editorial
1198, 1199, 1200. Finalmain! Ussa ha jau avunda
puncts per pustar quai cudesch che m’interessava
adina! Jau ser puspe la stgatla.
Has ti in carta da cumulus? Na? Ina Supercard dal
Supercoop? Na??? He il temp da rimnar puncts da
mondo e da silva è passà!
Il martgà nair flurischa. Ils dealers spetgan gia davos la porta da la scola. Inzagni dastga vegnir baratà, perquai che sia fatscha tatga gia a chasa en il
album. Per paja mantga il numer 66, il portugais
Luis Figo. L’alternativa èn ils pokémons che èn gia
vegnids stampà en ina sagunda ediziun perquai che
l’emprima era exausta.
Sco dess jau ussa manar ella si tar mai en chombra? – Il tric cun la collecziun da marcas è in zichel
antiquà. Forsa che jau pudess imponer ad ella cun
mia collecziun da gieus da video. U forsa tuttina
mia collecziun da DVD’s, u tonschan schizunt las
CD’s?
Tut il mund rimna. “L’uman è vegnì sviluppà sco ramassader” – uschia Urs Trottmann, psicolog diplomà en l’intervesta sin pagina 6. Ed ins po rimnar da
tutta schorts. Punts presenta in pêr collecziuns ed
intgins rimnaders. Qua datti da quels che rimnan
flippers, raps da si’annada, tatgaders, puppas e
bler auter pli. Punts ha era survegnì ina collecziun
da texts da la 2.classa da la scola claustrala da
Mustér. Damai: bun divertiment cun nossas collecziun e betg emblida – er quella ediziun tutga tar tia
collecziun.
Anita Simeon
la feivra da ramassar
Fadrina Hofmann
Tenor il lexicon daja differents möds da ramassar, per exaimpel ramassar roba chi interessa ad üna persuna, collecziunar la roba pervi da sia
valur o sia bellezza, tgnair sü in ün tschert uorden.
Precis a talas persunas n‘haja tscherchà. Eu laiva gnir a savair che
chi‘d es la fascinaziun da ramassar. Quatter persunas m‘han güdà ad
incleger meglder quist fenomen.
ladina, 14
ramassa butiglinas da parfum, ha ramassà vierchelins da gromma da cafè
Cura hast Tü cumanzà a ramassar?
Cun 4 o 5 ons n‘haja cumanzà a ramassar parfums, impustüt pervi da
las bellas butiglinas. Uossa ramassa perquai cha las savuors am plaschan. Ils vierchelins da gromma n‘haja cumanzà a ramassar circa in
prüma classa.
Our da che motiv hast Tü cumanzà a ramassar?
Ils vierchelins da gromma da cafè ramassaiva fingià mia cusdrina. Eu
sun lura ida a güdar a zavrar oura e n‘ha tschüf lapro eir eu plaschair
da ramassar.
Pro‘ls parfums d‘eira uschè ch‘eu n‘ha vis aint in Samignun butias da
parfum. Là n‘haja cumanzà a cumprar. Eu n‘ha eir adüna giavüschà
d‘anniversari parfums, e cul temp esa gnü ad üna vaira collecziun.
Che At plascha vi da quist hobi?
Hmm... Pro‘ls vierchelins da gromma da cafè am plaschaiva da zavrar
oura e da tscherchar pro oters collectuors, schi vessan ün vierchelin
chi‘m mancaiva o cur ch‘eu pudaiva barattar meis dubels cun oters
vierchelins. E parfums, quels am plaschan perquai ch‘eu tils poss masdar in aignas creaziuns e far svessa bunas savuors.
Dingionder vainst Tü nanpro cun material da ramassar?
ord la collecziun
dals giugadurs EM 2000
Michael, 12
Ils vierchelins da gromma da cafè n‘haja survgni per gronda part dad
üna cuntschainta e da mia cusdrina. Eir pro las butiglinas da parfum
n‘haja üna buna amia chi‘m regala adüna d‘anniversari 2 fin 3 parfums.
Fin l‘ultim as ramassa schon insembel alchet.
Che capita uossa culs vierchelins da gromma e culs parfums cha Tü ramassast?
Eu n‘ha üna cusdrina chi va in prüma classa e minchatant tilla regala
üna o tschella butiglina da parfum. Quels parfums chi savuran fich bain
tegna natüralmaing per mai. Culs vierchelins da gromma da cafè n‘haja
schmiss perquai ch‘eu nu vaiva plü plaschair landervia. Eu n‘ha regalà
tuot la collecziun ad ün‘amia.
bernd, 31
ramassa raps da si‘annada
Co est Tü gnü süll‘idea da ramassar munaida da Ti‘annada?
Duos ons avant meis anniversari raduond da trenta, vaiva l‘idea da far a
mai svessa ün regal special per quel evenimaint. Quai m‘ha manà
süll‘idea da cumanzar a ramassar tuot la munaida chi‘d es gnüda battüda da mi‘annada, dal 1969.
Che At plascha vi da quist hobi?
Ün hobi esa gnü pür cul temp. Vairamaing n‘haja cumanzà be our da
spüra vöglia a metter dvart quella munaida. Cur chi‘d ha dat our da
quella munaida üna mantunada da raps, ha quai planet cumanzà a gnir
üna mania da verer sün mincha rap chi‘m gniva per mans. Ed uschea
s‘ha quai mantunà.
Che capita lura cun quels raps?
Al cumanzamaint n‘haja miss la munaida in üna mappa. Però uossa
stöglia fingià far rollas landroura e metter dvart. Eu nun ha amo adüna
ingün‘idea che ch‘eu dess tour a man cun quels raps.
Che sorts da munaida ramassast?
