Our da la chesa cumünela
___________________________________________________________________
A las tschantedas dals 8 lügl, 12 avuost e 2 settember 2015 ho la suprastanza
cumünela da Bever tratto ils seguaints affers e trat las seguaintas decisiuns :
Departamaint fabrica
Revitalisaziun Las Agnas Bever 2. etappa. Offerta onurari planisatur
I’l ram da l’ultima tschanteda PBT es gnida discuteda l’elavuraziun d’ün’offerta per
onurari per la progettaziun per exposiziun. L’offerta es intaunt gnida inoltreda tres
l’ecowert, Hunziker, Zarn & Partner ed Eichenberger Revital SA. La progettaziun per
exposiziun per la revitalisaziun da las Agnas da Bever, 2. etappa vain surdeda a la
cumpagnia d’indschegners ecowert, Hunziker, Zarn & partner SA scu eir a la Eichenberger Revital SA per fr. 185'000.00 (plafonamaint dals cuosts).
Parcella 422 fabricat nouv-annex ufficina, suosta suotterrauna, abitaziun nouva
La dumanda da fabrica pel nouv fabricat ed annex d’ün’ufficina, d’üna suosta suotterrauna sco eir d’üna nouva abitaziun vain appruvo cun arsalvas.
Immobiglia da la posta: conclusiun da las lavuors/tevla naira/chartera
La suprastanza cumünela piglia cogniziun dal fat cha las lavuors vi da l’anteriura immobiglia da la posta sun prosmamaing glivredas. Vi da la fatscheda as rechatta da
nouv la chascha da las comunicaziuns da la vschinauncha (tevla naira), üna chartera
per la posta a la vschinauncha scu eir ün defibrillatur. Correspundentamaing vain la
populaziun infurmeda davart il nouv plazzamaint da la tevla naira, da la chartera scu
eir dal defibrillatur e quist implaunt vain piglio pü svelt pussibel in funcziun.
Revitalisaziun da Las Agnas da Bever: concept d’ütilisaziun/UFAG
Cun la charta dals 29 lügl 2015 ho l’Uffizi federel d’agricultura UFAG comunicho cha
ün spustamaint da surfatscha ütilisabla per l’agricultura nun es pussibel cun ün’adattamaint dal territori da muntagna e da stadageda. Scu argumentaziun vain fat valair
cha la revitalisaziun da Las Agnas nu rapreschainta ün criteri i’l sen d’ün uorden da
zonas agriculas per müder ils cunfins dal territori da stadageda. Il ram leghel nu
spordscha üngün spazi per müder ils cunfins la territori da stadageda. La revitalisaziun
da La revitalisaziun da Las Agnas da Bever 2. etappa es gnida partida in üna varianta
maximela ed üna varianta minimela güst eir causa la situaziun leghela intscherta in
reguard ad üna pussibla compensaziun per la surfatscha persa . Causa la decisiun
negativa nun es pussibla üna compensiaziun da la surfatscha d’ütilisaziun agricula. La
suprastanza cumünela decida da desister d’üna varianta maximela da la revitalisaziun
da Las Agnas da Bever 2. etappa e da consulter ils purs pertuchos davart la varianta
minimela in basa a la proposta da proget. Per que sun d’examiner las imsüras da
compensaziun per la perdita da pevel e d’asgürer cha’ls purs nu subeschan üngüna
perdita finanziela tres la diminuziun da territori d’ütilisaziun agricula i’l perimeter dal
proget.
Partecipaziun als cuosts mür da sustegn per lingia da chanalisaziun
La parcella 422 vain traverseda da la lingia d’ova principela da la vschinauncha da
Bever chi maina a la pumpa da la Sarinera Sax. Als patruns da fabrica vain prasto üna
garanzia dals cuosts i’l ram da la calculaziun dals cuosts da Fr. 8'000.00, per sustgnair
e puzzer la lingia d’ova persa, cun que cha quista tanghescha ün proget d’ün nouv
fabricat.
