30 ONS
Biblioteca populara Scuol
1982 - 2012
La biblioteca – ün s-chazi in cumün
Pel 30avel anniversari da la Biblioteca populara Scuol
"Cudeschs sun ils tapets svolants per rivar aint il muond da la fantasia." (James Daniel)
No eschan da chasa in üna regiun da bellezza. E listess faja bain dad ir davent minchatant
per verer otras cuntradas. Per quai nu stuvaina adüna ir cul auto, cul tren o cul eroplan. Eir
ün cudesch po ans manar in oters pajais o continents, inavo in temps passats o dafatta aint
ils muonds da la magia.
Ün cudesch es vairamaing svess alch magic. Duos chartuns e tanteraint ün plic palperi cun
üna pruna custabs – ma cun leger as sviluppan purtrets aint in noss cheus e sentimaints aint
in noss cours, no eschan dalöntsch davent, e cun tuornar inavo i'l minchadi eschna mincha
jada plü richs.
Las bibliotecaras in Chasa du Parc perchüran dimena ün grond s-chazi – e til partan cun
minchün. Quai fana daspö trent'ons cun ün ingaschamaint exemplaric. Fingià la fundaziun
dal 1982 es statta l'ouvra d'ün pêr idealistas ed idealists chi'd han lura lavurà ons e decennis,
il prüm sainz'ingüna paja, plü tard cunter ün'indemnisaziun fich modesta.
La decisiun dal cumün da s'ingaschar daplü pella biblioteca – eir finanzialmaing – nun es
perquai ün "regal" per l'anniversari raduond, dimpersè l'arcugnuschentscha per 30 ons lavur
cumpetenta ed ingaschada, il prüm cun fuondar e fabrichar sü la biblioteca, davo cun tilla
manar e sviluppar inavant.
Dürant ils ultims 30 ons es nempe capità bler. Cur cha'ls mezs da comunicaziun electronics
han cumanzà a's derasar eir illas chasadas privatas, esa dafatta gnü dit cha'l cudesch nun
haja plü ingün avegnir. La biblioteca ha reagi e metta hoz a disposiziun eir discs cumpacts,
DVDs e l'access a l'internet. Ils cudeschs però han survivü e sun dumandats amo adüna.
Il muond dals cudeschs es eir ün rom ideal per inscunters. La cronica dà üna survista
impreschiunanta dals arrandschamaints cha las bibliotecaras han organisà dürant ils 30 ons
passats: prelecziuns, referats, films ed oter plü per uffants e creschüts.
A propos uffants: la biblioteca populara es statta da prüma davent eir biblioteca da scoula.
Quai es sgüra ün motiv chi's vezza hoz regularmaing eir uffants in biblioteca. Els nun han be
a disposiziun üna gronda e bella tscherna da cudeschs ed otras medias per minch'età. Els
as saintan eir da chasa in biblioteca e sun bainviss. Uschè vain il plaschair da leger bod da
sai, ils cudeschs dvaintan amis dals uffants, e quai resta per regla üna vita intera.
Eu nu less be gratular a la Biblioteca populara da Scuol per l'anniversari raduond, dimpersè
eir ingrazchar a las bibliotecaras per lur grond ingaschamaint e lur lavur instancabla ch'ellas
fan cun amur e paschiun. Al listess mumaint giavüscha tuot il bun pels prossems 30 ons. Eu
sun persvas chi darà eir quella jada amo cudeschs ed umans a Scuol chi legian jent – na
l'ultim grazcha a nossa biblioteca!
dr. Jon Domenic Parolini
Capo cumünal
2
30 ONS BIBLIOTECA POPULARA SCUOL
1982 - 2012
I'ls ons 1981/82 es nada l'idea da metter ad ir a Scuol üna "biblioteca populara".
L'iniziativa es gnüda impustüt da Milla Parolini, Pieretta Tönett, Ulrica Vital, Anni
Rizzi e Jachen Mosca. Tista Murk, quella jada president da las bibliotecas svizras, ha
sustgnü la fundaziun.
L'idea es gnüda svelt plü concreta. Impustüt pella finanziaziun e pel lö s'haja stuvü
chattar soluziuns.
