Collecta 2015 dal Succurs d'enviern dal Grischun – text per las medias
Tge gronda surpraisa da Nadal! Jau vuless engraziar cordialmain per l'import (100.– francs)
che jau hai survegnì uschè nunspetgadamain dal Succurs d'enviern. Jau hai gì in plaschair
enorm. Grazia per Voss agid generus.
Brev d'engraziament d'ina persuna ch'è vegnida sustegnida tras la surpraisa da Nadal
Questa brev d'engraziament è la meglra cumprova ch'ina pitschna contribuziun a favur d'ina
famiglia u d'ina persuna singula che sa chatta en ina situaziun d'urgenza è in levgiament e
po far a medem temp grond plaschair. Circa la mesadad da las persunas e famiglias sustegnidas han survegnì agid dal Succurs d'enviern dal Grischun durant l'onn passà cun ina
contribuziun da main che 350.– francs. La collecta 2015 dal Succurs d'enviern dal Grischun
ha pia er la devisa:
Gia in pitschen agid ha in grond effect – faschai ina donaziun per umans en miseria en
Vossa vischinanza!
Grazia a Vossa donaziun èsi pussaivel al Succurs d'enviern dal Grischun da cuntinuar er en
l'avegnir cun la lavur curunada da success dals ultims onns.
Succurs d'enviern ed agid social
La quota d'agid social dal chantun Grischun sa chatta cun 1,2 % lunsch sut quella da la
media svizra da 3,2 %. Schebain che la quota chantunala è bassa, na signifitga quai betg
ch'i na dettia nagina basegnusadad e nagina miseria sociala. En il chantun Grischun vivan
umans da tut las vegliadetgnas en relaziuns finanzialas precaras u fitg modestas senza
ch'els retirassan agid social. L'acquisiziun d'ina tastga da scola u la contribuziun per in
champ da stad da l'uffant po periclitar l'equiliber dal budget d'ina famiglia, ch'è insumma
precar. Il Succurs d'enviern gida en tals cas. El na remplazza betg ils sustegns statals,
mabain gida cumplementarmain.
Tge fa il Succurs d'enviern dal Grischun?
Il Succurs d'enviern gida svelt ed en moda nuncumplitgada. L'onn da gestiun 2014/2015 èn
vegnidas inoltradas 207 dumondas da sustegn al Succurs d'enviern dal Grischun. En 189
cas han ins pudì dar ina resposta positiva a la dumonda da sustegn (182 dumondas permessas l'onn da gestiun 2013/2014). In agid finanzial è vegnì empermess tar 108 dumondas,
49 persunas u famiglias han survegnì ina pachet da vestgadira. Quai èn dubel uschè bleras
che l'onn precedent. Ed en 32 cas èsi vegnì fatg diever da la purschida da letgs. Ils entirs
custs per l'agid furnì importa 63 661.35 francs ed èn pli bass che l'onn precedent. Questa
diminuziun sto vegnir deducida dal fatg ch'igl ha dà in dumber pli pitschen da dumondas per
in sustegn finanzial. In terz da las expensas pertutga la purschida da letgs, 16 pertschient
dals meds finanzials èn vegnids investids en l'acziun da Nadal. Plinavant èn vegnidas permessas contribuziuns per surmuntar ils custs da viver (8 %), per custs da sanadad (6 %), per
scolaziun e furmaziun supplementara, per activitads da temp liber e da vacanzas sco er per
diversas autras prestaziuns. L'import mesaun per dumonda importa 336.85 francs. Duas da
trais dumondas permessas èn vegnidas inoltradas per famiglias cun uffants (77 cas) e per
famiglias d'in genitur cun uffants (60 cas). Ulteriuras 53 dumondas ha il Succurs d'enviern dal
Grischun permess per persunas singulas e 9 dumondas per pèrs senza uffants.
Infurmaziuns davart il Succurs d'enviern
Sut il num "Succurs d'enviern dal Grischun" exista dapi ils 31 d'october 1995 ina fundaziun
neutrala concernent la confessiun e concernent la politica da partidas tenor ils artitgels 80 ss.
dal cudesch civil svizzer. Il cussegl da fundaziun sa cumpona da las deputadas Tina Gartmann-Albin (presidenta), Elisabeth Mani-Heldstab, dal deputà Christian Hartmann, dal
vicepresident dal cussegl grond dal chantun Grischun Vitus Dermont (vicepresident) e da la
cussegliera guvernativa Barbara Janom Steiner. Il Succurs d'enviern dal Grischun è ina da
las 27 organisaziuns autonomas chantunalas che portan il label da qualitad dal ZEWO.
Il secretariat dal Succurs d'enviern dal Grischun sa chatta tar l'uffizi dal servetsch social
chantunal e vegn manà da las collavuraturas e dals collavuraturs da quel. Per il Succurs
d'enviern dal Grischun na resultan pia ni salaris ni custs da locaziun. Da mintga donaziun sto
pia vegnir impundida mo ina fitg pitschna part per ils custs administrativs.
Conto da donaziuns:
Banca chantunala grischuna, IBAN nr. CH 81 0077 4110 2862 4090 1
Persuna da contact:
Succurs d'enviern dal Grischun
Jürg Buchli, mainagestiun
c/o Uffizi chantunal dal servetsch social dal Grischun
Gürtelstrasse 89
7001 Cuira
Tel. 081 257 26 95
E-mail [email protected]
www.winterhilfe-gr.ch
2