Trattativas da la suprastanza cumünala Zernez
Protocol no. 665/14 dals 28 lügl 2014
Preventiv 2015 – fracziuns Zernez e Brail - investiziuns
In vista a la fusiun da cumüns s’es landervia ad elavurar il preventiv d’investiziuns per l’on 2015, part Zernez e Brail. La
suprastanza ha tut a cogniziun il prüm sböz dal preventiv.
Rait electrica Zernez – strategia pel futur
Il Cumün da Zernez nu fa part a la Rait Engiadina. La rait dal provedimaint electric illa fracziun da Brail es in
possess da la Repower AG. Id es gnü decis da laschar surlavurar ad ün perit las structuras e’ls reglamaints actuals
sül sectur dal provedimaint electric a Zernez.
Ouvr’electrica Sarsura, Punt’Ota e Barlas-ch - masüraziuns e collavuraziun illa gruppa da proget
2014
Il perit Robert Hälg, La Punt Chamues-ch es gnü incumbenzà inavant cullas masüraziuns d’aua per quists progets
d’ouvras electricas pitschnas.
Cumün da S-chanf – implant regiunal da tir a schaibgia Bos-chetta Plauna – dumonda da princip
Sün dumonda dal Cumün da S-chanf a reguard l’interess da partecipaziun vi d’ün implant da tir regiunal es gnü
decis da vulair demuossar inavant interess vi d’üna collavuraziun. Quai impustüt causa cha las societats indigenas
da tregants e da chatscha vaivan demuossà da lur vart interess vis da quist proget.
Vasca Punt’Ota – colliaziun provedimaint d’aua tanter Brail e Cinuos-chel
La suprastanza ha decis da prochatschar il proget fingià instradà d’üna vasca da sviamaint da l’aua da baiver
tanter il reservuar Punt’Ota e las fracziuns Cinuos-chel (S-chanf) e Brail (Zernez). Quist per sgürar buna qualità
d’aua da baiver in tuottas duos fracziuns in seguit a strasoras illa Val Punt’Ota.
Società da tregants Zernez – giubileum da 150 ons
A la società indigena da tregants es gnü contribui ün import da 2'000 chf per lur festa da giubileum da 150 ons.
Film sur da Zernez - Cineflex
Per pudair proseguir cul proget d’ün film d’image sur da Zernez es gnü concess ün ulteriur credit da bundant
11'000 chf per tour sü purtrets dürant quista stà/utuon. A la fin dess quai dar ün film chi muossa purtrets
d’inviern e da stà, las attracziuns turisticas in cumün ed impustüt nossa natüra intacta.
UNESCO reservat da biosfera – sböz dal contrat
Il contrat da collavuraziun sül sectur da la biosfera es avantman il sböz. Tenor l’avis da la suprastanza cumünala monta
quist contrat d’importanza grondischma pel cumün fusiunà ed uschè eir per l’avegnir da nos cumüns. Resguardond quist
fat ha decis la suprastanza cumünala da nu pudair entrar uossa in quista discussiun fich importanta, chi varà inamöd da
gnir preschantada al suveran dal cumün fusiunà.
Planisaziun d’areal Cul - proseguimaint
Per pudair proseguir cun quista planisaziun es gnü decis da manar tras üna prüma sezzüda culs pertocs possessurs da
las parcellas in Cul e da preparar la publicaziun ufficiala dal perimeter da planisaziun.
Plan da quartier Ils Muots
Illa cumischiun da planisaziun dal quartier Ils Muots in Brail fa part in avegnir eir il president da la fracziun Giachen
Godly.
Ledscha chantunala da dis da pos publics - consultaziun
In connex culla consultaziun da la revisiun da la ledscha da dis da pos publics es gnü decis d’inoltrar la proposta da
valütar il di da Chalandamarz sco di da pos ed uschè da dar l’importanza toccanta cha’l Chalandamarz ha per nos cumün
e per nossa regiun.
Büro electoral utuon 2014
Per las votaziuns cumünalas a l’urna pel cumün fusiunà sun gnüdas elettas las persunas dals büros electorals in
coordinaziun culs Cumüns da Susch e Lavin.
Restorant center da sport – mobiglia da restorant
Per la renovaziun da las sopchas dal restorant dal Center da sport, chi sun uossa passa 15 ons veglias, es gnü
surdat l’incumbenza al falegnam indigen David Rohrbach, Zernez per l’import dad 8'000 chf.
Chasa da scoula – fabricat temporari - proseguimaint
In chosa dal recuors cunter la surdatta d’ün’incumbenza in connex cul fabricat temporari da la chasa da scoula
s’ha laschà elavurar al cusgliader giuridic las variantas pussiblas per proseguir cun quist cas.
Resguardond il fat da la fusiun dals cumüns ed uschè eir ch’üna nouva suprastanza ed ün nouv cussagl da scoula
dessan as fatschendar cun quist proget ha la suprastanza cumünala decis da vulair rumper giò la submissiun
actuala e da surlavurar il proget cun las datas nouvas dal cumün fusiunà. I darà lura üna nouva submissiun in
quista chosa.
Vias da god – proceder futur
Insembel cun l’indschegner forestal chantunal es gnü elavurà ün palperi strategic pel proseguimaint dals progets da
sanaziuns da vias da god pel 2014 fin 2020. Quist palperi es gnü sancziunà e dess esser indicativ per pudair lavurar
inavant sün quist sectur.
Chasas Clavuot – nom da la via Runatsch o Suot Giassa
Illa lavur da l’armonisaziun dal register d’abitants d’avant tschinch ons han stuvü gnir definidas las adressas (vias)
per minch’abitant. Per singulas chasas in Runatsch d’eira gnü defini il nom Suot Giassa invezza da Runatsch. Sün
dumonda dals pertocs s’ha scleri a fuond quista chosa. La suprastanza ha decis in sia cumpetenza da vulair
müdar quist nom da l’adressa da Suot Giassa sün (nouv) vegl Runatsch.
Duschletta Curdin e Jäger Mario – contrats da fittanza parcellas agriculas
La suprastanza ha approvà ils sbözs dals contrats da fittanzas, gnüdas decisas da prümavaira, a man dals
fittadins. Eir in quists cas ha güdichà il cusgliader pauril las valurs da la gestiun da las parcellas.