Ün lö es gnü chattà bainbod. Il cumün es stat pront da metter a disposiziun localitats
adattadas aint illa Chasa du Parc.
Il problem principal, la finanziaziun, ha pudü gnir scholt grazcha a donaziuns generusas davart da diversas instituziuns ed organisaziuns. Ils cumüns concessiunaris da
las OEE, la Pro Engiadina Bassa, il cumün da Scuol, la "Reuniun sociala" da quella
jada, la "Donaziun dals 1. avuost" ed otras instituziuns, ma eir donaturs privats han
concess contribuziuns considerablas.
Fin l'avertüra da la "Biblioteca populara Scuol" sun gnüts insembel ca. 35'000 francs.
Quist import e l'ingaschamaint instancabel da las iniziantas e'ls iniziants, ma eir las
localitats cha'l cumün ha miss a disposiziun sainza fit han pussibiltà da drivir la
"Biblioteca populara Scuol" als 21 marz 1982. L'avertüra es gnüda festagiada cun
musica, chant ed ün pitschen aperitiv.
Il cumanzamaint es gratià davo lavuors preparatoricas da be s-chars duos ons!
Ün pêr datas importantas in successiun cronologica:
1982
Avertüra da la "Biblioteca populara Scuol" als 21 marz 1982.
La "Biblioteca" cumainza cun ca. 2'100 cudeschs. Fingià dürant il prüm
on vegnan cumprats ulteriurs ca. 750 cudeschs. Ca. 150 cudeschs survain la biblioteca sco regal.
Las bibliotecaras sun Milla Parolini, Ulrica Vital, Anni Rizzi, Pieretta
Tönett e Ruth Luzzi.
1983
Fingià a partir dal 1983 frequaintan diversas classas da scoula regularmaing la Biblioteca. Il sortimaint cumpiglia da prüma davent blers
cudeschs da pops – specialmaing pellas scoulinas – sco eir cudeschs
per uffants e giuvenils.
3
In favrer 1983 ha lö la prüma prelecziun, ün arrandschamaint pel
s-chalin bass. Annapitschna Grob-Ganzoni prelegia our da seis cudesch "Giovannin".
L'evenimaint il plü important da quel on es però la prelecziun da l'autura
cuntschainta Federica de Cesco. Ella es buna d'inchantar ils scolars dal
s-chalin ot.
1984
Il numer dals cudeschs chi stan a disposiziun surpassa ils 4'000. Quist
on vegnan imprastats fingià sur 3'800. Quistas cifras cumprouvan cha
l'avertüra da la Biblioteca correspuonda ad ün bsögn.
La "camiunetta culturala" da la Pro Helvetia fa fermativa a Scuol dals
11 fin als 30 gün 1984. In quist connex vain preschantada la Biblioteca
als 20 gün. Cun placats e fögls volants vain fat recloma per quist arrandschamaint.
1985
La cumünanza da lavur grischuna da cudeschs per la giuventüna
(Bündner Arbeitsgemeinschaft Jugendbuch BAJ) organisescha per la
prüma jada ün cuors fundamental per collavuraturas e collavuratuors da
bibliotecas (catalogisar, normas etc.). Milla Parolini ed Ulrica Vital frequaintan quist prüm cuors, insembel cun Bernadette Bezzola e Valerie
Dolfi chi'd aintran lura güsta illa squadra da las bibliotecaras.
1986
Per promouver l'interess vi da la Biblioteca organiseschan las bibliotecaras üna concurrenza pellas classas da scoula. Las respostas a las
diversas dumondas as chatta cun leger differents cudeschs. Il premi
principal es ün abunamaint annual. Grazcha a quist arrandschamaint
s'augmainta la frequenza pro scolaras e scolars.
Il numer dals cudeschs es restà daspö il 1984 pro ca. 4'000 tocs.
Ca. 3'100 vegnan imprastats in ün on.
Ulrica Vital e Pieretta Tönett bandunan la squadra da las bibliotecaras.
1987
Il cumün sustegna la Biblioteca cun üna contribuziun annuala da 5'000
francs. Quista contribuziun güda ad actualisar la sporta cuntinuadamaing.
