Project «Trun egl avegnir»
Gia cu ins ha lantschau avon dus onns la discussiun davart «Trun egl avegnir» ei il project
Ogna/America sortius da quellas ponderaziuns. Quel duei sanar il campadi da rudien, scaffir
novas pusseivladads d’alloschament per turists da sacados e trer a nez il prau America sco
areal niev da recreaziun. Il matg digl onn vargau ei vegniu fundau ina gruppa da lavur cun la
finamira da concretisar il project, sclarir la finanziaziun e fundar ina societad anonima.
Igl ei semussau che la construcziun d’in baghetg niev pil campadi ha la prioritad. Plinavon
duei il spazi per rulottas e tendas vegnir engrondius. Ina ulteriura finamira era da construir in
lag natural sil prau America. In rapport geologic ha uss denton mussau ch’il livel dall’aua
sutterana ei fetg aults, per part mo in meter sut tiara. Dus biros da planisaziun han sinaquei
calculau ch’ils cuosts per in lag natural contonschessen in milliun francs e quei per in lag
mediocher. Igl ei clar che quella summa stat en negina relaziun cun la rentabilitad ed aschia
ha la gruppa da lavur decidiu da schar crear in pign parc da recreaziun en cumbinaziun cun
ina plazza da giugs.
Per il baghetg dil campadi e per quei parc da recreaziun cun plazza da giugs drova ei ussa
lavurs da preparaziun e projectaziun. Per quei intent ha la gruppa tscherniu il biro da
planisaziun STW SA, Cuera. A caschun dalla sesida dil cussegl da vischnaunca dils 28 da
november 2011 ha quel decidiu da conceder per quei intent in credit da 195'000 francs. Damai
ch’ei ha buca dau in referendeum facultativ encunter quei project ha la gruppa da lavur saviu
far guotas cun tgau la fin digl onn e proponer alla suprastonza communala da surdar las lavurs
da preparaziun e projectaziun alla firma STW SA. Igl ei planisau da lantschar ina concurrenza
libra per quei project. Dallas annunzias che vegnan inoltradas duei vegnir tscherniu
maximalmein tschun architects e planisaders da cuntrada che san allura separticipar alla
concurrenza. Sch’ei reussescha da reveder parzialmein la lescha per la planisaziun locala e
segirar la finanziaziun duront igl onn current, sa la nova societad anonima vegnir fundada
2013.
Sper il project Ogna ha la gruppa da lavur evaluau tschun ideas per projects ord las spartas
communicaziun, economia e cultura e sport. La sparta communicaziun cumpeglia ton ina
megliera presentaziun dil vitg anoviars sin stampats, egl internet eav. sco era tablas
d’orientaziun en vischnaunca. Oravontut drova ei era plans d’orientaziun che dattan ina
survesta da tuttas attracziuns, tals dueien vegnir installai en loghens centrals sco la staziun
dalla viafier.
Las duas autras spartas cuntegnan projects che vegnan dapresent concretisai e
medemamein presentai el decuors digl onn current als gremis politics.
Trun, 06-05-2012