Vischnaunca Tujetsch
Gemeinde Tujetsch
Messadi
per la radunonza da vischnaunca
dils 17 da december 2010, allas 20.15 uras,
ella halla da gimnastica dalla casa da scola a Sedrun
Tractandas:
1. Avertura
2. Approbaziun dil protocol dils 23-04-2010
3. Preventiv 2011 (mira messadi separat)
a) Vischnaunca da Tujetsch
b) Bogn Sedrun
c) Tgèsa s. Vigeli
d) Fixar il pei da taglia per igl onn 2011
e) Fixar il pei da taglia sin schischom per igl onn 2011
4. Lag Claus Surrein – damonda da credit
5. Revisiun lescha da votaziuns ed elecziuns
6. Honoraziun dils collaboraturs che festiveschan in giubileum da
survetsch ni che van en pensiun
7. Orientaziuns
8. Varia
Messadi tier tractanda nr. 4
Lag Claus Surrein – damonda da credit
1. Introducziun
Ils 3 da mars 2010 ha il cussegl da vischnaunca priu ina decisiun da principi da persequitar
vinavon la realisaziun d’in lag a Claus Surrein. Sinaquei ei vegniu formau ina gruppa da lavur
per elavurar la basa per saver prender decisiuns.
Ils 27 d’october 2010 ha la suprastonza communala suttamess al cussegl da vischnaunca la
proposta da conceder in credit da frs. 1'100'000.00 per la realisaziun d’in lag (incl. baghetg
da menaschi) a Claus Surrein. Il cussegl da vischnaunca ha la finala concediu in credit da
frs. 750'000.00 e decidiu dad il mument desister sin l’erecziun d’in baghetg da menaschi (installaziuns sanitaras, kiosk).
Entochen sil pli tard la primavera 2011 ston tuttas decisiuns en connex cul project esser sin
meisa, q.v.d. la decisiun entras la radunonza da vischnaunca (credit), la votaziun all’urna
(midada da zona) sco era l’approbaziun entras la Regenza, per saver senezegiar dallas prestaziuns dall’ATG.
2. Project
2.1 Descripziun
Il project preveda l’erecziun d’in lag natural cun ina grondezia da 3'200 m 2 a Claus Surrein.
Igl areal da scher munta a 2'800 m2. Entuorn il lag meina ina via da spassegiar da 300 meters lunghezia. Medemamein eis ei previu ina plazza da termagliar. Plinavon eis ei previu da
cumplettar la purschida cun in baghetg che cuntegn las installaziuns sanitaras ed in kiosk. A
disposiziun stat era il necessari diember da parcadis (visualisaziun mira aschunta nr. 1).
2.2 Cuosts d’investiziun
Tier la presentaziun dil project al cussegl da vischnaunca eran ils cuosts d’investiziun calculai
cun frs. 1'100'000.00:
frs. 750'000.00 per il lag ed il contuorn
frs. 350'000.00 per il baghetg (installaziuns sanitaras, kiosk) e la colligiaziun
frs. 1'100’00.00 total
El cussegl da vischnaunca han surtut ils cuosts da frs. 350'000.00 per il baghetg da menaschi e la colligiaziun da tal caschunau per discussiuns. La finala ha il cussegl da vischnaunca
concediu in credit da frs. 750'000.00 e decidiu da desister sin in baghetg da menaschi. La
suprastonza communala ei vinavon dil meini ch’ei basegna ina certa infrastructura (installaziuns sanitaras, kiosk) ed ha sin fundament dalla discussiun el cussegl da vischnaunca
schau elavurar in project concret per in baghetg da menaschi che cuntegn mo il pli necessari
(mira aschunta nr. 2). Igl ei semussau ch’ei basegna la summa da frs. 350'000.00 per ereger
in baghetg da menaschi e colligiar tal. Ils uffecis cantunals cusseglian dad ereger in tal object. La tualetta existenta el pumpadi dalla serenera po buca cuntentar ils basegns futurs, era
sch’ella vegness cumplettada.