1988
Il local dvainta massa pitschen. La Biblioteca es plaina stachida. La discussiun davart eventualas pussibiltats d'ingrondir o da far müdada in
nouvas localitats cumainza e dürarà amo divers ons.
1989
Ingüns evenimaints specials.
4
Nossa biblioteca
schner 2012
5
1990
Las scoulas, la populaziun indigena e'ls giasts fan vi e daplü adöver da
la Biblioteca. Il bsögn d'ingrondir o da far müdada dvainta adüna plü
concret. Discusa vain eir la pussibiltà d'integrar la Biblioteca aint il Bogn
Engiadina Scuol.
Arrandschamaints:
21 gün: Rut Plouda prelegia istorgias pel s-chalin bass.
13 fin 17 november: eivna africana (occurrenza da tuot las bibliotecas
dal Chantun); l'indigena Mariachatrina Gisep Hofmann quinta da seis
minchadi in Tansania ingio ch'ella ha vivü cun sia famiglia dürant divers
ons.
1991
Il numer da medias s'amunta a 4'200, imprastrats vegnan ca. 4'100 l'on.
Mia Mathis aintra illa squadra da las bibliotecaras.
1992
10 ons Biblioteca populara Scuol!
Quist giubileum vain celebrà cun üna pitschna festa in preschentscha
da las autoritats cumünalas.
10 ons davo l'avertüra survegnan las bibliotecaras la prüma jada üna
paja modesta. Avant hana prestà tuot las lavuors gratuitamaing.
Degn da gnir manzunà es il referat dal publizist Hans ten Dornkaat cul
tema "Leger, ün evenimaint per tuot la famiglia".
1993
Prüms contacts cull'elavuraziun electronica da datas (EED). Cla Rauch
e Josef Sedlacek da Sent muossan co ir intuorn culla EED, impustüt cul
program rumantsch cha Josef Sedlacek ha sviluppà per economisar ils
impraists.
November: referat dal ravarenda Clemens Frey cul tema "Islam".
1994
Il cumün augmainta sia contribuziun annuala da da 5'000 a 10'000
francs.
Eir dal 1994 frequaintan las bibliotecaras ils cuors da perfecziunamaint
sportas da la BAJ.
Sur 5'100 cudeschs vegnan fingià imprastats. La sporta vain actualisada periodicamaing minch'on. I's eliminescha e venda tscherts cudeschs e cumpra nouvs, scha pussibel a Scuol.
6
1995
La mancanza da lö es permanentamaing ün tema. Las frequenzas
s'augmaintan adüna inavant. Eir las diversas classas da scoula vegnan
plü suvent. Perquai vain intensivada la tschercha d'üna pussibiltà per
ingrondir il spazi. Soluziuns concretas però nu daja amo ingünas.
1996
Ils impraists s'han augmantats per bundant 10%.
Prelecziun pella scoulina, la prüma e seguonda classa primara: Sylvia
Sempert prelegia our da seis cudesch "Istorgettas".
1997
In marz pon bivgnantar las bibliotecaras (actualmaing 5 duonnas) quatter nouvas collavuraturas plü giuvnas: Uschi Brosi, Ruth Grünenfelder
Uorschla Rauch e Silvia Roner.
Finalmaing esa pussibel da schoglier il problem dal lö! Il cumün metta a
disposiziun ün ulteriur local chi cunfina directamaing cullas localitats
existentas da la biblioteca. I segua la planisaziun detagliada (restructuraziun, mobiglia e fuormaziun), ün temp fich intensiv.
Grazcha a blers sponsurs ed a diversas donaziuns generusas, tanter
oter da la fundaziun Alice Denzler, dal cumün da Scuol e da la fundaziun S. + K. Binding esa pussibel da cumanzar cul proget "restructuraziun ed ingrondimaint".
La planisaziun detagliada vain sustgnüda dal Servezzan svizzer pellas
bibliotecas SSB (Schweizerischer Bibliotheksdienst SBD).
1998
In avrigl dà il cumün glüm verda per l'ingrondimaint. La Biblioteca vain
serrada per s-chars 3 mais.
