Classe seconde
Scuele Primarie di Vençon
A.S. 2008-09
Liquidute, Gasoline e Solidonie e
jerin trê sûrs, trê gotutis fiis de mari
Aghe.
A jerin picininis e come ducj i frutins e
a zuiavin cun altris gotutis, fin a fâ un
grant mâr blu.
Une biele dì Gasoline e Solidonie si
faserin puartâ fin tal ôr dal mâr, pocadis
des curints.
Liquidute invezit e jere restade ancjemò
tal profont dal mâr zuiâ cui pes.
Rivadis a pêl de aghe, chês dôs a
sintivin il soreli che lis scjaldave fin a
fâlis deventâ lizeris …lizeris.
Dut intun moment e lavin in sù, e
sameave che a svualassin. Rivadis
tal cîl a començarin a sintî tant frêt:
Gasoline e jere deventade sglonfe
sglonfe e invezit Solidonie e jere
deventade un ricam di glaç.
Altris gotutis si jerin svicinadis a
Gasoline fin a deventâ un biel nûl colôr
arint.
Solidonie invezit si jere svicinade a
tancj altris cristai ducj difarents e
ducj bielissims fin a deventâ un nûl
lizêr e dut blanc.
Plan plan il soreli al jere lât a mont
e il scûr de gnot e al jere vignût
indenant. L’aiar al pocave i nûi
lizêrs sore i paîs indurmidîts e i
boscs dulà che a stavin tantis
besteutis.
Al cricave il dì cuant che il nûl di
Solidonie si inacuarç di jessi rivât sore
la piche di un mont e di scomençâ a
sglonfâsi ...
A Solidonie i pareve di lâ abàs, lizere,
pocade dal aiar, come se e balàs. Man
man che si sbassave si sintive
divierse: no jere plui un cristal di glaç
ma e jere deventade un floc di nêf …
Rivade su la tiere si inacuarç di jessi
tal ôr di un riu glaçât.
Il nûl di Gasoline invezit al jere plui
pesant e cussì nol jere rivât a lâ sui
monts ma si jere fermât sore une val
verde, li che al coreve un flum.
Gasoline e jere deventade pesante
come lis sôs amiutis e l’aiar nol rivave
plui a tignîlis sù. Cussì lis gotutis plan
plan a vevin començât a colâ: a jerin
deventadis ploie.
Il soreli al jere tornât fûr e Solidonie
cumò, cun altris gotutis, e jere
deventade une ponte di glaç.
Gasoline e jere colade prime sore
une ombrene zale, dopo e jere finide
intune poce te strade e infin intun
tombin.
Li dentri al jere tant scûr e tant sporc
che la gotute Gasoline no viodeve la
ore di lâ fûr di chel puest scûr e che al
puçave.
Il viaç nol jere finît. Si sintive tirâ de
aghe fin a jentrâ intun depuratôr e cun
altris gotutis netis e jere rivade tal flum
che al coreve te val.
Solidonie e veve scugnût spietâ che il
soreli le scjaldàs, ben e no mâl, prime
di disfâsi e colâ tal riu.
Dut intun bot Solidonie si inacuarç che
e jere daûr a fâ un grant salt: e jere
plene di pôre, e veve cjapât un grant
spavent, e crodeve di jessi in pericul.
Dulà jerie finide?
Il grant salt al ere chel di une pissande.
Finide la pôre, al jere finît ancje il salt e
Solidonie jere lade a finî tal flum.
Lis dôs sûrs e jerin daûr a cori tal stes
flum e no lu savevin. La corint de aghe
lis pocave e lis faseve sbati di ca e di là,
lâ di corse o plui planc. Dopo tant cori, il
flum al ere rivât tal mâr e in chê volte
Solidonie e Gasoline si cjatarin. Dutis
contentis a ciririn Liquidine che lis
spietave.
Cheste volte e varessin provât la
grande venture dutis trê insieme.
Fin (anzit gnûf inizi)