18
LA QUOTIDIANA
VENDERDI, ILS 6 DA ZERCLADUR 2008
■ NOS MORTS
■ OPINIUNS
Anselm Quinter-Portmann, Glion
Anselm ha bandunau nus dumengia da
Palmas, ils 16 da mars 2008 en la vegliadetgna da 77 onns. Ina maligna malsogna ha scarpau quei um ferm e robust en
relativamein cuort temps ord nies miez.
Ils 19 da mars ha in grond pievel, parents
ed enconuschents, amitgs e collegas, priu
cumiau dil trapassau ed assistiu alla commuentonta sepultura, celebrada da sur
Alfred Cavelti, Glion, ed allura accumpignau el alla fossa.
Anselm ei naschius ils 13 da schaner
1931 a Zignau. Leu ha el, ensemen cun
siu frar pli giuven, passentau sia ventireivla affonza e giuventetgna en in ambient puril. A Zignau frequenta el la scola primara ed a Trun la secundara. Suenter conclusiun dallas scolas obligatoricas
ei il svegliau giuven plein fiug e flomma
serendius a Cuera el seminari da scolasts
ed ha acquistau igl onn 1952 la patenta
da scolast primar. Quei temps ei per el
sulettamein staus stimulaziun da cuntinuar ses studis pli tard.
Anselm Quinter instruescha dus onns
ad Oberägeri (ZG) agl institut da giuvenils dr. Pfister. 1954–1957 eis el immatriculaus alla Universitad da Friburg.
Duront quei temps da studi entra el ella
uniun studentica STV-Fryburgia, nua
ch’el ha empustiu ligioms cuzzonts per
l’entira veta. Quella uniun ha dau l’honur e priu cumiau da siu commember
veteren cun la bandiera.
Suenter ils studis alla facultad filosofica ei Anselm turnaus a casa cun la patenta da scolast secundar phil. I. Duront
in onn dat el scola a Hombrechtikon
(ZH), tuorna lu anavos el cantun Grischun e surpren la scola secundara a Paspels.
1960 vegn Anselm Quinter eligius
scolast alla scola secundara districtuala
Glion. Per igl um iniziativ cun slontsch
giuvenil sesarva cheu a Glion in vast iral
per siu fritgeivel operar sil camp da scolaziun, da cultura e dil cuminesser.
Adequat a sia scolaziun ein ils roms da
historia, lungatg e geografia stai sia scienzia preferida. Quels roms ha collega Anselm instruiu ella scola secundara a
Glion duront 36 onns cun success, e nus
essan perschuadi ch’el ha bandunau la
stanza da scola cun satisfacziun e bialas
regurdientschas.
Anselm ha adina priu siu pensum serius e sia instrucziun era tenor nies giudicar severa ed el pretendeva stricta attenziun e disciplina, ina metoda pulitamein autoritara. Per il collega cun siu enconuschent temperament ei quella metoda franc stada in levgiament.
Sper ils roms indicai sura ha el era dau
uras da cant. Tgei perseveronza e pazienzia ei drova per intimar ina schi gronda
roscha da scolaras e scolars per il cant, sa
mo quel che stat avon ina tala societad,
pil solit cun pintga motivaziun. Anselm
ha cheu fatg lavur da campiun. Cun special plascher e cun luschezia preparava ed
inscenava el il concert il di dalla relaschada militara. Quei era per el daveras in di
da fiasta.
Anselm ha dirigiu enzacons onns la
Musica dil marcau ed il Chor viril da
Glion. Varga trenta onns eis el staus cantadur e vicedirigent dil chor da baselgia
cecilian. Quei chor ha undrau siu anteriur fideivel commember cun emperneivlas e commuentontas canzuns.
Sco premurau mussader ha Anselm
era collaborau cun interess en las uniuns
scolasticas, la conferenza dalla Foppa e
l’Uniun da scolasts secundars dalla Surselva, e quei sco parsura ni en autras
scharschas.