Las donaziuns manzunadas nu permettan be ad ingrondir e drizzar aint
nouv il local, eir la sporta da medias vain actualisada ed schlargiada.
Il sustegn cumünal vain augmantà a 13'000 francs l'on. Plünavant metta
a disposiziun il cumün eir las ulteriuras localitats sainza fit. Eir ün augmaint modest da la paja pellas bibliotecaras dvainta pussibel.
Sco fin qua dà il Chantun minch'on üna contribuziun pella cumprita da
medias e per sustgnair arrandschamaints culturals.
Ün mumaint decisiv ill'istorgia da la Biblioteca es sgüra l'acquist dal
prüm indriz d'EED culla software da la firma Predata AG chi vain
dovrada da bleras bibliotecas in Grischun.
7
Inauguraziun da la biblioteca nouva in gün 1998
8
In gün esa uschè inavant. La Biblioteca ingrondida e drizzada aint nouv
vain drivida. Il capo cumünal Not Carl po salüdar ün numer remarchabel
da giasts invidats ad üna festina d'inauguraziun.
Indigens e giasts pon s'infuormar davo l'avertüra davart la nouva sporta
da la Biblioteca. Daspö la reavertüra vegnan sportas per la prüma jada
eir discs compacts, cassettas e comics.
October: Milla Parolini, commembra da fundaziun da la Biblioteca dà
cuntschaint sia demischiun. Seis ingaschamaint pella Biblioteca es stat
exemplaric, dad üna vart illa fasa da fundaziun, da tschella vart dürant
ils bundant 15 ons daspö l'avertüra. Insembel cun ella banduna eir
Valerie Dolfi la squadra.
L'ingrondimaint ha per consequenza cha'ls impraists creschan e surpassan ils 6'800 l'on.
1999
La sporta vain schlargiada danouvmaing (cudeschs auditivs, cudeschs
cun scrittüra gronda eui.).
La Biblioteca survain la prüma jada üna contribuziun annuala our dal
büdschet da la scoula (7'500 francs).
La Biblioteca prolunghescha ils temps d'avertüra sün 101/2 uras l'eivna.
Arrandschamaints:
Prelecziun da l'autur Robert Tobler per giuvenils e creschüts
Dr. med. Daniela Gmachel: referat cul tema "Allergias e starvera"
Cuors da perfecziunamaint pella magistraglia cun Doris Portner: "Quintar ed interpretar tarablas"
2000
Ils impraists surpassan 10'200.
Nouva sporta: far adöver da l'internet dürant las uras d'avertüra.
Sandra Hanselmann e Katrin Tissi aintran illa squadra da las bibliotecaras.
2001
La quantità da medias s'amunta a ca. 5’700. Imprastadas vegnan ca.
10'400.
Arrandschamaints:
In favrer e marz ferma l'exposiziun ambulanta da la BAJ "Cudeschs dal
Grischun" a Scuol. Tema: "Die Alpen – schützen und nutzen".
9
October 2000 fin marz 2001: concurrenza da l'Arge Alp (concurrenza
cumünaivla da leger dals trais pajais vaschins Svizra, Austria ed Italia)
Avrigl: Duri Gaudenz prelegia our da sias ouvras (in cumbinaziun cun
ün "quiz da lingua")
Avuost: Clo Duri Bezzola, autur da Scuol,
prelegia our da seis cudesch "Typisch, die
Engadiner zwischen Fernweh nach der Weite
und Heimweh nach der Enge".
November:
vernissascha
dal
"Istorgias" da e cun Jon Nuotclà.
cudesch
December: not da raquints cun teater "Ils
disegns grits" cun Justina Derungs e Curdin
Janett.
Uschi Brosi banduna la squadra da las bibliotecaras.
2002
Fingià bod 12'000 impraists.
Marz: prelecziun da l'autur Andreas Schwander: "Rolltreppenromanzen"
(istorgias cuortas da la Russia)
10
Gün: l'autura Klara Bosshart prelegia our da seis cudesch "Und dahinter sind Tränen und Sterne" (istorgias autobiograficas cul tema survendscher üna greiva malatia).
