Lia Rumantscha
La Lia Rumantscha (LR) è vegnida fundada il 1919 sco
organisaziun da tetg da tut las uniuns rumantschas. Ella è
in'associaziun confurma als artitgels 60 e sequents dal
Cudesch civil svizzer. La LR è in'instituziun d'util public. Ella è
politicamain e confessiunalmain neutrala. Tras il mandat
d'impunder las contribuziuns federalas e chantunalas per la
promoziun da la lingua e cultura rumantscha ademplescha ella
in'incumbensa da dretg public. La LR sustegna, promova e
coordinescha las lavurs da las uniuns regiunalas en favur da la
lingua e cultura rumantscha. Ella s'engascha per il
mantegniment e la promoziun dal rumantsch en famiglia, en
scola, en baselgia ed en la vita publica e represchenta ils
interess da la Rumantschia en ils secturs ils pli divers tant a
l'intern sco a l'extern dal territori rumantsch. Ultra da la
centrala operativa a Cuira ha la LR biros regiunals a Laax,
Savognin, Zernez e Ziràn.
Champs da retschertga e da lavur
Cun las Activitads Generalas vul la LR sensibilisar la
populaziun en las regiuns rumantschas ed en la diaspora per
la valur da la lingua e da la cultura rumantscha. Quai fa ella
cun ina vasta paletta dad activitads ed occurrenzas
organisadas dals biros regiunals savens en collavuraziun cun
uniuns ed organisaziuns localas e regiunalas.
Cun la Linguistica Applitgada è la LR ina partenaria per ils pli
divers temas linguistics. Ella cusseglia, infurmescha e
sustegna persunas privatas, interpresas ed instituziuns en
dumondas dal diever dal rumantsch discurrì e scrit. Ultra da
quai porscha ella in servetsch da translaziuns professiunal.
La partiziun Furmaziun da la LR cusseglia, cura ch'i va per
dumondas da la furmaziun sin ils differents stgalims da scola
fin a la furmaziun da persunas creschidas. Ella accentuescha
en sia lavur la valur e l'impurtanza da la bilinguitad e
plurilinguitad. Ulteriuras incumbensas èn l'integraziun da
persunas che na discurran betg rumantsch, il barat tranter las
gruppas linguisticas e la promoziun da contacts culturals.
La partiziun Art e Cultura s'occupa da las valurs tradiziunalas
da la lingua e cultura rumantscha che han in'influenza sin
l'identitad rumantscha. En quest rom sustegna ella la
realisaziun da projects da cultura en cas da dumondas
conceptualas, tematicas organisatoricas u finanzialas. Ultra da
quai maina ella ina chasa editura independenta che edescha
cudeschs per uffants e giuvenils.
Lia Rumantscha
Via da la Plessur 47
CH-7000 Cuira
T: +41 (0)81 258 32 22
Contact:
Urs Cadruvi, [email protected]
www.liarumantscha.ch