Mincha munaida chi‘m vain per mans e chi‘d es gnüda battüda da mia
annada. Quai pon esser schillings, marcs, pesetas, dollars ed in prüma
lingia francs.
Tü hast dit cha Tü nun hajast ingün‘idea che tour a man cun quists raps. Nun
haja dat fingià ideas che cha Tü pudessast far cun tuot?
Eu vaiva l‘idea da cumprar per meis anniversari raduond üna nouva camera da film. Ma displaschaivelmaing n‘haja lura survgni da meis genituors üna camera. Uossa n‘haja ils raps amo adüna e nu sa che far cun
quella.
Da che sort munaida dal 1969 hast vairamaing il daplü?
Da mi‘annada n‘haja üna pruna tschinquanterins e munaida da duos
francs. Invezza dals tschincuns n‘haja be ün unic.
Sco camerier rivast pro bain a la munaida! Quants raps hast ramassà fin uossa?
Sco dit, il prüm vegnan tuot ils raps in üna folia transparenta fin chi dà
üna rolla ch‘eu met lura da la vart. Intant n‘haja ramassà munaida chi
dà ün pais da 5 kils e 350 grams. Tuot meis raps vegnan dombrats e
pasats.
Cul temp han cumanzà eir amis e paraints a ramassar per mai. Id es ün
hobi contagius – differents da meis amis han cumanzà eir els a ramassar raps da lur annada.
ord la collecziun
d’indicaziuns
da marca als automats da cigarettas
André, 31
heinrich, 78
ramassa marcas daspö 64 ons
Co est Tü rivà a quist hobi?
Dal 1935, cur ch‘eu d‘eira in settavla classa, suna rivà tras ün barat a
marcas da la Pro Juventute. Da quel temp nu daiva ni radio ni televisiun
o oters trategnimaints electronics. I‘s d‘eira fich pover e modest. Marcas significhaivan amo “l‘aczia da l‘hom pitschen”. Eu tillas zoppaiva e
perchüraiva sco or e betgliaiva dapertuot per marcas veglias. Quist
hobi n‘haja mantgnü – dasper oters – infin hoz.
Da quels chi nu ramassan marcas dschessan cha Teis passatemp predilet saja
lungurus – che At fascinescha vi da ramassar marcas?
ord la collecziun da pokémons
Nicole, 10
Ramassand marcas as poja imprender bler. Mincha marca es üna pitschna ouvra artistica. Marcas sun eir adüna gnüdas creadas dad artists
renomnats. In ün rom plü vast esa fingià ün‘aigna scienza. Per mai es
quai eir ün inrichimaint material. Raritats o squitschs sbagliats sun
cuostaivels. Per mai nu daja nüglia plü bel co ün cudesch da marcas
cun lingiadas plain marcas d‘ediziun.
Quant temp investischast Tü per Teis hobi?
Il hobi da ramassar marcas es actual per tuot ils collectuors dad utuon
fin prümavaira. D‘inviern poja dar ch‘eu lavur mincha di trais fin quatter
uras vi da mias marcas, Eu distach las marcas “in ün stil plü grond”.
Per far quai n‘haja duos grondas pressas electronicas da fotografia.
Avair la controlla e la spartiziun sur da las marcas distachadas es il plü
bel sentimaint e douvra il plü bler temp.
Dingionder vainst Tü nanpro cullas marcas?
Marcas nouvas o almain plü nouvas survegna da l‘uffizi ingio ch‘eu
n‘ha lavurà fin uossa. Meis successur am chüra ün pa e metta dvart per
mai las marcas chi sun remarchablas. Eu am revandschesch lura da
temp in temp cun üna butiglia vin. Suvent daja collecziuns plü pitschnas da jertas, da quellas am venda meis ami Daniel our da la massa.
Tanter oter esa là marcas da tuot il muond.
Che as stoja remarchar specialmaing pro Tia paschiun? Che es extraordinari
landervia?
La prüma ledscha es da na far absolutamaing ingüns sbagls pro‘ls
daints da la marca o pro‘l purtret. Quai chi‘d es extraordinari invezza
es la complexità illa filatelia. Id es impussibel da savair tuot o da savair
far tuot in üna vit‘intera.
urs trottmann
psicolog diplomà
Dingionder vain il bsögn da ramassar alch?
A reguard il punct da vista dal svilup uman, vaina chafuol in nos intern
tscherts muosters elementars. Ün da quels ha nom “ramassar”.
L‘uman ha be pudü surviver, sch‘el ha miss dvart provischiuns, impustüt in nossa regiun. L‘oter motiv d‘origen es d‘ir a chatscha. L‘uman
es gnü sviluppà sco “ramassader”.
Schi‘s guarda plü dastrusch pens eu cha‘l bsögn da ramassar po esser
“plaschair”, vis in ün sen positiv. Però il bsögn da ramassar po eir avair
il motiv da “mancanza”. Davo üna guerra daja blera glieud chi collecziunescha plü bler co pussibel. Ün oter motiv es la “pussanza”. E lura
daja amo ün möd neurotic ed amalà da ramassar. In quel cas nun es
l‘uman plü liber invers quai ch‘el ha ramassà, dimpersè la roba til
dominescha.
Daja tschertas fasas illa vita umana, ingio chi sun “ramassaders”?
Vis sün basa da la psicologia dal svilup daja trais fasas illa vita, ingio
chi‘s ramassa. La prüma fasa es l‘uffant da scoulina chi cumainza
svessa ad avair jent roba e tilla voul eir posseder. La seguonda fasa es
l‘uman giuven tanter desch fin deschset ons, avant o dürant la pubertà.
Là haja dachefar alch culla gruppa; i s‘ha robas cha oters nun han o i‘s
po s-chamgiar roba. Ün‘otra raschun es ün motiv psicologic individual.