Gün: las mammas da la gruppa da gö da Scuol organiseschan ün'exposiziun da poppas.
Lügl fin avuost: exposiziun ambulanta cul tema: "Mit allen Wassern gewaschen" (Bibliomedia Schweiz)
November: not da raquints: "Kamishibai, art da raquintar giapunais"
November: l'istoriker Paul Grimm prelegia our da seis cudesch "Libertà
Engiadina Bassa".
2003
Il chantun Grischun decida displaschaivelmaing da scurznir las contribuziuns finanzialas pellas bibliotecas, quai a partir dal 2003.
La Biblioteca po barattar oura duos jadas l'on ca. 200 medias (üna
sporta da la Bibliomedia Soloturn).
Daspö il cumanzamaint dal 2003 spordscha la Biblioteca eir DVDs per
uffants e creschüts.
Arrandschamaints:
Schner: prelecziun da l'autur Alfons Clalüna: "Il tschêl sur mai"
Marz: Anita Simeon e Kurt Grünenfelder prelegian our dal cudesch "Wie
wärs mit etwas Meer?" da Flurin Spescha.
Avrigl: apéro cul cussagl cumünal.
Avuost: Festa da Bügls; la Biblioteca es
preschainta sü Plazzetta cun ün marchà
da cudeschs ed üna rapreschantaziun da
"Kamishibai" per uffants. Pro quist
arrandschamaint chattan las bibliotecaras
bleras persunas sco pin/mima per
medias. In tuot rivan sur 1'300 francs aint
illa chascha.
11
November: arrandschamaint pellas scoulas "Wie entsteht ein Bilderbuch?" cun Bruno Hächler, autur da cudeschs per uffants.
November: not da raquints; rapreschantaziun da kino (cun DVDs) illa
Biblioteca, tema "Wenn einer eine Reise tut …"
November 2003 fin avrigl 2004: concurrenza da leger Arge Alp.
2004
Danouvmaing crescha il numer da las medias sün totalmaing 5'845 medias. Impraists: ca. 14'000.
Scoula e scoulina frequaintan inavant regularmaing la Biblioteca (per
regla üna jada al mais).
Arrandschamaints:
Schner: "Lesen GR" cun Sobo, autur da cudeschs per giuvenils.
Vacanzas da mai: films per uffants chi passaintan lur vacanzas a chasa.
Gün: preschantaziun da cudeschs cun cafè e tuorta pellas Grischunas,
sco ingrazchamaint pel sustegn finanzial.
Lügl: prelecziun aint il local da cultura dal Bogn Engiadina: "Bartleby der
Schreiber". Dietrich Schulz prelegia.
November: not da raquints cun Niculin Stupan, Madlaina Rauch-Stupan,
Tinetta Rauch ed Anna Rauch: "Mamma, bap, eu ed els"
November: Jeanette Nussbaumer prelegia in Chasa Puntota our da
seis cudesch "Die Kellerkinder von Nivagl".
2005
L'on cumainza bain … collaps total da l'indriz per l'EED, tuot las datas
van a perder. Be cun ün grond ingaschamaint da las bibliotecaras (i
vain lavurà di e not) esa pussibel da refar il don infra temp ütil. Eir bleras persunas externas güdan a schoglier ils problems chaschunats tras
quist incap.
Arrandschamaints:
Favrer: texts / poesias da Luisa Famos "Eu sun la randulina d’insacura";
prelecziun cun Jürg Pünter Famos, Mevina Puorger e Dumenic Andry.
12
October:
vernissascha
dal
cudesch biling "Akkord / Il
retuorn" da e cun Oscar Peer
(moderaziun: Mevina Puorger)
December: fanestra d'Advent: Sco minch'on vain decorà üna fanestra
da la Biblioteca cun motivs da Nadal. In quist connex daja üna sairada
per minchün cun preschantaziuns da cudeschs, marenda e vin chod.
2006
25 ans biblioteca populara Scuol
Ün pêr arrandschamaints per l'on da giubileum:
"Scuol legia": in tuot il
cumün
vegnan
plazzats 7 bancs per
leger cun üna fuorma
e
culur
speciala.
