‘O NASO D’ ‘O RRE
Ce steva na vota nu guaglione ca si chiammava
Giannino ‘o Pierdetiempo. Chisto s’era miso ncapo ca
vuleva tuccà ‘o naso d’‘o Rre.
‘E cumpagne suoi ‘o scunzigliavano, ricenno:
- Guarda, ca è na cosa periculosa. Si ‘o Rre s’arraggia,
tu pierde nun sulo ‘o naso, ma tutta ‘a capa.
Ma Giannini era cucciuto. E accussì, primmo ‘e partì
pe’ Roma, decidette ‘e s’abbituà a tuccà ‘e nase d’ ‘a
ggente. Primma jette addò Parrucchiano, po’ addò
Sinnaco, po’ addò Marisciallo d’ ‘e carabbiniere; e a tutte
quante lle tuccaje ‘o naso, a chi cu nu rito, a chi cu dduje.
E ‘o facette cu tanta abbilità ca nisciune ‘e lloro se
n’accurgette.
Allora, isso pensaje: ‘Evisto ca nun è difficile?
Allora, p’essere cchiù sicuro, jette dinto ‘a città, se
facette indicà ‘a casa d’ ‘o Guvernatore: e ce riuscette!
Po’ se facette indicà indicà ‘a casa d’ ‘o Presidente: e
ce riuscette!
E po’ ‘a casa d’ ‘o Capo-Giurece e ce riuscette. Anzi,
Chisto dicette:
- Ma, guagliò, me staje piglianno p’ ‘o naso?
- No, Eccellenza, ce steva na mosca.
Però, se ne fujette, pe’ paura ‘e quacche reazzione.
E accussi, decidette ‘e se fa nu viaggio a Roma, pe’
ncuntrà finalmente ‘o Rre.
Giannino teneva nu libretto addò screveva ‘e nomme
‘e tutti chilli nase ca aveva tuccato.
Quanno arrivaje a Roma, però, s’avette accattà nu
libretto nuovo, pecché cammenanno p’ ‘a via, puteva
ncuntrà
tante
perzone
mpurtante:
Eccellenze,
Sottoministre, Sottosegretarie, Prisidente…
Pe’ quanto rigurda ‘e prisidente, ce ne stevano overo
tante: ce stevano cchiù prisidente ca pezziente.
Pe’ sciorta soja, tutti chisti perzunagge, quanno se
sentevano ‘e lliscià ‘o naso, anzicché ’e s’arraggià, se
divertivano . Anzi, quaccuno dicette all’impiegate suoie:
- Accummincianno da oggi, pe’ mme salutà, invece ‘e
fa l’inchino, , m’avite alliscià ‘o naso. E cu surrise e
barzellette facevano curaggio pure ‘e cchiù scuntruse e se
fa na maniatella d’‘o naso suio
Doppo poco tiempo tutte ‘e nase cchiù importante d’a
città, pe’ ‘a soddisfazzione, addeventajne lucide e russe.
Spunzunato ‘a tutte chisti successe, Giannino
accumminciaje a penzà a’ ‘o naso d’ ‘o Rre, speranno ca
primma o doppo quacche occasione l’aveva capità!
L’occasione capitaje ‘o juprno d’ ‘a festa nazionale.
Ce steva nu curteo luongo luongo, e ‘o Rre steva dinto ‘a
primma carrozza.
Giannino vedette ca spisso ‘e guardie nun dicevano
niente quanno ‘a ggente s’avvicinava ‘a carrozza, o pe’ fa
na supplica, o pe’ cercà na grazia. E penzaje:
-Ma quà migliore opportunità!
E accussi, scennette mmiezo ‘a folla e, dinto ‘o vottavotta generale, arrivaje vicino ‘a carrozza. Sagliette
ncoppo ‘o staffone e dicette vicino a ‘o Rre:
- Scusate, Maestà!
E l’allisciaje ‘o naso.
‘O Rre rimanrtte miezo stupediato: nun sapeva
manch’isso c’aveva fa.
Giannini, apprufittanno e chistu mumento, scennette
d’ ‘o staffone e se sperdette pe’ mmiezo ‘a folla.
‘A ggente, vedenne chesta bravata accumminciaje a
alluccà e a sbattere ‘e mmane.
‘O Primmo Ministro, ca steva dinta ‘a carrozza, vicino
‘o Rre, dicette zittu-zittu, cu ‘a mano nnanza ‘a vocca:
- Maestà, chisto è nu modo muderno ‘e fa l’omaggio!
E ‘o Re lle rispunnette:
- Però, a me nun me piace!-