Quai voul dir chi‘s ramassa roba chi plascha, chi‘s po identifichar, chi
dvainta ün ideal o ün idol. Quai sun per exaimpel posters e material da
stars. La terza fasa es vers la fin da la vita. Quai cumainza illa seguonda mità da la vita e va fin ill‘ota età. In quel temp as circundescha la
glieud cun sia vita passada. Tuot la roba chi s‘ha pudü as separar,
tegn‘na sü ed uschea resta la vita pro els.
Daja differents möds da ramassar? Chenüns?
I dà blers möds da ramassar. Ün möd es quel da vulair posseder alch
precius. Ün‘otra dimensiun es quella da l‘identificaziun cul idol, üna
terza roba ha dachefar alch culla gruppa. I‘s voul muossar chi s‘es plü
grond, meglder o plü rich co tschel. Da quists trais möds daja lura differentas metodas da ramassar.
Che voul dir quai per ün uman, sch‘el ramassa? Che disch quai sur d‘ün uman?
Eu nu less intunar ils motivs negativs o degenerats. In prüma lingia
haja dachefar alch cun avair plaschair vi da roba. Pro ramassadras e
ramassaders extrems pensa our da la vista psicologica chi saja sco ün
tschert rimplazzamaint. Impè da viver ed esser insembel cun conumans, as ramassa roba d‘umans sco purtrets, simbols o roba preciusa
e‘s muainta lura in seis agen muond. Spontanamaing am vain adimmaint la glieud chi ramassa figürinas sco Schlumpfs o sudats da zin.
Eu pens ch‘üna part da quist avair roba sco algordanza tocca pro
l‘uman, ma lura daja – sco adüna – glieud chi‘d exagerescha. Üna part
da quai nu fa nüglia e tocca pro l‘uman, tschella es donnaivla.
ord la collecziun da tatgaders
Tino, 36
flipp sin flippers
Sche Ivo Vasella raquinta da ses hobby, alura survegn
el egls traglischants. El rimna flippers.
Intervista: Anita Simeon
Entschet ha tut cun in flipper che stavan en la
stanza da cuminanza da nossa scola secudara.
Nus eran mintga pausa vi da far il “gamen” u
“spacen” sco nus schevan. Il davos na rivavan
nus en terma d’ina pausa mai tar il game over
er sch’ il gieu custava mo in franc. Cun 16 onns
hai jau alura cumprà – ensemmen cun mes ami
– nos emprims 6 flippers. Uschia ha la rimnada
entschet.
Tge è alura il regl da rimnar flippers?
I dat dus varts. D’ina vart è il plaschair da giugar. Da l’autra vart han ils flippers er in’estetica
grafica tut speziala e variada. Uschia ha mintga
epocha ses flippers. Ils onns sesanta eran quai
per exaimpel gieus ch’avevan savens num insatge cun space. Il pli sa tractavi da sagitar envers inqual umenet dal mars u da sa defender
en ina cuntrada lunara. Ils games dals onns 90
sa laschan inspirar da films sco per exaimpel
Independance Day, Godzilla u Jurassic Park. Interessant è era che tut ils flippers èn fatgs spezificamain per umens. I dat alura er divers cun
sujet pin-up. Fitg spezials èn er ils flippers da
l’entschatta dals onns 70 cun lur motivs da flower power.
Il pli grond plaschair am fa pero il reparar, renovar e cumpletar ils apparats che jau cumpr
normalmain defects e marods. Qua sa tracti
alura mintgatant da tschartgar toccanaglia rara
sin l’entir mund. Uschia ha mintga apparat sia
istorgetta. Ma sch’in è alura schi lunsch ch’ins
po dar l’emprim gieu è quai schon in sentiment
spezial.
Uschia ina rimnada dovra però er ses plaz in problem?
Jau e mes collega avain affità ina stanza nua
che nus avain drizzà en noss apparats. Mintga
mais avain nus in sera aviert noss salun e tut
quels che han gust pon vegnir a giugar. Circa
dus gedas a l’onn datti er turniers.
ord ina collecziun da flippers
or dal cudesch numnà
Quant gronda è alura tia collecziun?
En noss salun stattan var 40 apparats. In pèr èn
en magazin uschia ch’ins po dumbrar circa 50.
Jau pretend ch’i saja la pli gronda collecziun en
Svizra che è propi er en funcziun. Natiralmain
datti da quels che han ina collecziun pli gronda, ma quella stat alura en in tschaler e n’è
betg publica.
Rimnar flippers sarà er in char hobby?
I stat en in rom pussibel. Cunquai che jau cumprel adina apparats marods ed als pulisch e repar ha il flipper suenter ina pli gronda valita. E
mintgatant vend jau er l’in u l’auter. Atgnamain
investesch jau surtut mia lavur.
Tgenin è tes flipper preferì. Tgenin è il meglier?
Quella dumonda na poss jau betg rispunder. I
dat uschia differents tips e d’ils cumparegliar è
nunpussaivel. Segir datti divers flippers che jau
na dun betg pli nà, sco per exempel quel dal
onn 1943 che n’è atgnamain anc nagin flipper,
perquai ch’il flip, quella ala per far seglir enavos las culas, n’era betg anc inventà.
Tge flipper mantga alura en tia collecziun?
Natiral ch’i dat scho anc in pér che jau vuless
gugent. Ma cunquai che la producziun da flippers è vegnida sistida l’onn 1999 è la massa da
rimnar limitada. Uschia va il regn in zichel a
perder. Jau hai era gia cumenzà da rimnar gieus
da video – ma quai n’é ditg betg uschia interessant.