Quists bancs invidan a
far la posa cun leger
ün cudesch (sün tuot
ils bancs as rechatta il
cudesch
"Akkord/Il
retuorn").
Ils bancs vegnan fats e sponsurats da mansterans indigens. Indigens e
giasts fan bler adöver da quista sporta.
La culminaziun es
sgüra la spassegiada
literara tras Scuol cun
differents auturs, cun
prelecziuns e raquints
pro'ls
bancs
manzunats. Ün grond
public piglia part vi da
quist arrandschamaint
chi vain filmà e preschantà
da
la
televisiun rumantscha.
13
Oters arrandschamaints:
Schner: Klaus Peter Wolf e Beate Götschl prelegian in scoula.
Favrer: di da las portas avertas.
Avrigl: Fadrina Hofmann prelegia our dal cudesch "Chara nona, Tia
Susi" ch'ella ha tradüt da l'original tudais-ch (da Christine Nöstlinger) in
vallader.
Lügl: preschantaziun dal film "retuorn" da la televisiun svizra DRS
October: Referat da Chasper Pult: "… sco scha Scuol füss la riva d’ün
lai …"
November: not da raquints cun Antonella Stecher: "La diala da l'aua –
Die Wasserfee" (cudesch cha'l cumün da Scuol ha edi per l'avertüra da
la nouva plazza da giovar cun aua in Bagnera).
December: fanestra d'Advent.
Sandra Hanselmann banduna la squadra da las bibliotecaras.
2007
Numer da las medias
Impraists
6’538
15’371
Arrandschamaints:
Settember: prelecziun cun Henri Paucker: "Das mindere Leid"
October: prelecziun in Chasa Puntota cun Lilly Bardill: "Wie kann ich
fliegen ohne Flügel"
November: not da raquints: Ottiglia Augustin quinta istorgias. I vain eir
zambrià, ed i dà üna marendina pels uffants.
Anna Mathis Nesa e Christian Hänny giouvan ün teater sainza pleds
("Die Welt der Bücher") chi plascha fich bain.
2008
Arrandschamaints:
Avrigl: Mariachatrina Gisep Hofmann e Jon Candrian han tradüt il roman "Tod in Sils Maria" da Ulrich Knellwolf in rumantsch. Prelecziun our
dal cudesch illa Biblioteca.
October: ils auturs Jürgen Banscherus e Werner Färber prelegian pel
s-chalin ot.
14
November: sairada da films cun Susanna Fanzun Parolini: Preschantaziun dals films "La duonna culla corna – ün üert a New York" e "La Viafier Retica"
December: fanestra d'Advent. Star da cumpagnia pro cafè e grassins.
2009
Fingià 16'786 medias imprastadas!
Il cussagl cumünal conceda üna contribuziun supplementara da 2'000
francs l'on per cha la Biblioteca possa cumprar üna plü gronda part da
las medias a Scuol.
Arrandschamaints:
Duos jadas l'on (prümavaira e temp d'Advent) vegnan preschantats
nouvs cudeschs. I dà adüna cafè e tuorta.
Avrigl: Fadrina Hofmann prelegia our da seis cudesch biling "Be mumaints / Momente nur".
Stà/utuon: exposiziun da cudeschs cul tema "amur".
October: Dumenic Andry prelegia our da seis cudesch "Uondas" (Fadri
Pestalozzi accumpogna culla clarinetta).
2010
EED: introducziun da la nouva software per bibliotecas winMedio.net.
La biblioteca populara Scuol organisescha pellas bibliotecas da Ftan,
Sent, Ramosch, Samignun e Müstair l'introducziun e la scoulaziun necessaria. Per pudair lavurar cul nouv program esa da cumprar ün indriz
d'EED cun daplü prestaziun.
Nouv: scoula e biblioteca piglian part al program "Antolin" chi voul promouver la lectüra (www.antolin.ch) pro uffants e giuvenils. La scoula
cumpra la licenza necessaria, la magistraglia po far adöver da la nouva
sporta per l'instrucziun da lingua.
Claudia Denoth aintra illa squadra da las bibliotecaras.
