C UMÜN DA SCUOL
MISSIVA
per la votaziun cumünala
dals 14 gün 2015
1. Ledscha da pulizia
2. Ledscha da pumpiers
3. Contrat da cooperaziun davart il Reservat da
biosfera Val Müstair – Parc Naziunal
4. Concessiun per retrar aua pella sauaziun agricula
a Ftan
Die deutsche Fassung ist auf der Internetseite www.scuol.net zu finden. Sie
kann auch bei der Gemeindekanzlei bezogen werden.
Stimadas votantas, stimats votants
Daspö ils 1. schner 2015 exista il nouv cumün da Scuol chi s’ha fuormà
culla fusiun dals cumüns d’Ardez, Ftan, Guarda, Scuol, Sent e Tarasp.
Amo dürant il 2014 ha acceptà la cumünanza d’urna la constituziun e
la ledscha d’impostas dal nouv cumün. Tuot tschellas ledschas sun da
s-chaffir e d’approvar – tenor contrat da fusiun – infra 5 ons.
Als 14 gün 2015 vain vuschà davart la ledscha da pulizia e la ledscha da
pumpiers.
Ulteriuors progets da votaziun sun il contrat davart il Reservat da Biosfera Val Müstair – Parc Naziunal e la concessiun per retrar aua pella
sauaziun agricula a Ftan.
Las dumondas da votaziun sun:
Voul El/Ella acceptar
1. la ledscha da pulizia dal cumün da Scuol
2. la ledscha da pumpiers dal cumün da Scuol
3. il contrat da cooperaziun davart il Reservat da Biosfera Val
Müstair – Parc Naziunal
4. la concessiun per retrar aua da differents auals pella sauaziun
agricula sün territori da Ftan?
La suprastanza cumünala ha deliberà ils progets per mans da la radunanza dals 20 avrigl 2015 a Scuol. Quella tils ha discus e deliberà per
mans da la cumünanza d'urna. No Tillas/Tils arcumandain, stimadas
votantas e stimats votants, d'acceptar ils quatter progets.
Scuol, avrigl 2015
In nom da la suprastanza cumünala
Il capo:
Il chanzlist:
Christian Fanzun
Andri Florineth
1. Ledscha da pulizia
La ledscha da pulizia regla la sgürezza da persunas e proprietà e dess
mantgnair la quietezza e’l uorden public sül territori dal cumün da
Scuol. Ella es la basa per cha’ls organs da la pulizia possan gnir activs
in cas da surpassamaints.
La nouva ledscha correspuonda – cun pitschnas differenzas – a las
ledschas existentas dals anteriuors cumüns (cun excepziun da Guarda
chi nu vaiva ingüna ledscha da pulizia). Duos giurists tilla han examinada e verifichà eir ch’ella correspuonda a la constituziun cumünala.
Il text da la ledscha as chatta süllas seguaintas paginas.
2. Ledscha da pumpiers
Quista ledscha regla las incumbenzas e l’organisaziun dals pumpiers
dal nouv cumün. Ella rimplazza quella dals anteriuors cumüns.
Sia basa es l’art. 26 al. 3 da la ledscha davart la protecziun preventiva
cunter incendis e davart ils pumpiers aint il chantun Grischun. Ella sto
gnir approvada eir da la sgüranza d’edifizis dal Chantun.
Il text da la ledscha as chatta süllas seguaintas paginas.
3. Contrat da cooperaziun davart il Reservat da Biosfera
Val Müstair – Parc Naziunal
Situaziun da partenza
Il Parc Naziunal Svizzer es dvantà dal 1979 il prüm reservat da biosfera
arcugnuschü da la UNESCO in Svizra. 31 ons plü tard es gnüda integrada
eir la Val Müstair. La Biosfera Val Müstair – Parc Naziunal UNESCO
cumpiglia uossa dad üna vart il Parc Naziunal, la zona centrala protetta
severamaing, da tschella vart la Val Müstair chi fuorma vers süd ed ost
l’uscheditta zona circundanta, üna „zona da plümatsch“ chi tegna davent influenzas disturbantas da la zona centrala.