2
Sco opziun exista la pusseivladad dad amplificar la plazza da grillar a Clis cun ina senda da
divertiment ed in curtin da reiver. Ils cuosts persuenter muntan a frs. 91'000.00. Quella opziun duei denton buca vegnir realisada il mument.
El cass ch’igl ei buca pusseivel da realisar il lag il medem mument sco las lavurs dall’ATG vid
la deponia succedan, ston ins quintar cun cuosts supplementars da rodund frs. 200'000.00.
2.3 Cuosts da menaschi
Il plan da menaschi quenta cun in deficit annual da frs. 25'000.00. Viter vegnan las amortisaziuns (10%) ed ils tscheins interns (1.5%).
3. Midada da zona
Per saver realisar in lag a Claus Surrein basegna ei ina midada da zona. Oz sesanflan las
parcellas pertuccadas ella zona d’agricultura. Per saver realisar il project sto vegnir creau ina
zona da divertiment. Il cussegl da vischnaunca ha da principi approbau la midada da zona,
sto denton aunc decider definitivamein en caussa el cass che la radunonza da vischnaunca
conceda il credit per la realisaziun dil lag. La midada da zona basegna la finala ina votaziun
all’urna.
4. Posiziun dalla suprastonza communala
L’idea d’ereger in lag schai gia daditg ell’aria. En connex cun la NEAT sedat ussa la caschun
da realisar in project a Claus Surrein. In lag munta in’ulteriura purschida da stad en nossa
val. Il liug a Claus Surrein ei ord vesta dalla topografia, dil clima e dalla accessibladad mo era
sin fundament dil fatg ch’ei ha gia ina plazza da grillar leu, fetg adattaus per in tal project. Il
liug ha era pontenzial da vegnir sviluppaus vinavon sco zona da recreaziun locala (opziun
parc da reiver etc.). Damai ch’in lag natural ei fetg dependents dall’aura amplifichescha el
idealmein la purschida dil Bogn Sedrun. La suprastonza communala ha per quei motiv era
buca l’intenziun da frenar in svilup dil Bogn Sedrun muort l’erecziun d’in lag natural.
La damonda schebein ei fuss buca pli prudent da realisar la plazza da campar ed il lag el
medem liug ei giustificada. Per quei motiv ei era vegniu sclariu tiel cantun schebein ei fuss
pusseivel da realisar ina plazza da campar a Claus Surrein. Tenor il cantun ei l’erecziun d’in
campadi ord vesta dalla cuntrada problematica el vest, sin las parcellas 96 e 97 a Claus Surrein. Sin la parcella egl ost (105) vegn in campadi buca en damonda muort il schurmetg digl
ambient.
Giu Milar fuss l’erecziun d’in laghet pusseivla dado la zona da campar existenta, si encunter
la via (parcellas 2367 e 2369). Ils possessurs dil terren fussen da principi buca encunter da
metter a disposiziun il terren. La suprastonza communala ei tonaton dil meini da desister sin
la realisaziun d’in laghet Giu Milar. Il liug a Claus Surrein ei ord ils suranumnai motivs pli attractivs.
La radunonza da vischnaunca ha ussa la caschun da decider denter duas variantas.
a) Proposta cussegl da vischnaunca: Conceder in credit da frs. 750'000.00 per l’erecziun d’in
lag a Claus Surrein cun desister sin in baghetg da menaschi.
b) Proposta suprastonza communala: Conceder in credit da frs. 1'100’000.00 per l’erecziun
d’in lag a Claus Surrein (incl. baghetg da menaschi).
3
Proposta
Sin fundament dallas ponderaziuns suramenziunadas
propona
la suprastonza communala
da conceder in credit da frs. 1’100’000.00 per l’erecziun d’in lag a Claus Surrein (incl.
baghetg da menaschi).