Infos detagliads davart flippers e lur istorgia:
Marco Rossignoli, The Complete Pinball Book, Schiffer
USA, ISBN 0-7643-1003-8
Introducziun
Quellas historias cuortas ha la 2. classa 1999/2000 dalla scola claustrala da
Mustér scret. Nus numnein quella sort texts historias da 35 lingias. Ellas ein vegnidas screttas tenor ils criteris che nus numnein pelitec. Quei vuls dir: Mintga
historia ha ina persuna principala che vegn descretta fisicamein (co vesa la persuna ora?). Il liug ed il temps dall’acziun ein enconuschents. In eveniment meina alla fin tier in coc, ina sort sligiaziun dallas marveglias ch’il lectur survegn
magari duront la lectura. Quei coc ei buc manegiaus sco ina morala dalla historia, el duei plitost provocar ina reacziun da ahaa..!
Ils scolars han astgau eleger in tema en gruppas da treis. En ina sort concurrenza litterara (cun prelecziun dil text) han ils scolars elegiu il text ch’era tenor
lur manegiar il meglier. Has Ti sco lectur era in text preferiu? Dai part, sche Ti
has gust, p.ex. en fuorma da brev ellas proximas punts, ni directamein a nus!
Ina buna lectura giavischa
Vossa 2. classa (3. classa in spe)
Gion e sia dependenza da caussas dultschas
Gion, in giuven da dudisch onns, che stat a Trun, ei dependents da caussas dultschas. Mintga di
va el sper ina pasternaria ora per ir a casa.
Igl ei l’jamna avon pastgas e la vitrina dalla pasternaria ei ornada cun lieurs da tschugalatta.
Mintga di suonda il medem schema cun Gion en la pasternaria: Gion entra e salida curteseivlamein la vendidra. El cumpra ina pintga caussa dultscha e lai lu aunc mitschar en sac enqual
autra caussa. La vendidra constatescha ch'ei vegn engulau en sia stizun ed observa ses clients.
Il Gion vegn l'auter di puspei en stizun, cheu trapla la vendidra el e vul telefonar a ses geniturs,
mo lezs ein en vacanzas. Ella scamonda a Gion d 'entrar en la pasternaria. Gion va ussa el consum. Suenter pastgas entscheiva el era ad engular leu. Gia suenter in'jamna trapla ina veglia
clienta il giuven Gion ed alarmescha igl administratur. Suenter in liung discuors vegn ei scumandau a Gion d'entrar el consum. Il scamond da stizun retegn buca Gion da sia dependenza. Gion
va puspei en la pasternaria. Sco ina furia cuora la vendidra encunter Gion che tegn ses mauns
en sac. Ella trai ils mauns da Gion ord sac, e tgei vesa ella cheu? Ella vesa che Gion ha en ses
mauns in schenghetg cun scret si: “Per la vendidra, jeu sperel che Ti perdunies a mi che jeu hai
engulau entginas caussas tier Tei! Salids Gion.”
Adrian, Aluis e Bruno
La veta da mintgadi
Jeu level la damaun cun plascher. Il bellezia tun dil sveglarin fa vegnir neunavon mei. Cun bia
plascher sil vegnent di da scola mon jeu el bogn e selavel. Ord il spieghel ri in bi giuven scolar
che vesa o da carriera encunter a mi. Suenter serendel jeu riend en cuschina nua che mia mumma spetga sin mei cun in buontad solver. Culs radis dil sulegl levont carreschel jeu silsuenter cul
velo a scola e selegrel dil tschiel azur ch’empermetta in bellezia di. Arrivaus en scola salida mia
classa mei cordialmein. Il carezau scolast vegl cun barba vegn encunter a mi e gratulescha a mi
pil da sis en mate. El parta ora a nus in pensum ch’jeu sligiel senza breigias e cun grond plascher. Per far honur a quei di grondius cantein nus canzuns. Tuts contan cun bia engaschament
e cun vuschs d’aunghels. Per che nus sappien guder la bial’aura, dat il scolast liber a nus il
suentermiezdi, ed ei dat era buca pensums. Silsuenter accumpogna el nus a dar in giug da ballapei che nus dein senza arbiter, demai che negin da nus fa in faul. Il giug finescha 1:1. Aschia
ein omisduas gruppas cuntentas. La sera mondel jeu a casa. Ella televisuin vegnan mo super
films, e jeu mirel quels tochen las dudisch.
Tuttenina ina sirena, e tut entourn mei vegn ner. Tut surstaus mirel jeu entuorn ed encorschel las
cefras glischontas dil sveglarin. Il siemi ei vargaus. Jeu segliel ord letg, cuorel tras il bogn, mon
senza solver ord casa e cun miu velo tras la pli gronda plievgia encunter miu da dus en mate.
Jonas, Marco e Roman
In misteri
Saskia, Jana ed jeu essan treis scolaras dalla scola claustrala a Mustér. Jana ha sco suletta da
nus in amitg, il Pascal. Nus quater eran buns amitgs gia ella scoletta, en buns e schliats temps.
Mo el davos temps ei tut semidau. Pascal ei semidaus, tut ei semidau. In gi avon buca gitg ei
Pascal buca vegnius a scola. Nus havein denton buca piu serius ei, quei sa gie schabegiar.
“Forsa ei el gie malsauns”, havein nus tertgau. Mo naven da lu er’el adina fetg distracts. Ins enconuscheva strusch el pli. La relaziun cun nus, cunzun tier Jana, era tuttenina fetg sin distanza.