En fatgs politics era nies collega secapescha bein cudischius, eis el gie staus 20
onns mediatur pil cumin dalla Foppa.
Quella funcziun ha dau ad el caschun da
seprofundar en fatgs publics dalla veta da
mintga di. Ina tala pratica ei segiramein
era d’avantatg per la scola, cunzun sch’il
scolast capescha da cumbinar la historia
veglia cun fatgs actuals.
Siu rom preferiu ei bein stau la historia, e quei factum ha bein era intimau
Anselm da perscrutar igl interessant svilup digl emprem marcau spel Rein. La
historia locala, oravontut quella dil marcau da Glion, fascinava el. Cun pissiun e
cun gronda pazienzia rimnava ed ordinava el documents historics. Siu engaschi
alla ediziun dil «guid dil marcau» ei considerabels. E sias presentaziuns da quellas varts eran da jasters ed indigens zun
beinvegnidas ed oravontut respectadas
ed appreziadas. Cuort avon sia malsogna
ha Anselm aunc pudiu contribuir rehamein all’ediziun dalla cronica «70 onns
Consorzi da scola Glion e contuorn».
1963 ei Anselm Quinter maridaus
cun Marlis Portmann da Glion. Lur lètg
ei vegnida benedida cun treis affons, ina
feglia e dus fegls. Malgrad siu vast engaschi per clamada e cuminesser ha el adina puspei giu temps per sias famiglias.
Grond plascher haveva el secapescha da
ses quater biadis.
Sper clamada e famiglia ha el gudiu il
temps liber. Sco anteriur passiunau conduider da velo a motor eis el daventaus
pli tard in velocipedist da vaglia e carrava per l’entira Surselva entuorn sco in
giuvenot.
Siu liug preferiu era la dimora si Wallagada, in cuolm ord l’ierta da sia mumma,
naschida Henny, da Sursaissa. En tegia da
cuolm gudeva el la ruasseivladad, in liug
predestinau per calmar. Cheu entupava
ins Anselm da tut temps, la stad per ascender las muntognas dil contuorn, igl unviern sco gagliard skiunz sillas spundas
umbrivaunas denter Mundaun e Sezner.
Bugen fuss el puspei serendius questa
primavera si Wallagada. Siu desideri era
gronds.
Collega ed amitg Anselm ha terminau
siu viadi terrester. Sia crudeivla malsogna
ha el purtau cun pazienzia ed en grondezia. Biars onns essan nus caminai la medema via. Nus eran buc adina dil medem
meini. Denton en vesta a nossa finamira
communabla, il prosperar da nossa scola, essan nus adina s’entupai. Quei che
resta ein las regurdientschas. El ruaussi
en pasch! Alla consorta ed alla famiglia
nossa sincera condolientscha.
Christian Darms
Plascher regia
ella Surselva
In grond cumpliment s’auda a quels
ch’ein s’engaschai per l’Europeada 2008,
il turnier da ballapei dallas minoritads europeicas ella Surselva entochen Cuera.
Quei ei stau super entochen ussa. Jeu sun
perschuadius che quei cuntinuescha entochen sonda. Questas minoritads europeicas ed ils nos han purtau plascher en nossa regiun. Cunquei ch’jeu hai visitau tuts
giugs romontschs, hai jeu viu giugs da ballapei fetg interessants e d’aulta qualitad.
Tgei ch’ha era impressiunau ei stau che
massa affons ein curri entuorn ed han termagliau. Quei ei semplamein endretg
ch’in tal eveniment carmala carschi ed affons naven dallas televisiuns sils plazs da
ballapei per s’entupar. Quei ei gia in success cumplein. Sil plaz han ins era saviu
prender peda da sediscuorer e festivar. Jeu
hai giu interessants discuors cun Catalans,
Polacs e Romontschs. Il sport sco la musica colligian. Tgei vul ins dapli. In viva
sillas minoritads europeicas.