Suprastonza communala Tujetsch
President communal:
Pancrazi Berther
Actuar:
Lucas Collenberg
Aschuntas:
1. Visualisaziun lag
2. Visualisaziun baghetg da menaschi
4
Aschunta nr. 1: Visualisaziun lag
Aschunta nr. 2: Visualisaziun baghetg da menaschi
5
Aschunta nr. 3: Visualisaziun baghetg da menaschi
6
Messadi tier tractanda nr. 5
Revisiun lescha da votaziuns ed elecziuns
1. Introducziun
En sia seduta dils 20 da schaner 2010 ha il cussegl da vischnaunca elegiu ina cumissiun per
la revisiun dalla lescha da votaziuns ed elecziuns. La cumissiun ha elavurau ina proposta
permauns dalla suprastonza communala.
Ils 14 da zercladur 2010 ha la suprastonza communala tractau la fatschenta ed approbau
tala permauns dil cussegl da vischnaunca. Ils 11 d’uost 2010 ha il cussegl da vischnaunca
approbau la fatschenta permauns dalla radunonza da vischnaunca.
La suprastonza communala ed il cussegl da vischnaunca proponan las suandontas adattaziuns:
2. Midadas proponidas tier la lescha da votaziuns ed elecziuns
Tetel
La lescha senumna niev „Lescha davart ils dretgs politics“.
Art. 3 (niev art. 11)
Niev ei sulettamein reglau ella lescha che la suprastonza communala fixescha ils temps
dall’avertura ed ils loghens nua che las urnas vegnan pustadas. La publicaziun succeda mintgamai el fegl ufficial.
Ils cedels da votar ston esser sil pli tard il di dalla votaziun (buca la dumengia endamaun),
allas 11.00 uras, en casa communala.
Art. 6 (niev art. 9)
Il biro electoral secumpona per regla da treis commembers (buca pli 5).
Art. 11 (niev art. 28, 29 e 30)
Niev art. 28:
Tier vuschs ulivas tier elecziuns decida la sort entras il biro electoral. Quei era entochen oz
buca reglau.
Niev art. 29:
Il secund scrutini ei d’annunziar sil pli tard siat dis avon ch’el ha liug egl organ da publicaziun
ufficial. Quei era entochen oz buca reglau.
Niev art. 30:
Niev ei ina elecziun tgeua pusseivla tier il secund scrutini, aschinavon ch’ei vegn buca annunziau dapli candidats che posts libers. La suprastonza communala regla la procedura.
7
Art. 12 (niev art. 19)
Niev vegnan ils resultats dallas votaziuns publicai egl organ da publicaziun ufficial, avon casa
communala e sin la pagina d’internet dalla vischnaunca.
Art. 14 (niev art. 31)
Refusaziuns dall’elecziun ein da communicar all’administraziun communala (buca al president communal).
Art. 16 (niev art. 24)
Las autoritads communalas vegnan mintgamai elegidas el decuors dils meins avrel e matg
(adattau alla constituziun communala).
Art. 17 cefra 2 (niev art. 23)
Las propostas per las elecziuns communalas ein d’inoltrar sil termin fixau el fegl ufficial (strihau: sil pli tard 15 dis avon la votaziun all’urna).
Plinavon ei vegniu strihau ch’in votant astga separticipar mo ad ina gruppa che fa propostas
per las elecziuns communalas.
Proposta
Sin fundament dallas ponderaziuns suramenziunadas
proponan
la suprastonza communala ed il cussegl da vischnaunca
d’approbar la revisiun parziala dalla lescha da votaziuns ed elecziuns.
Suprastonza communala Tujetsch
President communal:
Pancrazi Berther
Actuar:
Lucas Collenberg
8
Lescha davart ils dretgs politics
dalla vischnaunca da Tujetsch
9
Cuntegn
I.
Determinaziuns generalas
Art. 1
Art. 2
Camp d’applicaziun
Dretg subsidiar
A. Dretg da votar e d‘eleger
Art. 3
Register electoral
B. Organisaziun dallas votaziuns ed elecziuns
Art.
Art.
Art.
Art.
Art.
Art.
