Idea da basa pel film Sindy
Riassunt da l’istorgia:
„Meis bap dschaiva adüna: scha tü nu pigliast tia via suot ils peis, survegnst bulais!“ (Toni)
Sindy es l’istorgia d’üna giuvna Grischuna, chi sto bandunar sia patria per viver seis sömmi.
Ella nun es rivada amo fich dalöntsch cur ch’ella inscuntra per la prüma jada a Toni, ün garaschist
solitari in tschercha da cumpagnia feminina. Quist prüm inscunter es üna situaziun strana per
tuots duos: ella fa il pisch davo il bös-ch, sül qual el sezza...ün inscunter cuort e dischagreabel, in
mincha cas per la giuvna.
Plü tard, cur ch’ella fa autostop sper il stradun, ferma precis el, Toni. El tilla piglia cun sai. Ma
perquai ch’ella nun es fich divertaivla e discuorra be inglais (fich mal, Toni as sainta tut pel chül) e
neir nu voul chantar cun el, tilla bütta Toni our da l’auto davo paccas stortas.
Il terz inscunter es plü paschaivel. Els baivan bira sün ün bankin e fan cugnuschentscha. Sindy
cuntinua da discuorrer be inglais e neir nu disch d’ingionder ch’ella vegn e neir na co ch’ella ha
nom. Plü co facil as nomnia ella in avegnir Sindy. Ella nu saja però amo sgüra, scha quai saja ün
bun nom d’artista. Sindy es in via per Londra. Là voul ella contactar il manager, ch’ella ha chattà in
l’internet, chi tilla ha impromiss da s’occupar d’ella e da sia carriera sco chantadura.
Quella not s’insömgia Toni da Sindy in ün vesti sexy chantond üna chanzun d’amur be per el.
Toni, uossa persvas cha Sindy saja sia duonna da sömmi, tilla preschainta plain superbgia seis plan
per ün avegnir cumünaivel: el ha jertà üna chasa, o plütöst üna baracca, sper la via chantunala.
Our da quella fessa’l jent ün ressort da vacanzas muni cun tuot las schicanas, dafata cun ün palc
per la gronda chantadura Sindy.
Sindy es schoccada, piglia sia valisch e mütscha. Toni, amo adüna in ardur, tilla segua cul auto ed
imprometta da tilla manar a Londra.
Ün viadi turbulent, plain ots e bass, cun atmosferas uschè differentas sco ils duos protagonists in
lur esser.
Sindy voul rivar il plü svelt pussibel a Le Havre, per tour da la barcha da passagi per l’Ingalterra.
Ella nu voul ne durmir ne far pausas. Toni s’inrücla da sia impromischiun. El es strat vi e nan
tanter desideri d’amur e disfiduzcha.
Cur ch’ella voul ir „be sveltin sün tualetta“ pro ün tancadi e til fà spettar passa üna mezz’ura, vegn
Toni nar. El va in tschercha da Sindy e tilla vezza flirtond e riond cun ün giuven i’l shop dal tancadi.
Fin a Paris nu discuorran els plü gnanca pled. Illa stanza d’hotel perda Toni la testa. El sforza a
Sindy da til bütschar, tilla bütta sül let, els han ün cumbat. Ma Paris, la chapitala da l’amur, tils
reconcilia.
Els passaintan ün bellezza di e cuntinuan lur viadi tuot allegers. Rivats la saira a Le Havre sezzan
els a la riva dal mar. Guardan il tramunt dal sulai. Toni es furtünà, el vezza il mar per la prüma jada
in sia vita ed el es rivà fin a quia cun Sindy, la duonna da seis sömmis. Uossa es eir el pront da
laschar inavo tuot e da cumanzar üna nouva vita cun Sindy a Londra.
Quella not s’insömgia Toni darcheu da Sindy. In seis sömmi es ella üna princessa cun fatscha
seriusa e lefs severs, chi fa vaschias da savun. Cur ch’el sdruaglia, es Sindy sparida. Ella til ha
bandunà.
1
Las figüras:
Sindy
Sindy craja d’avair be duos pussibilitads in sia vita:
o star in patria e schmarschir da la frustraziun o lura laschar inavo ils cumünets strets dal Grischun
ed ir a Londra per dvantar üna chantadura renomnada. Ella sa precis che e chi, ch’ella voul esser.
Ella es però eir naiva ed ha adüna alch d’ün uffant innoziaint.
Sindy nu voul esser là, ingio ch’ella es e perquai ch’ella nun es amo là, ingio ch’ella voul esser,
discuorra ella almain la lingua dal lö bramà. Sindy discuorra ün inglais s-chars. Ella til ha imprais
in secundara e til ha practichà be culs pacs giasts da lingua inglaisa in l’usteria da seis bap.
Sindy es in tschercha da libertà e d’identità. Toni es seis mez da rivar a quel böt. Toni ha ün auto e
tilla maina gratuit fin a Londra. Ma bler plü important es, ch’el mai nu metta in dumonda il sömmi
da Sindy. El craja in ella.