El era bia pli ruasseivels che usitau, suenter scola vegneva el gnanc pli el caffé cun nus. Sias
sgnoccas e ses commentaris muncavan. Sia fatscha rienta vesevan ins darar. “Jeu hai d’emprender!”, era sia risposta. Jana, la paupra, era tut trumpada. Tgei era pomai cun el? In mardis,
da mate, ei Pascal daus ensemen. Nus havein pigliau la detga tema, mo il scolast ha dau igl emprem’agid. Silsuenter ei Pascal semplamein ius a casa ed ha getg ch’ei seigi mo miez aschi
nausch. Miez aschi nausch? In pèr gis pli tard ei el insumma buca cumparius a scola pli, e negin
saveva nua ch’el seigi. Dalla mumma dad el ha Jana udiu ch’el seigi el spital grev malsauns. El
hagi in tumor.
Denise, Fabienne e Romina
Senza lavur
Sco mintga di leva Stiaffen era oz cun il sulegl. El va en cuschina da sia schampra casa per solver. Bia dat ei buc, pertgei Stiaffen ei gia dapi treis onns senza lavur.
Ussa va el el marcau per ina gasetta veglia ed encuera lien ina plazza da lavur entras inserats.
Suenter ditg sfegliar ha el anflau dus ni treis inserats ch’interessassen el. Ussa va Stiafen tier
l’emprem’adressa. Duas uras pli tard arriv’el da l’autra vart dil marcau el liug destinau. El legia
aunc inagada igl inserat per seperschuader ch’el seigi cheu el dretg liug:“Nus encurin in um
ferm da ca.30 onns che ha experientschas ella lavuraziun da tubac. Purschiu vegn ina buna
paga e la mondura da luvrar. Adressa: Tubac en sac AG 8053 Turitg.”
Ils criteris pretendi constattan tier Stiafen ed el va viers il biro per s’annunziar. Mo cura ch’ils
portiers vesan co el vesa ora, tarmettan els anora el. El suppona ch’ei schai vid il resti. Aschia
serenda Stiafen tier la banca e damonda, sch’el hagi aunc avunda daners per cumprar empau bi
resti adequat alla situaziun. Igl um sil spurtegl entscheiva tut surstaus a rir ed excloma: “Per
vestgadira? Avunda? Signur, sin vies conto ei aunc avunda per silmeins 3 casas.”
Toni, Corsin e Curdin
En vacanzas
Finalmein han las vacanzas da stad entschiet. Fabrizio, in giuven da 14 onns, cavels ners ed egls
blaus, selegra fetg sin las vacanzas a Rhodos. Oz vegn el a sgular per l’emprema gada. A
Rhodos eisi calira, perquei van el e ses geniturs el hotel. Mo da quella bial’aura po el buc star
leu. El va in tec sper la mar, a senudar. Gia suenter ina jamna eis el buc pli schi incantaus dallas
vacanzas cun ses geniturs. Mo la mar plai fetg bein ad el. In di, igl ei nebliu ed ei sufla pulit, va el
gia baul la damaun a senudar. Cura ch’ils geniturs levan, fan els buc quitaus per el. Mo encunter
sera, ei entscheiva gia a far brin, ei el aunc adina buca turnaus. Cheu alarmeschan ils geniturs la
polizia e la colonna d’agid, mo era quels anflan buca el. Trests tuornan tuts a casa. Il geniturs
van denton aunc ina secunda gada ad encurir lur fegl, mo era els han gleiti negina speronza
pli d’anflar Fabrizio. Denton creien els aunc adina buca vid la mort da lur fegl. Suenter ina jamna
han els aunc adina buca anflau el, ed era la speronza d’anflar el era bunamein svanida. Cheu
sedecidan els da serender a casa senza Fabrizio, era sche quei ei fetg grev per els. Els fan lur valischas e serendan sin la plazza aviatica. Spetgond sin lur sgol, observeschan els empau la glieud
che spetga medemamein sco els sin saver sgular a casa.
Tuttenina catta la mumma in enconuschent giuven vi sper l’entrada. Na, quei ei buca pusseivel...
igl ei Fabrizio!! Cun in surir sin fatscha di el ad els: “Stau bialas vacanzas, special da tschella vart
dall’insla!!!”
Laura, Sarah ed Ursina
Monolog el tren dallas 14.00
Igl ei las duas, il tren parta dalla staziun da Mustér. Tini, in giuven da 26 onns, baghegiaus bein
cun ina barba brina, entra el tren. Il carr ei stagnau pleins. Mo leu ha ei in plaz liber cun in um
vegl che sesa tut persuls. “Ei quei plaz aunc libers?” Negina risposta. Tini sesa semplamein giu.
“Nua meina Vies viadi? Miu meina a Vrin. Saveis, jeu hai leu parents. Avon diesch onns sundel
jeu vegnius a Mustér. Dapi lu haiel jeu strusch giu contact cun els pli. Vus stueis saver, mia
affonza ei nuota stada sempla. Mia mumma ei morta da cancer cura che jeu erel aunc giuvens.
Dapi lu hai jeu stuiu far il tener-casa, perquei che miu bab era in pur, e quels ein mai a casa. Jeu
stuevel era pertgirar mes fargliuns.
Frequentau la scola hai jeu mai endretg. Aschia hai jeu mai saviu far in emprendissadi sco sauda. Saveis, jeu fussel staus in talentau luvrer, mo senza scola va ozildi nuot!
Aschia hai jeu fatg in emprendissadi sco mecanist dad autos. Ussa lavurel jeu tier Mazzetta.
Mintga di Mustér-Trun. Plaunsiu fa quei la tgagia a mi. Jeu sundel schon in pauper gianter. So,
ussa essan nus finalmein arrivai. Vivi bein!”
Mo Tini veva buca sefatg en: Igl um vegl che seseva sper el era gia morts, avon ch’el era vegnius
el tren.
