Radunanza generala 2014
Venderdi, 5 december a las 19.00 uras
a l`Hotel a la Staziun, Zernez
Preschaints : 17 commembras e commembers
S-chüsats : Arno Cortesi, Reto Lehner, Ferdi e Nico Salutt, Corsin Rauch, Christa Rauch, Thomas e Severin
Dietrich, Patricia Wieser
Tractandas: 1. Tscherna scrutinadur
2. Approvaziun dal protocol, puplichà www.cdssarsura.ch
3. Rapport dal president
4. Rapport OG nordic e snowboard
5. Elecziuns: schef da meterial, manader OG nordic
6. Rendaquint e rapport da las revisuras
7. Program da l’on 2014/2015
8. Varia e communicaziuns
Nos president Guolf Denoth driva la sezzüda a las 19.05 uras.
1.Tscherna scrutinadur
Sco scrutinadur vaina tschernü a Reto Rauch.
2. Approvaziun dal protocol, puplichà www.cdssarsura.ch
Il protocol da las radunanza generala dals 29 november 2013 d’eira publichà sün nossa pagina d’internet e vain
approvà unanimamaing.
3.Rapport dal president
Pür fich tard, tanter Nadal e Büman, ha cumanzà propcha la stagiun d’inviern. Davo üna pitschna naivina in
october es stat fin la fin da l’on paca naiv. Davo ha quai però naivü e la stagiun d’inviern d’eira salvada.
Cumainzà la stagiun da cuorsas organisadas da lub da skis vaina als 8 schner cun 79 curridurs pro’l passlung da
not. Als 16 favrer la 46avla ediziun da la coursa populara da Zernez cun 253 curridurs. Als 22 favrer la cuorsa
Maloja-Zernez cun 228 curridurs. Il ‘’Zernezer’’ e’l ‘’Maloja-Zernez’’ pudaina bod dir, chi va daspö ons in sü. La
partezipaziun es statta pro tuottas duos cuorsas ün record.
Als 2 els 9 marz han gnü lö ils Maratons, ingiua cha nos club organisescha üna part da l’ustaria e metta a
disposiziun voluntaris. L’ora es statta eir quist on dret buna, uschè cha nossa cassa ha darcheu fat ün bun
guadogn. Eir da la cassa dal Maraton Engiadinais vaina darcheu tschüf ils Fr. 2000.00 per nossa cassa dal club.
Pro la festa da 100 ons Parc Naziunal Svizer, vaina cun 14 commembers sco voluntaris, eir fat üna buna lavur.
Il club da Zernez ha divers giuvenils nordic e boarders chi concuorran suot il nom Sarsura Zernez. Ad els
sinceras gratulaziuns per lur prestaziuns sportivas. Displaschaivelmaing es pel mumaint l’JO alpin sainza
curridurs.
Guolf ingrazcha als collegas da suprastanza ed als agüdonts da nos club per lur ingaschamaint dürant tuot l’on
ed a tuot ils sponsurs chi dan sustegn a nos club. La tschaina d’ingrazchamaint faina davo la radunanza.
4.Rapport OG nordic e snowboard
Walter Abderhalden, schef OG nordic
D’utuon s’han annunzchats 26 partecipants pell’OG da passlung. Walter ha cumanzà in october cul trenamaint
in sala e sur inviern hana fat 23 trenamints sülla naiv. Tuot in tuot han els gnü 34 trenamaints, bod adüna cun
duos manaders. Sur tuot l’inviern han els gnü 23 dis cun cuorsas inclusiv viadis. Pro las Maestranzas
Grischunaisas es Giuliana Werro gnüda champiuna, Nico Salutt quart e Damian Toutsch 8avel da la categoria
U16. Chrisitan Toutsch es gnü 6avel da la categoria U14. Implü es Nico gün 7avel e Giuliana seguonda da lur
categorias pro las Maestranzas Svizras da passlung. Sper oters plüs buns resultats es Nico gnü pro las
Maestranzas Svizras da biathlon champiun da la categoria U16.
Als 23 avuost han els fat la tura da finischiun cun 14 partecipants e 5 manaders. La saira sun els its a mangiar
pizza e han surdat ils premis da kilometers e guardà il film da la stagiun, sco chi’d es gnü tradiziun ils ultims ons.
Davo divers ons sco manader da l’OG alpin e trais ons sco mandader da l’OG nordic dal club da skis Sarsura
Zernez ha Walter decis d’as retrar da sia carica. El es persvas d’avair chattà cun Mattias Toutsch e Reto Lehner
perits chi mainan darcheu ün zich schlantsch ill’OG nordic. Walter ingrazcha al club da skis pel sustegn ed a tuot
ils manaders e genituors per lur ingaschamaint.
Guolf ingrazcha a Walter per sia lavur prestada dürant tuot ils ons. Il regal surdaina plü tard.
Heidi Haller, pe‘l snowboard
La stagiun d’inviern 2013/2014 es per Ursina e Christian cun diversas plazzas da podest aint illa coppa mundiala
ida a fin. La qualificaziun pels gös olympics a Sotchi vaivan els ragiunt fingià la stagiun avant e dürant il gös suna
rivats aint il final ed as classifichà suot ils 12 meglders Halfpipe Snowboarders.