Mür da curtin dannagio
Sper Chà Sur es gnieu dannagio l’utuon passo ün mür da curtin. Da vart da chantunais
vain fat attent cha’l radius da stordscher per veiculs agriculs cun remuorch in lur parcella es memma pitschen, surtuot eir causa cha sun alingedas lung il mür da curtin
restant plazzas da parker e cha l’ultima da quellas redüa auncha dapü il radius. La
suprastanza cumünela renunzcha a la reconstrucziun da la part dal mür da curtin (ca.
1 meter), cun que cha’s tratta be auncha dad üna part da la funcziun veritabla.
Parcella 402 proprieted in concomini (StWEG) permiss d’ir ad abiter
Als 31 lügl 2015 ho gieu lö ill’immobiglia parcella 402 la collaudaziun finela. A las duos
partidas vain concedieu ün permiss da retratta provisoric per las duos prümas abitaziuns, fin cha’d aintra il questiunari necessari e cha quel po gnir evaluo.
Permiss per edifizi dadour la zona da fabrica (EDZ) annex chamanna d’aviöls
A sia tschanteda als 17 gün 2015 ho la suprastanza cumünela appruvo fomelmaing
ün annex a la chamanna d’aviöls illa parcella 189 in proprieted da la vschinauncha.
Zieva cha l’ARE Grischun ho do l’acconsentimaint a l’EDZ zieva l’exposiziun publica,
admetta l’autorited da fabrica l’annex vi da la chamanna d’aviöls cun arsalvas.
Revisiun parziela planisaziun locala – dumanda per müdeda da zona Hotel Chesa Salis Bever SA
Il rapreschentant giuridic da l’Hotel Chesa Salis Bever SA ho inoltro la pretaisa da dret
da müder la zona per las parcellas nr. 286 e 291 da la zona d’hotels illa zona da minz
da la vschinauncha. La pretaisa argumenteda da la Chesa Salis Bever SA vain appruveda e la procedura respectiva vain invieda.
Loipa da passlung chesa da scoula/zona da protecziun da la cuntredgia Lavusters
La revisiun parziela da la planisaziun locala da Bever davart la loipa da passlung chesa
da scoula e davart la zona da protecziun dal cuntegn Lavusters vain relascheda per
mauns da la prosma radunanza cumünela dals 30 settember 2015.
Revitalisaziun Las Agnas da Bever: Offertas Sieber, Cassina & Handke/surdeda
La Sieber, Cassina & Handke Sa ho suottamiss ün’offerta per l’accumpagnamaint idrologic illa fasa dal proget d’exposiziun da la sgüreda da las cumprouvas e procuraziun
da las premissas i’l import da frs. 65'880.00 e cuosts da terzs da frs. 43'200.00. Las
lavuors sun absolutamaing necessarias per pudair documenter da maniera netta e
sclarir ils effets dal spievel da l’ova da fuonz pel territori da la vschinauncha cunfinanta
da La Punt Chamues-ch. Cò as tratta que d’üna procuraziun da las premissas. Impü
inoltrescha la Sieber Cassina & Handke SA cull’offerta dals 13 avuost 2015 ils cuosts
per güdicher ed eruir ils effets dal proget AP Bever 2 per l’ova da fuonz e las ovas
internas i’l import da fr. 25’920.00. Cun tuottas duos incumbenzas füssan definidas
tuot las indicaziuns per l’evaluaziun da l’ova da fuonz ed ovas internas fin al s-chein
da la progettaziun per exposiziun a pretaisas e cundiziuns. A la Sieber Cassina &
Handke SA vegnan surdedas las incumbenzas respectivas.
Plan da quartier Bügls Suot 2 Decisiun d‘appruvaziun
Il plan da quartier Bügls Suot 2 vain appruvo ed a vain decis da metter in quint las
expensas directas per il proget d’excluder da la zona (revisiun parziela da la planisaziun locala) d’üna parcella integreda da fr. 3'968.50 directamaing al chaschuneder,
zieva cha quist ho darcho retrat sia dumanda d’excluder da da la zona la parcella e
cha tela es resteda i’l territori dal plan da quartier.