Daniel, Retus e Simon
Novas ella tiarza classa
Dapi in meins frequentel jeu, ina scolara da 15 onns, la secunda classa ella scola claustrala a
Mustér. Donn che las bialas vacanzas da stad ein gia alla fin, mo zaco selegrel jeu d’emprender
d’enconuscher las scolaras ed ils scolars novs dall’emprema e tiarza classa. Jeu enconuschel
gia enzacons, mo ina hai jeu viu avon duas jamnas per l’ emprema ga. Avon cuort hai jeu viu co
ell’ei ida ella stanza dalla classa 3b. Ella ha cavels liungs brins ed egls brin-verds. Tschun minutas pli tard hai jeu fatg stem ch’ella ei sortida dalla sala da gimnastica, e quei tut suentada. L’auter di ei ella vegnida a scola cun caultschas cotschnas. Mo cura ch’jeu sun ida a casa purtava
ella caultschas grischas. Curios! In’autra ga ha ella raquintau a mi ch’ella hagi oz ina clausura da
mate, perquei ch’ella hagi muncau la davosa ga. Suenter la lecziun hai jeu dumandau ella,
sch’ella hagi giu bien ella clausura. Ella ha mirau sin mei sco sch’jeu havess cornas ed ha detg:
“Tgei examen? La davosa clausura hai jeu giu avon treis dis.” In di hai jeu spitgau sill’arrivada dil
tren che meina a Sedrun. Leu hai jeu entupau Pieder. El ha dumandau mei co jeu queti las novas
dalla tiarza. Jeu hai dumandau: “Tgeininas novas?” El ha declarau a mi ch’ei hagi duas novas
ella tiarza. Numnadamein duas schumellinas!!
Elisabeth, Marina ed Elisabeth
Paupradad
In mardis sera a Turitg: Alfons, in giuven pfleghegiau advocat less aunc far entginas cumissiuns.
Arrivond tier la stizun da victualias, auda Alfons in grir e sevilar. In um pign, vestgius sc’in parler
seglia en ad el. Alfons sa mo dar ina cuorta egliada sigl um, e lu eis el gia naven. Pli tard auda el
che quei um haveva engulau maglias en la stizun. In pèr dis pli tard, Alfons haveva gia emblidau
quell’episoda, fa el ina spassegiada el parc. Tuttenina vesa el sin in baun in murdiu, gest vid il
beiber vin e laguoter in toc paun sec. Mond pli datier, vesa Alfons che quei ei igl um da venderdis sera! “Aha!”, tratga el, “Quei ei aschia in! Lu s’empo el sez ch’el sto ir ad engular!” Alfons evitescha numnadamein quels tips. En quei mument arriva la polizia che less tschappar el pervia
da ses enguladetschs. Igl um scappa ed Alfons ed ils polizists dattan suenter ad el. Suenter ina
liunga persecuziun, arrivan els en ina baracca. Alfons entra en la baracca, e leu vesa el in maletg
commuentond: Ina dunna sin murir cun in affon sin bratsch e dasperas dus affons smagregiai.
Ussa sa Alfons, daco che quei um engulava, numnadamein mo per nutrir sia famiglia.
Erica, Silvan e Stefanie
souvenirs, souvenirs
Anita Simeon
Tournond dal restaurant che il camerier dal hotel aveva cusseglià (el aveva manegià ch’i saja
in tipic restaurant talian, dentant eri in restaurant da TUI – mintgacass aveva el provisiun)
passan els quel stizunet da souvenirs. “Insatge
stuessan nus bain prender a chasa per noss
pitschens – insatge tipic talian”. Uschia avran
els ponderà – mes geniturs e ma purtà ina da
quellas poppas cun vistgadira tradiziunala. I
para che la poppa m’haja fascinà – en mintga
cass è la collecziun da poppas daventada adina
pli gronda ed insacuras è ella avanzada a quel
punct nua ch’il regl da rimnar è pli grond che il
plaschair vi dal singul object.
Quindesch poppas esi, tuttas mess davos glas
en ina vitrina – pertge far giu regularmain la
pulvra fiss memia stentus. Ed igl è er meglier
ch’ellas statan davos ina fanestra, sco regurdientscha a taimps passads dasper ils paucs
pocals che jau hai gudagnà en cursas da skis
nua ch’ins era sco terza er l’emprima – mabain
da l’autra vart.
Interessant vi da las poppas è però, che bleras
han la medema fatga e la medema structura,
igl è la medema poppa standardisada, mo la
vistgadira è midada. È il proverbi “autras terras,
auters usits” mo ina malenclegientscha? È il
coc adina medem e mo “la vistgadira furma las
persunas”? Sch’ins guarda la collecziun poins
prest crair ch’i saja uschia. Ed il davos esi alura
tuttina sch’ins cumpra ils souvenirs en Scozia,
Frantscha u en Spania – tut è made in Hongkong.
ord la collecziun da
poppas en vistgadira tradiziunala
Anita, 28
ed ei setschenta el sac da miardas...
Angela Schmed
Rimnar fotis, rimnar marcas postalas, rimnar battafiugs, rimnar uorden da Coca-Cola, rimnar
uviarchels da groma da caffé, rimnar cors dad umens/femnas, rimnar insects, rimnar sitgets
da better si dallas differentas societads da sgol – la damonda sch’els ein pleins ni buc laschel
aviarta – rimnar autos da termagl, rimnar animals da plesch. Rimnar cozzas da meisa, termagls, resti, discs cumpacts, mobilias veglias, daners, dents da latg, comics, e e e.
Quasi mintgin da nus ha aschia in tic da rimnar enzatgei. E mintgin ha il sentiment che quei
che el rimni hagi in di in’enoooorma valeta. Mo lein inagada esser sincers. Tgi crei veramein
che quels tagliors da porcellana ch’ins ha artau dad in’onda dil tat ni las fotis dad x-in pèr
vegliets che negin enconuscha vegnien in di a purtar ad ins il daner grond? Ils pli paucs. En
quei cass sto enzatgei auter esser il motiv per tut las uras ch’ins impunda e per la gnarva
ch’ins engola als auters per posta d’in tic ch’ins ha.
