su logu
comunali andat de su mari meravilliosu a is
montis de aintru innoi s’agatant medas mitzas
e arratzas de froris e animalis. Intra is montis
minescit de èssiri arregordau cussu de Monti
Sebera (983 metrus) e in custus logus agatat
arricoveru su cerbu sardu, su sirboni, su
margiani e medas arratzas de pillonis. Su logu
de Pula mudat de cussu prenu de olias, menduas, tamatigas e axia a cussu piessignu de
su Mediterraneu cun murta, figu morisca e àteras cosas.
Bellas meda meda funt is ispiàgias, de cussa de Capo Furcadizzu a cussa de Nora, chi
s’agatat ainnanti a sa zona archeologica, fintzas a Cala Bernardini in sa bia chi andat a
Teulada. Dunas e ispiagixeddas prenas de anea s’agatant una pustis de s’àtera e est raru
agatai puru isuleddas.
IS FESTAS
Intra is apuntamentus de su folklori chi no si podint perdi, cussu prus de importu est sa
Festa de Sant’Efis su 1-2-3-4 de maiu. Su primu de maiu de dónnia annu si torrat gratzias
a su Santu Guerrieru cun d’una processioni de costumus sardus e carrus totus
cuncordaus innoi s’istatua de su Santu benit
acumpangiau de genti meda meda de
Casteddu fintzas a sa cresiedda chi est
dedicada a issu a Nora innoi est istètiu
martirizau. Custa festa fata de devotzioni e
religiosidadi incumintzat candu s’istàtua de
su Santu, ca iat salvau Casteddu de sa pesti
de su 1656, lassat sa citadi po andai a Nora.
S’istàtua de su Santu arribat a Nora a mesudì
de su dus de maiu e benit acumpangiada su
merì me in sa cresiedda sua innoi abarrat totu su crasi. Su merì de su tres ci funt cantus e
ballus e su crasi si torrat a partiri po Casteddu. Po is turistas chi arribant de totus is partis
de su mundu est unu spetaculu de coloris e de religiosidadi chi no si podit iscaresci. Ma
giai dónnia mesi ci funt festas e manifestatzionis religiosas e folkloristicas: Sant’Efis de
gennaiu (14-15 gennaiu), Sagra de Sant’Isidoru in sa borgada de Santa Margheida (3°
domínigu de maiu), Santu Giuanni Batista patronu de Pula (24 de làmpadas), Santa
Margheida patrona de Santa Margheida (2° o 3° cida de austu). Su 15 de austu de dónnia
annu si festegiat s’Assunta e sa statua de sa Madonna benit portada de sa genti cun d’una
bella processioni a mari innoi ci funt medas barcas in mesu a unu muntuni de luxis.