Sanda, 25 lügl 2009
POSTA LADI NA
Nouva soluziun per la canorta a Scuol
Il lavuratori culs Fränzlis es fich predschà
Mancantà üna schanza?
«Id es simplamaing fantastic»
Il proget da la società Chüra
d’uffants Engiadina Bassa
d’üna canorta sün l’areal da
la Chasa Puntota nun ha la
PEB sustgnü. Uossa propuona il cumün da Scuol a la
società da tour a fit localitats
illa chasa da l’Energia Engiadina.
(anr/fa) Da l’on 2001 es gnüda fundada la società Chüra d’uffants chi
vain presidiada da Maja BischoffPool da Sent. L’intenziun es da dar a
mammas da famiglias cun ün pitschen
guadogn, a mammas chi ston educar
be sulettas o chi vöglian restar activas
illa vita professiunala la pussibiltà da
laschar chürar lur uffants da persunas
fidadas, uschedittas mammas da di.
Causa chi’d es difficil da chattar da
quellas mammas da di es nada l’idea
da fundar üna canorta. «Cun plaschair
vaivna tut l’on passà cugnuschentscha da la sporta da la Dmura d’attempats Chasa Puntota da collavurar
cun nossa canorta», disch Maja Bischoff, «tant plü dischillusas eschna
uossa cha la Pro Engiadina Bassa nu
s’ha declerada pronta da sustgnair
nos proget.» Uossa però es gnü activ
il cumün da Scuol.
Canorta in vicinanza da la scoula
Ch’el saja gnü contactà da la PEB
cul giavüsch cha’l cumün da Scuol
tschercha localitats chi gnissan in dumonda per la canorta, infuormescha
il president cumünal Jon Domenic
Parolini. Davo avair visità insembel
cun exponentas da la Chüra d’uffants
regiunala divers ogets es il cussagl cumünal gnü a la conclusiun cha la chasa da l’Energia Engiadina füss il lö
adattà: «Sül plan da la butia e dals
magazins da l’Impraisa electrica dess
perquai gnir fatta quist on chi vain
l’investiziun necessaria per cha la
Spitex possa tour a fit la butia ed üna
part dal magazin», declera il capo da
Scuol, «e l’otra part dal magazin vers
ost dessna a fit a la Chüra d’uffants
regiunala.» Las localitats stan a disposiziun pel nouv scopo da prümavaira 2010, cur cha l’Impraisa electrica e l’Arena Tech fan müdada i’l
@­-Center. «Ils avantags da quista soluziun sun dad üna vart cha cun la
ledscha da scoula exista bainbod il
bsögn da structuras da di culla sporta
da giantar in vicinanza da la scoula
cumünala», manzuna Jon Domenic
Parolini, «da tschella vart es in stretta
vicinanza eir la plazza da giovar.»
«D’organisar da nouv la gestiun»
Chi saja salüdaivel cha’l cumün da
Scuol s’ingascha per la canorta regiunala, disch Maja Bischoff. Ella es però
da l’avis chi s’haja mancantà üna
schanza: «Nos proget cha no vaivan
elavurà in collavuraziun culla dmura
Puntota prevezzaiva üna grond’interacziun da vegl e giuven, cun quel concept s’haja fat in oters lös fich bunas
experienzas.» Ella manzuna chi s’haja
uossa bainschi survgni ün’alternativa
a la prüma soluziun, be cha’l proget
saja uossa darcheu al cumanzamaint:
«Las calculaziuns e l’organisaziun, il
fit, ingio as vaja pel damangiar, chi
pulischa – in quels reguards vessna
pudü collavurar culla dmura – tuot la
gestiun esa da far uossa da nouv.»
Maja Bischof resta però optimista:
«Uossa esa da verer concret, real che
esa da far per ragiundscher nos böt da
pudair rivir a Scuol üna canorta, ed
insembel cul cumün ans gratiarà quai
bain.»