Ursina ha quist on dat sü sia carriera aint il ‘’Spitzensport’’ ed as focussescha sün seis stüdi a l’Università da
Turich, ch’ella voul finir dal 2015. Però dal tuot our da la szena da profi nu’s retira Ursina. Ella s’ingascha invant
per la promoziun d’atlets giuvens e projects da films sun planisats.
Il film da 4 minuts ‘’memoires memoires’’, ha Christian realisà la fin da las stagiun 2013 sül Corvatsch. Quist film
guardaina davo la radunanza. Christian s’allegra ed es pront per la prossma stagiun d’inviern.
5.Elecziuns: schef da material e manader OG nordic
Pervi cha nus nu vain amo chattà qualchün chi’d es pront da surtour la carica dal schef da material, es Irène
pronta da far amo quista stagiun d’inviern.
Sco manader OG nordic vain elett Mattias Toutsch unanimamaing.
6.Rendaquint e rapport da las revisuras
Claudia Duschletta preschainta il rendaquint per l’on 2013/2014 in detagl. Nus vain fat ün guadogn da
Fr. 11 339.75. La facultà dal club pels 31.10.2014 s’ammunta a Fr. 98 817.49
Las revisuras Christa Rauch e Heidi Haller chattan cha la contabiltà saja manada in bun uorden e giavüschan da
dar dis-charg a la chaschiera. Il rendaquint vain acceptà unanimamaing.
7.Program da l’on 2014/2014
07.01.2015
Passlung da not Zernez
15.02.2015
Passlung popular da Zernez
21.02.2015
Passlung Maloja – Zernez in combinaziun cun la cuorsa dals funcziunaris dals
maratons Engiadinais
01./08.03.2015 güdar pro’ls maratons
Claudio Duschletta preschainta cuort la cuorsa ‘’La Diagonela’’ chi vain manada tras per la seguonda vouta als
17 schner. L’on passà han els gnü 150 partecipants e fan quist on quint cun var 800 fin 1000. La cuorsa va da
Zuoz sü San Murezzan e tuorna darcheu sur il Lai da Staz aint a Puntraschigna e giò Zuoz inua cha’l böt sarrà
immez cumün. Quista cuorsa vain manada tras i’l stil classic ed in duos distanzas, la lunga cun 65 km e la
pachifica cun 35 km. Il comitè d’organisaziun es amo in tschercha da voluntaris per quist grond evenimaint e
füss cuntaint, scha commembers da nos club füssan eir pronts da gnir a güdar. Nus laschain ir ün email per
infuormaziun a nos commembers.
8.Varia e communicaziuns
-Severin Dietrich, Laura Caduff, Jogscha Abderhalden, Fabiana Wieser e Natalia Müller s‘han ingrazchats in scrit
pel sustegn finanzial dal club.
-Jachen Jon Bass es nouv schef da loipas in Engiadin’Ota. Els sun vi dad ün project per drizzar aint las maschinas
cun GPS. Uschè chi füss pussibel da verer ingiua cha la maschina as rechatta. Quista spüerta füss impustüt
interessanta per passlunghists dad oters pajas. Els pudessan s’infuormar uschè, sur dal stadi da naiv e loipas in
Engiadina.
-Claudio Duschletta ans invida als 20 december a la festa d’avertüra da la nouva s-chabellera d’Albanas a Zuoz.
Implü ingrazcha’l per la buna collavuraziun pro’l Frauenlauf e’l Maraton.
Claudio infuormescha sur d’ün pêr müdamaints pro’l Frauenlauf e’l Maraton:
- Respunsabel pel böt a S-chanf es uossa Thomas Fent
- La Pasta-Party daja amo, ma COOP nu tocca plü pro’ls sponsurs.
- Sponsur Rivella vain rimplazzà dad Isostar
- Biera da Tschlin es nouv sponsur, ed i po gnir vendü quels dis be la biera da Tschlin ed ingüna Calanda.
Las bavrondas dutschas e las tendas d’ustaria vegnan però amo adüna tut da la Calanda.
Claudio fa attent a Flavio e Guolf, chi sun respunsabels per l’ustaria, da tour sü contact cun Reto Rauch
pervi da la biera da Tschlin.
Claudio ingrazcha a tuot ils voluntaris e giavüscha al club da skis bun success.
-Reto Rauch fa la dumonda ingiua cha’ls bachers da las cuorsas dal club chi d’eiran aint i’l Hotel a la Staziun sun
rivats. Quels sun aint in nos magazin in scoula, pervi cha la chaista ingiua chi d’eiran aint, es gnüda tut davent
ed ün oter lö adattà nun es gnü chattà.
-Flavio manaja cha’l cabel da l’inglüminaziun da la loipa da not sto gnir müdà oura. L’idea füss da müdar sün
LED. Quist sto però amo gnir scleri inandret e nun es pel mumaint amo actual.
Implü ha Flavio tut sü contact cun Irma Tognini per organisar prossem on ün viadi cul club da skis. Propostas
vegnan lura cur chi’d es uschè inavant.
Nos president sera la sezzüda a las 19.55 uras e giavüscha a tuots üna bella saira.
Zernez, ils 07.12.2014
L’actuara: Jolanda Gasperin