Istituto Comprensivo di Buja
Scuola Primaria di TREPPO GRANDE
Calendari
2015
Zenâr 2015
Al jere une volte…un grant flum e su lis rivis di chest flum a vivevin dôs fameis di contadins, une
su la rive drete e chê altre su la rive çampe. Inte aghe a svuacaravin lis rassis e i cesens,
contents di tornâ a viodi il soreli ogni buinore e di saludâlu ogni sere sul amont. Ogni matine lis
rassis e i cesens a cjapavin soreli sul ôr a çampe e, al incontrari, sot sere si tiravin sul ôr a
drete.
Fevrâr 2015
I doi contadins, invezit, a jerin invidiôs un dal altri. Chel che al jere a stâ di ca al varès volût sei
di là, e al incontrari, chel che al stave di là al varès dât cuissà ce par sei di ca. Cuant che, di
buinore, i doi contadins a aravin i lôr cjamps, un al bruntulave parcè che il soreli al sflandorave
sul teren di chel dong je lassant tal ombrene il so.
Març 2015
E, sul amont, cuant che a sclapavin i lens, al bruntulave chel altri, parcè che su la cjase dal vicin
e traeve ancjemò l’ultime spere di soreli, intant che la sô cjase si cjatave a sei te ombrene.
Avrîl 2015
Lis feminis dai contadins, po, a jerin ancjemò plui malcontentis: une, ogni buinore; chê altre,
ogni sere. Une matine, intant che dutis dôs a metevin a suiâ la blancjarie, chê che e stave su la
rive drete e butà une peraulate de bande de rive çampe.E chê stesse sere, biel tirant dong je la
blancjarie, chê che e stave su la rive çampe e tornà la sô vilanade de bande de rive diestre.
Mai 2015
Chest fat al sustà i oms. A scomençarin a tirâsi i clapons cun chê di svindicâsi.
Par altri, stant che il flum al jere masse larc, ducj i clapons a colarin inte aghe.
Jugn 2015
Nome sul misdì, cuant che il soreli al sflandorave tal mieç dal cîl, e jere par dut une grande pâs
e… cidinôr. Ducj i nemai, ancje il cjan, si metevin inte ombrene, intant che i oms e lis lôr feminis a
ronfavin sot di un miluçâr: chei culì su la rive drete e chei altris su la çampe.
Lui 2015
Invezit i doi fîs dai contadins si sentavin dong je de aghe e si stufavin. Un al cjalave de bande de
rive çampe, chel altri de bande de rive diestre.
“Se o fos une rasse!” al pensave il prin.
“Se o fos un cesen!” al murmuiave chel altri.
Avost 2015
Ma une biele zornade la aghe dal flum e scomençâ a sbassâsi di maniere che i doi fruts a
viodèrin a cucâ ca e là claps grues. Sun chei si podeve saltâ cence pericul… Si cjatarin cussì
tal mieç dal flum, contentons di sei insieme e di podê tabaiâ.
Setembar 2015
Si sentarin sul clap plui grant e par un pôc a restarin a cjalâ lis rassis e i cesens. Po dopo a
scomençarin a fevelâsi e a contâsi storiis: storiis de rive çampe, storiis de rive drete.
Otubar 2015
Cussì i doi fruts a faserin dal moment amicizie, tant che ogni dì, cuant che ducj a durmivin, si
cjatavin tal mieç dal flum saltant di un clap a di chel altri. I lôr g jenitôrs si fasevin di maravee
che i fruts, dut di un bot, a savessin tantis robis che nancje lôr no vevin mai sintudis.
Novembar 2015
Ma une brute dì, dopo che al veve plot a dilunc, i doi fruts a deventarin suturnos, no contarin plui
storiis, no zuarin e no cjantarin plui. Difat la aghe dal flum e jere di gnûf cressude tant di somerzi
lis pieris e di fâ discomparî il puint dai fruts.
Dicembar 2015
Nome alore i g jenitôrs a scuvierzerin il segret de g jonde dai lôr fruts e a scomençarin a pensâi
sore. E dopo pensât un biel pôc… a deciderin di fâ su, cul jutori dai fruts, un puint cui claps dal
flum. Un puint cetant biel, a volt perfet tant che l’arc di San Marc che il soreli al piture tal cîl
dopo dal burlaç.