Fabian Bearth, Sumvitg
Elecziuns ella
dertgira districtuala
Cun fetg grond plascher ha la pcd Surselva priu enconuschientscha dils resultats
dallas elecziuns per la dertgira districtuala. Ella engrazia als votants per il grond sustegn a caschun dallas elecziuns per la
dertgira districtuala. Igl excellent resultat
dil president dalla dertgira sco era dils derschaders dalla pcd ei in mussament da fidonza.
Pcd Surselva
Publireportage
Sa participar e cundecider: Raiffeisen – la banca in pau differenta
Tschertgais Vus ina banca che na metta betg mo ils daners en il center? Alura è la Raiffeisen la dretga banca
per Vus. Qua stat numnadamain l’uman en il center.
Inscunter suprem en il Grischun
La Raiffeisen, sco terz gronda gruppa da bancas
da la Svizra, è oz ina da las bancas da Retail cun il
pli grond success en Svizra. Las bancas Raiffeisen
autonomas e structuradas sco societads cooperativas cun 1155 agenturas èn regruppadas en
l’Associaziun svizra da las bancas Raiffeisen. La
radunanza da delegads è l’organ suprem da la
Raiffeisen Svizra. Ella sa raduna ils 7 da zercladur
a Flem.
La Raiffeisen Svizra ha la direcziun strategica da
l’entira Gruppa Raiffeisen. Ella è responsabla per
la gestiun da las ristgas e coordinescha las activitads da la Gruppa, creescha las cundiziuns da basa
per l’activitad da fatschenta da las bancas Raiffeisen localas e cusseglia e sustegna quellas en tut
las dumondas.
Ils pli impurtants avantatgs dals commembers
en in’egliada:
Spargnar spesas cun il conto
privat per commembers
Dapli tschains sin il conto da
spargn per commembers
La carta Maestro e la carta da
credit èn gratuitas l’emprim onn
In pass da museums gratuit
En Svizra sa fidan gia passa 3 milliuns umans da la
Raiffeisen – da quels èn pli che 1,5 milliuns commembers da la banca.
Cun cumprar in scrit da participaziun – cun in tschains
fitg attractiv – davent’ins commember ed associà da la
banca Raiffeisen. Quai permetta da decider a la radunanza generala annuala davart dumondas impurtantas e d’eleger il cussegl d’administraziun. Ultra da
quai è la commembranza colliada cun avantatgs exclusivs.
Spesas e tschains attractivs
Il conto privat per commembers da la Raiffeisen è optimal per tut las fatschentas finanzialas. Ils commembers spargnan spesas e profitan da servetschs gratuits.
Offertas per commembers cun il
motto «Scuvrir la Svizra»
Sa participar e cundecider
Cun nus vers novs orizonts
Ultra da quai porscha il conto da spargn per commembers in pli aut tschains.
Visitar gratuitamain ils museums
Cun il conto privat per commembers èn la carta Maestro e la carta da credit da la Raiffeisen l’emprim onn
gratuitas. Vulais Vus visitar ina giada il Museum svizzer da transports e communicaziun a Lucerna u il Museum al liber Ballenberg? La carta Maestro u la carta da
credit èn a medem temp era in pass da museums gratuit. Cun quella han ils commembers access gratuit a
passa 400 museums e chastels svizzers. Simplamain
mussar la carta e scuvrir numerus stgazis.
www.raiffeisen.ch/mitglieder
Las bancas da Retail da la Gruppa Raiffeisen èn sa
spezialisadas surtut sin respargns, pajaments, investiziuns, la finanziaziun da l’atgna proprietad
d’abitar (ipotecas), la prevenziun e la fatschenta da
clients d’interpresa. La societad cooperativa è activa unicamain en Svizra.
Las bancas Raiffeisen regruppadas en l’associaziun
da cooperativas furman ina cuminanza da ristga,
en la quala tut ils commembers s’engaschan in per
l’auter a moda solidara. Era tar la concessiun da
credits metta la Raiffeisen fitg gronda paisa sin la
segirezza. Ella dispona da l’uschenumnà Aa1-Rating da Moody’s.