Permiss d’ira aint a ster parcella 402
Als proprietaris da la parcella 402 vain do il premiss da retratta definitiv per tuottas
duos abitaziuns, zieva cha’d es entro il questiunari per sclerir il domicil domicil da dret
civil.
Departamaint agricultura, ova ed ova persa
Retratta d’ova davent dal provedimaint d’ova Spinas tres ARGE NAT II
L’ARGE NAT II ho drizzo la dumanda a buocha a l’administraziun cumünela da Bever,
scha saja pussibel da retrer ova da baiver dal provedimaint d’ova da Spinas. La suprastanza cumünela decida da nu conceder a l’ARGE NAT II il permiss da retrer ova
davent dal provedimaint d’ova Spinas/Val Bever, già cha la quantited d’ova da la funtauna e’l batschigl da reserva nu sun drizzos aint per ütilisaziuns supplementeras e
cha’l provedimaint d’ova es per part be s-chars sufficiaint.
Departamaint trafic, pulizia, silvicultura
Recuors cunter permiss excepziunel: limitaziun dal temp
Ün possessur d’ün’immobiglia in Val Bever ho recurrieu cunter il permiss excepziunel
da transir sülla via champestra Spinas/via da god Val Bever e pretais da survgnir ün
permiss excepziunel sainza limitaziun dal temp. La suprastanza cumünela refüsa la
dumanda sainza obligaziun da surpiglier ils cuosts.
Sanaziun da la via da vschinauncha da Bever: procedura da submissiun
La suprastanza cumünela nu giavüscha üngün‘etappaziun da la submissiun per la
sanaziun da la via veglia da vschinauncha da Bever. Quista dess succeder culla surdeda da tuot las etappas in üna.
Las lavuors dessan gnir interruottas da sted per schinager l’hotellaria ed a dess gnir
sclarieu scha las ouvras tecnicas giavüschan da metter giò büschens da reserva (eir
per cabels da fibras da vaider).
Decisiun procedura da contribuziun sanaziun via veglia da vschinauncha
La procedura da contribuziun per la sanaziun da la via veglia da vschinauncha da
Bever (clev da distribuziun dals cuosts) vain decisa definitivmaing culla nouva clev da
distribuziun dals cuosts e deda cuntschainta a tuot ils ils partecipos contribuents.
Rumida da la naiv via chnatunela veglia: porolungiaziun dal contrat
Il quint finel da la rumida da naiv da la via chantunela veglia serra cun cuosts da frs.
23'423.15 a quint da la vschinauncha da Bever cun cuosts totels da frs. 160'432.25 e
vain appruvo.
Ün’ultima prolungiaziun dal contrat per la rumida da naiv sülla via chantunela veglia
Bever-Samedan-Schlarigna culla ditta Secchi Transports SA pel prossem inviern vain
appruveda. A la vschinauncha respunsabla Samedan vain comunicho cha la vschinauncha da Bever vuless mantgnair il sistem in vigur da la rumida cumünaivla da naiv
inclusiv il servezzan da piket e fer la dumanda per üna concurrenza publica cumünaivla
tres la vschinauncha da Samedan cullas vschinaunchas partenarias da Bever e Schlarigna a partir da l’inviern 2016/17.
Departamaint turissem, ambiaint, allutanamaint d’immundizchas
Bus local Samedan-Bever – renunzcha
La suprastanza cumünela piglia cogniziun da la statistica dal bus local Samedan-Bever
chi muossa üna frequenza totela da 183 persunas entredas (104) e sortidas (74) a
Bever. A la vschinauncha vain comunicho cha la vschinauncha da Samedan renunzcha in avegnir al bus privat Samedan-Bever, cun que cha’ls cuosts nu staun pü in
üngüna relaziun cullas frequenzas.
Inventarisaziun rait da rutas per mountainbikes 2014. Realiser imsüras ?
La suprastanza cumünela decida da megliorer la via da Cuas cun imsüras simplas cun
cuosts da frs. 6'000.00 e d’integrer l’import i’l preventiv 2016. Cun quista imsüra po il
chöntschet dal Beverin gnir schligerieu, per cha’ls peduns hegian dapü quietezza.