4
5
6
7
8
9
Noziun
Termin da votaziuns
Publicaziun
Documentaziun
Spediziun
Biro electoral
C. Diever dil dretg da votar
Art. 10
Art. 11
Art. 12
Art. 13
Principi
Avertura dallas urnas e survigilonza
Levgiaments dalla votaziun
Votaziun ils dis precedents
D. Eruir ils resultats dallas votaziuns ed elecziuns
Art. 14
Art. 15
Art. 16
Art. 17
Art. 18
Art. 19
Art. 20
Art. 21
Votaziun sin vischnaunca
Dumbraziun
Cedels da votar nunvaleivels
Valeivladad dils cedels da votar tier elecziuns
Protocol
Publicaziun dils resultats
Recuors
Verificaziun
II. Determinaziuns executorias
A. Elecziuns
Art. 22
Art. 23
Art. 24
Art. 25
Art. 26
Art. 27
Art. 28
Art. 29
Art. 30
Art. 31
Demissiuns
Propostas
Temps d‘elecziun
Preparaziun dallas gliestas
Publicaziun e distribuziun
Remplazzament ed elecziuns cumplementaras
Emprem scrutini/Pli absolut
Secund scrutini
Elecziun tgeua
Acceptaziun dall‘elecziun
10
B. Votaziuns
Art. 32
Principis
III. Recuors
Art. 33
Dretg da recuors
IV. Determinaziuns finalas
Art. 34
Entrada en vigur
11
I. Determinaziuns generalas
Art. 1
Camp
d‘applicaziun
Questa lescha vala per las votaziuns ed elecziuns communalas sco
era per l'organisaziun dallas votaziuns ed elecziuns cantunalas e federalas, aschinavon ch'ei exista persuenter buca prescripziuns cantunalas e federalas ligiontas.
Las indicaziuns davart las persunas, las funcziuns e las professiuns
serefereschan ad omisduas schlatteinas.
Art. 2
Dretg subsidiar
Aschinavon che questa lescha cuntegn buca prescripziuns divergentas, valan las prescripziuns cantunalas davart il diever dils dretgs politics conform al senn.
A. Dretg da votar e d’eleger
Art. 3
Register electoral
Vischinas e vischins che han il dretg da votar fuorman la cuminonza
dils votants.
La vischnaunca meina in register dils votants domiciliai en vischnaunca. Inscripziuns e cassaziuns vegnan fatgas automaticamein entras la
controlla da habitonts. La tgira da quei register succeda a norma dallas prescripziuns vertentas dil cantun. Scadin votant sa prender investa da quel da tut temps.
B. Organisaziun dallas votaziuns ed elecziuns
Art. 4
Noziun
Votaziuns el senn da questa lescha ein tuttas votaziuns dil pievel, inclusiv elecziuns.
Art. 5
Termin da
votaziuns
Las votaziuns han per regla liug la dumengia.
Las votaziuns duein sche pusseivel haver liug el medem mument sco
las votaziuns federalas e cantunalas.
Tier elecziuns ha in secund scrutini per regla liug quater jamnas suenter l’emprema elecziun.
12
Art. 6
Publicaziun
Votaziuns ein d’annunziar sil pli tard 15 dis avon ch’ellas han liug egl
organ da publicaziun ufficial.
Art. 7
Documentaziun
La documentaziun ufficiala cuntegn la legitimaziun da votar, la cuviarta da votaziun, il messadi cun eventualas annexas sco era ils cedels
da votar.
Il messadi sto cuntener las propostas per mauns dalla cuminonza dils
votants ed ina informaziun objectiva dalla fatschenta.
Art. 8
Spediziun
Ils votants ston obtener la documentaziun sil pli tard 15 dis avon il di
da votaziun.
Art. 9
Biro electoral
La suprastonza communala elegia in biro electoral per regla da treis
commembers sco era ils necessaris gidonters e nominescha il president ed igl actuar dil biro. Ella sa era funcziunar sezza sco biro electoral, excepiu tier las elecziuns dalla suprastonza communala.
Il biro electoral constatescha il resultat dalla votaziun. El eruescha il
total dils votants, dils cedels entrai, dils cedels vits e nunvaleivels e
tier mintga votaziun davart fatschentas il total dallas vuschs affirmativas e dallas vuschs negativas. Tier elecziuns eruescha el il total dallas
vuschs valeivlas dadas per mintga candidat.