Ulteriura zona circundanta
La UNESCO ha approvà quist ingrondimaint in gün dal 2010, schabain
cha las premissas nu sun amo accumplidas dal tuot. I fa nempe dabsögn chi detta üna zona circundanta sainza interrupziuns intuorn
tuot il Parc Naziunal (= la zona centrala). Perquai esa da s-chaffir talas
zonas eir da la vart vers nord e vest. Be uschè po tgnair la Biosfera Val
Müstair – Parc Naziunal seis status sco reservat arcugnuschü da la
UNESCO. Sper il cumün da Scuol sun pertocs eir ils cumüns da S-chanf
e Zernez.
La zona circundanta consista da duos zonas: 1. la zona da chüra es protetta plü severamaing, pussibla es impustüt ün’agricultura e silvicultura
ecologica. 2. la zona da svilup es ün spazi d’abitar e d’economia cun diversas ütilisaziuns persistentas dal terrain.
Il contrat da cooperaziun
Oriundamaing esa stat previs da s-chaffir la nouva zona cirundanta cun
müdar il plan directiv regiunal. Ils cumüns pertocs s’han dostats cunter
quist intent. Els han gnü la temma cha las prescripziuns pudessan
esser massa severas. In quel cas as vessa pudü müdar la situaziun be
cun müdar darcheu il plan directiv, üna procedura chi voul bler temp.
Ils cumüns han propuonü perquai da reglar la chosa cun ün contrat.
Ils partenaris dal contrat sun la Fundaziun Parc Naziunal Svizzer (l’organisaziun portadra dal PNS), il cumün da Val Müstair sco eir ils cumüns
da S-chanf, Zernez und Scuol (Vertragsgemeinden Nord). El regla impustüt l’organisaziun (Cussagl dal reservat, administraziun etc.). Ils
artichels 2 fin 5 definischan ils differents geners da zonas.
(Il contrat es tudais-ch siond cha la Fundaziun PNS es ün gremi federal)
Art. 2 Allgemeine Bestimmungen
Die zulässigen Nutzungen innerhalb des Vertragsperimeters ergeben
sich aus den bestehenden Richtplänen, den bestehenden Plänen der
Grundordnungen der Standortgemeinden und den entsprechenden Gesetzen auf kommunaler, kantonaler und Bundesebene, welche durch
den vorliegenden Vertrag alle keine Änderungen erfahren.
Die Gemeinde Val Müstair beteiligt sich überdies in eigener Verantwortung, im Rahmen der jeweiligen gesetzlichen Bestimmungen, am
bestehenden Regionalen Naturpark Val Müstair.
Art. 3 Kernzone
Das Gebiet des Schweizerischen Nationalparks (SNP) bildet die Kernzone. In der Kernzone hat die freie Entwicklung der Natur Vorrang.
Die Nutzungen und Zuständigkeiten für dieses Gebiet richten sich
nach den Parkverträgen der Schweizerischen Eidgenossenschaft mit
den Gemeinden und nach dem Bundesgesetz über den Schweizerischen Nationalpark (SR 454).
Art. 4 Pflegezone Nord und Val Müstair
Die Pflegezone soll insbesondere Naturerlebnisse ermöglichen und eine
Pufferfunktion zugunsten der Kernzone bewirken.
Art. 5 Entwicklungszone Val Müstair und S-charl
In der Entwicklungszone Val Müstair und S-charl steht die sozioökonomische Entwicklung im Vordergrund.
Il text integral dal contrat as chatta sülla pagina d’internet dal cumün
(www.scuol.net). El po eir gnir retrat pro la chancellaria cumünala.
Ils cunfins da la nouva zona circundanta correspuondan plü o main a
l’Inventari federal da las cuntradas e dals monumaints natürals d’importanza naziunala (IFC).
Ill. 1: La zona circundanta previssa sün territori dal cumün da Scuol.