Univesited da Würzburg : permiss da furer proget da perscrutaziun dschieta permanenta
L’Univeristed da Würzburg perscrutescha già divers ans la dschieta permanenta in Val
Bever e vuless uossa fer düraunt las eivnas 37 u 39 üna fureda da prouva illas foppas
implidas cun gera da greva. Las duos eivnas croudan precis i’l temp da chatscha. La
suprastanza cumünela decida da metter in vista ün permiss da furer per l’eivna da
posa da chatscha (38) u a partir da l’eivna 41.
Departamaint finanzas, scolaziu n, planisaziun regiunela
Contribuziun 10. Festa da country engiadinaisa
Als 3 october ho lö a Silvaplaluna la 10. festa da country engiadinaisa. Ils organisatuors
dumandan da las vschinaunchas üna contribuziun da sustegn. La suprastanza
cumünela conceda üna contribuziun da sustegn per la 10. festa da country engiadinaisa.
Credit da frs. 4'200.00 per duos defibrillatuors
I’l ram da las lavuors finelas per la sanaziun da la veglia immobiglia da la posta da
Bever s’ho que stuvieu sclarir eir la dumanda davart il lö e l’acquist d’ün defibrillatur.
La suprastanza cumünela deliberscha ün credit da frs. 4'200.00 per l’acquist da duos
defibrillatuors. Ün vain plazzo da nouv sper l’edifzi da la posta, l’oter illa chesa da
scoula da Bever.
Sistem d’infurmaziun geografic SIG Engiadin’Ota
In maniera circulera ho la suprastanza cumünela pudieu piglier cogniziun da la charta
da la suprastanza cirquitela a la conferenza dals presidents a reguard dal SIG Engiadin’Ota. Ad es sainza dubi radschunaivel da mantgnair il SIG Engiadin’Ota e da surder
da nouv a la regiun. I’l ram da la conferenza dals presidents es la vschinauncha da
Bever da l’avis cha saja da mantgnair absolutamaing il SIG Engiadin’Ota e da surder
da nouv a la regiun.
Publicaziun noviteds dal stedi civil
Las vschinaunchas paun da principi decider sch’ellas vöglian publicher ils cas da stedi
civil u na. La cumpetenza da decider es in mauns da las vschinaunchas. La suprastanza cumünela es perincletta cha’ls cas da stedi civil scu naschentschas, mortoris, matrimonis e registraziuns da partenanzas, vegnan publichos tres l’uffizi civil cumpetent.
Egualisaziun da finanzas 2016
La suprastanza cumünela piglia cogniziun dal fat cha la vschinauncha da Bever ho da
verser al chantun Grischun, i’l ram da la nouva egualisaziun da finanzas, üna cumpensaziun da resursas i’l import da frs. 81'331.00. Il bilauntsch globel dals curraints da
finanzas es auncha aviert, già cha’l preventiv 2016 cullas diversas contribuziuns dal
chanutun nun es auncha avaunt maun. Tuot in tuot pudess que però der sainz’oter ün
resultat positiv per la vschinauncha da Bever, cun que cha resultan güst i’l champ da
la scolaziun qualchüns dis-chargs considerabels chaschunos da la zavreda da pajamaints e pajamaints d’egualisaziun.
Champiunedi mundiel da skis 2017 – patrunedi per ün di da cuorsa
Sün fundamaint da la clev da scumpart per la partecipaziun a la finanziaziun da l’organisaziun da voluntaris dal champiunedi mundiel da skis alpin 2017 paun las vschinaunchas dal circul surpiglier il patrunedi per ün di da cuorsa. La suprastanza cumünela
decida da tscherner il lündeschdi ils 13 schner 2017 culla cuorsa da la supercumbinaziun dals homens.
Termins radunanza cumünela
La prosma radunanza cumünela ho lö als 30 settember, l’ultima es previssa pels 27
november 2015.
Bever, ils 9-9-2015rro