La chasa da l’Energia Engiadina cun butia e magazin.
fotografia: U. Pult
Imprender meglder rumantsch
der Mond la glüna
abnehmender Mond
wir haben abnehmen-
den Mond
zunehmender Mond
wir haben zunehmen-
den Mond
der Mond nimmt ab
der Mond nimmt zu
der absteigende Mond
der aufsteigende Mond
die Mondbahn
die Mondfinsternis
der Mondhof
das Mondjahr
eine Mondnacht
die Mondphasen
der Mondschein
bei Mondschein
glüna guarainta
ad es guaraint /
id es guaraint
glüna creschainta
ad es creschaint /
id es creschaint
la glüna es guarainta
la glüna es creschainta
la glüna culs pizs ingiò
la glüna culs pizs insü
l’orbit lunar
la s-chürdüna /
s-chürdüm da la glüna
il rinch da la glüna
il tschierchel da la glüna
l’an solar / on solar
üna not da clerglüna
las fasas da la glüna
il clerglüna
da clerglüna
Il festival XONG spordscha
minch’on lavuratoris da
musica e chant chi vegnan
frequentats bain. In Engiadina ha lö be ün dals tschinch,
nempe quel dals Fränzlis a
Tschlin.
(anr/map) La chasa da scoula a
Tschlin es darcheu üna jada plain
vita. Our da la stanza pro l’entrada ed
our da la sala polivalenta as doda musica populara chi vain però interruotta adüna darcheu: ils 20 partecipants
al lavuratori da musica culs Fränzlis
exerciteschan ils tocs. Duri Janett
cussaglia: «Provai da sunar plü detagliadamaing, quai es lura eir bun plü
tard pel tempo.» El chanta la melodia
e seis musicants repetan cun pazienza
fin cha’l dirigent es tantinavant cuntaint.
Dar curaschi d’esser spontan
Men Steiner dals Fränzlis da Tschlin
es da la partida daspö il cumanzamaint
avant ot ons: «Minch’on esa different
e la sfida es dret gronda. I’s tratta
nempe da cumbinar instrumaints,
savair ed età.» El tradischa cha la
gruppa dad ingon saja ourdvart omogena e cha quai facilitescha la lavur.
El svess pissera per l’organisaziun dal
lavuratori: «I voul üna structura. Eu
di che, cura e chi e l’instrucziun da
musica fan Domenic, Duri e Curdin
chi sun ils profis.» Ils partecipants al
lavuratori survegnan ouravant duos
tocs cun notas ed ün disc compact
per tadlar. Cur chi vegnan in lündeschdi stuvessna tils savair plü o main
ourdadoura. Quai es nempe il böt
da l’ufficina: sunar a la fin da l’eivna
sainza ils pults davant sai. Men Steiner admetta chi saja bod impussibel
cha tuots rivan da sunar ourdadoura
tuot ils 10 tocs, eir causa cha la successiun infra ils tocs nun es facila
da’s remarchar. «No provain da dar
curaschi, da tils persvader chi nu sun
sulets e chi pon as fidar dal vaschin.»
Planisà in detagl vain be il prüm di da
l’eivna, davo vain discus mincha di e
decis da tuots quatter co chi dess ir
inavant. «Vairamaing es il lavuratori
scrit oura per sofladers e strichaders
ma no pigliain eir oters instrumaints.
Qua as vezza ils partecipants al lavuratori a Gluorn pro’l concert tras cità.
No provain da far musica populara
sco plü bod cun üna instrumentalisaziun chi’d es ida a perder», agiundscha Men Steiner. Quist on es gnü
integrà eir il chant in l’ufficina da
musica, pustüt per güstifichar il titel
dal festival. Pels Fränzlis es il lavuratori üna pussibiltà da render a lur
aderents il sustegn retschevü in occasiun da lur concerts.
nar spontan. Per quist intent es il lavuratori, ch’el frequainta per la terza
jada, üna stupend’occasiun. «Eu sun
ün fan dal XONG, id es simplamaing
fantastic. Ils Fränzlis chattan adüna
bunas soluziuns ed han ün bun man.
L’inscunter da plüssas generaziuns
am plascha zuond bain», agiundscha
Andrea Semadeni chi ha uossa a disposiziun daplü temp per far musica
daspö ch’el es pensiunà.
Bsögn d’improvisar
Per la tschinchavla jada frequainta Franziska Telser il lavuratori. Ella
vain da Damal ma sa bainischem rumantsch causa cha sia mamma es da
Müstair. «Minch’on esa flot, la glieud
es fich chara e diversas fatschas am
sun intant cuntschaintas», quint’la.