Arrandschamaints:
Favrer:
vernissascha
dal
cudesch "La chasa veglia" da e
cun Oscar Peer aint il local da
cultura dal BES. Moderaziun:
Mevina Puorger.
15
Marz fin avrigl: concurrenza pella scoulina e la scoula. Tema: crear
segns da cudeschs [Buchzeichen]
Mai fin november: proget "Bookstar" pel s-chalin ot (www.bookstar.ch)
Avuost: prelecziun in Chasa Puntota: Klara Bosshard: "Katzengeschichten"
Settember: Christine Fehér prelegia pel s-chalin ot: "Vincent, 17, Vater".
Settember: prelecziun da
Patrick S. Nussbaumer
pella 5avla e 6avla classa:
"Die SOS - Bande"
November: Anna Mathis
Nesa quinta "Istorgias our
dal god"; ella muossa eir
material
(büschmainta,
üsaglias eui.) ed üna DVD
cul tema "tagliar laina" per
dar ün'impreschiun sco
cha'ls bos-chers lavuran.
A partir da l'utuon sta a disposiziun il nouv logo da las bibliotecas publicas dal Grischun.
16
2011
Arrandschamaints:
Marz: Kathrin Schärer preschainta Kamishibai pel s-chalin bass.
Settember: eivna da las bibliotecas in Grischun.
In settember ha eir lö üna vernissascha tuot speciala: Il cudesch da
pops "Pippiloteca" da Lorenz Pauli, illustrà da Kathrin Schärer es gnü
tradüt in rumantsch vallader da Uorschla Rauch-Gustin ed Anna Mathis
Nesa. L'iniziativa es gnüda da la Biblioteca chi porta eir il ris-ch sco
editura.
Angelika Overath prelegia our da seis cudeschs "Alle Farben des
Schnees", "Nahe Tage" e "Flughafenfische".
November: Patrick S. Nussbaumer, giuven autur da San Murezzan,
prelegia our da seis cudesch "Hilferuf" (part da la trilogia "Die SOSBande").
Daspö l'on 2011 retira la Biblioteca eir cudeschs in lingua portugaisa,
üna sporta pels Portugais chi vain eir finanziada dad els.
17
Perspectivas per l'avegnir
Principi 2012 vain la Biblioteca organisada nouv. Il cussagl cumünal ha decis als
10 lügl 2011:
-
da dvantar portader da la Biblioteca resp. da's partecipar vi d'ün'organisaziun portadra
-
da surtour ils cuosts pella signalisaziun unitaria
-
d'augmantar las contribuziuns annualas dad actualmaing 42'000 sün nouv 60'000
francs (incl. fit pella località). Las contribuziuns van a la nouva organisaziun portadra in sen d'üna contribuziun vi d'ün büdschet global, q.v.d. cha'l cumün nu fa
ingünas pretaisas a reg. l'adöver dals raps.
La Biblioteca populara Scuol es hoz üna da 54 bibliotecas publicas dal chantun Grischun.
Ella es statta üna da las prümas bibliotecas in Engiadina.
BIBLIOTECARAS "BIBLIOTECA POPULARA SCUOL"
Milla Parolini
Ulrica Vital
Anni Rizzi
Pieretta Tönett
Ruth Luzzi
Valerie Dolfi
Bernadette Bezzola
Mia Mathis
Uschi Brosi
Ruth Grünenfelder Flury
Uorschla Rauch
Silvia Roner
Sandra Hanselmann
Katrin Tissi
Claudia Denoth
1982 - 1998
1982 - 1986
1982 - 1988
1982 - 1986
1982
1984 - 1998
1984
1991
1997 - 2001
1997
1997
1997
2000 - 2006
2000
2010
cun cuors fundamental SAB
cun cuors fundamental e cuors da manadra SAB
cun cuors fundamental e cuors da manadra SAB
(tuottas cul cuors fundamental da la BAJ)
REVISURS/REVISURAS DA QUINT
Peder Rauch
Lüzza Rauch
Antonia Lorenzetti
Sandra Hanselmann
fin 2010
fin 2010
daspö 2011
daspö 2011
18
Leger as poja dapertuot!
Scuol,schner 2012
19