A la fin da lur viadi bada Sindy però, ch’ella sto cuntinuar suletta per dvantar quella ch’ella voul
propi esser. Uschea bandun’la eir a Toni, l’ultima colliaziun cun seis passà e sia patria.
Toni
Toni es ün garaschist solitari. El lavura cun gust in sia garascha e s’insömgia jent dis l’inlunga da
fabrichar ün ressort da vacanzas our da la baracca jertada da seis bazegner. Propi müdar alch in sia
vita nu voul Toni. Be: üna femna vessa’l jent. Uschea profita’l da mincha occasiun per survgnir üna.
Sindy til plascha fich e da spür vulair üna duonna è’l pront da far tuot. Cur ch’el tilla imprometta da
tilla manar a Londra, gnanca nu stübgia’l sün che ch’el as lascha vairamaing aint.
Adonta cha Sindy pretenda d’esser chantadura, es
Toni quel chi maina musica i’l film. El suna melodica. Tras quels tuns exprima’l tuot quai ch’el mai
nu dschess cun pleds, perquai cha quai nu’s discha, impustüt na sco hom sursilvan. Sias chanzuns
quintan d’üna brama dad alch ch’el nu cugnuoscha amo. L’inscunter cun Sindy til regala ils
purtrets ed ils pleds per quella brama.
A la fin dal film es Toni darcheu sulet. Ma el ha viss Paris ed el es stat al mar.
2
Möd da sviluppar il film:
L’idea pel film Sindy es naschüda sün viadi. Viagiond eschan no (Jürg Gautschi e Flurina Badel)
rivats adüna darcheu pro lös chi’ns han inspirats per üna istorgia o üna scena per duos figüras. Cun
ir cul auto aint ed oura da la Val Lumnezia vaina constattà, chi dà da quels settings eir in nossa
vicinanza.
Punct da partenza per sviluppar il film Sindy sun in quel sen adüna singuls lös specials cun
potenzial dramatic o/ed estetic.
Uschè ün lö es la garascha a Peiden-Bad. Cun quel lö es naschüda la figüra Toni, il garaschist.
La seguonda figüra, Sindy, s’ha datta our da la via tanter ils settings chattads. Seis motor es da
rivar a Londra per accumplir seis sömmi. Cun ir sia via collia ella ils differents lös.
Sper il viadi es l’amur ün tema principal dal film o dit plü precis ün aspet central da l’amur: il sot
permanent tanter star ed ir davent. Quist principi vala per las figüras sco persunas singulas precis
uschea sco pel pêr Toni e Sindy.
Id es ün etern s’approsmar e s’allontanar da sai svessa, da l’oter, dal muond. Las figüras e lur
relaziun sun adüna in movimaint. Movimaints sincrons, parallels ed invers. Quai pissera per
tensiun, collisiun, dispitta, cuolp da deliberaziun, abüs, refüs, ferridas, reconciliaziun, attracziun,
uniun e cler pel settavel tschêl.
Il scenari pel film Sindy s’ha sviluppà dürant la prüma fasa da quist proget, il mais gün 2009. In
quella vaina sviluppà las duos figüras, la dinamica tanter ellas, elet ils lös in Val Lumnezia e skizzà
l’arch dramaturgic da l’istorgia dal cumanzamaint fin la fin. In quella prüma fasa dal proget vaina
eir ponderà co e cun che lingua da camera cha no lain realisar Sindy e filmà ün pêr scenas da
prouva.
möd da realisar il film
No ans vain deciss per üna camera teatrala. Tableaux vivants. Camera fixa, tuot las scenas filmadas
in ün take. La profuondità dal purtret as dà cun inscenar las figüras i’l setting, cur ch’ellas
s’avischinan ed as distanzieschan da la camera. Cun quella lingua da camera lavura per exaimpel il
redschissur svedais Roy Andersson i’ls films You, the living (2007) e Songs from the second floor
(2001).
Il scenari consista da l’arch dramaturgic da l’intera istorgia. Las acziuns precisas ed il text definitiv
per las singulas scenas naschan i’l mumaint da la filmada al lö. Cur cha no vain chattà ün setting
„perfet“ vegn defini il focus da la scena ed ils motivs d’agir da las figüras chi dirigian la dramaturgia
da quella scena. Quai sun las premissas da las figüras per improvisar e sviluppar la scena in dettagl,
culs movimaints e dialogs precis.
Pür lura vegn la scena filmada. Davo visiunada ed eventualmaing müdada, scurznida o prolungada,
optimada. L’idea es da trar a nüz la forza da quel mumaint in quel lö cun tuot las circumstanzas
preschaintas. Quel möd da sviluppar las scenas vaina examinà cun success dürant la filmada da
prouva in gün 2009.
Sindy es ün roadmovie. Tuot ils lös da l’istorgia sun sül o sper il stradun. Il viadi da Sindy e Toni
dvainta metafra per la tschercha da l’identità dals protagonists.
Sco pro’ls roadmovies classics giouva la musica eir i’l film Sindy üna rolla importanta. Motiv
musical principal es la melodia „La Mer„ da Charles Trénet, chi cumpara in differents
arrandschamaints per exaimpel cun la trocla da musica o cun la melodica da Toni.
www.farfarproject.ch
3