Cheu entgins motivs pusseivels:
per far in plascher a sesez ni ad enzatgi auter (Sche jeu patratgel vid las crunas fullenadas da mia tatta
saiel strusch metter avon ch’ella hagi collecziunau tut quei uorden perquei ch’ei plai ad ella. Per ex. il casti da
Sargans ord pupi, in papagagl da teila ni in maletg à la Picasso – deplorablamein buca cun suttascripziun!)
per far impressiun ad enzatgi auter (Ei duess gie veramein aunc dar tals/talas che secugliunan sche enzatgi di: “Astgel jeu mussar a Ti mia collecziun da marcas postalas?”)
per passatemps
per tentar enzatgi (Era da quels duess ei dar. La finfinala sevilenta mintga sora si sche la cruna da cudischs ei
tuttenina emplenida cun autos, cartas e capetschas da formula 1, ni?!)
per veramein far profit (tgi sa?!)
sco ornament (Tier ina detga collecziun da maletgs da Salvador Dali schessel era buca na!)
ins sa gie mai... (Enconuschan buca tuts quella construcziun, cunzun ord la bucca dils geniturs cura ch'ei va
per better enzatgei ni buc.
per emplenir il tschaler/surcombras (Aschia in liug vesess bein ora trests e vits senza tut quei uorden che
negin sa duvrar?)
pervia dil regl (Dat ei era rimnadas da bulius, lu savessel era capir ei!)
per emplenir il sac da miardas (Ils umens da rumians ston bein era haver lavur e mo per dir, enteifer ils
onns serimna maaaaaaaassa lavur per els)
Segir sto buca mintga collecziun setschentar el sac da miardas. Sch’enzatgi enquera in client
per ina u l’autra mobilia veglia ni schiglioc in toc da gronda valeta – jeu serecamondel. Ozildi
ston ins porscher enzatgei als lecturs. Mo cun dar ora ina gasetta senza far amogna auters survetschs eis ei era buca fatg, ni? (Quei va era aunc sut motivs pusseivels: rimnar puncts...)
ord la collecziun da puncts
Hedy, 69
gratulaziuns, chasper
Questa charta vuleva jau atgnamain trametter ad in exconscolar da mai. Però mia dunna ha intervenà e ditg:
“Es Ti nar. Smetta da T‘intermetter en la politica da la
Svizra. Ussa ès Ti emigrà en America, perquai emblida
tut quai!” Jau n‘hai lura betg tramess la charta. Però ina
copia hai jau tuttina tramess a la redacziun da las Punts.
Chau Chasper
Ussa ès Ti bain vegnì elegì sco deputà da nossa regiun – sinceras gratulaziuns Chasper. Mes
ami Flurin – Ta regordas bain anc da Flurin –
m‘ha tramess ina charta cun quella novitad.
Jau stoss però admetter, cura che jau hai legì
la charta sun jau stà in zichel surprais ed hai
ditg cun mia dunna: “Dieu saja engrazià,
Chasper è ussa deputà!” E mia dunna ha be
respundì: “Bravo!”
Jau hai alura pensà dalunga vi da noss magister Jaronas barmier. Ta regordas anc ch‘el aveva ditg cun Tai: “Char Chasper, Ti ès pli tup che
la crappa da Runellas. Però Ti vegnas segir e
franc ina giada elegì sco deputà.” E suenter –
durant la pausa – avevas Ti pluntà a tut quels
conscolars che avevan stuì rir.
U Ta regordas anc da quella festa a la maisa radunda dal “Tschierv”. Nus giavan gist tuts ensemen a la recruta. Là avevas Ti clamà sur tut la
maisa vi (bain, Ti eras schon vaira sturn): “Gidieus, Jugos u Tamils, quai è tut la medema gianira. Hitler aveva schon gì raschun. Faschain
puspè fieu en ils furns!”
Avant in pèr onns sun jau lura vegnì a savair
che Ti avevas fatg magari munaida cun ina chava da glera ed era anc cun auters affars – è
quai vaira? En mintga cas sun jau era vegnì ad
ureglia che Ti has maridà a Bernadetta. – Sas
anc che Ti schevas durant il temp da scola adina ch‘ella spizza da pes. E suenter la recruta
schevas savens: “A quella Bernadetta fissa da
chapunar ina giada.”
E sco che Flurin m‘ha rapportà ussa, ès Ti commember da la partida dal regress (PRS), quella
partida che s‘engascha per l‘isolaziun e la gloriusa neutralitad da la Svizra. Sche ina partida
va a prà cun Tia persuna, stimà Chasper, alura
è quai la PRS – là has Ti propi fatg ina buna
tscherna.
En mintga cas, ussa ès Ti in um da vaglia, ussa
sco deputà. Jau Ta gratulesch per Tia elecziun,
er sche da mai n‘avessas betg survegnì la
vusch.
E per finir anc ina rima per Tai Chasper (jau
fascheva gea adina ils versins per las festinas
da la classa):
Oz faschain nus festa,
perquai che Chasper è a la testa.
(E sperain ch‘el là na resta.)
Cun chars salids da Tes ex-conscolar
Men Caduff
la giuventetgna a la scuntrada a samedan
scuntrada 2000
La Giuventegna Rumantscha (GiuRu), la gasetta da giuvenils Punts ed il “battaporta” dal Radio Rumantsch porschan durant la Scuntrada differentas occurrenzas per
la giuventetgna. La redacziun da Punts producescha in
numer da Punts da e per la Scuntrada.