Il biro electoral repassa ils cedels da votar e decida davart la valeivladad da cedels da votar e da vuschs.
C. Diever dil dretg da votar
Art. 10
Principi
Ils votants ston emplenir ora il cedel da votar persunalmein ed a
maun.
Ils votants san votar all'urna ni per correspondenza.
Il votar per correspondenza sa succeder sil pli baul treis jamnas avon
la dumengia da votaziun.
La suprastonza communala sa possibilitar cumpleinamein ni parzialmein la votaziun sin via electronica, aschinavon che las cundiziuns
necessarias per registrar tut las vuschs sco era per garantir il secret
13
da votaziun e per impedir surdiever ein ademplidas.
La suprastonza communala regla las formalitads davart las modalitads
dalla votaziun.
Substituziun ei mo lubida eifer las normas dil dretg cantunal.
Art. 11
Avertura dallas
urnas e survigilonza
La suprastonza communala fixescha il temps dall'avertura ed ils loghens nua che las urnas vegnan pustadas.
L’exposiziun dall’urna vegn mintgamai publicada egl organ da publicaziun ufficial.
Scadina urna sto vegnir survigilada da silmeins duas persunas, nominadas dalla suprastonza communala.
lls cedels da votar ed eleger ston esser sil pli tard il di dalla votaziun,
allas 11.00 uras, en casa communala.
Art. 12
Levgiaments
dalla votaziun
A malsauns e mendus levgescha la suprastonza communala en concordanza cul dretg cantunal e federal igl ir a votar.
Art. 13
Votaziun ils dis
precedents
La votaziun ils dis che precedan al di da votaziun sedrezza tenor il
dretg federal e cantunal.
D. Eruir ils resultats dallas votaziuns ed elecziuns
Art. 14
Votaziun sin
vischnaunca
Las votaziuns sin vischnaunca vegnan per ordinari fatgas cun
maunpli.
Tier votaziuns cun maunpli ei la pluralitad da quels che voteschan decisiva. Ein las vuschs ulivas ei la damonda renviada.
Ina quarta dils votants presents sa pretender scrutini. Tier votaziuns
cun scrutini decida il pli absolut dallas vuschs valeivlas. Ein las vuschs
ulivas ei la damonda renviada.
Art. 15
Dumbraziun
La dumbraziun dils cedels da votar ha da succeder ladinamein suenter che las urnas vegnan serradas.
14
Art. 16
Cedels da votar
nunvaleivels
In cedel da votar ei nunvaleivels sch’el:
a) ei buca ufficials;
b) ei buca emplenius ora a maun;
c) cuntegn indicaziuns disfamontas ni che tradeschan il votant.
Ina vusch ei buca valeivla sche:
a) la voluntad dil votant ei buca clara, en special sch’ina indicaziun dil
candidat ei buca legibla ni buca sufficientamein determinabla;
b) ella secloma sin in num d’in candidat, ch’ei gia menziunaus.
Art. 17
Valeivladad dils
cedels da votar
tier elecziuns
Cedels da votar cun pli paucs nums che persunas ch’ein d’eleger ein
valeivels. Medemamein ein cedels da votar valeivels cun pli biars
nums che persunas ch’ein d’eleger. Ils davos nums vegnan denton
strihai dil biro electoral, e quei da giudem ensi e da dretg a seniester.
Art. 18
Protocol
Il biro electoral redegia in protocol davart il resultat da mintga votaziun
ed elecziun. Quel ei da suttascriver dil president e digl actuar.
Art. 19
Publicaziun dils
resultats
Ils resultats dallas votaziuns vegnan publicai egl organ da publicaziun
ufficial, avon casa communala e sin la pagina d’internet dalla
vischnaunca.
Tier elecziuns vegnan ils elegi informai a scret.
Art. 20
Recuors
Enteifer 30 dis suenter la publicaziun ufficiala sa mintga votant contestar il resultat total dalla votaziun communala cun recuors a scret e
motivau cul petitum, che quel vegni declaraus dil tut ni per part nunvaleivels ni rectificaus. Il recuors ei d’inoltrar alla dertgira adminstrativa.