Il contrat ha üna dürada fixa da 10 ons. 2 ons avant cha quella va a fin
cumainzan las parts contrahentas a trattar davart üna prolungaziun
cun o sainza modificaziuns. I nun exista ingün dovair da prolungar il
contrat. Id es eir pussibel ch’üna part desdischa il contrat (cun ün
termin da desditta da 6 mais) sch’el nun es plü cumportabel per ella.
Bunas experienzas in Val Müstair
Las experienzas in Val Müstair han muossà cha’l label „Biosfera“ ha
effets positivs per l’economia ed il turissem. Blers prodots as laschan
vender plü bain cur chi portan quist label.
4. Concessiun per retrar aua da differents auals pella sauaziun agricula sün territori da Ftan
Situaziun da partenza
La società da meglioraziun da Ftan retira aua da differents auals per la
sauaziun agricula. Quai succeda in basa ad üna cunvegna provisorica
dal 2006. La premissa per la concessiun definitiva d’eira ün concept da
sauaziun. Quel es uossa avant man. Il cussagl cumünal da Ftan til ha
approvà als 9 december 2014 e deliberà per mans da la cumünanza
d’urna dal nouv cumün.
Il proget in detagl
La tabella suotvart muossa las surfatschas previssas per la sauaziun
e’ls auals chi furnischan l’aua.
Territori
surfatscha inchaschamaint
sauada
Chauols
Cumpcha
Luot
Muntclü
Ftan Pitschen / Suot
Champs
Pra Lönch / Cuttüra
S-chaletta
Schliouas
Spescha
Suot Champs
Val Mastraingia
2.56
7.15
7.04
2.00
18.56
4.16
8.61
3.25
3.21
5.60
Total
81.98
19.84
Peidra Fessa
Aua da l’Ogna / Val Forada
Aua da l’Ogna / Val Forada
Val Corgnanca
Aua da Sadinas / Planbè / Aua
Val Corgnanca
Lais da Pesch
Aua da l’Ogna / Val Forada
Lais da Pesch
Sainas / Val Schmuglinas
Aua da Sadinas / Vallaina Bella
Aua da l’Ogna / Val Forada
Cuosts e finanziaziun
Ils cuosts totals s’amuntan a 1’846’700 francs. La Confederaziun e’l
Chantun pajan 1’395’300 francs, da l’egualisaziun da finanzas e dad
otras varts esa da far quint cun contribuziuns da ca. 300’000 francs. Ils
cuosts restants da 151’400 francs vegnan scumpartits seguaintamaing:
ils proprietaris han da da pajar 20 % (in tuot 30’280 francs, quai sun
369 francs per ha), ils cultivaders 80 % (in tuot 121’120 francs, quai
sun 1’477 francs per ha).
La concessiun
La concessiun fixa la quantità maximala chi das-cha gnir retratta ed ils
predschs (üna taxa unica per la concessiun svessa sco eir üna taxa
annuala per l’aua retratta). Ella regla plünavant ils obligs da la concessiunaria (Società da meglioraziun da Ftan) e las dumondas da respunsabiltà.
Per quai chi reguarda l’aua restanta valan las prescripziuns da la legislaziun superiura.
Proceder
Tenor l’ANU (Uffizi chantunal per natüra ed ambiaint) esa la radunanza cumünala resp. la cumünanza d’urna – tuot tenor che cha la
constituziun cumünala prevezza – chi dà concessiuns per retrar aua. Il
nouv cumün da Scuol decida talas dumondas cun vuschar a l’urna.
La concessiun – scha la cumünanza d’urna tilla accepta – vain tramissa al Chantun (departamaint d’educaziun, cultura e protecziun da
l’ambiaint) per l’approvaziun. Ella survain vigur legala al mumaint
cha’l departamaint ha dat ils permiss per retrar aua in basa al dret
davart la protecziun da las auas.
Il contrat da concessiun as chatta sülla pagina d’internet dal cumün
(www.scuol.net). El po eir gnir retrat pro la chancellaria cumünala.