Mintga di a las 10.30: Sesida da redacziun publica da
(LR/ata) Dals 16 fin ils 20 d’avust ha lieu en Engiadin’ota la Scuntrada 2000 sut il motto “Rumantsch en moviment”. La LR ha mess en pe
cun las quatter vischnancas Zuoz, Samedan,
Schlarigna e Puntraschigna in program vast e
multicultural per chau e chomma. Qua datti in
turnier dad unihockey, prelecziuns litteraras,
discussiuns, concerts, golf, vernissaschas, il
gieu liber “La Svouta”, gitas, inline-skating, ir a
chaval, zambregiar ed observar objects sgulants ed auter pli. La Scuntrada vul er s’adressar ad in nov public. Ella vul bandunar quest
tef d’in occurenza per Rumantschuns insiders.
Betg mo ils circuls stretgs dals Rumantschs e
dals aderents dal rumantsch duajan vegnir cuntanschids, mabain tuts ch’èn en Engiadina,
saja quai sco giasts u per motivs professiunals.
Tuts sajan numnadamain confruntads mintga di
cun il rumantsch. Rumantsch duai daventar ina
part normala ed integrativa dal mintgadi professiunal e betg mo vegnir duvrà en famiglia,
en scola u per discussiuns. Ma conscients da la
realitad da l’Engiadin’ota porschan ils organisaturs singulas occurrenzas da la Scuntrada
2000 en tudestg e talian. Mintgatant è la chaussa prioritara. Plurilinguitad dismetta cunfins,
collia ed enritgescha. Da render conscient quai
– e surtut da promover quai, era quai è nov vid
la Scuntrada 2000.
Punts cun in giast en il biro da redacziun a l’Academia
Engiadina:
16 d’avust
17 d’avust
18 d’avust
19 d’avust
Isabella Defuns, mainaredacziun
dal “battaporta”
Chasper Pult, directur CCS, Milano
anc avert
Clà Riatsch, docent a Berna
Intervistas publicas cun persunas prominentas:
17 d’avust
19 d’avust
17.00: Tonia Maria Zindel, actura
grischuna e diala da l’istorgia da buna notg
da la Televisiun Rumantscha
17.00: dus sportists (anc avert)
discussiuns al podium:
16 d’avust
18 d’avust
19.00: La lavur da giuventetgna
rumantscha cun: Jost Falett, Arno Berther,
Erwin Huonder, Roman Cathomas
mainadiscussiun: David Spinnler
17.00: Il print rumantsch cun:
Martin Cabalzar (La Quotidiana),
Jost Falett (LR), Urs Dubs (Posta Ladina),
Jon Domenic Parolini (ANR),
mainadiscussiuns:
Anita Simeon, David Truttmann
las perlas – ils concerts
16 d’avust 22.00: Ils Cantauturs Passiunai,
Pascal Gamboni e Curdin Brugger
17 d’avust 20.00: Best of film rumantsch giuven
22.00: Disco
18 d’avust 20.00: Ils Bandinz dal silenzi
20.30: Solution (gruppa da Cuira)
19 d’avust 20.00: Grond concert da rock:
Marygold, Tabularasa, Merfen Orange
Ils concerts dals 16,17 e 18 d’avust han lieu en l’Academia Engiadina. Il grond concert da rock da sonda, ils 19
d’avust, ha lieu en la sala polivalenta da la Scola professiunala a Samedan.
Il “battaporta” dal Radio Rumantsch vegn realisà ed
emess durant tut ils dis da la Scuntrada a Samedan.
ord la collecziun da
viertgels da gromma da café
Hilda, 57
Igl è damai insatge en moviment. Sche la Rumantschia è
en moviment dapenda er da Tai. Also tgau enfin tar la
Scuntrada.
Infurmaziuns detagliadas e guid:
Lia Rumantscha
Via da la Plessur 47, Chascha postala, 7000 Cuira
tel: 081 258 32 22, fax: 081 258 32 23
[email protected],
www.liarumantscha.ch
Impressum
chauredactura: Anita Simeon, Zurlindenstr. 294,
8003 Zürich, [email protected]
caporedacturs: Conradin Klaiss, Mulin, 7144 Vella
[email protected]
David Truttmann, Pasquer, 7537 Müstair,
[email protected]
redacturs: Fadrina Hofmann, Scuol;
Angela Schmed, Mustér; 2. classa dalla scola
claustrala da Mustér
secretariat e servetsch d’abunents: Punts,
Géraldine Fry, Geiselweidstr. 8, 8400 Winterthur,
tel 052 242 13 39, [email protected]
grafica e layout: Theres Jörger,
Hauptstr. 37, 6015 Reussbühl,
[email protected]
stampa: Spescha&Grünenfelder, Glion
spediziun: Argo SA, Glion
inserats: Brainstore AG, Biel
pretsch d’abunament: frs. 40.–, Raiffeisen
Laax 70-6699-9
editura: GiuRu, caum postal 312, 7002 Cuera
marketing: GiuRu (Roman Cathomas, Laax; Armin
Duff, Sumvitg)
internet: www.punts.ch
Punts è commembra da l’Associaziun da la Pressa
Svizra dals Giuvens
Punts en collaboraziun cul Dialog
rimnar, rimnar
rimna tut ils 105 puncts da mondo en questa ediziun (quels da silva na valan betg), alura survegns ti
l’abunament da Punts per Fr. 35.- enstagl da Fr. 40.num e prenum:
adressa:
lieu:
Trametter il talun ed ils punctsa suandanta adressa:
Punts – la gasetta giuvna,
Géraldine Fry, Geiselweidstr. 8, 8400 Winterthur,
tel 052 242 13 39