Art. 21
Verificaziun
Ils resultats dallas votaziuns communalas vegnan verificai dalla cumissiun da verificaziun, la quala vegn elegida dil cussegl da
vischnaunca. Il rapport dalla verificaziun vegn communicaus al cussegl da vischnaunca.
15
II. Determinaziuns executorias
A. Elecziuns
Art. 22
Demissiuns
Scadin commember d'ina autoritad communala ni d'ina cumissiun ha
d'inoltrar sia demissiun en scret all'administraziun communala sil termin fixaus egl organ da publicaziun ufficial.
Art. 23
Propostas
1. Per la suprastonza communala, il cussegl da vischnaunca, la cumissiun da gestiun ed il cussegl da scola - cumpriu substituts - san
vischinadis far propostas. Ultra da quei san era gruppas da silmeins 15 votants far nominaziuns da candidats.
Semegliontamein san vischinadis ni gruppas da silmeins 15 votants far propostas per las ulteriuras cumissiuns permanentas.
Autoritad electorala ei tenor art. 35 dalla constituziun communala
ed art. 13 dil regulativ da fatschenta denton il cussegl da
vischnaunca. Quel elegia ord la gliesta da candidats proponi ed
eventualmein cumpletada entras atgnas propostas ils commembers dallas cumissiuns permanentas.
2. Tuttas propostas ein da far sil termin fixaus egl organ da publicaziun ufficial. La suprastonza communala ei obligada da publicar ad
uras ed en temps il termin dalla serrada da propostas.
Las propostas ein da far en scret e d’inoltrar all‘administraziun
communala. Ina proposta astga buca cuntener dapli candidats ch’il
diember da posts libers. Ils candidats ston mintgamai vegnir indicai
cun num e prenum, onn da naschientscha, liug e professiun. Ufficials che seretilan buca valan sco proponi. Mintga vischin proponiu
sto vegnir orientaus dil sutsignau dalla gliesta, ch’el vegni proponius sco candidat per in u l’auter uffeci.
3. L‘administraziun communala tarmetta mintgamai tier a scadin vischinadi, sin giavisch era a gruppas ed uniuns, ina gliesta cun indicau il diember dils posts vacants. Scadina proposta sto vegnir
inoltrada cun la gliesta ufficiala. Sin quella gliesta eis ei era nudau
tuttas indicaziuns pertuccont l’annunzia dils candidats. Quella
gliesta duei denter auter era cuntener il termin d’annunzia sco era
far attenziun sin l’orientaziun persunala dil proponiu. Il sutsignau
dalla gliesta attesta ch’el hagi orientau ils proponi.
Seresulta ei a caschun dalla purificaziun dallas gliestas ch’igl ei
buca avunda candidats pils posts vacants, sa il termin d’annunzia
vegnir prolunghius, quei denton cun risguardar ils 15 dis avon la
votaziun all’urna per spedir il material.
16
Art. 24
Temps d'elecziun
Las elecziuns communalas han per regla liug el decuors dils meins
avrel e matg.
Art. 25
Preparaziun dallas gliestas
L’administraziun communala purifichescha las propostas inoltradas.
Munconzas vegnan cumpletadas en collaboraziun cun quels che han
signau la proposta. Silsuenter vegnan las gliestas definitivas dils candidats preparadas. Arisguard la successiun dils nums decida igl alfabet. Ils veders vegnan indicai sco tals.
Art. 26
Publicaziun e
distribuziun
Las gliestas purificadas vegnan publicadas egl organ da publicaziun
ufficial e repartidas a mintga votant.
Il medem mument obtegn mintga votant in cedel vit cun mintgamai ina
lingia per il president communal, quater lingias numeradas per la
suprastonza communala, 13 lingias numeradas per il cussegl da
vischnaunca ed ils suppleants (2), tschun lingias numeradas per la
cumissiun da gestiun ed ils suppleants (2) e tschun lingias numeradas
per il cussegl da scola ed il suppleant.