Ella po star pro Duri Janett e s’allegra
da pudair tuornar per ün concertin a
Gluorn. A Franziska, chi frequentarà
davent da quist on la scoula superiura a Bulzan, plascha da sunar insembel cun glieud da differenta età. Per
Andrea Semadeni, oriund da Tschlin
e domicilià a Berna, esa sco tuornar
in l’infanzia: «Eu sun creschü sü culs
Fränzlis. Cun rumir la chasa da meis
bazegner n’haja chattà sia gïa preziusa.» El suna insembel cun sia duonna
in ün orchester ingio chi sunan be ouvras classicas. El ha il bsögn da sunar
tocs populars, d’improvisar e da su-
Ils duos hits dal XONG
anr. Nicolo Bass, respunsabel pel
XONG in Svizra, es fich cuntaint cul
interess pels lavuratoris da musica.
Per evitar gronds deficits esa important cha mincha lavuratori dombra
almain 20 partecipants. Ils duos hits
sun l’eivna da teater e musica per
uffants pitschens a Strada e’l lavuratori culla gruppa austriaca Mnozil Brass a Damal. «Per l’eivna da
teater ston ils uffants s’annunzchar
bod per pudair far part. E per la
Mnozil Brass almain duos ons ouravant», tradischa Nicolo Bass. Il
lavuratori a Tschlin es ün pa giò
d’via e per chürar il contact vegnan insembel almain üna jada
ils partecipants dals differents lavuratoris, ingon es quai capità a
Gluorn.
Zernez
Kino Openair cun films per mincha gust
(pl) Dals 28 lügl fin als 3 avuost ha lö a Zernez il 8. Openair Kino
dal Parc Naziunal i’l üert dal Chastè
Planta Wildenberg. Il program cumpiglia films per pitschen e grond e
per mincha gust: da «Bienvenue chez
les Ch’tis», «Ice Age 3», «Australia»
fin «Nordwand». In connex cul film
«Nordwand», chi vain muossà in gövgia, ils 30 lügl, han ils organisatuors
dal Kino Openair Zernez invidà sco
giast special l’alpinist extrem Michal
Pitelka. Insembel cun Stephan Siegrist es el rampignà dal 2002 illa montura originala da la prümascensiun da
l’on 1938 sü da l’Eigernord-wand. La
tragedia «Nordwand» quinta da la
tentativa dals alpinists Hinterstoisser/
Kurz ed Angerer/Rainer dal 1936 da
rivar sco prüms sur la paraid-nord sül
Eiger. Il film dà üna pitschna invista
cun che difficultats cha’ls alpinists
vaivan da cumbattter quella jada.
Cordas da nylon, carabiners dad alu e
büschmainta choda da Gore-Text nu
daiva quella jada, ils alpinists d’eiran
equipats cun cordas da chonv, fier
battü e pingoula. Precis cun da quist
equipamaint es Michal Pitelka rampignà insembel cul cuntschaint alpinist Stephan Siegrist dal 2002 sü da la
paraid-nord dal Eiger.
Verer films da kino i’l üert dal chastè
Planta Wildenberg – ün evenimaint
tuot special.
Il Kino Openair da Zernez 2009 dà
però eir bler da rier, p.ex. cul film da
la prüma sairada «Bienvenue chez les
Ch’tis». Quist film es in Frantscha il
plü cuntschaint film indigen da tuot
ils temps. El quinta dals «Ch’tis» chi
vivan i’l nord da la Frantscha e chi
han ün dialect ün pa special. Quist
film vain preschantà in mardi, ils 28
lügl, a las 21.35.
In marcurdi, ils 29 lügl, vain muossà a las 21.35 il film «Australia» cun
Nicole Kidmann. Id es ün’istorgia
d’amur, ün western ed ün film da
guerra e natüra in üna. Inavant vaja
in gövgia, ils 30 lügl, a las 21.35, cul
film «Nordwand» ed in venderdi, ils
31 lügl, a las 21.35, cun «The Wrestler» cun Mickey Rourke – ün film
davart il comeback d’ün luottader a
la fin da sia carriera, ün classiker davart amur, suldüm e la tentaziun dal
showbusiness.
In dumengia, ils 2 avuost vain
muossà a las 21.35 il film chi trattegna
tant ils pitschens sco eir ils gronds
«Ice Age 3». Ils amis il Manni, Diego
e Sid passaintan darcheu bleras aventüras ed inchantan il public cun lur
umur. La finischun dal Kino Openair Zernez 2009 fa in lündeschdi, ils
3 avuost, a las 21.35, il film «Slumdog
Millionaire» chi ha guadagnà numerus premis da film.
Prevendita dals bigliets: Coop Zernez, Zuoz e Scuol. Ulteriuras infuormaziuns: www.nationalpark.ch