Mo cedels ufficials valan sco cedels da votar. Mintga votant indichescha sin quels ils candidats ch’el vul eleger.
Elegiblas ein era persunas che figureschan buca sin las gliestas da
candidats. Cumulaziun ei buca lubida.
Art. 27
Remplazzament
ed elecziuns
cumplementaras
Sa in commember dalla suprastonza communala buca prender part
regularmein allas radunonzas dalla suprastonza per pli liung temps
che sis meins, sto el vegnir remplazzaus avon la finiziun dalla perioda
d’uffeci. La suprastonza communala ordeina enteifer in meins in’elecziun supplementara per il rest dalla perioda d’uffeci.
Abdichescha ni banduna in ufficial duront la perioda d’uffeci siu post,
vegn ei elegiu in successur, aschilunsch che la proxima elecziun ordinaria ha buca liug enteifer sis meins.
Per las elecziuns cumplementaras valan en principi las medemas
prescripziuns sco per las elecziuns ordinarias.
Art. 28
Emprem scrutini
Pli absolut
Elegida egl emprem scrutini en suprastonza communala ei quella persuna che contonscha il pli absolut. Il diember total da tuttas vuschs
17
valeivlas da candidats vegn dividius tras il dubel diember da posts libers. La proxima cefra entira pli aulta ei il pli absolut.
Il president communal vegn elegius cun in cedel separau.
Sche dapli persunas han contonschiu il pli absolut che posts vacants,
ein quellas persunas elegidas che han contonschiu las biaras vuschs.
Tier vuschs ulivas decida la sort entras il biro electoral.
Per l'elecziun dil cussegl da vischnaunca, dalla cumissiun da gestiun,
dil cussegl da scola e dils suppleants corrispundents vala dall'enschatta enneu il pli relativ.
Art. 29
Secund scrutini
Sch’ina elecziun reussescha buca tier elecziuns singulas ni sche pli
paucs candidats ein elegi che quei ch’igl ei d’eleger tier elecziuns
cumplessivas, vegn ei fatg in secund, liber scrutini. En quel ein ils
candidats che reuneschan sin sesez las biaras vuschs elegi (pli relativ).
Persunas buca elegidas egl emprem scrutini san seretrer.
Al secund scrutini san era candidats separticipar che han buca priu
part agl emprem scrutini. Vischinadis ni gruppas da silmeins 15 votants san far novas propostas.
Il secund scrutini ei d’annunziar sil pli tard siat dis avon ch’el ha liug
egl organ da publicaziun ufficial.
Art. 30
Elecziun tgeua
El secund scrutini ei ina elecziun tgeua pusseivla, aschinavon ch'ei
vegn buca annunziau dapli candidats che posts vacants. La
suprastonza communala regla la procedura.
Art. 31
Acceptaziun
dall’elecziun
Tgi che refusescha ina elecziun sto communicar quei a scret enteifer
treis dis suenter haver obteniu la communicaziun all’administraziun
communala. Cass cuntrari vala l’elecziun per acceptada.
B. Votaziuns
Art. 32
Principis
Votaziuns han liug all'urna e tenor ils principis dalla constituziun communala.
18
Ina fatschenta (project) ei approbada, sch’il diember dallas vuschs
affirmativas, suenter deducziun dils cedels vits e nunvaleivels, survarga la mesadad dils cedels valeivels. Ein las vuschs ulivas ei la damonda renviada.
III. Recuors
Art. 33
Dretg da recuors
Il dretg da recuors encunter conclus e disposiziuns d'organs communals sedrezza tenor la legislaziun cantunala.
IV. Determinaziuns finalas
Art. 34
Entrada en vigur
Questa lescha ei vegnida approbada entras la radunonza da
vischnaunca ils 10 da december 2010 e passa en vigur igl 1. da schaner 2011. Cun l'entrada en vigur da questa lescha ein tuttas prescripziuns che stattan en cuntradicziun cun las novas determinaziuns cassadas, en special la lescha davart votaziuns ed elecziuns dils 15 da
zercladur 2001.
19